MARCOS 16

Jesús causarishcamanda

(Mat. 28:1-10; Luc. 24:1-12; Juan 20:1-10)

1Samana punlla ña yalijpimi, Jesuspaj cuerpogupi talishpa javingapa, mishquilla ashnajujta randingapa rinajurca. Magdala pueblomanda Mariandi, Jacobopaj mama Mariandi, Salomé shuti huarmindimi rinajurca. 2Semana callari punllayashcapimi, indi llujshishca tutamandata, Jesusta pambashca utujuman shamunajurca. 3Paicunaca:

“Huañushcata pambana utujuman yaicuna pungupi rumitaca, ¿pita suchuchingayari?” nishpandimi rinajurca.

4Ashtahuangarin, paicuna chayashpa ricujpica, chai jatun rumitaca suchuchishcatami ricunajurca. 5Huañushcata pambashca utujuman yaicushpaca, ali maquiman shuj huambragu tiyajujtami ricunajurca. Paitaca, jatun yuraj churajunata churajushca tiyajujta ricushpami ninanda manllarinajurca. 6Ashtahuangarin chai huambraguca, paicunataca cashnami nirca:

“Na manllarinachu canguichi. Cangunaca, chacatai tucushpa huañushca, Nazaretmanda Jesustami mascaj shamushcanguichi. Paica causarircami. Paita maipi churashcata ricuichi, Paica illanmi. 7Cunanga, Paipaj yachajujcunaman, Pedroman villagrichi. Paica, cangunata ñaupashpami Galilea llactaman rijun. Pai villashcashnallata chaipimi ricunguichi” nircami.

8Shina nijpimi, chai huarmicunaca, pambashca utujumanda llujshishpaca, ninanda manllarishpa calpanajurca. Ninan manllai japijpimi pimambash na villashpa calpanajurca.

Magdala pueblomanda Mariamanmi, Jesús ricurishca

(Juan 20:11-18)

9Semana callari tutamandata causarishca jipami Jesusca, Magdala pueblomanda Mariamanra punda ricurirca. Chai huarmimandami, canchis ayacunata llujchishca carca#16:9 (Versículo 9manda 20camanga, punda quilcashcacunapica na tiyanllu). 10Chai huarmi rishpami, Jesusta catijcuna, huacashpa, llaquilla tiyanajujpi tucuita villanajurca. 11Jesús causarishcata chai huarmi ricushpa villajujta uyashpapash, paicunaca na crinajurcachu.

Jesusca, Paipaj ishcai yachajujcunamanmi ricurishca

(Luc. 24:13-35)

12Ashtahuangarin chai jipami, Paipaj ishcaipura yachajujcunamanlla, ñanda rinajujpi Jesusca, shuj tucushpa ricurirca. 13Chaitami, caishujcunaman villangapa rinajurca. Paicuna villajpipash, napacha crinajurcachu.

Jesusca, apostolcunatami villachun cachashca

(Mat. 28:16-20; Luc. 24:36-49; Juan 20:19-23)

14Ña tucuita tucuchishca jipaca, mezapi micushpa tiyanajujpimi, chunga shuj yachajujcunaman ricurirca. Paicunataca, causarishcata ricujcuna villajujpipash, na crishpa shinlli shungucuna tucushcamandami, shinllita rimajurca. 15Shinallata paicunataca, cashnami nijurca: “Richi, tucui cai pachapi causajcunaman cai ali villanata villagrichi. 16Canguna villajpi crishpa, bautizai tucushpaca, quishpiringami. Ashtahuangarin na crishpaca, ninan llaquimanmi ringa. 17Ñucata crijcunaca, cashna pipash na rurai ushanallacunata rurashpa catingarami: Ñuca shutipi rimashpami, ayacunataca llujchinajunga. Shinallata, mushuj rimaicunatami rimanajunga. 18Culebracunata maquihuan japishpapash, huañuchijlla yacuta ufiashpapash, na imapash tucungachu. Huañujujcunapaj jahuapi paicunapaj maquita churajpica, ali tucungallami” nijurcami.

Jahua pachaman Jesús tigrashcamanda

(Luc. 24:50-53)

19Chashna villashca jipami, Apunchi Jesusca jahua pachaman apai tucurca. Chaipimi, Taita Diospaj ali maquiman tiyarirca. 20Chai yachajujcuna llujshishpa rishpaca, tucui llactacunapimi villanajurca. Paicunaca, Apunchi Jesús ushaita cujpimi, pipash na rurai ushanallacunata rurashpa, ali villanata villanajurca. Chashna cachun.

Currently Selected:

MARCOS 16: QVI16

Highlight

Copy