Markus 4

Pinoiradan do Iso Tulun Mongungumo

(Mat. 13:1-23; Luk. 8:4-15)

1Om timpuunno dii kavagu i Yisus monuduk diolo siri disan di Botung Tagajo do Golilia. Om sonrikot-rikotno dii iri tongotulun do oguu marong siri sinumoliput di Yisus gosob do sinumako Isido siri talud, om pointatangawoJo dii kopooyok om ogom nogi dii Isido. Om kasangkat diri tongotulun songingkakat siri disan do vaig. 2Om oguu ponudukan di Yisus do minaganu Isido do poiradan do itudukJo diolo. Om ponudukan nopo Disido nga irad diti: 3“Rongou kouno! Kivaro iso tulun do mongungumo do minongoi pasasad di linsou. 4Om pasasadono dii iri linsou disido, kivaroi nokotijas siri ralan, om rikotno dii i tongotombolog do mongoi monutuk diri linsou gosob do naavi. 5Om kivaro nogi i nakasasad siri kovotuvan iri tana tonipis, om oruai sinumobul do oribau gia i tana. 6Nga kosidangai nopo dii iri do tadau om nolonoti dii gosob do norujou i nisasadjo sabap do au aralom i kinoongoio di gamutjo. 7Om kivaro nogi i nakasasad siri pantok do korugijan, om iri nga sinumobul i linsou nga tinolidan i korugijan, irino dii do rinumujou dii iri nisasad do nokoluputan om aui dii minonguva. 8Om kivaro nogi dii iri nakasasad siri tana di aandai, do sinumobul, om alanggauno om ongororombung dii, om ponguva nopo dii iri nga oguu dii tuvajo. Kopumpung nopo dii iri, kivaro tolu nopulu, kivaro onom nopulu, om kivaro nogi aatus i tuvajo,” kadi Yisus.

9Om kaDisido kavagu, “Isaai nopo iri kitolingo, rumongouno marong diti tinangaranKu,” ka.

Tujuan do Poiradan di Yisus

(Mat. 13:10-17)

10Om nokorijang nopo dii i Yisus om iri opulu om duvo tulunJo om iri piipiro tulun vokon mantad di tongotulun toguu do nokorongou di ponudukanJo, om pongoduatno dii i tongotulun di minaja di Yisus nong onu komoion di pinoiradanJo diri. 11Om jawapno dii i Yisus diolo do ka, “Ikovu nopo nga onuan kovi do toilaan diri aupo nivantang si di tongotulun pogulu nong potingkukuro i Kinoringan momorinta siti vonuvo. Nga ii nopo tongotulun vokon nga tudukan noopo do poiradan, 12supaya irad di tinangar di nabi, i popolombus di tinangaran do Kinoringan di pogulu, do,

‘Mongontongi iolo nga auno koontong.

Om mongkinongoui iolo

nga auno kaarati di komoionKu,

supaya do auno iolo kopuriman do rumorogo di dusojo,

om auno dii oompunan,’

kadi nabi,” kadi Yisus.#Antangai Yasaya 6:9-10.

13Jadi kadi Yisus kavagu diolo do, “Au kou naku kaarati diti poiradanKu? Nong au kou kaarati diti, au kouno kaarati di poiradanKu vokon. 14Iri nopo mongungumo diri nga pasasad do tinangaran do Kinoringan. 15Iri nopo linsou diri i nokotijas si ralan nga irad di tinangaran do Kinoringan nakasasad siri ginavo do tulun. Karangaai nopo dii diolo iri tinangaran di Kinoringan, nga turus rikotno dii i Soitan, i kotua do rogon, mongoi popoidu diri tinangaran di Kinoringan i nakasasad siri ginavo diolo. 16Om iri nopo linsou i nakasasad siri kovotuvan nga irino irad di tinangaran di Kinoringan di nakasasad siri ginavo do tulun, om karangaai nopo dii diolo nga asanang dii i ginavo diolo om turus do aparsaya. 17Nga au dii minomugamut i kaparsayaan diolo om au atatap i kaparsayaan diolo siri ginavo. Jadi rikoto dii iolo do kosusaan om i pokorualan do tulun sabap do aparsaya iolo di tinangaran do Kinoringan, om irino dii turus nokoluoi i kaparsayaan diolo. 18-19Om iri nopo linsou vokon i nakasasad siri korugijan nga irino irad di tinangaran do Kinoringan i norongou di tulun do au dii minonguva si ginavo diolo, sabap sumurau i ginavo diolo diti kosusaan maso maino, om aandaian nogi iolo kumaya om voovokonpo kaandaian marong diolo, om irino dii nokoluputan iri tinangaran di Kinoringan si ginavo diolo. 20Om iri nopo dii linsou i nakasasad siri tana do aandai, ponguvano dii iri, om kivaro tolu nopulu, kivaro onom nopulu, kivaro aatus, nga irino irad di tinangaran do Kinoringan i nakasasad siri ginavo di tulun do minongkinongou om naparsaya, om muang-ruang dii i gaagaya diolo do aandai om irino tuvajo,” kadi Yisus.

Poiradan do Momuang do Lampu

(Mat. 5:15; 7:2; 13:12; Luk. 6:38; 8:16-18; 11:33; 19:26)

21Om minongoduat dii i Yisus diolo do ka, “Kivaro naku tulun momuang do lampu om potinggouban diri mital ko pasaauonpo siri toodopon? Ausoi. Nga potimpakon nopo siri savat. 22Om irad nogi dino do kasaangkat di nilosok nga pointalangoni do insan tadau, om onuu nopo i inolim di tulun do maino, nga poimbulajoni do Kinoringan do laaid. 23Isaai nopo iri kitolingo, rumongouno marong diti tinangaranKu,” kadi Yisus.

24Om mitangar i Yisus kavagu diolo, “Ondodomo mujuno marong iti ponudukanKu dikovu, do potingkuro nopo pongoturan muju si do vokon nga irino pongoturan do Kinoringan si dikovu. Om makin nogi iradon kou dino. 25Do iri nopo tulun di kivaro nunu nopo nga onuan kavagu. Nga iri nopo tulun di auso, nga insan kivaropo okuyak si disido nga solodon kasangkat,” kadi Yisus.

Kopomorintaan do Kinoringan irad do Tiasok

26Om minaganu kavagu i Yisus do iso pinoiradan do kaDisido, “Kopomorintaan nopo do Kinoringan om minggajo irad di tiasok do poosokon siri dumo. 27Do iri nopo tulun di paasok, otuvong nopo nga modopno isido, om anavau nopo nga tumungagno isido. Om iri nopo parai nga mobul-sobul om manggau-langgauno dii. Au dii oilaan disido nong potingkukuro iri parai lumanggau. 28Sobulno dii i parai mantad si tana. Minogulupo iri roun om ponilau nogi om pomuonsi nogi dii. 29Om kaansak nopo dii, pongovitno dii isido do linggaman do mongomot sabap norikotno i kapangamatan,” kadi Yisus.

Sayat do Sansam Inanu do Poiradan

(Mat. 13:31-32, 34; Luk. 13:18-21)

30Om kadi Yisus kavagu, “KukuroyonKu naku popoilo do tulun do i Kinoringan momorinta di tongotulunJo? Maganu Oku do iso poiradan supaya oilaan muju do muang-ruang i tongotulun porintawon di Kinoringan. 31Nga iri nopo om miirad diri iso sayat do sansam i pinasasad do tulun siri tana. Sayat nopo diri om opoyok mantad di kasangkatan sayat vokon siti vonuvo. 32Nga kasasad nopo dii iri, om sobulno dii om lumanggau marong, om agajo nogi mantad kasangkat diri tongosayur vokon, om olombon i raan gosob do obuli i tongotombolog mongoi tumirung siri raan om momurumun,” kadi Yisus.

33Om oguu dii pinoiradan di Yisus irad dii, do minonuduk di tangar do Kinoringan gosob diri orotijan diolo. 34Om au minonuduk Isido diolo nong okonko kivaro poiradan. Nga nosompini nopo dii i tongotulunJo om pinointalang nogi dii Disido i komoion di poiradanJo.

Minoningkod i Yisus diri Sarup om i Umbak

(Mat. 8:23-27; Luk. 8:22-25)

35Om mintutuvongno dii tadau diri om kadi Yisus di tongotulunJo, “Kayo tokou silo sondipau,” ka. 36Om iduai dii diolo iri tongotulun toguu, om angataino dii di tongotulunJo i Yisus sumondipau maja diri talud sinakaanJo laid. Om kivaro piipiro talud do vokon minaja Disido. 37Om rikotno dii sarup do tologod marong om iri umbak tagajo masu siri talud, om oruruaino noponu iri talud do vaig. 38Nga ulunan di Yisus i bantal do nokoodop siri muri. Om sumurau dii i tongotulunJo om posikaino dii diolo Isido om kadiolo, “Ou Guru, au opoduliKo do matai tokou diti?” ka.

39Om koposikno dii i Yisus om pitangarno dii do potingkod marong di sarup om i umbak supaya aui alava i sarup om mondod i umbak. Om turus tinumingkod i sarup om i umbak gosob do olomomno#4:39 olomom: oondod dii kavagu iri vaig. 40Om kadi Yisus diolo do, “Nokokuro do rumosi kou? Nokuro masipo do au aparsaya kou?” ka.

41Nga nokotingkabo#4:41 nokotingkabo: nokotigavo dii marong iolo, om poitatangarno dii iolo do irad diti, “Isai naku tulun diti do i sarup om umbak nga mikuboobojo do tangaronJo,” kadiolo.

Currently Selected:

Markus 4: LabukPKV

Highlight

Copy