GÉNESIS 50

1Taita Jacob huañujpica Joseca, paipaj taitataca ugllashpa, muchashpami huacajurca. 2Chai jipami Joseca, paipaj taita Israelpaj cuerpo ama huaglichun, jambita churaj runacuna jambichun mandarca. Shina mandajpimi, paicunaca chashna ruranajurca. 3Chuscu chunga punllacaman jambina cajpimi, chashna rurashpa pactachinajurca. Egiptopi causajcunaca, canchis chunga punllacamanmi huacanajurca. 4Chai huacana punllacuna yalijpimi Joseca, Faraonbaj huasipi causajcunataca, cashna nirca:

“Cunan cangunapaj ñavipi ñuca ali ricurishca cajpica, Faraonman cashna nigripaichi nipanimi: 5Joseca cashnami nijun: ‘Ñuca taitami cashna nishpa juramentuchihuarca: Ñami huañugrini. Ñucata pambachunga, Canaán llactapimi utujuta allachircani. Chaipi pambagrihuangui nihuarcami. Chaimandami cunanga, ñuca taitata pambashpa tigramugripani’ nijunmi nigripaichi” nijurcami.

6Shina nigrijpimi Faraonga:

“Cambaj taita juramentuchishcata pactachingapaca, cambaj taitata pambangapa rilla” nijurca.

7Shina nijpimi Joseca, paipaj taitata pambangapa vichai rirca. Paitaca, Faraonbajta rurajcunapash, Faraonbaj huasipi ricushpa mandaj ancianocunapash, Egipto llactamanda tucui ancianocunapashmi cumbashpa rinajurca. 8Josepaj huasi ucupuracunapash, paipaj huauquicunapash, Jacobpaj ayllucunapashmi cumbashpa rinajurca. Gosén llactapica, paicunapaj huahuacunata, llamacunata, huagracunatallami saquishpa rinajurca. 9Paihuanga, carretacunapi, caballocunapi tiyarishca gentecunapashmi, ashtaca ashtacapacha rinajurca. 10Paicunaca, Jordán jatun yacu chimbapi tiyajuj, Atad shuti pambamanmi chayagrirca. Chaipimi ninandapacha tucuilla llaquirishpa huacanajurca. Josepash, paicuna imashna rurajshnallatami, canchis punllacaman llaquilla canata pactachijurca.

11Chai llactapi causaj cananeo gentecunaca, Atad shuti pambapi chashna huacanajujta ricushpami: “Egiptopi causajcunaca, ninandapacha llaquirishpami huacanajun” ninajurca. Chaimandami, Jordán yacu chimbapi tiyajuj pambataca, Abel-mizraim#50:11 Abel-mizraim nishpaca Egipto llactapi causajcuna huañushcamanda huacana nijunmi shutita shutichinajurca.

12Jacobpaj churicunaca, paicunapaj taita mandashcatami tucuita pactachinajurca. 13Jacobpaj churicunaca, Canaán llactaman apashpami, Macpela shuti pambapi tiyajuj jatun utujupi pambarca. Chai pambataca Abrahammi, pambana alpa cachun, heteopura Efrón shuti runata randishca carca. Chai pambaca, Mamre shuti pueblomandaca, indi llujshimujmanmi carca. 14Joseca, paipaj huauquicunandi, paipaj taitata pambangapa paihuan vichai rishca tucui gentecunandimi, Egiptoman tigrajurca. Paipaj taitata pambashca jipami, chashna tigranajurca.

José huañushcamanda

15Josepaj huauquicunaca, paicunapaj taita huañujpimi cashna ninajurca: “Joseca, ñucanchitaca na ricunayachishpami, tucui na alita rurashcamanda, ñucanchitapash chashnallata llaquichinga” ninajurcami. 16Chaimandami, Josepajman cashna nichun cachanajurca: “Cambaj taitaca nara huañushpallatami cashna nishpa mandarca: 17‘Josetaca cashna ninguichi: Canda na alita rurashpa, cambaj huauquicuna juchata rurashcataca cungapailla. Na alitapachamari paicunaca rurashca ninguichi’ nircami. Chaimandami, cambaj taitapaj Taita Diosta alicachishpa causaj ñucanchi chai na alita rurashcataca cungapailla ninajupanchi, ninajunmi” nichunmi cachanajurca.

Shina nishpa villanajujpimi, Joseca huacarca. 18Paipaj huauquicunapash shamushpami, Josepaj ñaupajpi cungurishpa:

“Cambajta rurangapami, caipi capanchi” ninajurca.

19Shina nijpimi Joseca cashna nirca:

“Na manllanachu canguichi. ¿Ñucaca, Taita Dioschu cani? 20Cangunaca, ñucata na alita rurashpa llaquichinatami yarircanguichi. Ashtahuangarin, Taita Diosmi alipaj caiman pushamuhuashca. Chaitaca cunanmi ricunajunchi. Paimi, ashtaca gentecunata causaihuan charingapa chashna rurashca. 21Cunanga, na manllanachu canguichi. Ñucami cangunatapash, cangunapaj huahuacunatapash ricushpa charisha” nijurcami.

Chashnami, paicunapaj shunguman chayajta rimashpa ninanda cushichirca.

22Joseca, tucui paipaj ayllucunandimi Egiptopi causajurca. Joseca, patsaj chunga huatatami causarca. 23Joseca, Efrainbaj churicunataca, quimsa miraicamanmi ricurca. Manasespaj churi Maquir shuti runapaj huahuacunapash, Josepaj maquipimi viñarca.

24Shuj punllami Joseca, paipaj huauquicunataca cashna nirca: “Ñucaca ñallami huañuringa yanimi. Ashtahuangarin, Taita Diosca cangunata ricuj shamungapachami. Shinallata, cai llactamandaca, Abrahamman, Isaacman, Jacobman, carashapacha nishpa juramentushca alpamanmi vichai pushanga” nircami.

25Joseca, taita Israelpaj churicunataca, cashna nishpami juramentuchirca: “Taita Diosca, cangunataca ricuj shamungapachami. Pai shamujpica, ñuca tullucunataca caimanda apanapachami canguichi” nijurcami.

26Joseca, patsaj chunga huatata charishpami huañurca. Paitaca Egipto llactapimi, ama huaglichun jambicunata churashpa, shuj cajapi churanajurca.

Currently Selected:

GÉNESIS 50: QVI16

Highlight

Copy