GÉNESIS 28
28
1Chai jipami Isaacca, Jacobta cayachun cachashpa bendiciashpaca, cashna nishpa mandarca: “Canaán llactapi causajcunapaj ushicunamandaca, ama cazaranguichu. 2Cunanga, Padan-aram llactapi causaj, cambaj mamapaj taita Betuelpaj huasiman rilla. Chaipica, cambaj mamapaj turi Labanbaj ushicunamanda, cambaj huarmi cachun japinguilla. 3Candaca, tucui ushaita charij Taita Dios bendiciashpa, ashtaca gentecuna tucungacaman, ninandapacha mirachijuchun. 4Candapash, cambaj miraicunatapash, Abrahamda bendiciashcashna bendiciachun. Chashna bendiciajpimi Abrahamman, Taita Dios carashca, alpacunataca japingui” nijurcami.
5Chai jipami Isaacca, Jacobtaca, Padan-aram shuti llactaman cacharca. Paica, arameopura Betuel runapaj churi, Labán runapaj huasimanmi chayagrirca. Labán runaca, Rebecapaj turimi carca. Paica, Jacobpaj, Esaupaj mamami carca.
6Esaú runaca, Isaac, Jacobta imashna bendiciashcatami yachaj chayarca. Shinallata, Padan-aram shuti llactamanda huarmita, cambaj huarmi cachun japingui nishpa cachashcatapashmi yachaj chayarca. Isaac bendiciajushpaca: “Canaán llactapi causajcunapaj ushicunamandaca, ama cazaranguichu” nishcami carca.
7Shinallata, taita mama imata nishcata cazushpa, Padan-aram llactaman, Jacob rishcatapashmi paica yachaj chayarca. 8Paipaj taita Isaacpaj ricuipica, Canaán llactapi causajcunapaj ushicunaca, Esaupajca na alicuna cashcatapashmi yachaj chayarca. 9Shinamandami Esauca, shuj huarmicunata ña charishca jahuapash, Abrahambaj churi Ismaelpaj ushi Mahalat shuti huarmihuan cazararca, Mahalat huarmica Nebaiot huarmipaj ñañami carca.
Taita Diosca, Bet-el pambapi Jacobman ricurishcamanda
10Jacobca, Beerseba pambamanda llujshishpami, Harán shuti puebloman rirca. 11Indi ña huashajushca cajpimi, shuj pushtuman chayashpa chaipi puñurca. Paica shuj rumita japishpami, saunashpa puñungapa siririrca. 12Chaipimi, paica cashna muscurca: Cai pachamanda, jahua pachacaman chayajta, shuj chacana shayajujta Taita Diospaj angelcunaca, uraimambash, vichaimambash purinajujtami muscurca. 13Mandaj Dios, chai chacana umapi ricurishpa, cashna nijtami uyarca: “Ñucami, cambaj ñaupaj taita Abrahambaj, Isaacpaj Mandaj Taita Dios cani. Can sirijungui chai alpataca, canmambash, cambaj miraicunamambashmi carasha. 14Cambaj miraicunaca, ñutu alpashnami miranga. Indi huashajunmandaca, indi llujshimujcaman, jahuamandaca, uracamanmi miranguichi. Canmandapash, cambaj miraimandapashmi, cai pachapi causaj tucui ayllucunaca bendiciai tucunga. 15Ñucaca, can maita rijujpipash ricuriashpa, canhuan pacta cashpami, cai llactaman tigrachimusha. Ñuca ima nishcata pactachingacaman, candaca na saquishachu” nircami.
16Jacob rijcharishpami, manllarishpa cashna nirca: “Mandaj Diosca, caipimari cashca. Chaitaca na yachashcanichu” nircami. 17Paica: “¡Cai pushtuca, jatun manllarinamari cashca! Caipica, Taita Diospaj huasipacha#28:17 Taita Diospaj huasitami, Bet-el ninajun cajpimi, jahua pachaman chayana pungu cashca” nijurcami.
18Jacobca tutamandata jatarishpami, uma saunapi churashca rumitaca, tucuicuna ricunalla cachun churashpa, chai rumi jahuapica aceiteta talirca. 19Shina rurashpami, chai pambataca Bet-el shutita shutichirca. Pundaca chai pambaca, Luz shuti pueblomi carca.
20Chaipimi Jacobca, Diosman pactachingapa cashna nijurca: “Taita Dios, ñucata, maita rijujpipash ricushpa, micunagutapash carashpa, churajunatapash carashpa, 21ñuca taitapaj huasiman aliguman tigrachimujpica, Mandaj Diosca, ñuca Taita Diospachami canga. 22Tucuicuna ricunalla cachun churashca cai rumimi, Taita Diospaj huasi canga. Tucui imata ñucaman carashcamandaca, chungamanda shujgutami Diosman cupasha” nijurcami.
Currently Selected:
GÉNESIS 28: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
