使徒行傳 14
14
保羅及巴拿巴佇以哥念
1像款的代誌嘛發生佇以哥念。保羅及巴拿巴入去猶太人的會堂講道，結果有真多猶太人及希臘人來信。 2毋拘許個毋信的猶太人煽動外邦人，互𪜶厭惡信徒，對𪜶起反感。 3不過𪜶兩人佇遐住真久，靠主勇敢宣講；主賜𪜶能力行神跡奇事，證明𪜶所傳恩典的信息是真實。 4城內的群眾煞分裂，有的倚猶太人，有的倚使徒。
5彼時，外邦人及猶太人以及𪜶的官長計謀傷害使徒，欲用石頭給𪜶抌。 6使徒知此個代誌，就逃避去呂高尼的路司得及特庇兩個城以及周圍的地方， 7佇遐繼續傳福音。
佇路司得及特庇
8佇路司得，有一個人軟腳，不時坐啲，對出世就𣍐行。 9伊聽保羅講道；保羅注目給伊看，看見伊有信心通得著醫治， 10就大聲講：「徛起來，徛直直！」彼個人就跳起來行。 11群眾看著保羅的所做，就用呂高尼的話大聲喝：「有神明化身做人降臨佇咱中間啦！」 12𪜶稱呼巴拿巴做宙斯，稱保羅做希耳米，因為伊是主講者。 13城外有一個宙斯廟的祭司，伊牽牛閣提花環來到城門口，欲及眾人做夥獻祭。
14 巴拿巴及保羅兩個使徒聽著就拆破衫，闖入去群眾內面，喝講： 15「恁哪啲做此款代誌？阮嘛是人，及恁攏仝款。阮來遮傳福音是欲互恁離開虛假的偶像，來歸向彼位活活的上帝；伊是天、地、海，及其中萬物的創造主。 16早前的世代，伊容允萬民行家己的路。 17不過伊一直有通過所做的好事來顯明伊家己，就是對天落雨，互恁照時收成，食物充足，心內歡喜滿足。」 18使徒講諸個話才歛歛仔阻止群眾對𪜶獻祭。
19有一寡對彼西底的安提阿及以哥念來的猶太人煽動群眾用石頭抌保羅，想講伊已經死，就給伊拖出去城外。 20門徒圍倚來的時，伊徛起來，行入去城內。隔日，伊及巴拿巴做夥去特庇。
倒去敘利亞的安提阿
21 保羅及巴拿巴佇特庇傳福音，互真多人成做門徒。後來𪜶倒去路司得、以哥念，及安提阿， 22沿路堅固門徒的信心，鼓勵𪜶持守信仰，閣對𪜶講：「咱著經過真多苦難才會當進入上帝國。」 23𪜶兩人佇逐個教會選派長老，用禁食祈禱將𪜶交託互所信的主。
24𪜶兩人經過彼西底來到旁非利亞， 25佇別加講道了後落去亞大利， 26對遐坐船倒去安提阿；就是佇遮教會有將𪜶交託佇上帝的恩典，差𪜶出去做現在已經完成的工作。
27𪜶到安提阿就召集教會的眾信徒，將上帝及𪜶做夥做的一切，以及伊給外邦人開信仰的門的經過，攏對𪜶報告。 28後來𪜶及眾門徒住一段時間。
Currently Selected:
使徒行傳 14: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
