Lukas 6

Sinu Tagmagurang sis Fakamatoun fag Menit?

(Mat. 12:1-8; Mar. 2:23-28)

1Sik Fakamatoun fag Menit Isus ay at ngay tagadal nadalan sa sik tanuman. Ay ginanya at ngay tagadal narabas tiba at buwadan, ay nalukba ay naon wan. 2Ay tibak taw Parisiyu nalong te, “Taw ro ay fagfagbulunun sis Fakamatoun fag Menit?” 3Ay Isus nabalus te, “Go sangay yam natap fun Dabid at fagbulun ebi gina kalunus? Ay anggan at ngay ufud sigon gina kalunus? 4Kanya nasakbo sas Diyus bale ay nabul ay naon sanya fag ngay anyun sas Diyus fag ngay tinafay, dewa marirukan sis Diyus at longan te, ‘Wa masine tibak taw nu kon ka fag ngay tinafay. Takon at ngay taganyun wadi.’ ” 5Ay Isus nalong yangay te, “Aw wan, Taw at Baguwama, at tagmagurang dewa sis Fakamatoun fag Menit.”

Isus Nafafiya sik Ama at yud Mafalelegan at Take

(Mat. 12:9-14; Mar. 3:1-6)

6Ay sa tibak Fakamatoun fag Menit, Isus nasakbo sa sangay taw Udyu at bale fakafulan ay nafoyung sanya. Ay sanya e sik ama at yud mafalelegan at siyun baliwa fag take. 7Ay at ngay tagfoyung Muisis at Suguwan ay anggan taw Parisiyu gulit dawdaw Isus te, “Go Isus gfafiya ro ka fag ama sis Fakamatoun fag Menit?” Fakatanyaun ka fag ngay taw fagulitun, anway kaumsig nu e foyungan sa tibak taw te, Isus long e asalanan. 8Ay roro Isus gsaful way ka fag ngay taw at amatanganan. Ay nalong sa at yud mafalelegan at take te, “Stei, malindugi stes fagunaan.” Ay ka fag ama nlindug wa fiya sanya. 9Ay Isus nalong sanya fag ngay taw te, “E fagintoun aw ayu. Inday fag fagbulun tagfaning Muisis at Suguwan sis Fakamatoun fag Menit? Go nanfagbulun masine ay ate at mauri? Ay go nanfalangfe sik taw ay ate nanfate?” 10Ay Isus nalinggat ka fag ngay taw, ay rodi ataw nalong sa at yud mafalelegan at take te, “Falugdei am take.” Ay kanya nafalugde ay infiya wan. 11Ay ka fag ngay tagfoyung Muisis at Suguwan ay taw Parisiyu mason nu kadotama, ay igsulitanan sit dayu te, “Tain ban tam fagbulun sas Isus?”

Isus Nafili At Nasugu fag Labi Duwa

(Mat. 10:1-4; Mar. 13:13-19)

12Ginanya fag menit, Isus nalo sas tungud muyud laman nandarangin. Ay fagngaba wak yabi Isus nu gdarangin sanya. 13Ay nu nmenit wan, Isus nafaful at ngay tagalo fag ngay taw, ay nafili sanya ginan labi duwak taw. Ay nangayan at Nasugu fag Labi Duwa. 14Katatuy at ngay ngayan: Simun (Isus nafangayan yay te, Pedru), ay Andres (Simun at ariyan), ay Santiagu, ay Uan, ay Filipi, ay Bartulume, 15ay Matiyu, ay Tumas, ay sadi yak Santiagu (Santiagu tama Alfiu), ay Simun (tiba nafangayan anya te, sik Takamabo sas talun Ruma), 16ay Udas (Santiagu at baguwama), ay Udas Iskaryute,#6:16 Iskaryute: Iskaryute bunwa Udas apilidu. Labon at masuwad, Udas sik taw Kiryut. at nafoyung ban sat mauri fag ngay taw.

Isus Igfoyung ay anggan Igfafiya ngay Taw

(Mat. 4:23-25)

17Ay Isus ay at Labi Duwa at nafili indaga siginans tungud muyud ay inful sa sik datag. Ay at ngay tagadal inful yangay sanya ay anggan sik ngay taw ayuwayu siginans talun Udiya fag ngay fulan ay anggan fulan Erusalem. Ay e sik ngay taw yangay sanya siginans fulan Tiru ay Sidun. Kanya sis tigyangan dagat. 18At fagindasugun laman nandungugan Isus ay laman nanfafiya at ngay daylan. Ay Isus nafafiya at ke mafurat fag falad fag ngay taw. 19Ay fagayu taw kaumsig nanted Isus, anway at fagmadaragangun siginan anya mafafiya fagayu at ke daylan.

Isus Nafoyung sas Fagusegananun ay sas Fagmauriun baliwa

(Mat. 5:1-12)

20Ay Isus nalinggat at ngay tagadal ay nalong te,

“Useganani tuwa, am at yud e kwa fag taw, anway anggan am, katap wam sas Diyus at fagmagurangan taw.

21Useganani tuwa, am takalunus katsi, anway mapsug tuwa ban am.

Useganani tuwa, am taguyway katsi, anway mase tuwa ban am.

22Useganani tuwa, am tagfaning angku, Taw at Baguwama, dewa ay iba kalimata ayu, ay gfalingun ayu, ay glong sa ayu at mauri, anggan glong te, ‘Bunwa am em kaiban.’

23Katanya yangay ka fag ngay taw at aguyangan at nafagbulun ebi sas Diyus at ngay taglong. Nu magbulun ban sa ayu katanya, useganani dawdaw, gbiya ban ay nabul sas banwa.

24Ay e nanfauri ban ayu, am at mabalan fag taw. Katsi nabul wam ay ngay fakaumsigun nus nge wain.

25Ay e nanfauri ban ayu, am fag ngay taw at mapsugan katsi, anway bandi kalunus way ban am.

Ay e nanfauri ban ayu, am fag ngay taw takase katsi, anway kabalu way ban am, ay guyway way ban am.

26Ay e nanfauri ban ayu, fagalay ay iba gelongan masine sa ayu baliwa kata yangay am anya. Madyay katanya yangay ka fag ngay taw at aguyangan ebi, nu gelongan masine yangay sa at yud matuyan fag ngay taglong baliwa.”

Esugi tuwa Ay ngay Fabarangyan

(Mat. 5:38-48; 7:12)

27“Ay glong aw sa ayu tagdungugan te, esugi tuwa ay ngay fabarangyan, ay fagbuluni masinei sa takalimata ayu. 28Ay darangini laman Diyus kafanyu tuwa sa taglong ayu te, ‘Diyus gfauri ayu.’ Ay darangini yangay tagfalingun ayu. 29Ay sik taw nu nafalang am fingi at sadi, falagi yangay am fingi sik tigyangan. Ay sik taw nu nabul am umut, lag gsalag nu gbul anggan am balukas. 30Foni sas fagayu taget emu. Ay sik taw nu nafamul am nanuranan, lag nanget am nanuranan siginan anya. 31Fagbuluni sa ay iba kata ay fakaumsigun at fagbulun ban sa ayu.

32“Ay ay fakesugun nu kayu way takesug ayu, go e fagfanyaun am siginans Diyus? Go yaya! Anway anggan at ngay tagasalanan kesug yangay takesug anya. 33Ay ay fagtarabangun nu kayu way tagtarabang ayu, go e fagfanyaun am siginans Diyus? Go yaya! Anway anggan at ngay tagasalanan katanya yangay at fagbulun. 34Ay nu gfaulbus am nu sa way ay fagsegun at mafasali sa ayu, go e fagfanyaun am siginans Diyus? Go yaya! Anway anggan at ngay tagasalanan igfaulbus yangay sa tibak tagasalanan, teway e fagsegun tuwa te mafafafoli wa fiya at naulbus. 35Ay roro esugi tuwa ay ngay fabarangyan ay fagbuluni sa anya at masine. Ay fagalay am gfaulbus, lag dawdaw gseg te, kanya ban gfafoli yay. Nu katanya tuwa, gbiya ban ay nabul sas banwa, ay sumaful yangay ayu te, am wan at Tiba Tungud at ngay unga. Anway Diyus kafanyu yangay dewa sat mauri fag ngay taw ay anggan sa at yud guseganan sa tiba. 36Fangafanyui tuwa, kata yangay ay Tama nu gfangafanyu at ngay taw.”

Isus At Foyungan sa baliwas Tagfansulup

(Mat. 7:1-5)

37“Lag am gamatangan sa baliwa ay iba te, mauri at fagbulun, laman ban Diyus di gfoyung te, mauri yangay ay fagbulun. Ay lag am glong te, ‘Diyus faurii wa nangus ka fag ngay taw tagfagbulun mauri,’ laman ban Diyus di gfauri ayu. Ay falyami ay iba at asalanan, laman ban Diyus gfalyam yangay ay asalanan. 38Ay famoni tuwa, ay e gfon yangay ban ayu. Ay at fon ban sa ayu kasakan tuwa, ay mafagitan tuwa, ay matunan tuwa, ay mabugsul tuwa. Anway nus nga seyu ay nafon sa ay iba, kayu yangay ban anya nu gfon sa ayu.”

39Ay Isus nafoyung sik fafaskudanan te, “Go at yud glag fag taw mafataban tuwa ro at yud glag? Go yaya, anway ka fag duwa gsud way ro umtong sasad tabyu. 40Ay we tagadal glabi at takamoyung. Ay fagayu tagadal nu nasaful tuwa, katvngvd yangay at takamoyung.

41“Taw ro am fagnalongun sa am fadugsay te, ‘Ganamata wo,’ ay si emu ngap nu sik kayu tuwa daw tagsi am mata? 42Ay taw ro am fagnalongun sam fadugsay te, ‘Sama, aw wan tagbul am namata,’ ay si emu ngap nu sik kayu tuwa daw si am mata? Tagfanluk way o fag taw! Buli yap taguna ka fag kayu si am mata, ay nu nabul tuwo si emu am namata, glag tuwo fiya fiya nu nanbul o am iba namata.”

Isus At Fafaskudanan sa sik Kayu ay sat Buwadan

(Mat. 7:16-20; 12:34-35)

43“Sik masine fag kayu wa mafafabuwadan mayango. Ay sik mayango fag kayu wa mafafabuwadan melo. 44Anway at buwadan way tagfasaful sas taw te, go tain ka fag kayu. Sik makmak madugi wa gbuwadan igus ay ate ubas. 45At masine fag taw, matuyan tuwa nu gelongan, anway masine tuwa tagsi at amatanganan. Ay at mauri fag taw, mauri way at elongan, anway fagmauriun way tagsi at amatanganan. Anway nus nga setaw at naelongan, katanya at naamatangan.”

Isus At Fafaskudanan sa sik Duwak Taw Takawat Bale

(Mat. 7:24-27)

46“Taw ro ay fagnafangayanun angku te, ‘Em Fun,’ nu dway ngap am gfaning ku ngay longan? 47Nanfoyung aw sa ayu te, katatuy at ugali sik taw takakbang sa angku, ay gdungugan ku longan, ay gfaning ku ngay foyungan. 48Ka fag taw kata sik taw at naawat sik bale. Ay naali ngabasad ay at fagfatungkudan sis batu. Ay dewa at safa ndaul ay nadalan ka fag bale, di guwigan, anway matvngvd tuwa nu maawatan. 49Ay roro ka fag taw nu nadungug way fagtvngvd ku foyungan, ay nu dway nafaning, kanya kata way sik taw at nafadfalianan kamale, ay wa naali, matungkud way sigad sis wa daga. Ay at safa nu ndasug sa ka fag bale, ka fag bale nagfuwan, taba wa nrasras.”

Currently Selected:

Lukas 6: TAWEAST

Highlight

Copy