GÉNESIS 19

Sodoma shuti, Gomorra shuti pueblocunata tucuchishcamanda

1Chai ishcai angelcunaca, ña chishashcapimi, Sodoma puebloman chayarca. Lot runaca, Sodoma puebloman yaicuna pungupimi tiyajurca. Chai angelcunata Lot ricushpaca, jatarishpa tuparigrishpami, alpaman chayajta cumurirca. 2Chaipimi:

“Cangunaca ñucata mandajmi capanguichi. Cangunapajta ruraj ñucapaj huasiguman ripashunchi. Chaipimi cangunapaj chaquitapash maillapanguichi. Cayapaca, tutamandata jatarishpa chai ñanda catishpa ripanguichillami” nirca.

Shina nijpimi angelcunaca:

“Cunan tutaca ñambillami saquirina canchi” ninajurca.

3Lot runaca, ripashunchiyari nijujpillatami, paicunaca, Lot runahuan rishpa, paipaj huasiman yaicunajurca. Jatun micuita rurashpa, levadura illaj tandata carajpimi, paicunaca micunajurca.

4Ashtahuangarin puñungapa nara siririjpillatami, Sodoma pueblopi causaj runacunaca, Lot runapaj huasita muyunajurca. Chairalla viñai huambracunamanda callarishpa, ashtahuan rucucunacaman, tucui gentecuna tandanajushpami, chashna muyunajurca. 5Paicunaca, Lot runata cayashpami cashna ninajurca:

“¿Cunan tuta cambaj huasiman shamushca runacunaca maipita? Paicunahuan pacta puñungapa canllaman llujchimui” ninajurcami.

6Shina nijpimi, Lot runaca paicunahuan rimaringapa punguta vichashpa canllaman llujshirca. 7Shina llujchishpami, cashna nirca:

“Ñuca huauquicunalla, chashnapacha jatun na alitaca napacha ruranachu canguichi. 8Uyapaichi, pihuambash nara ima tucushca, ishcai ushicunatami charipani. Paicunata canllaman llujchimujpica, canguna ima munashcata ruranguichilla. Ñuca huasi ucupi mingaringapa shamushca cai jaricunatalla, ama imatapash rurapaichi” nircami.

9Shina nijpimi paicunaca:

“¡Canga, caimanda anchuri!” nishpa, ashtahuan cashnatapash ninajurca:

“Can, maimandapash shamushca runarachu, ¿ñucanchitaca mandagringui? Cunanga, candami ashtahuan llaquichishun” nishpami, Lot runataca tangashpa punguta faquingapa chayamunajurca.

10Shina ruranajujpimi angelcunaca, maquita chutashpa Lot runata japishpa, paicunahuan huasi ucuman churashpa, punguta vicharca. 11Canllapi shayanajuj runacunataca, uchillamanda callarishpa rucucamanmi, ñausayachishpa saquirca. Chaimandami, punguta mascanajushpallata shaijunajurca.

12Shina cajpimi angelcunaca, Lot runataca cashna ninajurca:

“¿Pipash caipi, canhuan causanrachu? Mashacunata, cambaj churicunata, ushicunata, cai pueblopi tucui ima charishcacunatapash, caimanda llujchilla. 13Cai pueblopi causaj gentecuna, na alita rurashcamanda caparinajushcapash, Mandaj Diospaj ñaupajcamanmi chayarca. Shinamandami, cai pueblotaca tucuchigrinchi. Chaipajmi Mandaj Diosca, ñucanchitaca cachamurca” ninajurcami.

14Shina nijpimi Lot runaca, canllaman llujshishpa, paipaj ushicunata cazarana mashacunataca, cashna nirca:

“Jatarishpa, caimanda llujshichi. Mandaj Diosca, cai pueblota tucuchigrinmi” nirca.

Ashtahuangarin, paipaj masha tucunacunapaj yuyaipica, yanga asingapalla nijujshnallami uyarirca. 15Ña yurajlla punllayajujpimi angelcunaca, Lot runa ucha llujshichun cashna ninajurca:

“Cai pueblota llaquichishpa tucuchijujpi, ama huañungapaca, cambaj huarmitapash, caipi cambaj ishcandi ushicunatapash pushashpa ucha llujshi” ninajurcami.

16Lot runa na ucha llujshijpimi, angelcunaca, paitapash, paipaj huarmitapash, paipaj ishcandi ushicunatapash, maquimanda aisashpa llujchirca. Mandaj Dios ninanda juyashpallami, pueblomanda llujchishpa, paitaca canllapi churagrirca. 17Paicunata ña canllaman llujchishca jipami, angelcunaca cashna ninajurca:

“Ama huañungapaca, calpashpa pacajugrilla. Ama huashaman tigrarishpa ricunguichu. Cai tucui jatun pambacunapipash, ama shayaringuichu. Urcupi pacajungapa calpailla, na cashpaca huañunguimi” ninajurcami.

18Ashtahuangarin Lot runaca:

“Ñucata mandajcunalla. Chaitaca na usharipangachu nipanimi. 19Cunanmi cangunapaj ñaupajpica ali ricuripashcani. Chaimandami causaita charichun ninanda llaquihuashcanguichi. Ashtahuangarin, urcuman rishpa pacajugritaca, napacha ushapashachu. Chai jatun llaqui ñucata japimujpica huañupashami. 20Ricupaichi, chai uchilla puebloca na yapa carupichu, chaipi pacajugrichun saquihuaichi. Chaipi pacajugrishpami na huañupasha. (Chai puebloca, ¿nachu uchillagupacha capan?)” nijurcami.

21Shina nijpimi, cashna nirca:

“Can mañashcataca uyashcanimi. Chaimandami can nijushca pueblotaca na tucuchigrini. 22Shina cashcamanda, chaipi ucha pacajugrilla. Can chaiman chayangacamanmi imatapash na rurasha” nircami.

Chai pueblotaca uchilla cajpimi, Zoar nishpa shutichirca.

23Zoar shuti puebloman Lot runa chayajujpica, indica ñami llujshijurca. 24Shinamandami, Mandaj Diosca, Sodoma, Gomorra pueblocunapi, azufrehuan rupajuj ninata tamiachimurca. Chashnami Mandaj Diosca, jahua pachamanda llaquichimurca. 25Shinami chai pueblocunatapash, chaipi tucuilla pambacunatapash tucuchirca. Chai pueblocunapi causajcunataca, pambacunapi fucushca granocunandimi tucuchirca. 26Shina cajpimi, Lot runapaj huarmica, paipaj huashata catijushpa huashaman tigrarishpa ricurca. Shina ricushpaca, cachi rumimanmi tigrarca.

27Abrahamga, Mandaj Dioshuan tuparishca pushtumanllatami cayandi tutamandaca, vichai tigrarca. 28Chaipi cashpami, Sodoma, Gomorra pueblocunata, chai tucuilla pambacunatapash ricujurca. Chai tucuilla alpacunamandaca, hornomanda cushni llujshijshnami llujshijurca. 29Taita Diosca, chai pambapi pueblocunata tucuchijushpami, Abrahamdaca yarirca. Shina yarishpami, Lot runa causajushca pueblocunata, llaquinayaita tucuchijushpaca, Lot runataca chaimanda canllaman llujchirca.

30Ashtahuangarin Lot runaca, Zoar pueblomanda vichai rishpami, paipaj ishcandi ushicunandi urcupi causajurca. Lot runaca, Zoar pueblopi causajcunata manllashpami, paipaj ishcandi ushicunandi, shuj jatun utujupi causajurca. 31Chaipimi punda ushica, paipaj cati ñañataca cashna nirca:

“Ñucanchi taitaca ñamari rucu. Tucui llactacunapi causaj gentecunashnallata causangapaca, cai llactapica jaripash na tiyanllu. 32Cunanga, ñucanchi taitaman vinota ufiachishpa, paihuan pacta puñushun. Chashnami, ñucanchi taitamanda mirai huahuata charishpa catishun” nijurcami.

33Chashna nishpami chai tutallata, paicunapaj taitaman vinota ufiachinajurca. Shina ufiachishpami punda ushica, paipaj taitahuan pacta puñurca. Ashtahuangarin taitaca, paipaj ushi siririjtapash, jatarintapash na yacharcachu. 34Cati punllapica, punda ushimi, paipaj jipa ñañatapash cashna nirca:

“Caina tutami ñucaca taitahuan pacta puñurcani. Cunan tutapash vinota ufiachishunlla. Shina ufiachishpaca, ñucanchi taitamanda mirai huahuata charingapa, cambash paihuan pacta puñungapa yaicunguillami” nircami.

35Chashnami chai tutapash, paicunapaj taitaman vinota ufiachinajurca. Chashnami jipa ushipash, paipaj taitahuan pacta puñurca. Ashtahuangarin taitaca, paipaj ushi siririjtapash, jatarintapash na yacharcachu. 36Shina cashpami, Lot runapaj ishcandi ushicunaca, paicunapaj taitapajta vijsayu tucurca. 37Punda ushica, shuj churita ungushpami, Moab shutita shutichirca. Shinami paica, Moabita gentecunapaj taita tucurca. 38Jipa ushipash, shuj churita ungushpami, Ben-ammi shutita shutichirca. Shinami paica, amonita gentecunapaj taita tucurca.

Currently Selected:

GÉNESIS 19: QVI16

Highlight

Copy