GÉNESIS 42

Josepaj huauquicuna micunata randingapa rishcamanda

1Jacob runaca, Egipto llactapi micuna tiyajta yachashpami, paipaj churicunataca: “¿Imashpata caishuj chaishuj rimarishpalla shayanajunguichi?” nircami. 2Shinallata cashnatapashmi nirca: “Egiptopi micuna tiyan nijtami uyashcani. Ama huañungapa chaiman urai rishpa, micunata randimugrichi” nircami. 3Shina nijpimi, Josepaj chungapura huauquicunaca, Egiptopi trigota randingapa urai rinajurca. 4Ashtahuangarin Jacobca, Josepaj huauqui Benjamindaca, paipaj huauquicunahuanga na cacharcachu. “Paitapash, imapash llaquicuna japingami” yashpami na cacharca. 5Canaán llactapi yarjai tiyajpimi, Israelpaj churicunaca granocunata randingapa rij shuj gentecunahuan rinajurca. 6Egiptopica, José mandajushpami, chai llactapica tucui gentecunaman granota jatujurca. Josepaj huauquicuna chaiman chayashpaca, alpaman chayajtami urai cumurinajurca. 7Joseca, paipaj huauquicunata ricushpaca, rigsircallami. Ashtahuangarin Joseca, paicunata na rigsijshnalla tucushpami, fiñaj ñavita ricuchishpa, shinllita rimashpa: “¿Maimandata canguichi?” nirca. Shina nijpimi paicunaca: “Canaán llactamandami, granota randingapa shamuparcanchi” ninajurca. 8Joseca, paipaj huauquicunata rigsijpipash, ashtahuangarin paicunaca na rigsircachu. 9Shinamandami Joseca, paicunamanda muscuicunata charishcata yarijurca. Paicunataca cashnami nirca: “Cangunataca, pacalla ricuchunmi cachamushcanga. Cai llacta maipilla na jarcashcata ricungapallami shamushcanguichi” nircami. 10Shina nijpimi paicunaca cashna ninajurca: “Ñucanchita mandajlla, na shinachu capan. Ashtahuangarin cambajta rurajcunaca, granoguta randingapallami shamuparcanchi. 11Tucui ñucanchica, shujlla taitapaj huahuacuna, ali gentecunami capanchi. Cambajta rurajcunaca, napacha pacalla ricushpa purijcunachu capanchi” ninajurcami. 12Ashtahuangarin Joseca cashnami nirca: “Na chashnachu. Cangunaca, cai llacta maipilla na jarcashca cajta ricungapallami shamushcanguichi” nircami. 13Shina nijpimi paicunaca cashna ninajurca: “Cambajta rurajcunaca, chunga ishcai huauquipura, Canaán llactapi causajuj, shujlla taitapaj churicunami capanchi. Tucuicunapaj jipa huauquica ñucanchi taitahuanmi saquirirca. Shujca ña chingariparcami” ninajurcami. 14Shina nijpimi Joseca: “Ñuca ña nishcashna, pacalla ricuj shamushcacunami cashcanguichi. 15Cashnata rurashpami cangunataca yachasha: Faraonbaj shutipimi cashna nini: Cangunapaj jipa huauqui caiman na shamujpica, caimandaca napacha llujshi ushanachu canguichi. 16Cangunaca caipi prezu saquirishpa, cangunapaj cati huauquita pushamuchun shujtaca cachaichilla. Shina pushamujpimi, canguna na llullanajushcataca yachasha. Na cashpaca, Faraonbaj shutipimi cashna nini: Cangunaca, pacalla ricuchun cachamushcacunami canguichi” nircami. 17Shina nishpami paicunataca, prezuna huasipi quimsa punllacunacaman vicharca. 18Ña quimsa punllapimi Joseca: “Ñucaca, Taita Diostami manllani. Canguna huañungapa na munashpaca ñuca nishcatami pactachina canguichi. 19Canguna ali gentecuna cashpaca, cangunapuramanda shujca, cai prezuna huasipi saquirichi. Caishujcunaca, cangunapaj huasipi ayllucunaman granota apashpa richilla. 20Shinallata cangunapaj jipa huauquitaca, pushamunapachami canguichi. Shina pushamushpaca, canguna parlanajushcapash chashnapacha pactajpimi, na huañunguichi” nircami. Shina nijpimi paicunaca, chashna ruranajurca. 21Paicunaca caishuj chaishujmi cashna ninajurca: “Ñucataca na jatunachu cahuanguichi nishpa, ninanda llaquirishpa José mañajujpipash, ñucanchi huauquita jatushpaca, ninan juchatami rurashcanchi. Chaimandami, cai tucui llaquita apanajunchi” ninajurcami. 22Shina ninajujpimi Rubenga cashna nirca: “¿Nachu, ‘chai huambraguta na llaquichinachu canchi’ nijurcani? Shina nijpipash na uyashpami llaquichircanguichi. Chaimandami ñucanchitapash cai llaquica japimushca” nijurcami. 23Joseca, paicunahuanga, Egipto llacta rimaipimi rimajurca. Chaitami shuj runaca, paicunapaj rimaipi yalichijurca. Paicuna chashna rimarinajushpaca, paicunapaj rimaitaca, Joseca na yachanllu yanajurcami. 24Joseca, paicunapaj ñaupamanda anchurishpa rishpami huacajurca. Chai jipaca, paicunapajman tigrashpami, Simeondaca paicuna ricujta huatashpa prezu churarca. 25Chaipaj jipaca Joseca, paicunapaj costalcunapi trigota jundachishpa, tucuilla paicunapaj culquitapash, chai costalpillata churachunmi mandarca. Shinallata, ñanda rishpa micunajuchumbash, cucabichishpa cachachunmi mandarca. Tucuitami, pai mandashcashna ruranajurca. 26Chai jipami paicunapaj trigotaca, paicunapaj burrucunapi apachishpa chaimanda rinajurca. 27Shina rinajushpami, paicunapuramanda shujca, samana huasipi paipaj burruman micuchingapa costalta pascajushpaca, paipaj culquica costal shimipi tiyajushcata tarirca. 28Shina ricushpami, paipaj huauquicunataca cashna nirca: “Ricuichi, ñuca culquitaca tigrachimushcamari cashca. Cai ñuca costalpimi tiyajushca” nirca. Shina nijpimi, ninanda manllarishpa, caishuj chaishuj: “¿Taita Diosca, imatata ñucanchitaca rurashcayari?” ninajurca. 29Canaán llactaman tigramushpaca, tucui ima tucushcatami, paicunapaj taita Jacobman cashna nishpa villanajurca: 30“Chai llactata mandaj runaca, pacalla ricungapa rishcacunatashnami, ñucanchitaca, fiñaj ñavihuan shinllita rimarca. 31Shina rimajpimi ñucanchica cashna nircanchi: ‘Ñucanchica ali gentecunami capanchi. Napacha pacalla ricushpa purijcunachu capanchi. 32Ñucanchica, shujlla taitapaj churicuna, chunga ishcai huauquicunami capanchi. Shujca ña chingaripashcami. Tucuicunapaj cati huauquica, Canaán llactapimi, ñucanchi taitahuan saquirirca’ nircanchimi. 33Shina nijpimi, chai llactata mandaj runaca cashna nirca: ‘Caita rurajpimi, cangunataca ali gentecuna cajtaca yachasha. Cangunapaj huauquipuramanda, shujta ñucahuan saquishpa, cangunapaj ayllucunaman granota apashpa richilla. 34Na pacalla ricuchun cachamushca, ali gentecuna cashcata yachangapaca, cangunapaj jipa huauquita pushamunguichi. Shina pushamujpimi, cangunapaj caishuj huauquitaca tigrachisha. Chai jipami cai llactapica, randishpa jatushpa puri ushanguichi’ nircami” nishpami villanajurca. 35Chai jipaca paicunapaj grano costalcunata talijpica, tucuicunapaj costalpimi, paicunapaj culqui huatashcacunapash tiyanajushca carca. Chai culqui huatashcacunataca paicunapash, paicunapaj taitapash ricushpami, ninanda manllarinajurca. 36Chaimandami paicunapaj taita Jacobca cashna nirca: “Cangunaca, churicuna illajtami saquigrihuanguichi. Josepash ña chingarishcami. Simeonbash na shamushcachu. Cunanga, Benjamindapashmi apagringuichi. Tucui caicunaca, ñucatamari ninanda llaquichijun” nircami. 37Rubenga, paipaj taitataca cashnami nirca: “Cambaj churita ñuca na tigrachimujpica, ñucapaj ishcandi churicunata huañuchipanguilla. Cambaj churitaca, ñuca maquipi saquihuailla. Paitaca, ñucami canman tigrachimupasha” nijurcami. 38Shina nijpimi Jacobca, cashna nirca: “Ñuca churiguca, napacha cangunahuan urai ringachu. Paipaj huauquipash ñami huañushca, paillami ñucahuan saquiripashca. Canguna rinajuj ñambi ima llaquipash japijpica, yuraj ajchayu ñucataca, cangunami jatun llaquihuan, Seolman urai cachahuanguichi” nijurcami.

Currently Selected:

GÉNESIS 42: QVI16

Highlight

Copy