Iok-hān Hok-im 8

1m̄-kú Iâ-so͘ khì Kaⁿ-ná-soaⁿ.

2Keh-ji̍t thàu-chá, Iâ-so͘ koh khì Sèng-tiān. Bîn-chiòng lóng óa-lâi I hia, I chiū chē lo̍h-khì kā in kà-sī. 3Hit-sî keng-ha̍k-kàu-su kap Hoat-lī-sài-phài ê lâng chhōa chi̍t ê hū-jîn-lâng lâi, i teh hoān kan-îm ê sî hō͘ lâng lia̍h--tio̍h. In hō͘ i khiā tī tiong-ng, 4mn̄g Iâ-so͘ kóng, “Lāu-su, chit-ê cha-bó͘-lâng hoān kan-îm ê sî hō͘ lâng lia̍h--tio̍h. 5Kun-kù Lu̍t-hoat, Mô͘-se bēng-lēng lán tio̍h ēng chio̍h-thâu tìm-sí chit-khoán cha-bó͘-lâng. Lí ū sím-mi̍h ì-kiàn?” 6In án-ni kóng sī beh chhì-thàm Iâ-so͘, thang chhē khang-phāng kā I kò. Iâ-so͘ khû--lo̍h-khì, ēng chńg-thâu-á tī thô͘-kha siá-jī.

7In ti̍t-ti̍t kā I mn̄g, Iâ-so͘ chiū khiā--khí-lâi, tùi in kóng, “Lín tiong-kan bô chōe ê lâng seng the̍h chio̍h-thâu kā i tìm.” 8Jiân-āu I koh khû lo̍h-khì tī thô͘-kha siá-jī. 9In chi̍t-ē thiaⁿ-tio̍h chiah-ê ōe, tùi lāu--ê khai-sí chi̍t-ê chi̍t-ê liu--chhut-khì, chhun Iâ-so͘ chi̍t ê, hit-ê hū-jîn-lâng iáu khiā tī hia. 10Iâ-so͘ khiā--khí-lâi, kā i kóng, “Hū-jîn-lâng, in tī tó-ūi? Bô lâng kā lí tēng-chōe sī--bô?”

11I ìn kóng, “Sian-siⁿ, bô.”

Iâ-so͘ kóng, “Góa mā bô kā lí tēng-chōe. Lí tńg--khì, í-āu m̄-thang koh hoān-chōe.”}

Iâ-so͘ Sī Sè-kan ê Kng

12Iâ-so͘ koh kā chèng-lâng kóng, “Góa sī sè-kan ê kng; tè góa ê lâng bōe tī o͘-àm tiong seng-oa̍h, hoán-tńg ū oa̍h-miā ê kng.”

13Hoat-lī-sài-phài ê lâng chiū tùi I kóng, “Lí teh ūi ka-kī choh-chèng, lí ê kiàn-chèng bô-hāu.”

14Iâ-so͘ ìn kóng, “Sui-jiân góa ūi ka-kī choh-chèng, góa ê kiàn-chèng ū-hāu, in-ūi góa chai góa tùi tó-ūi lâi, beh khì tó-ūi; m̄-kú lín m̄ chai góa tùi tó-ūi lâi, beh khì tó-ūi. 15Lín ēng lâng ê phiau-chún phoe-phòaⁿ lâng, góa bô kā lâng phoe-phòaⁿ. 16Góa nā phoe-phòaⁿ, góa ê phòaⁿ-toàn chèng-khak, in-ūi góa m̄-sī ka-kī chi̍t ê teh phòaⁿ-toàn, sī chhe góa ê Pē kap góa chòe-hé phòaⁿ-toàn. 17Koh lín ê Lu̍t-hoat ū kì-chài, ū nn̄g ê lâng choh-chèng, in ê kiàn-chèng chiah ū-hāu. 18Góa ūi ka-kī choh-chèng, chhe góa ê Pē mā ūi góa choh-chèng.”

19In chiū mn̄g Iâ-so͘, “Lí ê Pē tī tó-ūi?”

Iâ-so͘ ìn kóng, “Lín m̄ bat góa, mā m̄ bat góa ê Pē. Lín nā bat góa, mā ōe bat góa ê Pē.”

20Chiah-ê ōe sī Iâ-so͘ tī Sèng-tiān kà-sī lâng ê sî, tī khǹg hōng-hiàn-kūi hia kóng--ê. Put-kò bô lâng kā I lia̍h, in-ūi I ê sî iáu-bē kàu.

Góa Khì ê Só͘-chāi, Lín Bōe-tàng Khì

21Iâ-so͘ koh kā in kóng, “Góa beh lī-khui lah. Lín ōe chhē góa, m̄-kú lín ōe in-ūi ka-kī ê chōe lâi sí; góa khì ê só͘-chāi, lín bōe-tàng khì.”

22 Iû-thài-kàu ê léng-siù kóng, “I kóng ‘Góa khì ê só͘-chāi, lín bōe-tàng khì’, kiám kóng I beh khì chū-sat?”

23Iâ-so͘ kā in kóng, “Lín tùi ē-bīn lâi, góa tùi téng-bīn lâi. Lín sio̍k chit sè-kan, góa bô sio̍k chit sè-kan. 24Só͘-í góa chiah kā lín kóng lín ōe in-ūi ka-kī ê chōe lâi sí; in-ūi lín nā m̄ sìn góa chiū-sī ‘Chū-iú-éng-iú’ Hit-ūi, lín ōe in-ūi ka-kī ê chōe lâi sí.”

25In chiū mn̄g Iâ-so͘, “Lí sī sím-mi̍h-lâng?”

Iâ-so͘ ìn kóng, “Góa tùi khí-thâu chiū kā lín kóng lah. 26Koan-hē lín, góa ū chin chōe thang kóng, thang tēng-chōe. M̄-kú chhe góa Hit-ūi sī chin-si̍t, góa chiong tùi I thiaⁿ--tio̍h-ê thoân hō͘ sè-kan-lâng.”

27In bô liáu-kái Iâ-so͘ sī teh tùi in kóng Pē ê tāi-chì. 28Só͘-í Iâ-so͘ kā in kóng, “Lín kú-khí Jîn-chú liáu-āu chiū ōe chai, góa chiū-sī ‘Chū-iú-éng-iú’ Hit-ūi, koh góa chòe tāi-chì bô chi̍t hāng sī chiàu góa ka-kī ê ì-sù, chí-ū chiàu Pē kà-sī góa--ê lâi kóng. 29Chhe góa Hit-ūi kap góa tông-chāi; I m̄-bat pàng góa ka-kī chi̍t ê, in-ūi góa put-sî teh chòe I só͘ hoaⁿ-hí ê tāi-chì.”

30Iâ-so͘ kóng chiah-ê ōe ê sî, ū chin chōe lâng sìn I.

Chin-lí Hō͘ Lín Ū Chū-iû

31Iâ-so͘ tùi sìn I hiah-ê Iû-thài-lâng kóng, “Lín nā kè-sio̍k chun-siú góa ê ōe, chiū si̍t-chāi sī góa ê bûn-tô͘; 32lín ōe bat chin-lí, chin-lí ōe hō͘ lín tit-tio̍h chū-iû.”

33In ìn kóng, “Goán sī A-pek-la-hán ê kiáⁿ-sun, m̄-bat chòe lâng ê lô͘-lē. Lí ná ōe kóng ‘Lín ōe tit-tio̍h chū-iû’?”

34Iâ-so͘ kā in kóng, “Góa si̍t-si̍t-chāi-chāi kā lín kóng, ta̍k-ê hoān-chōe ê lâng chiū-sī chōe ê lô͘-lē. 35Lô͘-lē bô éng-oán sio̍k tī chú-lâng ê ka-têng, kiáⁿ chiū éng-oán ū. 36Só͘-í, Siōng-tè ê Kiáⁿ nā hō͘ lín chū-iû, lín chiū si̍t-chāi ū chū-iû. 37Góa chai lín sī A-pek-la-hán ê kiáⁿ-sun; m̄-kú lín siūⁿ-beh thâi góa, in-ūi lín m̄ chiap-siū góa ê ōe. 38Góa sī teh kóng tùi góa ê Pē hia khòaⁿ--tio̍h-ê; lín sī teh chòe tùi lín ê pē hia thiaⁿ--tio̍h-ê.”

Lín ê Pē Sī Mô͘-kúi

39In ìn Iâ-so͘ kóng, “Goán ê pē sī A-pek-la-hán.”

Iâ-so͘ tùi in kóng, “Lín nā-sī A-pek-la-hán ê kiáⁿ-sun, lín ōe chòe A-pek-la-hán só͘ chòe ê tāi-chì. 40Hiān-chāi góa chiong tùi Siōng-tè thiaⁿ--tio̍h ê chin-lí kā lín kóng, lín soah siūⁿ-beh thâi góa. A-pek-la-hán pèng bô chòe chit-khoán tāi-chì. 41Lín sī teh chòe lín ê pē só͘ chòe ê tāi-chì.”

In ìn kóng, “Goán m̄-sī su-seng-chú; Siōng-tè sī goán î-it ê Pē.”

42Iâ-so͘ chiū tùi in kóng, “Siōng-tè nā chin-chiàⁿ sī lín ê Pē, lín ōe thiàⁿ góa, in-ūi góa tùi Siōng-tè hia lâi, hiān-chāi tī chia. Góa m̄-sī chiàu góa ka-kī ê ì-sù lâi, sī Siōng-tè chhe-khián góa lâi. 43Sī-án-chóaⁿ lín bô bêng-pe̍k góa ê ōe? Sī in-ūi góa ê ōe lín thiaⁿ bōe ji̍p--khì. 44Lín ê pē sī Mô͘-kúi; lín kan-ta siūⁿ-beh si̍t-hêng lín ê pē ê io̍k-bōng. I tùi khí-thâu chiū-sī sat-jîn-hoān, bô chun-siú chin-lí, in-ūi i ê lāi-bīn bô chin-lí. Kóng pe̍h-chha̍t sī i ê pún-sèng, in-ūi i sī kóng pe̍h-chha̍t--ê, mā-sī kóng pe̍h-chha̍t ê lâng ê pē. 45In-ūi góa kóng chin-lí, lín m̄ sìn góa. 46Lín tiong-kan sím-mi̍h-lâng ōe-tàng chí-chèng góa ū-chōe? Kì-jiân góa kóng chin-lí, sī-án-chóaⁿ lín m̄ sìn góa? 47Sio̍k Siōng-tè ê lâng thiaⁿ Siōng-tè ê ōe; lín m̄ thiaⁿ, in-ūi lín m̄-sī sio̍k Siōng-tè.”

Iâ-so͘ kap A-pek-la-hán

48 Iû-thài-kàu ê léng-siù tùi Iâ-so͘ kóng, “Goán kóng lí sī Sat-má-lī-a-lâng, koh hoān-tio̍h kúi, kiám m̄-tio̍h?”

49Iâ-so͘ kóng, “Góa bô hoān-tio̍h kúi; góa chun-kèng góa ê Pē, lín khiok bô chun-kèng góa. 50Góa bô tui-kiû ka-kī ê êng-kng, put-kò ū Chi̍t-ūi ūi-tio̍h góa tui-kiû, ūi-tio̍h góa chhâi-koat. 51Góa si̍t-si̍t-chāi-chāi kā lín kóng, chun-siú góa ê ōe ê lâng it-tēng éng-oán bōe sí.”

52 Iû-thài-kàu ê léng-siù ìn kóng, “Taⁿ goán khak-si̍t chai lí hoān-tio̍h kúi. A-pek-la-hán í-keng sí, chèng sian-ti mā sí--khì, lí ná kóng ‘chun-siú góa ê ōe ê lâng éng-oán bōe sí’? 53Lí kiám pí goán ê pē A-pek-la-hán khah úi-tāi? I í-keng sí, chèng sian-ti mā sí--khì. Lí siūⁿ lí sī siáⁿ-lâng?”

54Iâ-so͘ ìn kóng, “Góa nā êng-iāu góa ka-kī, góa ê êng-kng chiū bô kè-ta̍t. Êng-iāu góa--ê sī góa ê Pē, chiū-sī lín kóng ‘I sī goán ê Siōng-tè’ Hit-ūi. 55Lín m̄ bat I, m̄-kú góa bat I. Góa nā kóng góa m̄ bat I, góa chiū kap lín kâng-khoán sī pe̍h-chha̍t. M̄-kú góa bat I, koh chun-siú I ê ōe. 56Lín ê pē A-pek-la-hán hoaⁿ-hí teh thèng-hāu góa lâi-lîm ê ji̍t-chí; i ū khòaⁿ--tio̍h, khòaⁿ-liáu chin hoaⁿ-hí.”

57 Iû-thài-kàu ê léng-siù tùi Iâ-so͘ kóng, “Lí iáu-bē gō͘-cha̍p hè, kiám bat khòaⁿ-tio̍h A-pek-la-hán?”

58Iâ-so͘ ìn kóng, “Góa si̍t-si̍t-chāi-chāi kā lín kóng, A-pek-la-hán iáu-bē chhut-sì, góa í-keng chûn-chāi.”

59In chiū the̍h chio̍h-thâu beh kā I tìm; m̄-kú Iâ-so͘ siám-khui, lī-khui Sèng-tiān.

Currently Selected:

Iok-hān Hok-im 8: TTVR

Highlight

Copy

Want to have your highlights saved across all your devices? Sign up or sign in

The Bible Society in Taiwan

Learn More About 現代台語譯本羅馬字版

Popular Bible Verses from
Iok-hān Hok-im 8

Videos for Iok-hān Hok-im 8

John 8:1-11

Lumo Project

Adulterous Woman

Jesus Film Project

I AM The Light of the World

Streetlights

Episode 16: Can You Trust the Bible?

Under The Hood

Iok-hān Hok-im 8

Popular Bible Verses from
Iok-hān Hok-im 8

Videos for Iok-hān Hok-im 8

John 8:1-11

Adulterous Woman

I AM The Light of the World

Episode 16: Can You Trust the Bible?

Bible:

Chinese, Min Nan

Version: 現代台語譯本羅馬字版 - TTVR

Iok-hān Hok-im 8

Iok-hān Hok-im 8

Popular Bible Verses from Iok-hān Hok-im 8

Videos for Iok-hān Hok-im 8

John 8:1-11

Adulterous Woman

I AM The Light of the World

Episode 16: Can You Trust the Bible?

Bible:

Chinese, Min Nan

Version: 現代台語譯本羅馬字版 - TTVR

Iok-hān Hok-im 8

Popular Bible Verses from
Iok-hān Hok-im 8