ÉXODO 1
1
Israelcuna, Egiptopi llaquita apanajushcamanda
1Egipto llactamanga, taita Israelpaj churicunaca, paicunapaj ayllucunandimi yaicurca. Jacobpaj churicunapaj shuticunaca caicunami: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Aser, shuticunami carca. 5Jacobpaj miraicunaca, canchis chungami carca. Joseca, Egiptopimi ña causajurca.
6Josepash, tucuilla paipaj huauquicunapash, chai tucui miraicunapashmi huañurca. 7Israelcunaca ashtahuan mirashpami ninanda jundanajurca. Chashnami alipacha shinlli runacuna tucushpa, chai llactapica jundanajurca. 8Chai punllacunapimi Egiptopica, Joseta na rijsishca shuj mushuj jatun mandaj tiyarirca. Chai mandajmi, chaipi causajcunataca cashna nijurca: 9“Israelcunaca ñucanchita ashtahuan yali ashtacacunami. Paicunaca, ñucanchitaca yali ashtahuan shinllicunami. 10Cunanga, paicuna ama ashtahuan mirachun, alipacha yarishpa paicunataca imatapash rurashunchi. Ñucanchihuan jatun macanajui tiyajpi, ñucanchita fiñajcunahuan tandanajushpa, paicunapash ñucanchihuan macanajushpaca, cai llactamanda llujshishpa ringallami” nijurcami.
11Shina nijpimi, Israelcunamanga ashtahuan shinlli ruraicunata cushpa llaquichinajuchun, shuj mandajcunata churarca. Shinallata, Pitón shuti, Ramesés shuti, pueblocunatami Faraonman shayachinajuchun mandarca. Chai pueblocunapimi, Faraonga ima charishcatapash alichijurca. 12Ashtahuangarin chashna ninanda llaquichinajujpipash, paicunaca ashtahuanmi mirashpa jundanajurca. Chaimandami Egipto llacta runacunaca, Israelcunataca ninanda manllanajurca.
13Egipto llacta runacunaca, Israelcunataca shinllitapachami imatapash rurachishpa charirca. 14Paicunataca, turuta, ladrillota rurachishpa charishpami, ninandapacha llaquichishpa charirca. Shinallata pambacunapipash, imata ruranacunapipash, shinllitapachami mandashpa charinajurca. 15Egipto llactata jatun mandajca, huahuata unguchij hebreopura, Sifra shuti, Fúa shuti huarmicunatami cashna nirca:
16“Hebreopura huarmicunata huahuata unguchinajushpaca, jari huahua cajpica, huañuchinguichilla. Huarmi huahua cajpica, causachun saquinguichilla” nircami.
17Ashtahuangarin huahuata unguchij huarmicunaca, Taita Diosta manllashpami, Egipto llactata jatun mandaj ima nishcataca na rurashpa, jari huahuacunatapash causachun saquinajurca. 18Egipto llactata jatun mandajca, huahuata unguchij huarmicunata cayachun cachashpami cashna nirca:
“Cangunaca, ¿imashpata chashna rurarcanguichi? ¿Imashpata jari huahuacunatapash, causachun saquircanguichi?” nircami.
19Shina nijpimi huahuata unguchij huarmicunaca, Faraondaca cashna ninajurca:
“Hebreopura huarmicunaca, Egiptopi causaj huarmicunashnaca na canllu. Paicunaca shinllicuna cashpami, ñucanchi nara paicunapajman chayajpillata ungunlla” ninajurcami.
20Shina shinllicuna cashpami Israelcunaca ashtahuan miranajurca. Shinallata, Taita Diosca chai unguchij huarmicunata alicachircami. 21Chai unguchij huarmicuna, Taita Diosta manllashcamandami, paicunataca bendiciashpa mirachirca. 22Shinamandami Faraonga, tucuilla paipaj gentecunata cashna nishpa mandarca: “Jari huahuata ungujpica, jatun yacupi shitanguichilla. Tucui huarmi huahuacunataca, causachun saquinguichilla” nircami.
Currently Selected:
ÉXODO 1: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
