Iok-hān Hok-im 7

Iâ-so͘ ê Hiaⁿ-tī M̄ Sìn I

1Chit-ê tāi-chì í-āu, Iâ-so͘ khì Ka-lī-lī kéng-lāi ta̍k só͘-chāi; I bô ài khì Iû-thài, in-ūi Iû-thài-kàu ê léng-siù chhē ki-hōe beh kā I thâi. 2Iû-thài-lâng ê Tah-liâu-choeh teh-beh kàu. 3Só͘-í Iâ-so͘ ê hiaⁿ-tī kā I kóng, “Lí tio̍h lī-khui chia khì Iû-thài, hō͘ lí ê bûn-tô͘ mā thang khòaⁿ lí teh chòe ê tāi-chì. 4Lâng beh chhut-miâ bōe tiām-tiām-á chòe. Kì-jiân lí teh chòe chiah-ê tāi-chì, tio̍h khì chòe hō͘ sè-kan-lâng khòaⁿ.” 5In-ūi liân I ê hiaⁿ-tī to bô sìn I.

6Iâ-so͘ kā in kóng, “Góa ê sî iáu-bē kàu; put-kò lín ta̍k-sî lóng piān-piān. 7Sè-kan-lâng bô lí-iû oàn-hūn lín; in oàn-hūn góa, in-ūi góa put-sî teh chí-chhut in ê hêng-ûi siâ-ok. 8Lín chòe lín chiūⁿ-khì siú-choeh; góa bô ài chiūⁿ-khì siú chit-ê choeh, in-ūi góa ê sî-ki iáu-bē sêng-se̍k.” 9Iâ-so͘ kóng chiah-ê ōe liáu-āu kè-sio̍k lâu tī Ka-lī-lī.

Iâ-so͘ Siú Tah-liâu-choeh

10Iâ-so͘ ê hiaⁿ-tī chiūⁿ-khì siú-choeh, I mā khì, m̄-sī kong-khai, sī tiām-tiām-á khì. 11Choeh-kî ê tiong-kan, Iû-thài-kàu ê léng-siù teh chhē Iâ-so͘, mn̄g kóng, “I tī sím-mi̍h só͘-chāi?”

12Kûn-chiòng ê tiong-kan ū chin chōe lâng su-hā teh gī-lūn Iâ-so͘ ê tāi-chì. Ū lâng kóng, “I sī hó-lâng.” Mā ū lâng kóng, “M̄-sī, I sī teh siàn-tōng kûn-chiòng.” 13M̄-kú in kiaⁿ Iû-thài-kàu ê léng-siù, bô lâng káⁿ kong-jiân kóng-khí I ê tāi-chì.

14Choeh-kî kè chi̍t-pòaⁿ, Iâ-so͘ chiah chiūⁿ-khì Sèng-tiān kà-sī lâng. 15Iû-thài-kàu ê léng-siù kám-kak kî-koài, kóng, “Chit-ê lâng bô siū-kè kàu-io̍k, ná hiah-ni̍h ū ha̍k-būn?”

16Iâ-so͘ ìn kóng, “Góa ê kà-sī m̄-sī góa ka-kī ê, sī chhe góa lâi Hit-ūi ê kà-sī. 17Lâng nā goān-ì si̍t-hêng Siōng-tè ê chí-ì, chiū ōe chai góa ê kà-sī sī tùi Siōng-tè lâi á-sī chiàu ka-kī ê ì-sù teh kóng. 18Óa-khò ka-kī kóng--ê sī teh kiû ka-kī ê êng-kng; kiû chhe i Hit-ūi ê êng-kng ê lâng sī chin-si̍t, i ê lāi-bīn lóng bô put-gī. 19Mô͘-se kiám bô hō͘ lín Lu̍t-hoat? Put-kò lín tiong-kan bô kah chi̍t ê chun-siú Lu̍t-hoat. Sī-án-chóaⁿ lín siūⁿ-beh thâi góa?”

20Kûn-chiòng ìn kóng, “Lí m̄-teh khòaⁿ-tio̍h kúi. Siáⁿ-lâng siūⁿ-beh thâi lí?”

21Iâ-so͘ tùi in kóng, “Góa kan-ta chòe chi̍t hāng tāi-chì, lín chiū lóng kám-kak kî-koài. 22Mô͘-se bēng-lēng lín kiâⁿ kat-lé, lín mā tī An-hioh-ji̍t kā lâng kiâⁿ kat-lé. Sū-si̍t, chit-ê lé-gî m̄-sī tùi Mô͘-se, sī tùi lín chó͘-sian khai-sí. 23Kì-jiân lín ūi-tio̍h beh chun-siú Mô͘-se ê Lu̍t-hoat, tī An-hioh-ji̍t kā chi̍t ê ta-po͘ gín-á kiâⁿ kat-lé, án-ni góa tī An-hioh-ji̍t hō͘ chi̍t ê pīⁿ-lâng oân-choân hó--khí-lâi, lín sī-án-chóaⁿ tùi góa siū-khì? 24M̄-thang khòaⁿ gōa-piáu lâi phòaⁿ-toàn sī-hui, tio̍h chiàu kong-chèng phòaⁿ-toàn.”

I Sī Ki-tok á M̄-sī

25Ū chi̍t-kóa Iâ-lō͘-sat-léng ê lâng teh kóng, “Chit-ê kiám m̄-sī in siūⁿ-beh sat-hāi hit-ê lâng? 26Lí khòaⁿ, I kong-khai teh kóng-ōe, in mā bô kóng sím-mi̍h kā I hoán-tùi. Kiám kóng chiah-ê koaⁿ-tiúⁿ chin-chiàⁿ chai chit-ê lâng sī Ki-tok? 27M̄-kú chit-ê lâng ê lâi-le̍k lán lóng chai; Ki-tok lâi ê sî, bô lâng ōe chai I tùi tó-ūi lâi.”

28Iâ-so͘ tī Sèng-tiān teh kà-sī ê sî, tōa-siaⁿ kóng, “Lín bat góa, mā chai góa ê lâi-le̍k; put-kò góa m̄-sī chiàu ka-kī ê ì-sù lâi. Chhe góa lâi Hit-ūi sī chin-si̍t, lín khiok m̄ bat I. 29Góa bat I, in-ūi góa tùi I hia lâi, I chhe-khián góa lâi.”

30In chiū siūⁿ-beh kā I lia̍h, put-kò bô lâng hē-chhiú, in-ūi I ê sî iáu-bē kàu. 31Kûn-chiòng ê tiong-kan ū chin chōe lâng sìn I, kóng, “Ki-tok lâi ê sî, kiám ōe pí chit-ê lâng kiâⁿ khah chōe sîn-jiah?”

Kéng-ōe Siū Phài Lia̍h Iâ-so͘

32Hoat-lī-sài-phài ê lâng thiaⁿ-tio̍h kûn-chiòng su-hā teh gī-lūn Iâ-so͘ ê tāi-chì, chè-si-tiúⁿ kap Hoat-lī-sài-lâng chiū phài Sèng-tiān ê kéng-ōe khì lia̍h Iâ-so͘. 33Iâ-so͘ kóng, “Góa koh kap lín chòe-hé bô jōa kú chiū beh tńg-khì chhe góa lâi Hit-ūi hia. 34Lín ōe chhē góa, m̄-kú chhē bōe tio̍h, in-ūi góa khì ê só͘-chāi, lín bōe-tàng khì.”

35 Iû-thài-kàu ê léng-siù hō͘-siōng kóng, “Chit-ê lâng beh khì tó-ūi hō͘ lán chhē bōe tio̍h? I siūⁿ-beh khì sì-sòaⁿ tī Hi-la̍h siâⁿ-chhī ê Iû-thài kiâu-bîn hia, khì kà-sī Hi-la̍h-lâng sī--bô? 36I kóng ‘Lín ōe chhē góa, m̄-kú chhē bōe tio̍h’, koh kóng ‘Góa khì ê só͘-chāi, lín bōe-tàng khì’, che sī sím-mi̍h ì-sù?”

Oa̍h-chúi ê Khoe

37Choeh-kî ê chòe-āu hit-ji̍t, mā-sī siōng tiōng-iàu ê ji̍t, Iâ-so͘ khiā--khí-lâi, tōa-siaⁿ kóng, “Chhùi-ta ê lâng tio̍h lâi góa chia lim. 38Sìn góa ê lâng, chiàu Sèng-keng só͘ kóng, ‘Ū oa̍h-chúi ê khoe ōe tùi i ê pak-lāi chhèng--chhut-lâi.’”

39Iâ-so͘ án-ni kóng sī chí sìn I ê lâng teh-beh niá-siū ê Sèng Sîn. Hit-sî, Siōng-tè iáu-bē sù Sèng Sîn, in-ūi Iâ-so͘ iáu-bē tit-tio̍h êng-kng.

Kûn-chiòng In-ūi Iâ-so͘ Khí Hun-cheng

40Kûn-chiòng ê tiong-kan ū lâng thiaⁿ-tio̍h chiah-ê ōe chiū kóng, “Chit-ê lâng chin-chiàⁿ sī hit-ūi Sian-ti.” 41Koh ū lâng kóng, “Chit-ê lâng sī Ki-tok.”

Put-kò mā ū lâng kóng, “Ki-tok ná ōe tùi Ka-lī-lī chhut? 42Sèng-keng kiám m̄-sī kóng Ki-tok sī Tāi-pi̍t ê kiáⁿ-sun, sī tùi Tāi-pi̍t ê kò͘-hiong Pek-lī-hêng chhut?” 43Án-ni, kûn-chiòng in-ūi Iâ-so͘ ê iân-kò͘ khí hun-cheng. 44Kî-tiong ū chi̍t-kóa lâng siūⁿ-beh lia̍h Iâ-so͘, m̄-kú bô lâng hē-chhiú.

Iû-thài-kàu ê Léng-siù M̄ Sìn Iâ-so͘

45Sèng-tiān ê kéng-ōe tńg-khì kìⁿ chè-si-tiúⁿ kap Hoat-lī-sài-phài ê lâng. In chiū mn̄g kéng-ōe kóng, “Lín ná bô kā I ah--lâi?”

46Kéng-ōe ìn kóng, “M̄-bat ū lâng kóng-ōe chhin-chhiūⁿ chit-ê lâng.”

47Hoat-lī-sài-lâng chiū tùi in kóng, “Lín mā hō͘ I bê--khì o͘h? 48Lán ê koaⁿ-tiúⁿ á-sī Hoat-lī-sài-lâng kiám ū lâng sìn I? 49Chit-tīn m̄ bat Lu̍t-hoat ê kûn-chiòng sī siū chiù-chó͘--ê.”

50Hoat-lī-sài-lâng ê tiong-kan bat khì kìⁿ Iâ-so͘ ê Nî-ko-tek-bō͘ kā in kóng, 51“Chiàu lán ê Lu̍t-hoat, bô seng sím-mn̄g koh chhâ-bêng lâng ū chòe sím-mi̍h, kiám ōe-tàng kā i tēng-chōe?”

52In ìn kóng, “Lí mā-sī Ka-lī-lī lâi--ê sī--bô? Lí chhâ-khó Sèng-keng chiū chai Ka-lī-lī m̄-bat chhut sian-ti.”

Hoān Kan-îm ê Hū-jîn-lâng

{ 53Chèng-lâng lóng tńg-khì ka-kī ê chhù,#7.53-8.11 Chit-tōaⁿ keng-bûn, siōng chá ê chhau-pún bô; āu-lâi ê chhau-pún, ū-ê hē tī chia; ū-ê hē tī 7.36 āu-bīn; ū-ê hē tī 21.25 āu-bīn; ū-ê hē tī Lō͘-ka 21.38 āu-bīn.

Currently Selected:

Iok-hān Hok-im 7: TTVR

Highlight

Copy