GÉNESIS 48
48
Jacobca, Efraindapash, Manasestapash bendiciashcamanda
1Chai jipacunami: “Cambaj taitaca huañujunmi” nishpa Joseman villanajurca. Shina nijpimi Joseca, Manasés, Efraín, paipaj ishcandi churicunata pushashpa ricungapa rirca. 2“Cambaj churi Josemi, canda ricungapa shamushca” nishpa villajpimi taita Israelca, shinlli tucushpa jatarishpa, camapi tiyarirca. 3Josetaca cashnami nijurca:
“Tucui Ushaita charij Taita Diosmi, Canaán llactapi tiyajuj, Luz shuti pueblopi ricurishpa bendiciahuarca. 4Chaipica cashnami nihuarca: ‘Cambaj miraicunaca, ashtacapachami canga. Candaca, llactacunata callarichij cachunmi churasha. Cai llactataca, cambaj miraicunamanmi, causaita causaicaman paicunapaj cachun carasha’ nihuarcami. 5Cunanga, Efraín, Manasés, cambaj ishcandi churicunaca, ñuca churicunashnami canga. Paicunataca, cai Egipto llactaman canhuan causangapa ñuca nara shamujpillatami charircangui. Paicunami, Rubén, Simeón ñuca churicunashnallata ñucapaj churicuna canga. 6Paicunapaj cati charishca huahuacunami cambaj canga. Paicunaca, Efrainbaj, Manasespaj shutipimi, carashca alpataca japinajunga. 7Padan-aram shuti llactamanda shamujujpimi, cambaj mama Raquelca huañuparca. Efrata puebloman chayangapaca, ña ashalla illajpimi Canaán llactapi huañuparca. Paitaca, Efrata shuti, Belén puebloman rina ñan pambapimi pambarcani” nijurcami.
8Taita Israelca, Josepaj churicunata ricushpaca:
“¿Paicunaca picunata?” nishpami tapurca.
9Shina nijpimi Joseca:
“Taita Dios ñucaman cai llactapi carashca churicunami capan” nirca.
Shina nijpimi Jacobca:
“Paicunatami bendiciagrini, ñucapajman quimichimupai” nirca.
10Taita Israelca, ña rucugu cashpami paipaj ñavipash na ali ricui ushajurca. Chai huahuacunata, taita Israelpajman quimichijpimi, paica ugllashpa mucharca. 11Chai jipami taita Israelca, Josetaca cashna nirca:
“Cambaj ñavitaca na cutinga ricushachu yajurcanimi. Shina cajpipash, Taita Diosmi cambaj miraicunatapash ricuchun causaita carahuashca” nircami.
12Shina nishca jipami Joseca, Jacobpaj migllapi tiyanajuj chai huahuacunata cayashpa, alpaman chayangacaman, Jacobpaj ñaupajpi urai cumurirca. 13Joseca, paipaj ishcandi churicunata maquimanda aisashpami, Efraindaca, taita Israelpaj lluqui maquiman, Manasestaca ali maquiman shayachirca. 14Shina cajpimi taita Israelca, paipaj ali maquitaca, jipa churi Efrainbaj umapi, paipaj lluqui maquitaca, Manasespaj umapi churarca. Shinami, Manasés punda churi cajta ali yachashpapash, paipaj ali maquitaca Efrainbaj umapi churarca. 15Shina cashpami Josetaca, cashna nishpa bendiciajurca: “Taita Abrahambash, taita Isaacpash, Taita Dioshuanmi causanajurca. Ñuca causai callarishca punllamandapacha cunangamanmi, Taita Diosllata ñucatapash charijuhuan. 16Tucui na alicunamanda ñucata huacaichishpa charijuj Angelca, cai huambragucunatapash bendiciashpa charipachun nipanimi. Ñuca shutipash, taita Abrahambaj shutipash, ñuca taita Isaacpaj shutipash, paicunapi causaita causaicaman rijsi tucushca cachun. Cai pachapica ninanda miranajupachun” nijurcami.
17Ashtahuangarin paipaj taitapaj ali maquita, Efrainbaj umapi churanta ricushpami Joseca, paipaj taitapaj maquita japishpa, Efrainbaj umamanda, Manasespaj umapi churangapa munarca. 18Shinamandami Joseca, paipaj taitataca cashna nijurca:
“Ñuca taitalla, na chashnachu. Caimari punda churi capan. Cambaj ali maquitaca, paipaj umapi churapai” nircami.
19Ashtahuangarin paipaj taitaca, na chashna rurangapa munashpami cashna nirca:
“Ari, chaitaca yachanimari, ñuca huahualla. Manasespashmari, ashtaca gentecuna tucushpa, jatunyachi tucushca canga. Ashtahuangarin paipaj jipa huauquimi, paitaca yalishpa ashtahuan jatunyachi tucushca canga. Paipaj mirai huahuacunaca, ashtacapacha llactacunami tucunga” nircami.
20Chai punllami cashna nishpa bendiciajurca:
“Canmandami Israelcunaca, cashna nishpa bendicianajunga: ‘Taita Diosca, Efrainda, Manasesta imashna bendiciashcashna, candapash bendiciachun’ ninajungami” nircami.
Shina nishpami Efraindaca, Manasespaj pundapi churarca.
21Chai jipami taita Israelca, Josetaca cashna nirca:
“Ñucaca ñami huañugrini. Shina cajpipash Taita Dios cangunahuan cashpami, cangunapaj taitacunapaj llactaman tigrachinga. 22Ñucaca, cambaj huauquicunaman carashca alpatapash ashtahuan yalitami canman carani. Chai alpataca, ñuca espadahuan, ñuca arcohuan macanajushpa mishashpami, amorreocunapaj maquimanda quichurcani” nijurcami.
Currently Selected:
GÉNESIS 48: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
