ÉXODO 3
3
Moisesta Dios cayashcamanda
1Moisesca, paipaj huarmipaj taita Jetropaj llamacunatami michishpa causajurca. Jetroca, Madián llactapaj sacerdotemi carca. Moisesca jichushca pambata llamacunahuan rijushpami, Taita Diospajlla Horeb shuti urcuman chayarca. 2Chaipimi zarza yura rupajuj chaupipi, Mandaj Diospaj Ángel shayajujta ricurca. Shinallata zarza yurataca, chashna rupajushpapash napacha tucurijtami ricurca. 3Shinamandami Moisesca: “Caitaca muscuipishnami ricujuni, imamanda chai yura na rupashpa tucurijta ricungapami rigrini” yajurcami.
4Chaita ricungapa Moisés rijujpimi, Mandaj Diosca zarza yura chaupimandaca:
“¡Moisés, Moisés!” nishpa cayarca.
Shina cayajpimi Moisesca:
“Caipimi capani” nirca.
5Shina nijpimi cashna nirca:
“Ama caiman quimirimuichu, can shayajuj alpaca, Ñucapajlla shicanyachishca cajpimi, cambaj chaquipi churajushcataca llujchina cangui” nircami.
6Cashnatapashmi nirca:
“Ñucami, cambaj ñaupaj taita Abrahambaj, Isaacpaj, Jacobpaj Taita Dios cani” nircami.
Shina nijpimi Moisesca, Taita Diosta ricungapa manllashpa, ñavita quilparirca.
7Chai jipapash Mandaj Diosca cashnami nijurca: “Ñuca agllashca gentecuna Egiptopi llaquita apanajujtaca ricunimi. Shinallata, paicunata mandajcuna ninandapacha llaquichinajujpi caparinajujtapash uyanimi. 8Chaimandami paicunataca, Egiptopi causaj runacunapaj maquimanda cacharichingapa uriajumurcani. Cai llactamanda llujchishpami paicunataca, lechepash, balun mishquipash ninandapacha tiyaj llactaman pushasha. Paicunataca, cananeo, heteo, amorreo, ferezeo, heveo, jebuseo gentecuna causanajuj alpacunamanmi pushasha. 9Israelmanda mirai huahuacuna caparishpa mañanajujtapash uyarcanimi. Shinallata, Egipto llacta runacuna, paicunata llaquichishpa charijtapash ricurcanimi. 10Shina cashcamanda shamui, cunanga candami Faraonbajman cachagrini. Ñuca agllashca Israelcunataca, Egiptomanda llujchimuchunmi candaca cachagrini” nijurcami.
11Shina nijpimi Moisesca, Taita Diostaca cashna nirca:
“Faraonbajman rishpa, Israelcunata Egiptomanda llujchingapaca, ¿pita caniyari?” nircami.
12Shina nijpimi cashna nirca:
“Rilla, Ñucami canhuan casha. Ñuca canhuan cashcata ricuchingapami, pipash na rurai ushashcata rurashpa ricuchisha. Ñuca agllashca gentecunata, Egiptomanda can llujchimujpimi, cai urcupica Ñucataca tucuicuna alicachinajunguichi” nircami.
13Shina nijpimi Moisesca, Taita Diostaca cashna nirca:
“Israelcunapajman rishpaca: ‘Cangunapaj ñaupa taitacunapaj Taita Dios cachajpimi shamuni’ nishami. Shina nijpimi paicunaca: ‘¿Paica ima shutitayari?’ nishpa tapuhuanga. Shina tapujpica, ¿imatashi nisha?” nircami.
14Shina nijpimi Taita Diosca, Moisestaca:
“ÑUCAMI CANI. ÑUCALLATAMI CANI” nijurca.
Shina nishpami cashnatapash nirca:
“Israelcunataca cashna ningui: ‘ÑUCAMI CANI’ shutita charijmi, cangunapajman cachamurca ningui” nijurcami.
15Taita Diosca, Moisestaca cashnatapashmi nirca:
“Israelcunataca cashna ningui: ‘Cangunapaj ñaupaj taita Abrahambaj, Isaacpaj, Jacobpaj Taita Diosmi cangunapajman cachamujpi shamuni’ ningui. Ñuca Shutica causaita causaicamanmi canga. Ñucataca cai shutipimi, causaita causaicaman rigsinajunga. 16Israelcunata mandaj rucu taitacunata tandachishpa cashna ningui: Cangunapaj ñaupaj taita Abrahambaj, Isaacpaj, Jacobpaj Taita Dios ricurishpami cashna nihuarca: ‘Cangunata ricungapa shamushpami, Egiptopi imashna llaquita apanajujtaca ricurcani ningui’ nihuarcami. 17Shinallata cangunataca: ‘Ñucami, Egiptopi llaquichi tucushpa causanajunmanda llujchisha. Shina llujchishpami, cananeo, heteo, amorreo, ferezeo, heveo, jebuseo gentecuna causanajuj alpaman pushasha. Lechepash, balun mishquipash ashtacapacha tiyaj alpamanmi pushasha nihuarcami’ ningui. 18Shina nijpimi can villashcataca uyanga. Cunanga, Israelcunata mandaj rucucunatapash pushashpa, Egipto llactata jatun mandajpajman rishpa cashna nigrichi: ‘Hebreocunata Mandaj Taita Diosmi, ñucanchitaca tuparirca. Shinamandami, quimsa punllata jichushca pambata chaquilla rishpa, Mandaj Taita Diosman animalcunata rupachishpa caragrinchi. Chaiman richun saquihuai ninguichi’ nircami. 19Ashtahuangarin Egipto llactata jatun mandaj, canguna richun na saquinataca yachanimi. Shina cajpipash, Ñuca llaquichijpimi cangunataca llujshichun saquinga. 20Ashtahuangarin Ñuca ninan ushaihuanmi, Egiptopi causaj runacunataca, jatun manllanayai llaquicunata cachamushpa llaquichisha. Shina llaquichijpimi cangunataca richun saquinga. 21Shinallata, chai llactamanda canguna ama shinalla llujshishpa richunga, Egiptopi causajcuna tucui imatapash carashpa cachanajuchunmi yarichisha. 22Ashtahuangarin Israel huarmicunaca, quimiriallapi causaj huarmicunatapash, paicunahuan causanajuj huarmicunatapash, culquita, curihuan rurashca juyaillacunata, churajunacunatapashmi mañashpa apanga. Chaicunaca cangunapaj huahuacunapajmi canga. Chashna rurashpami Egiptopi causajcunataca tucuita quichushpa apanguichi” nijurcami.
Currently Selected:
ÉXODO 3: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
