GÉNESIS 43

Josepaj huauquicuna, Benjaminda pushashpa Egiptoman tigrashcamanda

1Canaán llactapica, ashtahuanmi yarjai punllacuna chayamurca. 2Egiptomanda randimushca trigopash tucurijpimi, taita Jacobca paipaj churicunataca: “Ñucanchi micungapa asha granoguta randingapa, Egiptoman tigraichilla” nirca. 3Shina nijpimi Judá runaca cashna nijurca: “Chai llactata mandaj runaca, ‘cangunapaj huauquita, na pushamushpaca, ñuca ñavipica napacha ricurimunachu canguichi’ nircami. 4Ñucanchi huauqui Benjaminda cachajpillami urai rishpa, granocunata randimuita ushashun. 5Ashtahuangarin paita na cachajpica, napacha ri ushashunllu. ‘Cangunapaj huauquita na pushamushpaca, ñuca ñavipica na ricurimunachu canguichi’ nircamari” nijurcami. 6Shina nijpimi taita Israelca: “¿Imashpata chai runamanga, shuj huauquitapash charinchimi nishpa villarcanguichi? Cunanga, ñucatami ninanda llaquichihuanguichi” nircami. 7Shina nijpimi paicunaca cashna ninajurca: “Chai runamari ñucanchimandapash, ñucanchi ayllucunamandapash callarishpa cashna tapuchirca: ‘¿Cangunapaj taitaca causanrachu? ¿Nachu shuj huauquitapash charinguichi?’ nijurcamari. Shina tapujujpimi tucuita villarcanchi. ‘Cangunapaj huauquitaca pushamunapachami’ canguichi ningataca, ¿imatata yachashunyari?” ninajurcami. 8Chai jipami Judá runaca, paipaj taita Israeltaca cashna nijurca: “Cambash, ñucanchipash, ñucanchi huahuacunapash, yarjaimanda ama huañungapaca, ñucanchi huauquiguta cachapailla. Paita cachajpica, cunanda rishunllami. 9Paitaca ñucami tigrachimusha. Paita na tigrachimujpica, ñucata juchachihuanguilla. Cambaj ñaupajman paita na tigrachimushpaca, tucui ñuca causaipimi na alicachi tucushpa causapasha. 10Na ashtahuan imatapash ninajushpaca, ñami ishcaicaman rishpa tigramunchiman carca” nijurcami. 11Shina nijpimi taita Israelca cashna nirca: “Cangunapaj nishcata ruraichilla. Chai mandaj runaman carangapaca, balsamota, balun mishquita, mishquilla ashnajun jambita, mirrata, tuctita, almendrota, cai llactapi tucui ima ali tiyashcata, asha ashagu cangunapaj muchilapi churashpa apanguichi. 12Culquitaca punda apashcamandaca chaupi yalitami apana canguichi. Cangunapaj costal shimipi tigrachimushca culquitapash apashpami rina canguichi. Chaitaca, pandashpara tigrachimushca canman. 13Cangunapaj huauquitapash pushashpa, chai runapajman tigraichilla. 14Tucui Ushaita charij Taita Diosllatami, chai runa cangunata llaquishpa chasquichun, cangunapaj chaishuj huauquitapash, Benjamín churigutapash cacharichun tucuita ruranga. Huahuacuna illaj saquirina cajpica, chashnachari canga” nijurcami. 15Shina nijpimi caranacunatapash apashpa, culquitapash chaupi yalita apashpa, Benjamindapash pushashpa, Egipto llactaman urai rishpa Josepajman chayagrirca. 16Joseca, paipaj huauqui Benjamindaca, caishuj huauquicunandi chayamunta ricushpami, paipajta ruraj runataca cashna nirca: “Chai runacunataca, ñuca huasiman pushailla. Shinallata, shuj huagrata huañuchishpa yanugri. Chaupi punllapica, paicunaca ñucahuanmi micunajunga” nircami. 17Pai ima nishcashnami chai runaca, Josepaj huauquicunataca, Josepaj huasiman pushashpa rirca. 18Josepaj huasiman pushanajujpimi, ninanda manllarishpa paicunaca cashna ninajurca: “Punda shamuipimi, ñucanchi costalcunapica culquita tigrachishpa cachashca carca. Chaimandami cunanga, ñucanchitapash, burrucunandi, paipajta rurashpa causachun, upallamanda juchachingapa caiman pushamun yarin” ninajurcami. 19Josepaj huasiman yaicuna pungupi shayarishpami, chai huasipi tucuita ricushpa mandajuj runapajman quimirishpa parlanajurca. 20Chaipimi paicunaca cashna ninajurca: “Aij, ñucanchita mandajlla. Na llullashpami nipanchi. Pundaca micuna granoguta randingapami urai shamuparcanchi. 21Samana pushtuman chayashpa, ñucanchi costalcunata pascajpica, tucuicunapaj costal shimicunapi culquica, tucuillapacha tiyanajujtami tariparcanchi. Chai culquitaca, cutin tigrachingapami apamuparcanchi. 22Ñucanchica micuna granocunata randingapami, culquitapash ashtahuan apashpa shamuparcanchi. Ñucanchica, chai culquita costalcunapi maijan churashcatapash, na yachashcami caparcanchi” ninajurca. 23Shina ninajujpimi chai runaca: “Ama manllarishpa, cushilla caichilla. Cangunapajpash, cangunapaj taitapajpash Taita Diosmi, chai culquitaca cangunapaj costalcunapi ricuchishca. Canguna granota randingapa apamushca culquitaca ñucami japircani” nircami. Chai jipami, Simeondaca llujchishpa paicunapajman apamurca. 24Chai runaca, tucuicunatami Josepaj huasiman pusharca. Shina pushashpa yacuta paicunaman cujpimi, chaquita maillanajurca. Paicunapaj burrucunamambashmi, micuchun churarca. 25Chaupi punllacaman José chayamuna cajpimi, caranacunata alichinajurca. Paicunaca, chaipi micuna cashcata yachashpami, chashna ruranajurca.

26Huasiman José shamujpica, maquipi charinajushca caranacunata huasi ucuman apamushpa cushpami paicunaca, Josepaj ñaupajpi alpaman chayajta cumurinajurca. 27Joseca, alillachu canguichi nishca jipami, cashna nishpa tapurca: “Cangunapaj taitaca causanrami nishpami villarcanguichi. ¿Chai taitaguca alillachu capan? ¿Paica causajunrachu?” nircami. 28Shina nijpimi cashna ninajurca: “Cambajta ruraj ñucanchi taitaca alillami capan. Paica causajupanrami” ninajurca. Shina nishpami, paipaj ñaupajpi urai cumurinajurca. 29Shina cajpimi Joseca, taitamanda, mamamanda, paipaj huauqui Benjaminda ricushpaca cashna nijurca. “¿Ñucaman parlanajushca cangunapaj jipa huauquica, paichu?” nirca. Shina nishpami, Benjamindaca: “Ñuca huahualla, Taita Dios candaca llaquipachun” nirca. 30Joseca paipaj huauquita ricushpaca, paipaj shungu ucupi ninanda llaquirishpami, chaimanda llujshishpa pai puñuna ucuman yaicushpa, chaipi huacajurca. 31Ña huacashca jipa, ñavita maillarishpa llujshishpami: “Micunata churamuichi” nirca. 32Shina nijpimi: José micuchumbash shican, Josepaj huauquicunamambash shican, chai huasipi causaj Egipto gentecunamambash shican churarca. Egipto gentecunaca, hebreo gentecunataca yangapi churashpa, na ricunayachishpami, paicunahuanga napacha pacta micun carca. 33Josepaj ñaupajpimi, punda churimanda callarishpa, jipa churicaman, catipi catipi tiyachirca. Shina tiyanajushpami, caishuj chaishuj manllarishpa, paicunapura ricurinajurca. 34Josepaj ñaupajpi tiyajuj micunacunatami, tucuillaman yalichinajurca. Ashtahuangarin, Benjaminbaj micunaca, tucuicunapajta pichacaman yali, ashtacami carca. Shinami paicunaca, Josehuan micushpa, ufiashpa cushijunajurca.

Currently Selected:

GÉNESIS 43: QVI16

Highlight

Copy