ÉXODO CALLARI YUYAI
CALLARI YUYAI
Éxodo nishpaca “Llujshina”, na cashpaca “Shuj llactaman rina” nijunmi. Cai quilcapica Moisés, Israelcunata Egiptomanda llujchishpa pushashcatami parlajun. Chaimandami, Éxodo shutihuan tiyajun.
Taita Diosca, pai agllashcacuna gañan causanajujpi llujchishpa Canaán llactaman pushangapami, Moisesman ricurishpa paita agllashca. “Chai Canaán llactatami, paicunapaj ñaupa taita Abrahamman, Isaacman carashami” nishpa villashca.
Shinallata cai quilcashcacunapica, punda huatacunapi gañan causanajushca ashtaca gentecunahuan, shuj jatun llactata Taita Dios rurashcatami villajun. Chaitaca, Moiseshuan villachishpami chashna rurashca.
Taita Diosca, paicunapaj ñaupa taitacunahuan ari ninajushpa callarichishcata, jichushca pambapi mushujyachishpami, shuj mandashcata cushca. Paicunaca, Taita Diospajlla agllashca cashcamanda, Dioshuan imashna canatapash, paicunapurapi imashna causanatapash yachachunmi, mandashcacunata cushca.
Cai quilcashcacunapica, Moisesmandami ashtahuan parlajun. Gañan causanajujpi Moisés llujchishcata, Israelcunata mandaj cashcata, mandashcacunata cushcatami villajun.
Callari capitulomanda 15:21 caman ricujpica, Israelcuna Egiptopi gañan causanajushcata parlashcacunapash, Moisés huacharishpa imatalla rurashpa causashcapash, jichushca pambapi Taita Dios paita cayashcapash, ninanda llaquichishpa charij Faraonhuan chimbapura parlashcapashmi tiyajun.
Pascua punllapi micuita rurashca jipa, Egiptomanda Israelcuna llujshishcatapashmi villajun. Chaipaj catica, capítulo 15:22 manda 24:18 caman ricujpica, Sinaí urcuman chayangacaman, jichushca pambapi purinajushpa ima tucushcacunatami villajun.
Ashtahuan chaipaj catipica, capítulo 25manda, 40caman ricujpica, Israelcunahuan ari ninajushcatapash, mandashca shimicunata tucuicunaman rijsichishcatapashmi villajun. Chai mandashcacunapica, imatalla rurachun nishcata tucuicunapaj causaipi ruranata, shujcunahuan imashna causanata, Diosta imashna alicachishpa causanatami yachachijun.
Éxodo capítulo 20 pica, chunga mandashca shimicunapashmi tiyajun. Chai capitulocunapica, Mandaj Diospajlla huasita imashna ruranata, shinallata chai huasipica, imashna Diosman imaguta caranatapashmi villajun.
Currently Selected:
ÉXODO CALLARI YUYAI: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.