LUCAS CALLARI YUYAI
CALLARI YUYAI
Lucas quilcashca ali villaipica Jesusca, Israel gentecunapajlla Quishpichij cajtaca, na villajunllu. Ashtahuangarin tucui cai pachapi causajcunata Quishpichij cajtami villajun.
Quishpirinamanda ali villaita villajuj cai quilcashcapica, Jesuspaj causai imashnalla cashcatami villajun. Cai quilcashcata quilcaj Lucasca: “Quilcanata callarishpaca, Jesusmanda punda quilcashcacunata ali ricushpami, pai imatalla rurashcatapash alipacha yachashca. Chaicunataca, ali tapushpa yachashpami, imata rurashcatapash aliguta catishpa quilcashcani” nijunmi. Chaitaca, capítulo 1:1-4 camanmi villajun.
Shina cashcamandami cai quilcashcapica, Jesús huacharishcata, huahua cashcata, paita ñaupashpa villaj Bautizaj Juanmandapash, Mateo quilcashcata ashtahuan yalishpa villajun. Chaicunamanda ashtahuan villashcacunaca, ali villaita villajuj cai quilcashcapillami tiyan.
Mateo quilcashcahuan, Marcos quilcashcahuan chimbapurashpa ricujpica, Bautizaj Juan, Diospajta rurashcatami, capítulo 3:1 manda 20 caman villajun.
Jesusta bautizashcata, na ali yuyaicunata diablo cujushcataca, capítulo 3:21 manda 4:13 camanmi villajun.
Chai jipaca, capítulo 4:14 manda 9:50 caman ricujpica Apunchi Jesús, Galilea llactapi tucuicuna ricujta, Diospajta rurajushcatami villajun.
Mateohuan, Marcoshuan villajunshnallatami, Galilea llactamanda Jerusalenbi huañungapa Jesús shamushcamandapash, ricuchishpa aliguta villajun. Chaitaca, capítulo 9:51 manda 19:27 camanmi villajun.
Llaquita apashpa huañushcamandaca, capítulo 19:28 manda 23:56 camanmi villajun. Apunchi Jesús causarishcata, causarishca jipa taucacunaman cutin cutin ricurishcata, jahua pachaman rishcatapash, capítulo 24 pimi villajun.
Tucuicuna ricujta Diospajta Jesús rurajushcata Nazaret llactapi tandanajuna huasiman rishcataca, ali villaita villaj cai quilcashcami ashtahuan villajun.
Pai villai callarishpaca, Isaías quilcapi paimandallata villajushcata japishpami villashca. Shinallata Jesusca, imagutapash na charijcunaman ali villaita villachun, Jatun Diospaj Espíritu yarichijpi villaj cashcatami villashca. Tucui chaicunatami, caipi quilcashca quishpirina ali villaipica, Jesusca imagutapash na charijcunaman, llaquihuan causajcunaman, yangapi churai tucushca gentecunaman ashtahuan villashcata ricuchijun.
Jesús nara huacharishca ashtahuan pundalla imashnalla cashcata, pai jahua pachaman rishcata quishpirina ali villaita villajpi cushijushcatapashmi villajun.
Samaria llactamanda llaquij runamanda parlashcapash, chingashca churi tigrajpi taita perdonashpa chasquishcata parlashcapash, cai Lucas quilcashcapillami ricurin. Shinallata Taita Diosta mañanamandapash, jucha illaj Diospaj Espiritumandapash, juchacunata perdonanamandapash, jatun yuyaicunata cushpa, Jesús yachachishcatami villajun. Huarmicunapash, Apunchi Jesuspajta rurashpa yanapanajushcatami yachachijun.
Currently Selected:
LUCAS CALLARI YUYAI: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.