使徒行傳 13
13
聖神指派巴拿巴及掃羅
1 安提阿的教會有幾若個先知及教師，就是巴拿巴、互人叫做「烏人」的西緬、古利奈人路求，及分封的王希律做夥大漢的馬念，以及掃羅。 2𪜶啲敬拜主，禁食的時，聖神給𪜶講：「著為著我指派巴拿巴及掃羅去做我呼召𪜶做的工作。」
3𪜶禁食祈禱了後，給𪜶按手，差派𪜶出去。
巴拿巴及掃羅佇塞浦路斯
4 巴拿巴及掃羅已經受聖神差派，就落去西流基，對遐坐船去塞浦路斯。 5𪜶到撒拉米，就佇猶太人的會堂宣講上帝的信息。約翰‧馬可嘛去遐給𪜶協助。
6𪜶行透全島，來到帕弗，佇遐抵著一個行法術的人，是猶太人的假先知，叫做巴耶穌。 7伊及總督士求‧保羅有交陪；此個總督是賢明的人，伊請巴拿巴及掃羅來，欲對𪜶聽上帝的信息。 8不過彼個行法術的以呂馬 — 以呂馬是伊的希臘名 — 反對𪜶兩人，想欲阻擋總督接受此個信仰。 9毋拘掃羅，嘛叫做保羅，互聖神充滿，直直給伊相， 10講：「你此個魔鬼仔子，你是一切公義的對敵，充滿逐款邪惡及詭詐，故意歪曲主的正直的道路！ 11今，你看，主欲給你刑罰，你會睛瞑，暫時𣍐看見日光。」
以呂馬的目睭隨時互烏暗罩啲，起煙暈；伊四界摸，尋人給伊牽。 12總督看著所發生的代誌就信，對主的教示感覺真希奇。
佇彼西底的安提阿
13 保羅及伊的同伴對帕弗開船，到旁非利亞的別加；約翰‧馬可佇遐離開𪜶，倒去耶路撒冷。 14𪜶對別加繼續行程來到彼西底的安提阿。佇安歇日𪜶入去會堂，坐落去。 15讀摩西的律法及先知書了後，會堂的主管差人來給𪜶講：「兄弟，恁若有話欲勸勉大家，請恁講。」 16保羅就徛起來，比手勢，講：
「以色列人及敬畏上帝的眾人，請聽！ 17以色列人的上帝有揀選咱的祖先，佇𪜶寄居埃及的時互𪜶成做大的民族，用伊大權能的手導𪜶出埃及， 18閣佇曠野寬容𪜶四十年久。 19伊毀滅迦南地區七個民族了後，將彼個土地互𪜶做產業， 20約四百五十年久。
「以後上帝有為著𪜶設立士師，一直到先知撒母耳的時。 21後來𪜶要求愛有一個王，上帝就對便雅憫支族選出基士的子掃羅，互伊作王四十年久。 22上帝廢掃羅了後，任命大闢做𪜶的王。關係大闢，伊有按呢講：『我尋著耶西的後代大闢，伊是合我心意的人，逐項代誌遵趁我的旨意。』 23上帝照伊的應允，對大闢的後代互以色列人一位救主，就是耶穌。 24耶穌出來以前，約翰對眾以色列人傳道，叫𪜶著悔改來領受洗禮。 25約翰啲欲結束伊的工作的時，對眾人講：『恁想我是什麼人？我毋是恁啲聽候彼位，毋拘有一位隨佇我後面啲來，我連給伊解鞋帶都𣍐堪得。』
26「各位兄弟，亞伯拉罕的子孫及恁中間敬畏上帝的眾人，此個拯救的信息已經有傳互咱。 27因為住佇耶路撒冷的人及𪜶的官長毋識耶穌，嘛無明白逐個安歇日所讀先知的話，就給伊定罪，這抵應驗先知的預言。 28雖然𪜶尋𣍐出給伊定死罪的理由，猶久要求彼拉多給伊處死刑。 29聖經所記載關係耶穌一切的事攏完成，𪜶就將伊對十字架頂扶落來，下佇墓裡。 30總是上帝有互伊對死人中閣活， 31有一段時間，伊顯現互許個對加利利隨伊來耶路撒冷的人看見。諸個人現在佇眾人中啲作耶穌的見證人。 32阮將上帝應允互祖先的福音傳互恁， 33因為伊互耶穌閣活，此個應允已經有對咱諸個作子孫的應驗，親像詩篇第二篇所記載：
你是我的子，
我今仔日生你。
34關係互伊對死人中閣活無閣朽爛的事，
上帝講：
我欲將對大闢所應允
彼個神聖可靠的恩典賜互恁。
35所以，佇詩篇別個所在嘛按呢講：
你𣍐互你的聖者朽爛。
36 大闢在生的時有遵趁上帝的計劃。伊死了後埋葬佇祖先的邊仔，朽爛啦。 37毋拘上帝互伊對死人中閣活彼位無朽爛。 38-39所以，各位兄弟，恁應該知，赦罪的信息是對此位耶穌傳互恁；恁靠摩西的律法𣍐當互恁脫離罪，毋拘所有信耶穌的人攏會當對罪得著解放。 40所以恁著謹慎，才免互先知所講的臨到恁：
41藐視上帝的人啊，
著看，著驚，著滅亡！
因為佇恁的時代我所做的事，
有人給恁說明，恁嘛毋信。」
42 保羅及巴拿巴對會堂出去的時，眾人邀請𪜶佇下一個安歇日閣來講諸個代誌互𪜶聽。 43散會後，真多猶太人及改宗入猶太教許個虔誠的外邦人就隨保羅及巴拿巴出去。兩個使徒及𪜶談話，勸勉𪜶著擒牢上帝的恩典。
44閣落去的安歇日，全城的人攏聚集，欲聽主的道。 45猶太人看著人赫多，心內充滿怨妒，反駁保羅所講的話，閣給伊侮辱。 46毋拘保羅及巴拿巴勇敢宣講講：「上帝的道著先傳互恁，恁竟然拒絕，家己斷定無資格得著永遠的活命，所以阮才轉向外邦人。 47因為主曾按呢命令阮講：
我已經指定你做外邦人的光，
通互你將我的拯救帶到天邊海角。」
48外邦人聽著諸個話攏真歡喜，歸榮光互主的信息。許個已經受上帝揀選通得著永遠的活命的人攏成做信徒。
49對按呢主的信息傳遍彼地方。 50毋拘猶太人煽動虔誠尊貴的婦女及城內有地位的人士來迫害保羅及巴拿巴，將𪜶趕出境。 51𪜶兩人就佇眾人的面前給腳裡的土粉拌㧒确表示抗議，然後去以哥念。 52門徒滿心歡喜，閣受聖神充滿。
Currently Selected:
使徒行傳 13: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
