ÉXODO 2
2
Moisés huacharishcamanda
1Leví ayllupuramanda shuj runami, Levipaj miraipuramandallata shuj cuitsahuan cazararca. 2Chai huarmi vijsayu tucushpami, shuj jari huahuaguta charirca. Chai huahua juyailla cajta ricushpami, paitaca quimsa quillacaman pacashpa charirca. 3Chaimanda ashtahuan yalishpa pacaita na ushashpami, sucushuan canastata rurashpa, asfaltohuan, breahuan javirca. Chai canastapi churashpami huahuataca, sucuscuna viñashca jatun yacu manñapi churagrirca. 4Shina churashpami, chai huahuapaj shuj panica, huahua ima tucujtapash carullamanda pacalla ricujurca.
5Faraonbaj ushica jatun yacupi armangapami urai rirca. Chaipi cajpimi, paipajta ruraj cuitsacunapash, jatun yacu manñapi purinajurca. Chaipimi paica, sucusta rurashca canastataca, sucuscuna ucupi tiyajujta ricurca. Shina ricushpami, paipajta ruraj shuj cuitsataca, canastata japichun cacharca. 6Chai canastata pascashpa ricujpi, shuj jari huahua huacajujta ricushpami:
“Cai huahuaca hebreocunapajmi” nijurca.
7Shina nijujpimi chai huahuapaj panica, Faraonbaj ushitaca cashna nirca:
“¿Cai huahuata canman viñachishpa cuchun, hebreopura shuj huarmita cayagrichun munanguichu?” nirca.
8Shina nijpimi Faraonbaj ushica:
“Ari rilla” nirca.
Shina nijpi chai cuitsagu rishpaca, chai huahuapaj mamatami pushamurca.
9Paitami, Faraonbaj ushica cashna nirca:
“Cai huahuata apashpa, ñucaman viñachigri. Viñachishcamandaca ñucami culquita cusha” nircami.
Shina nijpimi chai huarmica, huahuata apashpa viñachigrirca. 10Chai huahua ña viñajpica, Faraonbaj ushipajmanmi apamurca. Faraonbaj ushica, paipaj churipacha cachunmi tucuita pactachirca. Paica:
“Cai huahuataca yacumandami llujchircani” nishpami, Moisés shutita shutichirca.
Moisesca, Egiptomanda pacajushpa rishcamanda
11Chai punllacunapica cashnami tucurca: Moisesca ña jatun cashpami, paipaj huauquicunata ricungapa rirca. Paicunataca, ninan shinlli ruranacunahuan ninan llaqui cajtami ricujurca. Shinallata, paipaj huauquipuramanda, hebreopura shuj runata Egipto llactamanda shuj runa macajujtapashmi ricurca. 12Shinamandami paica caita chaita ricushpa, pipash na ricurijpica, Egipto llacta runataca huañuchishpa t'iyu alpapi pambashpa saquirca. 13Cati punllapash llujshishpami, hebreopura ishcai runacuna macanajunajujta ricurca. Chaita ricushpami, ashtahuan yalishpa macajuj runataca:
“¿Imashpata cambaj cumbatallata macajungui?” nirca.
14Shina nijpimi chai runaca cashna nirca:
“¿Pita candaca, ñucanchita mandajpash, ñucanchita ricujpash cachun churarca? ¿Canga, Egipto llacta runata huañuchishcashna, ñucatapash huañuchishallami yanguichu?” nircami.
Shina nijpimi Moisesca: “Ñuca huañuchishcataca, yachashcamari” yashpa ninanda manllarirca. 15Chashna rurashcata Faraón uyashpami, Moisesta huañuchingapa munarca. Ashtahuangarin Moisesca, Faraonbaj ñaupajmanda pacajushpa rishpami Madián llactapi causagrirca.
16Paica, yacuta llujchingapa allashca jatun utuju manñapi tiyajujpimi, Madián llactamanda sacerdotepaj canchis ushicuna shamurca. Paicunaca yacuta pilun rumipi jundachishpa, paicunapaj taitapaj llamacunaman carangapami shamunajurca. 17Ashtahuangarin, llamata michij runacuna shamushpami chaimanda calpachinajurca. Shinamandami Moisesca jatarishpa, chai cuitsacunata mitsashpa, paicunapaj llamacunaman yacuta cararca. 18Chai cuitsacuna paipaj taita Reuelpajman tigrajpimi:
“¿Imashpata cunanga ñapash shamunguichi?” nirca.
19Shina nijpimi paicunaca cashna ninajurca:
“Llama michij runacuna ñucanchi llamacunata calpachinajujpimi, Egipto llactamanda shuj runagu mitsarca. Shinallata yacutapash vishishpami, ñucanchi llamacunaman cararca” ninajurcami.
20Shina nijpimi paipaj ushicunataca cashna nirca:
“¿Chai runaguca maipitayari? ¿Chai runagutaca, imashpata saquishpa shamurcanguichiyari? Micuchun pushamugrichi” nirca.
21Moisesca chai taitapaj huasipi causangapa ari nishpami, chai huasipi saquirirca. Huasiyuj runaca, Séfora shuti paipaj ushihuanmi, Moisestaca cazarachirca.
22Moisesca paipaj huarmihuanmi, shuj jari huahuata charirca. Chai huahuataca: “Shuj llactamanda shamushpami, shujcunapaj llactapi causajuni” nishpami, Gersón shutita shutichirca.
23Ña tauca huatacuna yalishca jipami, Egipto llactata jatun mandajca huañurca. Israelcunaca, gañan causanajushpami, llaquicunahuan ¡aij! nishpa caparinajurca. Paicuna chashna llaquihuan causanajushpa caparinajujtaca, Taita Diosmi uyarca. 24Taita Diosca, paicuna ¡aij! ninajujta uyashpami, Abrahamman, Isaacman, Jacobman, ari nishcataca yarirca. 25Taita Diosca, Israelpaj huahuacuna chashna llaquipi causanajujpimi, paicunata yanapanata yarirca.
Currently Selected:
ÉXODO 2: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
