GÉNESIS 44

Josepaj culqui copamanda

1Joseca, paipaj huasipi tucuita ricushpa mandaj runatami cashna nirca:

“Cai runacunapaj costalcunapica, granocunata, mashnata apai ushanata ricushpa jundachinguilla. Shinallata, culquitapash tucuicunapaj costalpi churangui. 2Shinallata, ñucapaj copatapash churangui. Chai culqui copataca, trigomanda pai cushca culquindi, jipa huauquipaj costalpi churanguilla” nircami.

Shina nijpimi chai runaca José ima nishcata rurarca. 3Cayandi ña punllayashcapica, “cayacaman” nishpa, chai runacunata cachajpimi, paicunapaj burrucunandi rinajurca. 4Paicuna pueblomanda llujshishpa, nara caruta rijpillatami Joseca, paipaj huasipi tucuita ricuj runataca cashna nirca:

“Chai runacunata catishpa rishpa japigri. Ña japigrishpaca cashna ningui: ‘¿Imamandata alita rurashcamandaca, na alitara rurashcanguichi? ¿Imamandata ñuca culqui copata shuhuarcanguichi? 5¿Nachu chai copaca, ñucata mandaj ufiana copa? ¿Nachu chai copapi, paica imatapash yachai ushan? Caita rurashpaca, na alitamari rurashcanguichi’ ningui” nircami.

6Ña japigrishpaca, tucuitami chashnatapacha nijurca. 7Shina nijpimi paicunaca cashna ninajurca:

“Ñucanchita mandajlla, ¿imamandata chashnaca nipanguiyari? Cambajta rurajcunaca, napacha chashnata rurajcunachu canchi. 8Ricui, ñucanchi costal shimicunapi tarishca culquitapash, Canaán llactamandapacha apamushpami, canman tigrachiparcanchi. ¿Imamandata, canda mandajpaj huasimandaca culquita, curitaca shuhuashunyari? 9Cambajta ruraj ñucanchimanda maijambash, chai copata apajushpaca huañunatami charin, ninchimi. Shinallata, ñucanchipash, ñucanchita mandajpajta rurajcunami tucushun ninchimi” ninajurcami.

10Shina ninajujpimi chai runaca cashna nirca:

“Cunanga, canguna nishcashna pactachun. Chai copata, maijan apajuj runami, ñucapajta ruraj tucunga. Maijan na apajujcunaca, ringallami” nircami.

11Shina nijpimi paicunaca, costalcunata ucha alpaman uriajuchishpa, tucuicuna pascanajurca. 12Shina pascajpimi, rucu huauquipaj costalmanda callarishpa, jipa huauquipaj costalcaman mascashpaca, chai copataca Benjaminbaj costalpi tarirca. 13Shinamandami, paicuna churajushcacunata pilarishpa, paicuna apanajushcacunata burrupi cutin apachishpa, puebloman tigranajurca. 14Judá runaca, paipaj huauquicunandi, Josepaj huasiman shamushpaca, José chaipi cajpimi, paipaj ñaupajpi urai cumurinajurca. 15Chaipimi Joseca cashna nirca:

“¿Imashpata cashna rurarcanguichi? Ñucashnalla runaca, imatapash yachai ushanlla candaca, ¿nachu yachanguichi?” nircami.

16Shina nijpimi Judá runaca cashna nirca:

“Ñucata mandajtaca, ¿imatata nipashunyari? ¿Imatata rimapashunyari, na cashpaca ima nishpata alipi ricuripashunyari? Cambajta rurajcuna na alita rurashcamandami, Taita Diosca cashna rurashca. Cunanmandaca ñucanchipash, chai copata apaj huambrapash, ñucanchita mandaj cambajta rurajcunami capanchi” nijurcami.

17Shina nijujpimi Joseca cashna nirca:

“Ñucaca napacha chashna rurashachu. Chai copata charijushca huambrallami, ñucapajta rurangapa saquiringa. Cangunaca, taitapajman aliguta tigraichilla” nircami.

Benjaminda cacharichun, Judá mañashcamanda

18Shina nijpimi Judá runaca, Josepajman quimirishpa cashna nijurca:

“Aij, ñucata mandajlla. Shuj shimiguta rimachun saquihuayari nipanimi. Cambajta ruraj ñucahuanga, ama ninanda fiñaripanguichu. Canga, jatun mandaj Faraonshnallatami capangui. 19Ñucata mandaj canllatami, cambajta rurajcunataca: ‘¿Nachu taitata, huauquita charinguichi?’ nishpa tapurcangui. 20Shina tapujpimi, ñucanchita mandaj canmanga cashna niparcanchi: ‘Ña rucu taitagutami charipanchi. Shuj cati huauquigutapashmi charipanchi. Paica, taita ña rucugu cashpa charishca, uchilla huambragumi capan. Paipaj ñaupariyaj huauquica huañujpimi, paipaj mamapaj huahuacunamandaca, pailla saquirishca. Paipaj taitaca, paitami ninanda juyan’ niparcanchimi. 21Shina nijpimi, cambajta ruraj ñucanchitaca: ‘Paita pushamuichi. Paitaca, ñuca ñavihuambacha rijsingapami munani’ niparcangui. 22Chaimandami ñucata mandajtaca, cashna niparcanchi: ‘Chai huambraguca, paipaj taitataca na saqui ushapanllu. Saquijpica, paipaj taitaca huañungami’ niparcanchimi. 23Shina nijpimi cambajta ruraj ñucanchitaca, cashna nircangui: ‘Cangunapaj jipa huauqui cangunahuan na shamujpica, ñuca ñaupajmanga napacha tigramunachu canguichi’ niparcanguimi.

24Cambajta ruraj ñuca taitapajman chayashpaca, ñucata mandaj can imatalla nishcatami paiman villarcanchi. 25Shina villajpimi, ñucanchi taitaca: ‘Asha granoguta randingapa tigraichi’ nirca. 26Shina nijpimi cashna nircanchi: ‘Na ri usharingachu. Ñucanchi huauqui ñucanchihuan rijpillami ripashun. Paita na pushashpa rishpaca, na chai runapaj ñavipica ricuri ushanachu canchi’ nircanchimi. 27Shina ninajujpimi, cambajta ruraj ñuca taitaca, ñucanchitaca cashna nirca: ‘Cangunallata yachanguichimi, ishcai churigutami ñuca huarmi Raquelhuanga charircani. 28Shujcarin, ñuca ñaupajmanda rishpaca cutinga ña na tigramurcachu. Paitaca millai animalcunami, caita chaita fitishpa micushcanga yanimi. Paitaca, cunangaman na ricunichu. 29Cai huambragutapash, canguna ñuca ñaupajmanda apajpi, paitapash ñambi llaqui japijpica, yuraj ajcha tucushca ñucataca, jatun llaquihuanmi Seolman urai cachahuanguichi’ nircami.

30Cunanga, cambajta ruraj ñuca taitapajman, huambragu ñucahuan na rijpica, taitapaj shunguhuan, huambragupaj shunguhuan huatarishcashna juyarishcamandami, 31huambraguta na ricushpaca, huañupanga. Cambajta ruraj ñucanchimi, rucuyashpa, yuraj ajcha tucushca, cambajta ruraj ñucanchi taitataca, jatun llaquihuan Seolman urai cacharinga. 32Cambajta ruraj ñucami, huambragutaca ñuca taitapajman tigrachimushami nishpa cashna niparcani: ‘Huambraguta canman ñuca na tigrachimushpaca, ñucami ñuca taitapaj ñaupajpica, tucui causaipi llaquita apashpa causasha’ niparcanimi. 33Chaimandami huambragupaj randica, can mandapajta rurangapaca, cambajta ruraj ñuca saquiripasha nishpa mañapani. Huambragutaca, paipaj huauquicunahuan richun saquipailla. 34Ashtahuangarin huambraguta na pushashpaca, ¿imashnata ñuca taitapajman tigrapashayari? Ñuca taitata llaqui japijta ama ricungapami, na ri ushapasha” nijurcami.

Currently Selected:

GÉNESIS 44: QVI16

Highlight

Copy