GÉNESIS 49

Paipaj churicuna imashna causanata Jacobca villajushcamanda

1Paipaj churicunata Jacob cayashpaca cashnami nijurca: “Caiman tandanajumuichi. Jipa punllacunapi canguna ima tucunatami villagrini.

2Jacobpaj churicuna, tandanajushpa ñucata uyahuaichi.

Cangunapaj taita Israel ima nijujta uyahuaichi.

3Rubén, canmi ñuca punda churi cangui.

Canmi callari ushaihuan charishca churi cangui.

Canmi, pundapi alicachi tucunatapash, mandana ushaitapash charingui.

4Canga, ninanda rijuj yacushna cashpapash, na pundapi churai tucunguichu.

Canga ñuca huarmihuan pacta puñushpami, ñucataca yangapi churashpa llaquichircangui.

5Simeonhuan, Levihuanga, chashna, chashnacunami.

Paicunaca, ninanda fiñarishpami pitapash llaquichinajun.

6Paicuna ima nishcatapash, ñuca shungupica na chasquishachu.

Ñuca espiritupash, paicunahuanga na pacta cangachu.

Paicunaca, ninanda fiñarishpami gentecunataca huañuchishca.

Ninanda fiñarishpami huagracunatapash fitishpa tucuchishca.

7Paicuna ninanda fiñarishcataca, pipash ama chasquishca cachun.

Paicuna na alita rurashcataca, pipash ama alicachishca cachun.

Ñucami, paicunataca caita chaita cachasha.

Tucui Israel llactatami, caita chaita cachasha.

8Judá, candaca cambaj huauquicunami alicachinga.

Canda fiñajcunataca, canmi mandangui.

Cambaj taitapaj churicunami, cambaj ñaupajpi cumurinajunga.

9Judá, canga huahua leonshnami cangui.

Ñuca huahualla, animalcunata japishpami, vichai tigramungui.

Canga, leonshna curcuyashpami, rucu leonshna micushpa sirijungui.

¿Candaca, pita rijchachita ushangayari?

10Judá mandana vara caspitaca, pipash na quichungachu.

Mandana ushaita charishcatapash pipash na quichungachu.

Siloh mandangapa shamungacaman, chashna cangui.

Paipajmanmi, llactacunapi causajcunaca tandanajumunga.

11Canbaj huahua burrutaca, uva yurapimi huatangui.

Cambaj huahua burrutaca, uva sapipimi huatangui.

Cambaj churajunatapash, vinopimi mutiyachingui.

12Canbaj ñavicunaca, vinotapash yali pucami.

Canbaj quirucunapash, lechetapash yali yurajmi.

13Zabulón, canga mama cucha manñacunapimi causangui.

Chaicunapimi barcocuna shayarinajunga.

Paipaj llactaca, Sidón pueblocamanmi canga.

14Isacar, canga shinlli burrushnami cangui.

Ishcai corral chaupipi sirijunshnami cangui.

15Samanaca alipacha cajta, llactapash juyaillagupacha cajta ricushpaca,

shujcunapajta rurashpa causangapa ari ninguillami.

16Dan, canga Israel ayllupura cashpami,

Israelpaj miraicunataca aliguta ricushpa mandajungui.

17Dan, canga ñan manñapi chapaj culebrashnami cangui.

Chaqui ñanbi, caballota talonbi canishpa, caballopi tiyajujta urmachijshnami cangui.

18Mandaj Dioslla, can yanapanatami shuyajupani.

19Gad, candaca shuhuacunami macaj shamunga.

Ashtahuangarin, canmi macashpa mishangui.

20Aser, canga alipacha micunatami charingui.

Alipacha micunacunata yanujpimi, jatun mandajcunapash alicachinga.

21Neftalí, canga tarugata cacharishcashnami causangui.

Canga, yachaisapa rimaicunahuanmi yachachijungui.

22José, canga ninanda fucuj yurashnami cangui.

Yacu patapi tiyaj ninanda fucuj yurashnami cangui.

Chai yurapaj malquicuna viñashpa, pata jahuata mirashpa rijujshnami cangui.

23Candaca ninandami llaquichinajun.

Flechacunata cacharishpami llaquichinajun.

Paitaca, arcohuan flechata cacharijcunami na ricunayachin.

24Ashtahuangarin paipaj arcoca, shinllipacha tiyajurcallami.

Paipaj rigrapash, paipaj maquipash, shinllipachami carca.

Jacobman ushaita cuj Dios yanapajpimi, chashna carca.

(Israelcunapaj jatun Rumishna, paicunata Michij Diospaj shutimandami chashna carca).

25Cambaj taitapaj, Taita Dios ushaita cujpimi chashna canga.

Tucui ushaita charij Taita Diosmi, candaca bendicianga.

Jahua pachamandami candaca bendicianga.

Mama cucha ucu ucumandapashmi candaca bendicianga.

Huahuata chuchuchijuj mamapajpash, huahuata vijsayuj mamapash, bendiciai tucushcami canga.

26Cambaj taita bendiciashcacunaca, ñucapaj ñaupa taitacuna bendiciashcatapash ashtahuan yalimi canga.

Chai bendiciashcacunaca, urcu pundacunacaman cashcashnami canga.

José, canmi chashna bendiciai tucungui

Cambaj huauquicunamanda shicanyachi tucushca cashcamandami, chashna bendiciai tucungui.

27Benjamín, canga imatapash quichujlla atujshnami cangui.

Tutamandatami, aichataca japishpa micunga.

Chishipica, puchushcatami chaupishpa carajunga” nijurcami.

Jacob huañujpi pambashcamanda

28Tucui paicunami, chunga ishcai Israel ayllucuna carca. Paicunapaj taita bendiciajushpaca, tucuicunamanmi, paicuna imashna canata ricushpa bendiciajurca. 29Chaipaj jipami, churicunataca cashna nishpa mandarca: “Ñucaca, ñuca llactapuracunahuanmi tandanajugrini. Heteopura, Efrón shuti runata randishca pambapi tiyajuj utujupi, ñuca taitacunata pambashca pushtupi pambahuanguichi. 30Macpela shuti pambapi tiyajuj utujupi pambahuanguichi. Chai pambaca, Canaán llactapi, Mamre shuti pueblomanda, indi llujshimujmanmi tiyajun. Chai alpatami Abrahamga, heteopura Efrón runata randirca. Chai pambataca, pambana alpa cachunmi randirca.

31Chaipimi Abrahamdapash, paipaj huarmi Saratapash pambarca. Chaipillatami Isaactapash, paipaj huarmi Rebecatapash pambarca. Ñucapash, Leataca chaipillatami pambarcani. 32Chai alpandi, chai alpapillata tiyajuj jatun utujundi randishcacunaca, Het shuti runapaj miraicunapajmi carca” nijurcami.

33Jacobca, paipaj churicunata chashna mandashpa tucuchishpaca, paipaj camapi chaquita vichai curpashpa huañushpami, paipaj ñaupaj taitacunahuan tandanajugrirca.

Currently Selected:

GÉNESIS 49: QVI16

Highlight

Copy