GÉNESIS 41

Faraón muscushca ima tucunata, José villashcamanda

1Ishcai huata jipami Faraonga muscuita charirca. Paica jatun yacu rijuj manñapi shayajushpami muscurca. 2Chai jatun yacumandaca, virayashca juyailla canchis huarmi huagracuna llujshimushpa, jihua pambapi micunajujmi ricurirca. 3Chai huagracunapaj catipica, millanai tullu tullu canchis huarmi huagracuna jatun yacumanda llujshimushpami, chai juyailla huagracuna shayanajuj pushtupi shayanajurca. 4Chai millanai tullu tullu huagracunaca, ninan virayashca juyailla chai canchis huagracunatami micushpa tucuchirca. Shina muscujushpami, Faraonga rijcharirca. 5Cutin puñushpaca cashnatapashmi muscurca: Shuj trigo yuramandalla malquishpa, grano junda juyailla canchis trigo caspacuna viñanajujtami muscurca. 6Chaipaj catica, huaira rupaihuan chaquishpa jamsiyashca, canchis trigo caspacunami llujshirca. 7Chai chaquishpa jamsiyashca canchis trigo caspacunami, grano junda canchis racu trigo caspacunataca micushpa tucuchirca. Shina muscushpa Faraón rijcharishpaca, muscuilla cashcatami yacharca. 8Cayandi tutamanda paipaj shungupi ninanda manllarishca cashpami, Egiptopi causanajuj tucui yachajcunata, tucuilla alipacha yachajushcacunata cayachun cacharca. Paicunamanmi, pai muscushcacunata Faraonga villajurca. Ashtahuangarin chai muscuicuna ima cajta Faraonman villaitaca, pipash na usharcachu.

9Chashna cajpimi vinota yalichijcunata mandaj runaca, Faraondaca cashna nirca: “Ñuca na pagui nishpa causajushcataca, cunanmi yachani. 10Mandaj Faraonlla, cambajta ruraj ñucanchita fiñashpami, ñucatapash, tandata rurajcunata mandajtapash, tucuita ricushpa shayaj runacunata mandajpaj prezuna huasipi churarcangui. 11Chaipimi, paipash ñucapash, chai tutallata shuj muscuita charircanchi. Chai muscuicunaca, ishcandillatami ima tucunata ricuchijurca. 12Chaipica, chai prezuna huasipi mandajpajta rurashpa causaj hebreopura, shuj huambrami ñucanchihuan carca. Chai muscuicunata paiman villajpimi, ñucanchij muscushcacuna ima cajtapash, ñucanchi ima tucunatapash villarca. 13Chai jipaca pai nishcashna pactajpimi, ñucaca punda imata rurajushca pushtupillata cutin churai tucurcani. Caishujca, sipishpami huarcui tucurca” nircami.

14Chai jipaca, Joseta pushamuchun Faraón cachajpimi, prezuna huasimanda ucha pushamunajurca. Paitaca, barbastapash cuchuchishpa, mushujta churachishpami, Faraonbaj ñaupajman pushamurca. 15Faraonga, Josetaca cashnami nirca: “Ñucami, shuj muscuita charircani. Chai muscui ima cajtaca pipash na villai ushanllu. Ashtahuangarin candami, muscuicuna ima cajta villanlla nijta uyashcani” nircami. 16Shina nijpimi Joseca, Faraondaca cashna nirca: “Caitaca na ñucamandalla villai ushanichu. Mandaj Faraonlla, chai muscui ima canataca, Taita Diosllami villai ushanga” nircami.

17Shina nijpimi Faraonga, Josetaca cashna nirca: “Ñuca muscuipica, jatun yacu rijuj manñapimi shayajurcani. 18Chai jatun yacumandaca, ninan virayashca, juyailla canchis huarmi huagracuna llujshinajujmi ricurirca. Chai huagracunaca, jihua pambapimi micunajurca. 19Chai huagracunapaj catica, tullu tullu millanai canchis huagracunami, jatun yacumanda vichai llujshinajurca. Chashnapacha, tullu tullu huañunayai huagracunataca, tucui cai Egipto llactapica napacha ricushcanichu. 20Chai tullu tullu millanai huagracunami, punda llujshishca ninan racu juyailla canchis huagracunataca micushpa tucuchirca. 21Chai huagracunata micushpapash, micushcashnallapash na ricurircachu. Chai tullu tullu huagracunaca, pundashnallata tullu tullucunami carca. Shinata muscujushpami rijcharircani. 22Cutin muscushpaca, shuj trigo yuramandalla malquishpa, grano junda juyailla canchis trigo caspacuna viñanajujtami ricujurcani. 23Chaipaj catica, huaira rupaihuan chaquishpa jamsiyashca canchis trigo caspacunami viñarca. 24Huaglishpa jupayashca chai caspacunami, juyailla canchis caspacunataca micushpa tucuchirca. Yachaj runacunaman villajpipash, chai muscui ima cajtaca pipash na villai usharcachu” nijurcami.

25Shina nijpimi Joseca, Faraonman cashna nijurca: “Mandaj Faraonlla, chai muscuicunaca shujllami. Taita Diosmi, Pai imata ruranata Faraonmanga ricuchishca. 26Chai canchis juyailla huagracunaca, canchis huatacunami. Juyailla trigo caspacunapash, canchis huatacunallatami. Chai muscuicunaca shujllami. 27Shinallata, juyailla huagracunapaj catipi llujshishca, millanai tullu tullu canchis huagracunapash canchis huatacunallatami. Rupai huairahuan chaquichishca jamzi trigo caspacunaca, canchis huatacunata yarjai punllacuna tiyanatami ricuchijun. 28Mandaj Faraonlla, caitami villapani. Taita Diosca, Pai imata ruranatami Faraonman ricuchishca. 29Uyapai, tucui cai Egipto llactapimi canchis huatacamanlla, granocuna ninandapacha fucunga. 30Chaipaj catica, canchis huatacunatami ninan yarjai punllacuna tiyanga. Shina cajpimi, cai Egipto llactapi tucui granocuna fucushcacunaca tucuringa. Yarjai punllacuna chayamushpami tucui cai llactapi causajcunataca tucuchinga. 31Chashna ninan yarjai punllacuna tiyashcamandami, ninanda fucushca granocunaca ña tucuilla tucuringa. 32Mandaj Faraonlla, Taita Diosca chashnatapacha pactachina cajpimi, chai ishcai muscuitaca charishcangui. Chaitami Taita Diosca ña pactachigrijun. 33Mandaj Faraonlla, cunanga cai Egipto llactata ricuchunga, alipacha yarishpa purij, ali yachajushca shuj runatami mascashpa churana cangui. 34Mandaj Faraonlla, cai llactapica cati mandajcunatapash churapailla. Canchis huatacunata Egipto llactapi ninanda fucujpica, chai granocunataca, paicunami pichapi chaupishpa, shuj chaupitaca alichinajunga. 35Shinallata, tucui ima fucushca granocunatami, cai shamuj ali huatacunapica tandachinajunga. Mandaj Faraonllata ricushpami, cai llactapi micuna tiyachunga, trigotaca tandachishpa alichina cangui. 36Tucui chai tandachishca granocunaca, Egipto llactapi canchis huatacunata yarjai punllacuna chayamungacamanmi alichishca tiyajunga. Chashna rurajpimi cai llactapi causajcunaca na yarjaimanda huañunga” nijurcami.

Josetaca, Egiptopi cati mandaj cachun churashcamanda

37José chashna nishcacunaca, Faraonbajpash, paipajta rurajcunapajpash alipachami ricurirca. 38Shina cashcamandami Faraonga, paipajta rurajcunataca cashna nirca: “¿Taita Dioshuan causaj, paishnalla shuj runataca tari ushanachu canchi?” nishpa tapurca. 39Faraonga, Josetaca cashnami nirca: “Taita Diosmi, canmanga cashna yachachishca, canshnalla alipacha yachajushca runaca pipash na tiyanllu. 40Canmi caipica tucuita ricushpa mandangui. Can mandajpimi tucui gentecuna cazushpa tucuita ruranajunga. Ñucaca, jatun mandaj cashcamandallami candaca yali ricurisha” nircami. 41Faraonga Josetaca cashnatapashmi nirca: “Ricui, candaca tucui Egipto llactata mandachunmi churani” nircami. 42Shina nishpami Faraonga, paipaj maquimanda surtijata surcushpa, Josepaj maquipi churachirca. Shinallata lino puchata ahuashca, alipacha churajunacunata churachishpami, curimanda rurashcatapash cungapi churachirca. 43Josetaca, Faraonga, paipaj cati carretapi tiyachishpami, ¡paipaj ñaupajpi tucuicuna cungurichun! mandarca. Chashnami Josetaca, tucui Egipto llactata mandachun churarca. 44Chaipaj jipaca Faraonga, Josetaca cashnami nirca: “Ñucami Faraón cani. Tucui cai Egipto llactapica, can mandajpillami pipash tucuita ruranga” nircami.

45Faraonga, Josetaca, Zafnat-panea shutitami shutichirca. On shuti pueblopi causaj Potifera shuti sacerdotepaj ushi, Asenat shuti cuitsahuanmi paitaca cazarachirca. Chai jipami Joseca, tucui Egipto llactata ricungapa llujshirca.

46Egipto llactata jatun mandaj Faraonbaj ñaupajman pushai tucushca punllapica, Joseca quimsa chunga huatatami charirca. Joseca, Faraonbaj ñaupajmanda llujshishpami, tucuilla Egipto llactata ricungapa rirca. 47Chai canchis huatapica, chai llactapica granocunaca ninandapachami fucurca. 48Egipto llactapi canchis huatata ninanda fucushca granocunataca, Josemi tandachishpa tucuilla pueblocunapi alichijurca. Chai pueblocunapaj muyundi pambacunapi fucushca granocunaca, chai pueblocunapillatami alichirirca. 49Joseca, mama cucha manñapi t'iyu alpatashnami trigotaca ninandapacha tandachirca. Yupaitapash na ushanalla cajpimi, na ushangacaman tandachijurca.

50Joseca, yarjai callari huata nara chayamujpillatami ishcai huahuacunata charirca. Chai huahuacunataca, On shuti pueblomanda Potifera shuti sacerdotepaj ushi Asenat shuti huarmihuanmi charirca. 51Joseca: “Taita Diosmi, tucui llaquicunatapash, ñuca ayllucunatapash, cungachihuashca” nishpami, paipaj punda churitaca, Manasés shutita shutichirca. 52Shinallata Joseca: “Cai llactapi llaquita apashpa causajujpipash, Taita Diosmi huahuacunata charichun ushaita carahuashca” nishpami, paipaj cati churitaca Efraín shutita shutichirca.

53Shinami Egipto llactapi, granocuna ninanda fucuna canchis huatacunaca pactarca. 54Chai jipaca, José villashcashnami, canchis huatacunata ninan yarjai tiyarca. Ashtahuangarin, tucuilla llactacunapi ninan yarjai tiyajpipash, Egipto llactapica micuna tiyarcami. 55Egipto llactapi causaj gentecuna micunata ña na charishpami, Faraondaca ninanda caparinajurca. Shina cajpimi Faraonga, Egipto llactapi causajcunataca: “Josepajman rishpa, pai imata nishcata ruranguichi” nijurca. 56Tucui Egipto llactapi yarjai tiyajpimi Joseca, tucui pueblocunapi granocunata alichishca ucucunata pascashpa, gentecunaman jatujurca. Egipto llactapica, ashtahuan ninan yarjai tiyajpimi, chashna jatujurca. 57Shinallata, shuj llactacunapipash ashtahuan yarjai tiyajpimi, Josepaj maquimanda trigota randingapa, Egipto llactaman shamunajurca.

Currently Selected:

GÉNESIS 41: QVI16

Highlight

Copy