使徒行傳 12
12
教會受閣較大的迫害
1差不多彼個時，希律王下手迫害教會的一寡人， 2用刀刣死約翰的兄哥雅各。 3伊看出此個代誌有互猶太人歡喜，就續落去掠彼得。此個代誌佇除酵節的期間發生。 4伊掠彼得，給伊關落監，交互四班的警衛顧守，逐班有四個兵。希律按算欲佇𨃟過節後給伊押出來佇眾人的面前審判。 5彼得就按呢互人關佇監裡；教會為著伊對上帝迫切祈禱。
彼得對監裡受救出
6 希律欲押彼得出來審判的前一暗，彼得睏佇兩個警衛的中間，互人用兩條鐵鍊鍊啲，閣有警衛佇門外顧守。 7忽然主的天使徛佇遐，有光啲照監房。天使搭彼得的肩頭，給伊叫醒，講：「緊起來！」鐵鍊就對伊的手落落去。 8天使對伊講：「腰帶縖咧，鞋穿咧。」彼得就照按呢做。天使閣講：「外衫幔咧，隨我來！」 9彼得就隨伊出去，毋知影天使啲做的是真的，想做是啲看異象。 10𪜶經過警衛所第一關及第二關，來到迵入城彼個鐵門，門自動開，𪜶就出去，行過一條街；天使隨時離開彼得。
11 彼得一下醒，講：「今我真正知，主差伊的天使來救我脫離希律的手及猶太人一切的計謀。」
12伊明白此個情形，就去約翰，嘛叫做馬可的老母馬利亞的厝；佇遐有真多人聚集啲祈禱。 13彼得拍外門，有一個女婢叫做羅大出來欲開門。 14伊認得彼得的聲，歡喜甲𣍐顧得開門，就走入去報告講彼得徛佇門口。 15𪜶講：「你啲起狂！」伊堅持講有影。𪜶就講：「按呢一定是伊的天使。」
16 彼得一直拍門。𪜶開門，看著彼得，非常著驚。 17彼得比手叫𪜶安靜，給𪜶說明主導伊對監獄出來的經過。彼得閣吩咐𪜶將此個消息報告雅各及眾信徒，就離開去別個所在。
18天光的時，兵士毋知彼得去叨位，就亂操操。 19希律叫人去尋，毋拘尋無，就審問看守，下令給𪜶處死。
此個代誌以後，希律離開猶太去凱撒利亞，住佇遐。
希律的死
20當時，希律對泰爾及西頓的人民非常受氣，𪜶就派代表組團去見伊。𪜶代先說服宮廷的總管伯拉斯都，設法互𪜶通去見希律，對伊求和，因為𪜶的糧食靠王管轄的地區啲供應。
21佇約定的日子，希律穿王服，坐佇座位，對人民演講。 22眾人一直喝講：「這是神明的聲，毋是人的聲！」 23主的天使隨時給希律拍倒，因為伊無歸榮光互上帝；後來伊互蟲咬，就死去。
24上帝的道愈傳開愈興旺。
25 巴拿巴及掃羅完成𪜶的任務，就導叫做馬可的約翰做夥離開#12.25 「離開」：有的抄本是「轉去」。耶路撒冷。
Currently Selected:
使徒行傳 12: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
