Markus 3

Minongolingos i Yisus di Tulun Nokimai i Longon Sampaping

(Mat. 12:9-14; Luk. 6:6-11)

1Om minongoi kavagu i Yisus muntun siri valai sasambayangan do tulun Joudi. Om kivaro dii iso kusai siri do nokimai iri longonjo sampaping. 2Nga kivaro nogi i kumpulan do Porisi siri do mogium do koontodon do papasala daa di Yisus. Om intatajon dii diolo i Yisus nong mongolingos Isido do toruol diri tulun supaya kadapat iolo mangadaawa Disido daa sabap au maja di Tadau Koingkajadan. 3Om pitangarno i Yisus di tulun nokimai iri longon sampaping do ka, “Kaino, ingkakatno siti,” ka. 4Om duatono dii Disido iri tongotulun do ka, “Nong maja di Undang-undang Ugama tokou onu iri apatut vaalon do tulun ontok do Tadau Koingkajadan? Mamaal do aandai, ko mamaalpo do araat? Momijau ko mamataipo?” kadi Yisus.

Nga ausoi mungkomi diolo jumawap. 5Om pingantangai dii di Yisus iolo do araatan Isido di kumpulan do Porisi om osusa dii i ginavoJo do ongokodou i ginavo diolo. Om kaDisido di tulun kimai longon sampaping do, “Porolojo siti Dogo ino longonnu,” ka. Om porolojono dii disido i longonjo om turus do nolingasan. 6Nga labusno dii i kumpulan Porisi om turus ongoino dii iolo kumiupakat di tulun diIrudis nong potingkuro iolo mamatai di Yisus.

Oguu Tulun Liningasan di Yisus

(Mat. 12:15-16; Luk. 6:17-19)

7-8Om koidu nopo dii i Yisus om i tongotulunJo do gumungguli do rumuuk siri Botung Tagajo do Golilia, om okonko nokuukuyak iri tongotulun si Vonuvo Golilia minaja Disido. Om norongou nopo di tongotulun iri kosunduvan di Yisus, om oguu dii i tulun rinumikot mantad siri Vonuvo Yudia, mantad siri Bandar Yorusalim, mantad siri Vonuvo Idumia, mantad siri sondipau do Yurdon om mantad siri somok do Bandar Tirus om Bandar Sidun. 9Om ponuuno dii i Yisus di tulunJo mogium do talud sakaanJo supaya au ogisok Isido di tulun toguu, 10do oguu i tulun liningasan Disido, gosob do kasangkat di tulun kitoruol moitotomping mongoi kumama Disido. 11Koontongi i tongotulun rinosukan do rogon di Yisus, sompori-orino tumungub siri tana si gotuvangJo, om lumuvap do, “Ikano Tanak do Kinoringan,” ka.

12Nga kadii di Yisus diolo do, “PoiloonKu ikovu, adano marong sangkaabarai di tongotulun vokon nong isai Oku,” kaDisido.

Minomili i Yisus di Opulu om Duvo TulunJo

(Mat. 10:1-4; Luk. 6:12-16)

13Om takadno dii i Yisus siri kulud#3:13 kulud: kotud om loovono dii Disido i tongotulun di kouvanganJo, om rikot nogi dii iolo siri Disido. 14Om piliono Disido i opulu om duvo tulun om kaDisido diolo, “PilionKu ikovu do povojoonKu Dogo, onuonKu do susuuonKu do mongoi popoilo do tulun di Abar do Aandai, 15om onuanKu ikovu do kuasa monunsub do rogon,” kadi Yisus.

16Ngaran nopo di tulun di nopili Disido nga i Simun i pinudolian di Yisus do ngaran Pitrus, 17om i duvo misulod i Yakub om i Yaya tanak di Jobidi, i roitan Disido do i Bunogis, -- komoion nopo dii nga nong rumaatan om lumuvap irad di tinggorud kalava, -- 18om iOndorias, i Pilipus, i Botulomius, i Matius, i Tumas, om i Yakub i tanak diAlpius, om i Tadius, om i Simun i otoboi maja do pati di bansa kondiri, 19om i Yudas mantad Kampung Koriut i pojual di Yisus do insan tadau.

I Yisus om i Bosibul

(Mat. 12:22-32; Luk. 11:14-23; 12:10)

20Om ulino dii i Yisus siri valai tiijononJo. Om korikotno kavagu i kinoguuan do tulun siri sampai do au kosivat oi Yisus mangakan. 21Karangaai nopo dii di samvalaiJo do au mangakan i Yisus, panantamanpo om mulau Isido, ongoino iolo momusus daa Disido.

22Om i tongotulun monunuduk do Undang-undang Ugama do Joudi mantad soi Bandar Yorusalim nga minitangar do, “Rinosukan i Yisus di kotua do rogon ngaranjo i Bosibul,” ka, om, “Kikuasa i Yisus monunsub do rogon sabap mantad di kuasa di kotua do rogon,” kadiolo, do i Bosibulno roitan do Soitan.

23Jadi loovono dii di Yisus i tongotulun om minaganu Isido do iso poiradan do, “Au buli i Soitan i kotua do rogon monunsub disido kondiri. 24Nong moioodu i tongotulun siri iso kopomorintaan ausono koingkakato diri kopomorintaan dii. 25Om nong kasangkat iri iso sampaganakan moioodu, aui alaid om moitotondijangno dii do auso poitotoluadan. 26Om irad nogi dino i kotua do rogon nong kumiodu isido di tongorogon porintawonjo, om moiririjangno, ausono koingkokoto di porintawonjo, nolijotno dii,” kadi Yisus.

27Om minagau i Yisus do iso poiradan do agajo kuasa Disido mantad di kotua do rogon, do i kotua nopo do rogon nga irad diri tulun do ogirot, nga i Yisus nopo nga ogirot mantad disido do kadi Yisus, “Auso kaasu siri valai di tulun togirot do manakau do tongoporompon siri valai disido, nong aupo nakagasan mogulu iri tulun togirot. Nakagasan nopo dii iri tulun togirot diri, nga kapanakauno dii isido do tongoporompon di togirot.

28PatangaronKu marong dikovu iti do ompunani kasangkat duso do tulun om i tongotulun mangararaat do Kinoringan nga ompunani. 29Nga isai-isai nopo iri mangararaat di Tatod Tolidang, om ausono marong koompunan di dusojo,” kadi Yisus.

30Om minitangar i Yisus do irad diri sabap minonunsub Isido di rogon mantad di kuasa di Tatod do Kinoringan, nga kadi tongotulun monunuduk do Undang-undang Ugama Joudi do, “Rinosukan Isido do rogon,” ka.

IinoJo om OiadiJo di Yisus

(Mat. 12:46-50; Luk. 8:19-21)

31Om ontok diri rikotno iinoJo di Yisus om oiadiJo kusai om ingkakatno dii si navauon om ponuuno dii iolo di songulun, “Loovopo i Yisus,” ka. 32Om oguu iri tongotulun songogom-ogom misoliput di Yisus, do mitangar Disido do, “Alono iinoNu om oiadiNu silo labus mongongoi Dika,” ka.

33Om jawapno dii i Yisus diolo, “PoiloonKu ikovu nong isai iinoKu om oiadiKu,” ka. 34Om pingantangaino dii di Yisus iri tongotulun iri songogom-ogom misoliput Disido, om kaDisido do, “Ikovuno pinokotidiKu om pinakatadiKu! 35Do isai-isai nopo iri maja do kouvangan do Kinoringan, irino sumiliu irad diinoKu om sulodKu kusai om tongondu,” kadi Yisus.

Currently Selected:

Markus 3: LabukPKV

Highlight

Copy