GÉNESIS 40
40
Ishcai muscuicuna ima tucunata, José villashcamanda
1Chai punllacuna jipami cashna tucurca: Egipto llactata jatun mandajman vinota yalichij runapash, tandata ruraj runapashmi, Egipto llactata jatun mandajpaj ñaupajpica na alita rurarca. 2Shina cajpimi Faraonga, vinota yalichijcunata mandajhuambash, tandata rurajcunata mandajhuambash ninanda fiñarirca. 3Shina cashpami paicunataca, Joseta maipi prezu churashca Mandajcunapaj presuna huasipi prezu churarca. 4Chai prezuna huasipi mandaj runa, chai prezucunata José ricuchun mingajpimi, tauca punllacunata paica chaipi ricujurca. 5Egipto llactata jatun mandajman vinota yalichij runapash, tandata ruraj runapashmi prezuna huasipi cashpa shuj muscuicunata charirca. Paicunaca chai tutallatami, paicuna ima tucunata muscushca carca. 6Tutamandata paicunapajman José shamushpaca, llaquilla tiyanajujtami ricurca. 7Shina ricushpami, prezu tiyanajuj Faraonbajta ruraj runacunataca: “¿Imamandata chashna llaquilla canguichi?” nishpa tapurca. 8Shina nijpimi paicunaca, cashna ninajurca: “Shuj muscuitami charircanchi. Chai muscui ima canataca, pipash na villai ushanllu” ninajurcami. Shina nijpimi Joseca cashna nirca: “Chai muscui ima canata villanaca, ¿nachu Taita Diospaj canga? Cunanda ñucaman villahuaichilla” nircami. 9Shina nijpimi vinota yalichijcunata mandaj runaca, pai muscushcata Joseman cashna villajurca: “Ñucaca, shuj uva yura ñuca ñaupajpi shayajujtami muscurcani. 10Chai uva yurapica quimsa malquicunami viñarca. Chai yurapica, fangacuna jundashpami, ninandapacha sisajurca. Chai sisacunaca, ashtaca uvacuna tucushpami ninanda fucujurca. 11Faraonbaj copaca ñuca maquipimi carca. Ñucaca chai uvacunata japishpami, Faraonbaj copapi capishpa, Faraonman cujurcani” nircami. 12Shina nijpimi Joseca cashna nirca: “Chai muscui ima canapash cashnami: Quimsa malquicunaca, quimsa punllacunami. 13Quimsa punlla jipami, Faraonga canda perdonashpa, chaitallata rurachun cutin churanga. Shina cashpami, punda imashna copata yalichijun carcangui, shinallata, Faraonbaj maquipi cutin yalichishpa causangui. 14Can chashna alipi cashpaca, ñucata ama cungashpa, ñucamanda Faraonman villashpa, cai prezuna huasimanda ucha llujchihuangui. 15Ñucaca, hebreocunapaj llactamanda shuhuashpa, jatumui tucushcami cani. Shinallata, ñuca caipi prezu tiyajungapapash, ima na alitapash na rurashcanichu” nircami. 16Chai muscuica alipaj cashcata José villajpimi, tandata rurajcunata mandajpash cashna villajurca: “Ñucapashmari quimsa yuraj tazacuna ñuca uma jahuapi tiyanajujta ricujushpa muscurcani. 17Ashtahuan jahuaman tiyajuj tazapica, Faraonman rurashca, micunayai, mishquilla tucui tandacunami tiyanajurca. Chai ñuca umapi tiyajuj tazamandaca, alasyu animalcunami shamushpa micunajurca” nijurcami. 18Shina nijujpimi Joseca, cashna nirca: “Chai muscui ima canapash cashnami: Quimsa tazacunaca, quimsa punllacunami. 19Cunanmanda quimsa punlla jipaca, Faraonga cambaj umatami fitichishpa caspipi huarcunga. Shina huarcujpimi, alasyu animalcuna shamushpa, candaca micunajunga” nircami. 20Quimsa punlla jipa, jatun mandaj Faraón huacharishca punllata yarina cajpimi, tucui paipajta rurajcunaman jatun micuita paica rurajurca. Shina rurajushpami, vinota yalichijcunata mandajtapash, tandata rurajcunata mandajtapash, pushamuchun cacharca. 21Shinamandami, vinota yalichijcunata mandajtaca, punda imata rurajushcapillata cutin churajpi, Faraonman vino copata yalichijurca. 22Ashtahuangarin, tandata rurajcunata mandajtaca, pai imashna tucunata, José villashcashnami sipishpa huañuchinajuchun mandarca. 23Shina cashpapash, vinota yalichijcunata mandaj runaca, Josetaca na yarircachu.
Currently Selected:
GÉNESIS 40: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
