使徒行傳 11
11
彼得對耶路撒冷的教會報告
1使徒及住佇猶太的信徒攏有聽著外邦人嘛接受上帝的道。 2彼得上耶路撒冷的時，許個受割禮的猶太人信徒給伊批評，講： 3「你竟然入去無受割禮的人的厝及𪜶做夥食飯！」 4彼得就將所發生的代誌對頭一項一項給𪜶說明：
5「我佇約帕城啲祈禱的時有入神看見異象，有一個物件親像一塊大塊布，四角頭吊啲，對天頂縋落來到我面前。 6我詳細看，內面有地上的牲生、野獸、蟲𧒴，及空中的鳥類。 7我閣聽著有聲給我講：『彼得，起來，刣來食！』 8我講：『主啊，絕對𣍐用得！我毋曾食污穢無清氣的物。』 9彼個聲第二遍對天頂應我講：『上帝互伊清氣的，你毋通看做污穢。』 10此個代誌繼續有三遍，許個物件就攏閣收倒轉去天頂。 11抵彼時，對凱撒利亞派來尋我彼三個人來到阮啲住彼間厝。 12聖神叫我著及𪜶去，毋通躊躇#11.12 「躊躇」：有的抄本是「佇𪜶及阮中間有差別」。。彼六個信徒嘛及我做夥去凱撒利亞。阮就攏入去哥尼流的厝。 13哥尼流給阮講伊有看見一個天使徛佇伊的厝內，對伊講：『著差人去約帕請彼個叫做彼得的西門來。 14伊有話欲給你講，通互你及你的全家攏得著救。』 15我開始講話的時，聖神降臨佇𪜶身上，及當初降臨佇咱身上仝款。 16我就想起主所講的話：約翰用水給恁洗禮，毋拘恁會領受聖神的洗禮。 17既然上帝有將咱信主耶穌基督的時所領受像款的恩賜賜互外邦人，我算啥人，哪會當阻擋上帝的所做？」
18𪜶聽著諸個話就恬去，歸榮光互上帝，講：「上帝嘛有互外邦人悔改來得著活命。」
安提阿的教會
19因為司提反的代誌受迫害四散的信徒，有的到腓尼基、塞浦路斯，及安提阿，𪜶無對別人，只有對猶太人傳道。 20毋拘其中有一寡塞浦路斯及古利奈的信徒到安提阿，嘛向希臘人傳，對𪜶講起主耶穌的福音。 21主的氣力及𪜶同在，信來歸主的人額真多。
22此個消息傳到耶路撒冷的教會，𪜶就派巴拿巴去安提阿。 23伊一下到位，看著上帝有賜𪜶恩惠，就歡喜，勸勉𪜶大家著全心一意信靠主。 24巴拿巴是好人，互聖神充滿，閣有信心。彼時有真多人信主。
25後來，巴拿巴去大數尋掃羅， 26尋著就導伊去安提阿。足足一年久，𪜶兩個及教會的人聚會，教示真多人。門徒叫做「基督徒」是對安提阿開始。
27彼時，有幾若個先知對耶路撒冷落去安提阿。 28其中一個名叫做亞迦布；伊得著聖神的指示，徛起來預言講全世界啲欲有大飢荒。此個代誌佇克勞第統治的年間果然發生。 29門徒就決定逐個人照家己的能力捐獻，通送去賑濟住佇猶太的信徒。 30𪜶就照按呢做，將捐獻託巴拿巴及掃羅交互遐的長老。
Currently Selected:
使徒行傳 11: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
