GÉNESIS 29

Raquelmandapash, Leamandapashmi, Jacobca Labán runapajta rurajushca

1Jacobca ñanda catishpa rishpami, indi llujshimujman tiyaj runacuna causaj alpaman chayagrirca.

2Paica ñanda rijushpami, yacuta llujchingapa allashca utujupi, animalcuna yacuta ufianajunda, shinallata, quimsapi shicanyachishca llamacuna shayanajujtapash ricurca. Chai utujutaca, jatun rumihuan quilpashcami carca. 3Chaipimi llamacunata tandachishpa yacuta llujchishpa caraj carca. Chai jipaca chai rumihuanllatami, chai utujutaca quilpashpa saquij carca. 4Chai michij runacunatami Jacobca:

“Ñuca huauquicuna, ¿maimandata capanguichi?” nishpa tapurca.

Shina tapujpimi, chai michijcunaca:

“Ñucanchica, Harán shuti pueblomandami capanchi” ninajurca.

5Shina nijpimi, Jacobca:

“¿Nachu, Nacorpaj churi Labán shuti runata rijsipanguichij?” nirca.

Shina nijpimi, chai michijcunaca:

“Ari, rijsipanchimi” ninajurca.

6Shina nijpimi, Jacobca:

“Laban runaca ¿alillachu capan?” nishpa tapurca.

Shina nijpimi: “Alillami causajupan. Ricui, chaitami paipaj ushi Raquelca, llamacunahuan shamujun” ninajurca.

7Shina nijpimi Jacobca:

“Nara chishanllu, animalcunataca nara tandachinachu canguichi. Llamacunaman yacuta ufiachishpaca, cutin michigrichilla” nirca.

8Shina nijpimi michij runacunaca:

“Nara animalcunamanga yacuta caranachu canchi. Tucuilla animalcunata tandandachishpami, yacuta llujchina utujumanda rumita anchuchishpa yacuta caranchi” ninajurca.

9Michij runacunahuan, Jacob chashna parlajujpillatami, Raquel cuitsaguca, llamacunata michij cashpa, paipaj taitapaj llamacunahuan shamujurca. 10Jacobca, paipaj mamapaj turi Laban runapaj ushi Raquel, llamacunata apashpa shamujujta ricushpami, yacuta llujchina chai utujuta quilpashca rumita anchuchishpa, Laban runapaj llamacunaman yacuta cararca. 11Jacobca, Raquelta muchashpami, ninanda huacajurca. 12Jacobca: “Cambaj taitapaj ayllupurami cani. Rebecapaj churimi cani” nishpa villajpimi, Raquel cuitsaguca, paipaj taitapajman calpashpa tucuita villajurca.

13Labán runaca, paipaj panipaj churi Jacob shamushcata villajpi uyashcandimi, tuparingapa calparca. Jacobta tuparishpaca, ugllashpa muchashpami, huasiman pusharca. Jacobca, Labán runamanga tucuitami villajurca. 14Shina villajpimi, Labán runaca: “Ñuca tullupacha, ñuca aichapachamari cashcangui” nirca.

Shinami Jacobca, ña shuj quillata Labán runapaj huasipi causajurca. 15Chai jipami Labán runaca, Jacobtaca cashna nirca:

“Can, ñuca ayllupura cashcamandalla, na yanga ñucaman rurachishpa charisha ninichu. ¿Mashnatata cuchun nihuangui? villahuailla” nircami.

16Labán runaca, ishcai ushicunatami charirca. Punda ushica, Lea shutimi carca. Jipa ushica, Raquel shutimi carca. 17Lea shuti cuitsaguca, juyailla ñavicunatami charirca. Ashtahuangarin, Raquel cuitsaguca, chaquimanda callarishpa, umacamanmi juyaillagupacha carca. 18Jacobca, Raquelta ninanda juyashpami, Labán runataca cashna nirca:

“Cambaj jipa ushi Raquelmandaca, canchis huatatami cambajta rurashpa causasha nipani” nircami.

19Shina nijpimi Labán runaca:

“Shina cashpaca, ari ninimi. Shuj runahuan cazarachingapa randica, canhuanmi cazarachisha. Cunanga caipi saquirilla” nirca.

20Shinami Jacobca, Raquelmandaca, canchis huatata Labán runapajta rurashpa causajurca. Raquelta ninanda juyashcamandaca, Jacobpaj ricuipica, huaquinlla punllacunashnallami carca. 21Shinamandami Jacobca, Labán runataca cashna nirca:

“Ñuca huarmi tucunataca, cazarangapa cuhuailla. Paimandaca, ñami cambajta tucuita ruraparcani” nircami.

22Shina nijpimi Labán runaca, chaipi causaj tucuicunata tandachishpa, jatun micuita rurarca. 23Labán runaca, ña tutayashcapimi paipaj ushi Leata, Jacobman pushamurca. Shina pushamujpimi Jacobca, chai cuitsahuan pacta puñurca. 24Labán runaca, Zilpa shuti huarmitami, paipaj ushi Leapajta ruraj cachun curca. 25Cayandi tutamanda Jacobca, Leahuan pacta puñushcata yachaj chayashpami, Labán runataca cashna nirca:

“¿Canga, imatata rurashcanguiyari? ¿Nachu, Raquelmanda tucuita rurajurcani? ¿Imamandata chashna umachihuarcangui?” nirca.

26Shina nijpimi Labán runaca, cashna nirca:

“Ñucanchi cai llactapica, na chashna ruranata yachanchica. Punda ushitapash nara cazarachishpallata, jipa ushitara cazarachitaca na yachanchica. 27Cai cazarai micui punllacunataca pactachilla. Can, shuj canchis huatacunata ñucapajta rurasha nijpica, caishuj ushitapash cushallami” nircami.

28Shina nijpimi Jacobca, ari nishpa, chai jatun micui punllacunataca pactachirca. Shina cajpimi, Labán runaca, paipaj ushi Raqueltaca, paipaj huarmi cachun curca. 29Labán runaca, paipajta ruraj Bilha shuti huarmitami, paipaj ushi Raquelpajta ruraj cachun curca. 30Jacobca, Raquelhuambash pactami causajurca. Paica Raqueltami, Leataca yali ashtahuan juyarca. Shinami Jacobca, Labán runapajta rurashpa canchis huatacaman causajurca.

Jacobpaj huahuacunamanda

31Mandaj Diosca, Leata, Jacob na juyashcata yachashpami, huahuacunata charichun paitaca bendiciarca. Ashtahuangarin Raquelca, huahuata na chari usharcachu. 32Leaca vijsayu tucushpami, shuj jari huahuata charirca. Paica: “Mandaj Diosmi, ñuca llaquita ricushca. Cunanga, ñuca cusaca juyahuangami” nishpami, chai huahuataca, Rubén shutita shutichirca.

33Leaca, cutin vijsayu tucushpami, shuj jari huahuata charirca. Paica: “Ñucata na juyajpi, llaqui causajujta ricushpami, Mandaj Diosca cai huahuatapash carahuashca” nishpami chai huahuataca, Simeón shutita shutichirca.

34Cutin vijsayu tucushpami, shuj jari huahuata charirca. Paica: “Cunanga, ñuca cusaca ashtahuanmi juyahuanga. Quimsa churicunata paihuan charishcamandami juyahuanga” nishpami chai huahuataca, Leví shutita shutichirca.

35Cutin vijsayu tucushpa, shuj jari huahuata charishpaca: “Cunanga, Mandaj Diostami alicachisha” nishpami chai huahuataca, Judá shutita shutichirca. Chai jipaca, na ashtahuan huahuata charircachu.

Currently Selected:

GÉNESIS 29: QVI16

Highlight

Copy