GÉNESIS 47

1Faraonbajman José shamushpaca cashnami nijurca: “Ñuca taitami, ñuca huauquicunandi, paicunapaj llamacunata, huagracunata, paicuna imatalla charishcacunatapash apashpa, Canaán llactamanda shamushca. Cunanga, Gosén pambapimi capan” nircami. 2Paica, pichandi chairalla huauquicunata Faraonman rijsichingapa pushashpami rirca. 3Shina cajpimi Faraonga, Josepaj huauquicunataca:

“Cangunaca, ¿imatata ruranata yachanguichi?” nishpa tapurca.

Shina tapujpimi paicunaca:

“Cambajta ruraj ñucanchica, ñucanchi ñaupa taitacunashnallata, llamacunata michijcunami capanchi” ninajurca.

4Faraondaca cashnatapashmi ninajurca:

“Canaán llactapica ninan yarjai tiyajpimi, llamacunata michingapapash jihua illajpi, cai llactapi causangapa shamupanchi. Chaimandami, cambajta ruraj ñucanchitaca, Gosén pambacunapi causachun saquihuai nishpa mañanajupanchi” ninajurcami.

5Shina nijpimi Faraonga, Josetaca cashna nirca:

“Cambaj taitapash, cambaj huauquicunapashmi, cambajman shamushca. 6Egipto llactaca cambaj maquipimi. Cambaj taitataca, cambaj huauquicunandi, Gosén pambacunapi, ali alpacunata agllashpa causachun cunguilla. Paicunapuramanda maijambash, animalcunata ali ricunata yachajcunaca tiyajpica, ñuca animalcunata tucuipi ricuchun churanguilla” nircami.

7Chai jipami Joseca, paipaj taita Jacobtapash pushashpa Faraonman rijsichirca. Chaipimi taita Jacobca, Faraondaca bendiciarca. 8Faraonga:

“Jacobtaca ¿mashna huatacunatata charingui?” nircami.

9Shina nijpimi Jacobca, Faraonman cashna nirca:

“Patsaj quimsa chunga huatacunatami, caita chaita purishpa, ashalla huatacunapipash, llaquicunata apashpa causapashcani. Ñucapaj ñaupa taitacuna unai huatacunata caita chaita purishpa causashcashnaca, ñucaca na causai ushapashcanichu” nijurcami.

10Chai jipami Jacobca, Faraonda bendiciashpa, paipaj ñaupajmanda llujshishpa rirca. 11Joseca, Faraón mandashcashnami, paipaj taitaman, paipaj huauquicunamambash, Egipto llactapi ashtahuan ali alpata agllashpa curca. Shinamandami paicunaca, Ramesés shuti alpacunapi causanajurca. 12Shinallata Joseca, paipaj taitaman, paipaj huauquicunaman, paipaj ayllucunamanga, pactanata ricushpami micunatapash tucuillaman cararca.

13Tucui llactacunapi granocuna tucurijpimi, Egipto llactapi causajcunapash, Canaán llactapi causajcunapash, yarjaimanda imata ruraita na ushanajurca. 14Shina cajpimi Joseca, Egipto llactamanda, Canaán llactamanda gentecunaman micunata jatushpa culquitaca tandachishpa, Faraonbaj culquita alichina huasipi alichijurca. 15Egiptopi causajcunapash, Canaán llactapi causajcunapash, paicunapaj culqui tucurijpi, Josepajman shamushpami:

“¿Nacha granoguta ñucanchiman carahuanguiman? Culqui illajpi na randi ushashpami, cambaj ñaupajpi huañugrinchi?” ninajurcami.

16Shina ninajujpimi Joseca cashna nirca:

“Culqui illajpica, canguna charishca animalcunata apamuichilla, cangunaman granocunata cushallami” nircami.

17Shina nijpimi gentecunaca, paicunapaj caballocunata, llamacunata, huagracunata, burrucunata Joseman apamushpa, granocunata japinajurca. Chashnami Joseca, animalcunata japishpa, shuj huatacaman granocunata cujurca. 18Chai huata yalijpica, cati huatapash Josepajman shamushpami cashna ninajurca:

“Ñucanchita mandajlla. Na llullashpami canman nipanchi. Culquitapash, animalcunatapash tucuillami, granocunamandaca canman cuparcanchi. Cunanga imapash illaj, ñucanchi alpacunahuanllami saquiripashcanchi. 19¿Imashpata cambaj ñaupajpi tucui ñucanchipash huañujpi, alpacunapash jichushca sirinajuchun saquigringui? Ñucanchitapash, alpacunatapash micunagumanda randipailla, shinami ñucanchipash, alpacunapash cambaj saquiripashun. Canman alpacunata tarpushpa causangapa, alpacunapash ama jichushca saquirichun, ñucanchitapash ama huañuchun saquihuaichu” ninajurcami.

20Shina ninajujpimi Joseca, Egiptopi causajcunapaj tucuilla alpacunataca, Faraonbaj cachun randirca. Egipto llactapi ninan yarjai tiyajpi, tucuicuna paicunapaj alpacunata jatujpimi alpacunaca tucuilla Faraonbaj saquirirca. 21Shina cajpimi gentecunataca, Egipto llacta tucui pueblocunapi causanajuchun tandachirca. 22Sacerdotecunapaj alpacunatallami na randirca. Paicunaca, Faraón micunata carajpi causanajushpami, paicunapaj alpacunataca na jaturca.

23Chai jipami Joseca cashna nijurca:

“Cunanga cangunatapash, cangunapaj alpacunatapashmi, Faraonbaj cachun randircani. Cai muyucunata japishpa, alpacunapi tarpungapa richilla. 24Tucuilla grano fucushcataca, pichapi chaupishpami, shuj chaupitaca Faraonman cushpa, chuscu chaupitaca alpacunapi tarpungapa, cancunapaj huahuacuna, cangunapaj huasipi causajcuna micuchun japina canguichi” nijurcami.

25Shina nijpimi paicunaca, cashna ninajurca:

“Ñucanchita mandajlla. Ñucanchi causaita quishpichishcamanda, cambaj ñaupajpi alipi ricurishca cajpica, Faraonbajta rurajcuna tucupashun nipanchimi” ninajurcami.

26Shinamandami Joseca, Egipto llactapi tucui fucushca granocunataca, pichapi chaupishpa, shuj chaupitaca Faraonman cuchun mandarca. Chai mandashcataca cunangamanmi chashna ruran. Sacerdotecunapaj alpacunallami, na Faraonbaj maquipica saquirirca.

27Israel gentecunaca, Egipto llactapi tiyajuj Gosén pambacunapimi, alpacunatapash randishpa, ashtacata mirashpa catirca. 28Jacobca, Egipto llactapica chunga canchis huatacunata causajushpami, patsaj chuscu chunga canchis huatacunata charirca.

29Taita Israelca, pai huañuna punlla chayajujpimi, paipaj churi Josetaca cayashpa cashna nirca:

“Cambaj ñaupajpi ñuca ali ricurishca cajpica, cambaj maquita ñuca cunguripi churai. Ñucata llaquishpaca, ñuca ima mañashcata ama llullashpa pactachingui. Ñuca huañujpica, ama cai Egipto llactapica pambashpa saquihuanguichu. 30Ñuca huañujpica, ñuca taitacuna maipi pambarishca pushtuman, Egiptomandaca apashpa pambagrihuangui” nircami.

Shina nijpimi Joseca:

“Ari can nishcataca pactachishami” nirca.

31Taita Israelca:

“Shina cashpaca, juramentunami cangui” nircami. Shina nijpimi Joseca juramenturca.

Chai jipami taita Israelca, uma sauna jahuapi urai cumurishpa Taita Diosta mañajurca.

Currently Selected:

GÉNESIS 47: QVI16

Highlight

Copy