GÉNESIS 18
18
Isaac huacharinata villashcamanda
1Mandaj Diosca, encina shuti quirucuna shayanajuj Mamre shuti pambapimi, Abrahamman ricurimurca. Ninan rupai punlla cajpimi, paipaj carpa pungupi Abrahamga tiyajurca. 2Pai vichai ricushpaca, quimsapura runacuna shamunajujtami ricurca. Shina ricushpami, paipaj carpa pungumanda calpashpa rishpa, paicunata tuparigrishpa, alpapi cungurirca. 3Abrahamga cashnami nirca:
“Mandaj Taitalla, cambaj ñaupajpi ñuca ali ricurishca cajpica, caipi ashaguta saquiripai. Ama yalishpa ripaichu nipanimi. 4Cunanga, asha yacuguta apamushpa, cangunapaj chaquita maillachipasha. Chai jipaca, quiru llandupi samapanguichillami. 5Shinallata, asha tandagutapash canguna micuchun apamupasha, micushca jipaca ripanguichillami. Cangunapajta ruraj ñucapajman shamushcamandaca, cushijushpami chasquipani” nirca.
Shina nijpimi paicunaca:
“Can nishcashna rurailla” ninajurca.
6Shina nijpimi Abrahamga, carpaman ucha yaicushpa, paipaj huarmi Sarataca:
“Quimsa batea ashtahuan ali jacuta masashpa, tandata rurashpa yanuchi” nirca.
7Shinallata, Abrahamga, huagracuna shayanajuj pushtuman rishpami, shuj shicuta apamushpa, paipajta ruraj runa huañuchishpa yanuchun curca. Chai runaca, chai huagrata huañuchishpami, ucha yanungapa rirca. 8Abrahamga, quesota, lecheta, huagra aicha yanushcata apamushpa carashpami, quiru llandupi shuyajurca, imagutapash ashtahuan carasha yashpa.
9Abrahamdaca:
“¿Sara shuti cambaj huarmica maipita?” ninajujpimi:
“Cai carpa ucupimi” nirca.
10Shina nijpimi paicunamanda shujca cashna nirca:
“Na llullashpami cashna nijuni: Cutinmi caiman tigramusha. Ricui, Sara shuti cambaj huarmica, cunanmanda huatacamanmi, shuj churita charinga” nircami.
Sara huarmica, Abrahambaj huashapi, carpaman yaicuna pungupi shayajushpami tucuita uyajurca. 11Abrahambash ña rucugu, Sarapash ña payagumi carca. Sara huarmica, huahuata charitaca ña na ushanachu carca. 12Sara huarmica, paipaj shungupi asishpami cashna nijurca: “Ñucapash paya, ñuca cusapash rucu cashca jahuachu, ¿huahuata charina munaita charisha?” nijurcami. 13Chaimandami Mandaj Diosca, Abrahamdaca cashna nirca:
“¿Imamandata, Sara huarmica cunan ña payapirachu, huahuata charina cani nishpa asijun? 14¿Taita Diospaca, imatapash na ushanalla tiyangachu? Ñuca shamusha nishca punllapillatami, cutin tigramusha. Sara huarmica, caya huata cunan punllashnami shuj churita charinga” nircami.
15Shina nijpimi Sara huarmica, manllaita charishpa:
“Na asircanichu” nishpa llullarca.
Shina nijpimi Paica:
“Ñucami yachani, canga asircanguimi” nirca.
Abrahamga, Sodoma pueblota quishpichipai nijushcamanda
16Chai quimsa runacuna chaimanda jatarishpaca, Sodoma pueblomanmi rinajurca. Abrahambash, paicunahuan pajtami rijurca. 17Shina cajpimi, Mandaj Diosca cashna nijurca: “Ñuca imata ruranataca, ¿Abrahamman na villashpa pacashachu? 18Abrahammanda miraimandami, jatun llacta tucunga. Shinallata, tucui cai pachapi llactacunami, paimandaca bendiciai tucunga. ¿Shina cajpichu, chashna pacasha? nijurcami. 19Paipaj huahuacunatapash, tucui mirai ayllucunatapash, Mandaj Dios Ñucata cazushpa, alitalla rurashpa causachunmi agllashcani. Chashna aliguta causachun Abraham yachachijpica, Mandaj Dios Ñucapash, paiman carashami nishcataca pactachishami” yajurcami. 20Chai jipami Mandaj Diosca cashna nirca:
“Sodoma shuti, Gomorra shuti pueblocunapi causajcunaca, ashtahuan juchata rurashpa catinajujpimi, na alicachishpa ninanda caparinajun. 21Shinamandami cunanga, imashnapacha cashcata ricungapa, urai rishpa yachagrini” nijurcami.
22Chaimanda anchurishpami, ishcaipura runacunaca Sodoma puebloman rinajurca. Ashtahuangarin Abrahamga, Mandaj Diospaj ñaupajpimi saquirirca. 23Chaipimi Abrahamga, Mandaj Diospajman quimirishpa cashna nijurca:
“¿Alitalla rurashpa causajcunatapash, na alicunahuan pactachu huañuchishpa tucuchigripangui? 24Alitalla rurajcuna picha chungallapash chai pueblopi tiyajpica, paicunata llaquimanda ¿nacha chai pueblotaca perdonapanguiman?
25Alitalla rurajcunataca, na alicunahuan tandachishpaca napacha huañuchipanguichu. Tucui cai pachapi causajcunapaj Juezca, alitalla rurajmari capangui” nijurcami.
26Shina nijpimi Mandaj Diosca, cashna nirca:
“Sodoma pueblopi alitalla rurajcuna picha chunga tiyajpica, paicunata juyaimandami, cai pueblopi tucuicunapaj juchata perdonasha” nircami.
27Shina nijpimi Abrahamga, cutin cashna nijurca:
“Ñucaca, ñutu alpallami capani. Shina cashpapash, Can Jatun Diosta mañashpa catijushcamandaca, ama fiñaripanguichu. 28Alitalla rurajcuna, chuscu chunga picha tiyajpica, ¿chai pueblota tucuchipanguimanllu?” nircami.
Shina nijpimi:
“Chuscu chunga pichalla tiyajpipash, na tucuchishachu” nirca.
29Cutinmi Abrahamga:
“¿Chaipi, chuscu chungalla tiyajpica?” nishpa tapurca.
Shina nijpimi:
“Chai chuscu chungata juyaimandaca, na tucuchishachu” nirca.
30Shina nijpimi Abrahamga:
“Ñuca Jatun Dioslla, cutin ñuca rimajpica ama fiñahuanguichu. ¿Chaipi quimsa chungalla tiyajpica?” nirca.
Shina nijpimi:
“Quimsa chungallapash chaipi tiyajpica, na tucuchishachu” nirca.
31Shina nijpimi Abrahamga:
“Ñuca Jatun Diostaca, yapatami rimajupanilla. ¿Chaipi ishcai chungalla tiyajpica?” nirca.
Shina nijpimi:
“Chai ishcai chungata juyaimandaca na tucuchishachu” nirca.
32Shina nijpimi Abrahamga, cutinbash cashna nirca:
“Ñuca Jatun Dioslla, ama fiñahuanguichu. Cunanga caigutallami nigripani. ¿Chaipi chungapuralla tiyajpica?” nirca.
Shina nijpimi:
“Chai chungata juyaimandaca na tucuchishachu” nirca.
33Mandaj Diosca, Abrahamhuan rimaita tucuchishca jipaca rircallami. Shinallata, Abrahambash paipaj huasiman tigrarcallami.
Currently Selected:
GÉNESIS 18: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
