GÉNESIS 20
20
Abrahammandapash, Abimelecmandapash
1Abrahamga, pai causajushca alpamandami, Neguev shuti pambacunaman rirca. Cades shuti, Shur shuti pueblocuna chaupipi tiyaj Gerar shuti pueblopimi, shuj llactamanda purij runashna causajurca. 2Abrahamga, paipaj huarmi Sarataca, “Ñuca panimi” nishpami villajurca. Shinamandami, Gerar shuti pueblota mandaj Abimelec runaca, Sara huarmita pushamugrichun cachashpa, paipaj huarmi cachun japirca. 3Ashtahuangarin Taita Diosca, muscuipi tuta ricurishpami, Abimelectaca cashna nirca: “Chai huarmita pushamushcamandami huañugringui. Chai huarmica cazarashca, cusayuj huarmimi” nircami.
4Ashtahuangarin chai huarmihuanga Abimelec runaca nara pacta puñushca cashpami, cashna nirca: “Jatun Dioslla, ¿ima na alitapash na rurashca cajpipash, huañuchinallachu cahuangui? 5¿Nachu chai runaca: ‘Ñuca panimi’ nirca? Shinallata ¿nachu chai huarmipash: ‘Ñuca turimi’ nirca? Ñucaca ali shungu cashpa, alita rurajuni yashpami, paitaca pushamuchun cacharcani” nircami.
6Shina nijpimi Taita Diosca muscuipi paiman ricurishpa, cashna nirca: “Ñucapash, can ali shunguhuan chashna rurashcataca yachanimi. Chai huarmihuan juchata rurashpa, ñucata ama fiñachijuchunmi, candaca jarcarcani. 7Cunanga, chai huarmitaca, paipaj cusapajman tigrachilla. Paica, ñucapajta ruraj profetami. Canmanda, Ñucata mañajpimi causangui. Chai huarmita na tigrachishpaca, cambash, cambaj huasipi causajcunapash, huañunapacha cajtaca yachanami cangui” nircami.
8Shina nishca jipami Abimelec runaca, tutamandata jatarishpa, paipajta rurajcunata cayashpa, tucuilla cai shimicunataca, paicuna uyajta villajurca. Shina villajpimi chai runacunaca, ninandapacha manllarinajurca. 9Chai jipami Abimelec runaca, Abrahamda cayashpa cashna nirca:
“¿Imatata ñucanchitaca rurashcangui? ¿Ñucaca, ima juchata rurashpata candaca fiñachircani? Canga ñucamambash, ñuca mandajuj llactamambash, ninan juchata ruranatamari apamushcangui. Canga, ñucahuanga napash ruranatami rurashcangui” nircami.
10Abimelec runaca, cashnatapashmi Abrahamdaca nirca:
“¿Imashpata chashna rurarcangui? ¿Ima yashpata, chashnataca rurarcangui?” nircami.
11Shina nijpimi Abrahamga, cashna nirca:
“Ñucaca cashnami yajurcani: ‘Cai llactapica, Taita Diosta manllajcunaca napacha tiyanllu. Shina cashcamanda, ñuca huarmimandaca huañuchihuangami yashpami, chashna nircani. 12Ñuca taitamandaca pani cashpapash, ñuca mamamandaca na pani cajpimi, ñuca huarmi cachun japircani. 13Taita Dios, ñuca llactata saquishpa ri nishca punllamandami, ñuca huarmitaca, paipaj panimi cani ningui nishpa mañarcani’ nircanimi” nijurcami.
14Shina nijujpimi Abimelec runaca, llamacunata, huarmi huagracunata, paipajta ruraj jaricunata, huarmicunata, Abrahamman cararca. Shinallata, paipaj huarmi Saratapash tigrachirca. 15Shina rurashpami Abimelec runaca:
“Ñuca llacta alpacunata ricui, can maipi munashcapi causagrilla” nirca.
16Saratapash cashnami nirca:
“Huaranga culquitami cambaj turiman curcani. Chai culquimi, canda rijsijcunapaj ñaupajpipash, tucui gentecunapaj ñaupajpipash, umata quilparina telashna canga. Shinamandami, imata juchachinapash illaj saquiringui” nircami.
17Chai jipami Abrahamga, Taita Diosta mañarca. Chashna rurajpimi, Taita Diosca Abimelec runatapash, paipaj huarmitapash, paipajta ruraj huarmicunatapash, huahuacunata charina ushaita cutin cararca. 18Mandaj Diosmi, Abimelec runapaj huasipi causaj tucuilla huarmicunataca, huahuata ama chari ushachun jarcashca carca. Abrahambaj huarmi, Saramandami, chashna rurashca carca.
Currently Selected:
GÉNESIS 20: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
