ÉXODO 4
4
1Shina nijpimi Moisesca cashna nirca:
“Paicunaca ñucata na crishpami, ñuca villajujtaca na uyanayachinga. Paicunaca: ‘Mandaj Diosca, canmanga maitata ricurishcangayari’ ninajungami” nircami.
2Shina nijpimi Mandaj Diosca, Moisestaca:
“¿Cambaj maquipica imatata charijungui?” nijpi,
“Shuj vara caspitami charijuni” nirca.
3Shina nijpimi:
“Chai caspita alpaman shitai” nirca.
Caspita alpaman Moisés shitajpica, culebraman tigrajpimi, Moisesca manllarishpa anchurijurca. 4Shinamandami Mandaj Diosca, Moisestaca:
“Cambaj maquihuan chupamanda japi” nirca.
Shina nijpi japijpica, cutin caspiman tigrarcallami.
5Chashna rurajpimi, canda Mandaj Dios Ñuca ricurishcataca yachanga. Cangunapaj ñaupaj taita, Abrahambaj, Isaacpaj, Jacobpaj, Taita Diospacha ricurishcatami yachanga. 6Mandaj Diosca, ashtahuan cashnatapashmi nirca:
“Cunanga, cambaj maquita quinlluli ucuman churai” nirca.
Shina nijpimi Moisesca, paipaj maquita quinllulipi churashpa cutin llujchijpica, paipaj maquica lepra ungüihuan, rasushna yuraj yuraj ricurirca. 7Shina cajpimi:
“Cambaj maquita, cambaj quinlluli ucuman cutin churai” nirca.
Shina nijpimi Moisesca, maquita paipaj quinllulipi cutin churarca. Cutin llujchijpica paipaj maquica, ali tucushcami carca. 8Moisestaca cashnami nirca:
“Callaripi can imata rurashcata na crishpa, na cazushpapash, jipaman can imata rurashcatami crinajunga. 9Cashna manllarinacunata rurashpa, ishcaicaman ricuchijpipash na crishpa, can ima nishcatapash na uyajpica, Nilo yacumanda yacuta apamushpa alpapi talingui. Chai yacuca, alpapica yahuarmanmi tigranga” nircami.
10Shina nijpimi Moisesca, Mandaj Diostaca cashna nirca:
“¡Aij, Jatun Dioslla! Ali rimaitapash, napacha ushajchu cashcani. Pundacunapash, cunambash, cambajta ruraj ñucata, Can rimajujpica ali rimaitaca na ushapanichu. Na ucha rimai ushaj, jallupash jarcarishpa rimaj runami capani” nijurcami.
11Shina nijpimi Mandaj Diosca cashna nirca:
“Shimitaca, ¿pita runaman curca? Na rimai ushajtapash, rinri na uyajujtapash, ñavi ricujujtapash, ñausatapash, ¿pita rurarca? ¿Nachu Mandaj Dios Ñucallata rurarcani? 12Cunanga rilla, can imata rimachumbash, Ñucami cambaj shimipi churasha” nircami.
13Shina nijpimi Moisesca:
“¡Aij, Jatun Dioslla! Pita cachana cashpapash, paita cachapailla” nirca.
14Shina nijpimi Mandaj Diosca, Moiseshuan fiñarishpa cashna nirca:
“Levitapura cambaj huauqui Aarondaca, ali rimaj cajtami rijsini. Paimi, canda tuparingapa llujshinga. Canda ricushpaca, tucui shungumi cushijunga. 15Canmi, Aarón imata rimachumbash paiman nina cangui. Ñucami, cambaj shimipipash, paipaj shimipipash imatalla rimanataca yachachisha. 16Paimi, cambaj randi gentecunaman villajunga. Cambaj shimihuan rimangapa randica paimi rimajunga. Canga, Ñucapaj randimi rimangui. 17Cai vara caspita apashpa rishpami, imapash manllarinacunata rurashpa ricuchijungui” nijurcami.
Moisesca, Egiptoman tigrashcamanda
18Chashna nijpimi Moisesca, paipaj huarmipaj taita Jetropajman tigrashpa, cashna nirca:
“Cunanga rigripanimi. Egiptopi, ñuca huauquicunata ricungapami rigrijupani” nirca.
Shina nijpimi taita Jetroca, Moisestaca:
“Imatapash na manllashpa, aliguta rilla” nirca.
19Mandaj Diosca Moisés Madián llactapi cajpillatami cashnatapash nirca:
“Egiptoman tigrailla. Canda huañuchingapa munajcunaca, ñami tucuilla huañushca” nirca.
20Shina nijpimi Moisesca, paipaj huarmitapash, paipaj huahuacunatapash burrupi tiyachishpa, Egipto llactaman tigrajurca. Moisesca, Taita Diospaj vara caspitapashmi apashpa rijurca.
21Mandaj Diosca, Moisestaca cashnami nijurca: “Egiptoman ña chayashpaca, imapash na rurai ushanallacunata ruranata, canman Ñuca yachachishcataca, Faraonbaj ñaupajpi ruranguilla. Ashtahuangarin, paipaj shunguta Ñuca shinlliyachijpimi, Israelcuna richunga na saquinga. 22Faraondaca cashna ningui: ‘Mandaj Diosmi cashna nirca: Israelcunaca, ñuca punda churishnapachami. 23Ñucata alicachingapa richun, Ñuca huahuacunata saqui nijpipash, na richun saquingapa munashcanguichu. Shinamandami cambaj punda churita huañuchigrini’ nircami ningui” nijurcami.
24Ñanda rishpa, pai samajuj pushtupi Mandaj Dios tuparimushpami, Moisesta huañuchingapa munarca. 25Chaimandami, Séfora shuti paipaj huarmica, shuj filo rumita japishpa, paipaj churita circuncisionda rurarca. Chai fitishca aicha carata, Moisespaj changacunapi churashpami: “Cunanga, ñuca yahuar cusapachami cangui” nirca.
26Chai jipaca, Taita Diosca richun saquircallami. Séfora huarmica, Moisestaca: “Circuncisionda rurashcamandami, ñuca yahuar cusapacha cangui” nirca.
27Shinallata Mandaj Diosca, Aarondami: “Jichushca pambapi Moisesta tuparingapa ri” nishpa mandarca.
Shina nijpi Aarón rishpaca, Taita Diospaj urcupi Moisesta tuparishpami, ugllarishpa mucharca. 28Chaipimi Moisesca, Mandaj Dios tucui imatalla nishcatapash, tucui imatalla rurashpa ricuchishcatapash Aaronman villajurca. 29Chai jipami Moisespash, Aaronbash, Israelcunata mandaj tucui ancianocunata tandachingapa rirca. 30Shina rurashpami Aaronga, Moisesman, Mandaj Dios tucui imatalla nishcacunata villajurca. Shinallata, na rurai ushanallacunatapashmi, Israelcunapaj ñaupajpi rurajurca.
31Shina rurajpimi Israelcunaca crinajurca. Shinallata, Israelcuna llaquita apanajujta ricushpa, paicunata ricungapa Mandaj Dios shamushcata yachashpami, urai cumurishpa Taita Diostaca alicachinajurca.
Currently Selected:
ÉXODO 4: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
