GÉNESIS 27
27
Isaacca, Jacobtami Esaupaj randi bendiciashca
1Isaac runaca ña rucugupacha cashpami, paipaj ñavi amsayajpi na ali ricui ushajurca: Shina cashpami paipaj rucu churi Esautaca:
“Ñuca huahualla” nishpa cayarca.
Shina cayajpimi Esauca:
“Caipimi capani” nirca.
2Shina nijpimi Isaacca:
“Ñucaca ñami rucu cani. Ima punlla cashpapash huañuringallami. 3Cunanga, macanajuna flechacunata, arcotapash japishpa, animalta huañuchishpa ñucaman apamugrilla. 4Shina rurashpaca, ñuca munashca micuna caldoguta yanushpa apamungui. Chaita micushpami ñuca nara huañushpallata, candaca bendiciasha” nircami.
5Rebeca huarmiguca, Isaac paipaj churi Esauta chashna nijujtami uyarca. Esaú runaca, animalta mascashpa huañuchishpa apamungapami pambaman rirca. 6Esaú runa rishca jipami Rebecapash, paipaj churi Jacobtaca cashna nijurca:
“Cambaj taitaca, cambaj huauqui Esautaca: 7‘Animalta huañuchishpa apamushpa, mishquilla caldoguta yanushpa apamugri. Chaita micushpami, ñuca nara huañushpallata, candaca Mandaj Diospaj ñaupajpi bendiciasha’ nijurcami. 8Ñuca huahualla, cunanga ñuca mandashcata uyailla. 9Animalcuna shayanajuj pushtuman rishpa, ashtahuan ali ishcai maltun chivocunata apamugri. Shina apamujpimi chai chivocunataca, cambaj taita munashcashna mishquillaguta yanusha. 10Chai micunata cambaj taitaman carajpimi paica micunga. Pai nara huañushpallata canda bendiciachunmi, chashna rurana cangui” nijurcami.
11Shina nijpimi Jacobca, paipaj mama Rebecataca cashna nirca:
“Ñuca huauqui Esauca milmasapamari. Ñucaca na chashna canica. 12Imashpapash ñuca taita ñucata tacarishpaca, canga umachingapami shamushcangui nishpami, bendiciangapa randica, ninanda na alicachishpa saquihuanga” nijurcami.
13Shina nijpimi paipaj mamaca:
“Ñuca huahualla, canda ninanda na alicachijpica, chai llaquitaca ñucami apasha. Ñuca mandashcata cazushpa, chaitaca ucha rurailla” nircami.
14Shina nijpi pai rishpaca, chivocunata japishpami, mamapajman apamurca. Paipaj mamaca, Jacobpaj taita imashna munaj cashcata yachashpami mishquilla caldoguta yanurca. 15Rebeca huarmica, punda churi Esaupaj juyailla churajunacunatami huasipi charirca. Chaicunata japishpami, paipaj jipa churi Jacobman churachirca. 16Paipaj maquipipash, cungapipash, maipi milmata na charishcapimi, huahua chivocunapaj caracunahuan quilparca. 17Chai jipami, mishquillaguta yanushca caldotapash, tandatapash, paipaj churi Jacobman curca.
18Shina cujpimi Jacobca, paipaj taitapajman rishpa:
“Ñuca taiticu” nirca.
Shina nijpimi, Isaacca:
“Caipimi cani, ¿ñuca huahualla, maijanda cangui?” nirca.
19Shina nijpimi Jacobca, paipaj taitataca:
“Ñucaca, cambaj punda churi Esaumi cani. Can imata mandashcatami rurarcani. Cunanga, jatarishpa tiyarishpa ñuca huañuchishpa apamushpa yanushcata micupailla, chaita micushca jipaca bendiciahuanguillami” nirca.
20Shina nijpimi Isaacca, paipaj churitaca:
“Ñuca huahualla, ¿imashnata ñapash tarimurcangui?” nirca.
Shina nijpica:
“Canda Mandaj Taita Diosllata, ñuca ñaupajpi ricuchimujpimi ñapash tarircani” nirca.
21Shina nijpimi Isaacca, Jacobtaca:
“Ñuca huahualla, cunanga ñuca churi Esaupacha cajta, tacarishpa yachangapa caiman quimirimui” nircami.
22Paipaj taita Isaacpajman, Jacob quimirijpi tacarishpaca:
“Rimaica, Jacobpaj rimaimi. Shina cashpapash maquica, Esaupaj maquimi” nirca.
23Jacobpaj maquica, Esaupaj maquishnalla milmalla cajpimi, na rijsirca. Chaimandami bendiciagrijushpaca:
24“¿Canga, ñuca churi Esauchu cangui?” nirca.
Shina nijpimi, Jacobca:
“Ari, ñucallatami cani” nirca.
25Shina nijpimi, cutin cashna nirca:
“Cunanga ñuca huahualla, can huañuchishpa apamushcata micungapa apamui. Chai jipami, candaca bendiciasha” nircami.
Shina nijpimi, micunahuan Jacob quimirijpica, Isaac runaca micurca. Vinotapash apamujpimi ufiarca.
26Chai jipami paipaj taita Isaacca:
“Ñuca huahualla, cunanga quimirimushpa muchahuai” nirca.
27Shina nijpimi Jacobca, quimirishpa mucharca. Isaac runaca, Jacob churajushcata ashnachishpami, cashna nishpa bendiciajurca:
“Ñuca huahuaca, Mandaj Dios bendiciashca pambashnami ashnajungui.
28Taita Diosca, jahua pachamanda tamiaguta caramuchun.
Alpapipash, ali granocuna fucuchun.
Ashtaca trigotapash, llullu vinotapash caramuchun.
29Tucui llacta gentecuna, canda alicachishpa, cambajta ruranajuchun.
Shuj llactacunapi causajcunapash, cambaj ñaupajpi urai cumurinajuchun.
Cambaj huauquicunapajca, canmi mandaj tucungui.
Cambaj mamapaj churicunapash, cambaj ñaupajpimi cumurinajunga.
Canda na alicachijcunaca, paicunapashmi na alicachi tucunajunga.
Canda bendiciajcunaca, paicunapashmi bendiciai tucunajunga” nijurcami.
30Jacobta, paipaj taita Isaac bendiciashca jipami, Jacobca paipaj taitapaj ñaupajmandaca llujshishpa rirca. Chashna llujshijhuanmi, paipaj huauqui Esauca, animalta huañuchishpa apashpa tigramurca. 31Paipashmi, mishquilla caldoguta yanushpa, paipaj taitapajman apashpa rishpa cashna nirca:
“Ñuca taitalla, ñuca apamushcata micungapa jataripai, chai jipami ñucataca bendiciahuangui” nirca.
32Shina nijpimi, paipaj taita Isaacca:
“¿Canga, pita canguiyari?” nirca.
Shina nijpica:
“Ñucaca, cambaj punda churi Esaumi capani” nirca.
33Shina nijpimi Isaacca, ninanda manllarishpa cashna nirca:
“¿Pita caiman shamurcayari? Huañuchishpa apamushpa ñucaman carajpimi, can nara shamujpillata micurcani. Ñucaca, paitami bendiciarcani. Paica, ñami bendiciai tucushca” nircami.
34Paipaj taita chashna nijpimi, Esauca ninanda llaquirishpa shinllita caparishpa huacashpaca:
“Ñuca taitalla, ñucatapash bendiciahuayari” nirca.
35Shina nijpimi Isaacca:
“Cambaj huauqui llullashpa shamushpami, cambaj bendiciondaca pai chasquishpa rirca” nirca.
36Shina nijpimi Esauca:
“Chaimandallatami paitaca, Jacob#27:36 Jacob shutica, shujpaj randi llullashpa shayarij nijunmi shutita shutichishca. Ñami ishcaita umachihuan. Callaripica, punda churi cashpa imata japinatami quichuhuarca. Cunanga ñuca bendiciai tucunatami quichuhuashca, nishpami: ¿Nachu ñucamambash, bendicianata charipangui?” nirca.
37Shina nijpimi Isaacca, paipaj churi Esautaca cashna nirca:
“Ñucami paitaca canda mandaj cachun churarcani. Paipaj tucuilla huauquicunatapash, paipajta rurajcuna cachunmi, paiman curcani. Trigotapash, llullu vinotapash paimanmi curcani. Cunanga ñuca huahualla, ¿imatata cushayari?” nirca.
38Shina nijpimi Esauca, paipaj taitataca:
“Ñuca taitalla, ¿shuj bendiciondallachu charipangui? Ñuca taitalla, ñucatapash bendiciahuayari” nishpa caparishpa huacajurca.
39Chaimandami paipaj taita Isaacca, cashna nijurca:
“Alipacha fucuj alpamanda carupimi causangui.
Jahua pachamanda tamiajunmandapash, carupimi causangui.
40Cambaj espadahuan macanajushpa, mishashpami causai ushangui.
Cambaj huauquipajta rurashpami causangui.
Chai jipa ninan charij tucushpami, cambaj huauquipajta rurajushcamandaca cachariringui” nircami.
Esaumanda, Jacob pacajushpa rishcamanda
41Paicunapaj taitaca, Jacobtara bendiciashcamandami, Esaú runaca Jacobtaca napacha ricunayachishpa, paipaj shungupica cashna yajurca: “Ñuca taita huañujpi, llaqui punllacuna yalishca jipami, ñuca huauqui Jacobtaca huañuchisha” yajurcami.
42Paipaj punda churi Esaú chashna nijujtami, Rebecaman villanajurca. Chaimandami, paipaj jipa churi Jacobta cayachun cachashpa cashna nijurca:
“Cambaj huauquica, canda imashna huañuchinata yarishpami purijun. 43Ñuca huahualla, cunanga ñuca mandashcata uyahuai. Harán shuti pueblopi causajuj ñuca turi Labán runapaj huasiman pacajushpa ucha rilla. 44Cambaj huauqui, canda fiñashcata cungangacaman, ñuca turipaj huasipi causangapa ucha rilla. 45Can chashna rurashcata, cambaj huauqui cungangacaman, chaipi causagrilla. Ña cungajpica, ñucallata chai llactamanda canda pushamuchun cachashallami. ¿Imashpata shuj punllalla, canguna illaj tucushayari?” nijurcami.
46Chai jipami Rebeca huarmica, paipaj cusa Isaactaca cashna nirca:
“Het shuti runapaj mirai ushicunahuanga, ña na ushanichu. Chai runapaj ushicunata, paipaj huarmi cachun Jacob japijpica, ¿na causashpami ali caiman?” nijurcami.
Currently Selected:
GÉNESIS 27: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
