Markus 2

Nolingasan i Tulun Kimai

(Mat. 9:2-8; Luk. 5:18-26; Yaya 5:1-18)

1Kivaro piipiro tadau di Yisus siri padang do kovotuvan om guli nogi dii kavagu Isido siri Bandar Kaparnaum. Om karangaaino dii do tulun do siri Isido valai. 2Om untunno dii iri tongotulun do oguu gosob do nogisok iri valai, siri navauon nga auso ogomon. Om ontok diri mangaabar i Yisus diolo do tangar do Kinoringan, 3om kivaro i tulun apat kojuvan rumikot do minoiompujung do mongovit diri iso tulun kimai. 4Nga au dii korikot iolo siri di Yisus do atabanan di tongotulun do oguu marong. Nga vaja dii iolo di tukad si labus do valai do minindakod si soribau taap. Jadi posutono dii diolo i taap saau di Yisus om pouluono dii diolo iri tulun kimai di poingodop siri toodoponjo. 5Nga kaantangai nopo dii di Yisus iolo do aparsaya marong Disido, om kaDisido di tulun kimai, “Apa, noompunanno ino dusonu maino,” kadi Yisus.

6Nga kivaro nogi piipiro i tulun do monunuduk do Undang-undang Ugama do Joudi do songogom-ogom siri do minsoromo daa do, 7“Nokuro ilo tulun do opusu mangararaat do Kinoringan do rumantai Isido do Kinoringan? Do ausono buli mangampun do duso nga irino i Kinoringan!” kadi ginavo diolo.

8Nga turus do noilaani di Yisus iri sinoromo diolo, om ka dii Disido diolo, “Nokuro kou minsoromo do irad dino? 9Inombono agaan tangaronKu diti tulun kimai, nong mitangar Okupo do, ‘Noompunanno i dusonu,’ kangKupo ko, ‘Tungagno, kakatono ino tikamnu om pampanauno!’ kangKupo disido? 10LingasanKu iti tulun kimai do poontong Oku dikovu supaya oilaan muju do kikuasa Oku do mangampun do duso siti vonuvo do Iokuno i Sinumiliu do Tulun,” kadi Yisus. Om tilombusai Disido mitangar iri tulun kimai do, 11“Tungagno pogi, om kakatono ino tikamnu om pampanauno muli,” kadi Yisus.

12Tungagno dii i tulun kimai, om turus kakato dii i tikamjo sumoriat diri tongotulun toguu. Osumboijan dii marong kasangkat iolo, om minangarajouno dii iolo do Kinoringan om ka dii diolo, “Atuuk, aupo insan tokou nokoontong irad dilo!” ka.

Minongoloou i Yisus di Liwi

(Mat. 9:9-13; Luk. 5:27-32)

13Om labusno dii i Yisus mantad si valai om pampanauno dii kavagu Isido siri disan di Botung Tagajo do Golilia. Om korikotno dii kasangkat i tongotulun siri di Yisus, om ponudukno dii Isido diolo di Abar do Aandai. 14Om nokoopodno dii i Yisus monuduk diolo, om ontok do manau-panau Isido naantangan Disido iso tulun do poingogom siri upis pangatadan di tongotulun do sukai, i Liwi ngaranjo, i tanak di Alpius. Om kaantangai dii di Yisus i Liwi om kaDisido do, “Kayo, vaja Dogo,” ka. Om ingkakatno dii isido do maja di Yisus.

15Korikot nopo dii i Yisus om i tongotulunJo siri valai di Liwi om paakano dii di Liwi iolo. Nga di pintangaan di Yisus om i tongotulunJo mangakan siri valai di Liwi, om oguu nogi dii i tulun momumumpung do sukai vokon om i tongotulun kiduso i au maja di Undang-undang Ugama do Joudi do minuruk di Yisus mangakan, do oguu dii i tongotulun do minaja di Yisus. 16Om kivaro piipiro tulun kumpulan do Porisi siri, irino monunuduk do Undang-undang Ugama. Kaantangai dii diolo i Yisus minuruk mangakan di tulun do kiduso om tulun momumumpung do sukai, om pongoduatno dii iolo di tongotulun di Yisus, “Nokuro Isido muruk mangakan di tongotulun do momumumpung do sukai om iri tulun kiduso,” kadi kumpulan Porisi.

17Om korongou nopo dii i Yisus di tangar diolo, om minaganu Isido do iso poiradan do ka, “I tulun do au kataru mokiubat do duktur, okonko i tulun do apangkau. Rinumikot Oku diti do mongoloou di tulun kiduso do pavaja Dogo. Okoniko i tulun minsoromo do abanar isido do loovonKu,” kadi Yisus.

Mogpuasa om Ponudukan Kavavagu

(Mat. 9:14-17; Luk. 5:33-39)

18Kivaro iso tadau do minogpuasa i tongotulun di Yaya om i kumpulan Porisi. Om rikotno dii i piipiro tulun mongoduat di Yisus do, “Nokuro ilo tulun di Yaya Mamamatis#2:18 Mamamatis: Momomonsu om ilo tulun do Porisi mogpuasa, nga ilo tulunNu do au mogpuasa?” ka.

19Nga minaganu i Yisus do iso poiradan do Isidono irad di kumawin om kaDisido, “Kasaramaanan muju nopo nga mogpuasa i sumapul di kawin ontokpo do poirunggumpo diolo i kinumawin? Aui mogpuasa iolo nong poirunggumpo diolo iri kumawin. 20Nga orikotpo iri tadau do kapanangkapan di tongotulun diri kusai di kumawin do patajon, om ampa nogi dino do mogpuasa i sumapul di kawin. Om irad nogi dino, salaid#2:20 salaid: salama do siti Okupo di tongotulunKu au mogpuasa iolo,” kadi Yisus.

21Om minaganu kavagu i Yisus do iso poiradan do ponudukanJo nopo di kavavagu nga irad di kain om kinomol kavavagu, do kaDisido, “Ausoi tulun do mangampil#2:21 mangampil: monompong di sabung laid diri kain kavavagu, do nong ompilan#2:21 ompilan: tampangan do kain vagu kumongkong iri om kanogi dino do araradan i noruak di sabung laid. 22Om auso nogi tulun do papaasu diri kinomol kavavagu siri poijanan i vinaal mantad do kulit do kambing di navaal laid, nga siri poijanan di vagupo. Do nong siri poijanan laid poosuon om kumambang nopo i kinomol kavavagu om tumudak i kulit pinoijanan sabap do okoris, om nopirubatani dii i poijanan mivaja di kinomol do nobubus. Nga iri nopo kinomol kavavagu om vaguno iri poijanan,” kadi Yisus.

Pisivalan di Tulun pasal do Tadau Koingkajadan

(Mat. 12:1-8; Luk. 6:1-5)

23Kivaro iso Tadau Koingkajadan minampanau i Yisus om i tongotulunJo nakavaja siri kodumaan. Om ontok di mampanau iolo pongkotu dii i tongotulunJo di parai om impurijo dii diolo om akano. 24Nga kivaro nogi dii i kumpulan do Porisi nokoontong diri tongotulun di Yisus om kadiolo, “Oi Yisus, antangaipo ilo tongotulunNu. Nokokuro do mangalanggar iolo diri Undang-undang Ugama tokou do au obuli kumuri ontok do Tadau Koingkajadan?” kadi kumpulan Porisi.

25Nga jawapno dii i Yisus diolo do, “Nakabasa kouno bo gia diri Kitab nong potingkuro i Daud om i tongotulunjo ontok di vinitilon iolo do auso kokorui. 26Nga ontok nopo dii om iObitarno najadi do Imam Tagajo. Om au nogi nakasala i Daud insan minasu isido siri natad do Valai do Kinoringan do mokianu di kuui iri nitaak do Kinoringan, do inakanjo om onuai nogi dii iri songkoruanganjo. Ombo iti do apatut nopo daa nong maja di Undang-undang Ugama tokou, iri tongoimam noopo do apatut mangakan diri, do au daa aakan do tulun vokon irad di Daud,” kadi Yisus.

27Om kadi Yisus kavagu, “Kinotontuan nopo di Kinoringan diti Tadau Koingkajadan supaya koingkojod i tongotulun di karajajo, nga okoniko tontuon Disido i Tadau Koingkajadan supaya maja di tongotulun di undang-undang pasal diti Tadau Koingkajadan. 28Ioku nopo nga i Sinumiliu do Tulun, om Ioku nogi nga Tuhani, insan Tadau Koingkajadan nga kikuasa Okui,” kadi Yisus.

Currently Selected:

Markus 2: LabukPKV

Highlight

Copy