Lukas 5

Isus Nafili Ufat Tagfanguyang

(Mat. 4:18-22; Mar. 1:16-20)

1Sik menit ngayuk taw tagidgitan kaduge gdungugan Isus nu gfoyung Diyus at longan. Ay Isus malindug sis tigyangan lino Genesaret. 2Ay Isus nalag duwak balutu sanya sis tigyangan lino. Ay ngay tagfanguyang nalo wan sanya ginan, laman nanfegus at ngay fanggamat uyang. 3Ay Isus nasakay sas Simun fagagbilugun fag balutu. Ay Isus glong sas Simun te, “Fayayui yap sirut sasad lino.” Ay Isus namalunggung ay nafoyung sa sangay taw tagsis tigyangan lino.

4Ay nu ntabu wan Isus nu gfoyung, kanya nalong sas Simun te, “Nanfanguyang wam, ay ukasi ay ngay fanggamat uyang sad fagngabasadan ay fagamat ro am.” 5Ay Simun nabalus Isus te, “Em Takamoyung, fagngaba wak yabi nu gfanguyang ami, ay wami e nafagamat. Ay dewa katanya, anway o wan at nalong, nangukas kyay ro fiya em ngay fanggamat.” 6Ay nut si was fagngabasadan, naukas at ngay fanggamat, ay ngayu wa fiya dawdaw at nafagamat uyang. At kayuwan gakarasrasun wan at ngay fanggamat. 7Nu katanya, Simun ay at ngay ufud tagfanguyang si at balutu gyafe tibama sa tibak balutu laman gtarabang. Ay at ibama ndasug wa fiya. Ay at ba uyang inkapnu ka fag duwak balutu. Ay at katvngvdan nu mapnu gakalubgubun wan. 8Ay Simun Pedru nu nalag, natudan sas Isus at akbang ay nalong te, “Ku Fun, ayayui angku, anway sik tagasalanan aw.” 9Fakatanyaun Simun longan anway nadulawan dawdaw. Ay anggan fagayu tagufud anya si at balutu nadulawan yangay, teway ngayu dawdaw at nafagamat uyang. 10Ay anggan Sebidiyu at baguwama fag duwa, Santiagu ay Uan, nadulawan yangay. Ka fag dugsay, Simun at ibama sat fagbulun. Ay Isus nalong sas Simun te, “Lag o kalimu. Siginan katsi nanfaful ban o ngay taw, kata nu gamat o uyang.” 11Ay nu nafadasug wan ngay balutu sas tigyangan, ka fag tulu naubun wan fagayu ay naalo wa Isus.

Isus Nafafiya sik Ama at ke Mason fag Daylan sit Balat

(Mat. 8:1-4; Mar. 1:40-45)

12Kaduge Isus sa sik fulan, e sik ama sanya at ke mason fag daylan sit balat. Ay nu nalag Isus, kanya nkakbang ay namalub sas Isus at daga salubangan. Ay gfafanyuwan sas Isus te, “Ku Fun, nu kaumsig o, fafiyai yap nangus angku laman tumap yangay angku te, masine aw kata em fagfaningun fag ugali.” 13Ay Isus nafalugde at take ay nated sat ke daylan ay nalong te, “Kin, kaumsig aw. Afiyai wan!” Ay rodi tv, infiya wa fiya aro tagadaylan sit balat. 14Ay rodi Isus matvngvd nu gsalag anya te, “Lag kamansulit nus di sadik taw. Loi way fagtvngvd ay falagi way am bilug sas taganyun. Ay foni sik famanyun kata ebi Muisis at suguwan, laman am famasaful sa sangay taw te, infiya wo.” 15Ay dewa Isus nasalag ka fag taw, mafali at barita nu karapyag. Ay ngayuk taw at kinful, laman nandungugan Isus ay nanfafiya at ngay daylan. 16Ay roro Isus nalo wa sas talun at yud e taw laman nandarangin.

Isus Nafafiya sik Ama at yud Malelegan

(Mat. 9:1-8; Mar. 2:1-12)

17Sik menit, kaduge Isus igfoyung, e taw Parisiyu ay ngay tagfoyung Muisis at Suguwan at malunggung gdungugan anya. Ka fag ngay taw siginan sangay fulan Galiliya ay Udiya, ay anggan siginans fulan Erusalem. Ay Isus at fagmadaragangun siginans Diyus at fagmafafiyaun at ngay taw at ke daylan. 18Ay gina sanya e nauba sik ama at yud malelegan sisad igyan. Ay at ngay taguba gsarap at fagfasakboan sasad bale, laman gfafadasug at ke daylan sas Isus akbang. 19Ay at ngay taguba we nalag at fagfasakboan, anway ngayu wayay at taw sanya. Ay rodi kanya nasas tungud ugun ay nasulat ugun ay nafatagbung sat daga at yud malelegan sisad igyan, sas Isus at salubangan. 20Ay Isus nu nalag ka fag ngay taw at fagafanudun, kanya nalong sat yud malelegan te, “Sama, nafalyam wan am ngay asalanan.”

21Ay rodi taw Parisiyu ay ngay tagfoyung Muisis at Suguwan igsulitanan sit dayu te, “Sinu manga ka fag taw tagelongan mauri sas Diyus baliwa? Sinu at mafafalyam taw at asalanan, nu bunway Diyus fag sadi?” 22Ay roro Isus gsaful way ka fag ngay taw at amatanganan. Ay Isus ginto te, “Taw ro ay fagamatanganun katanya? 23Go sangay inday manga at mafali, nu lumong o sa at yud malelegan te, ‘Nafalyam wan am ngay asalanan,’ ay ate, ‘Malindugi, ay ubanani am fagtiyugan ay loi wan’? 24Katsi kaumsig aw gfatuyan sa ayu te, aw, Taw at Baguwama, e fagmadaragangun aktuwa ste swa daga gfalyam taw at asalanan.” Ay Isus nalong sa at yud malelegan te, “Alindugi. Ay ubanani am fagtiyugan ay ulii wa sam bale!” 25Ay rodi tv, kanya fag taw inlindug wa fiya si sangay taw at daga salubangan. Ay naubanan wa fiya at fagtiyugan. Ay nauli wa sat bale guseganan sas Diyus. 26Ay at naulit fag ngay taw nadulawan dawdaw, ay nafauseganan sas Diyus. Ay manga kalimu te, “Nalag ami sik ngay madulawan!”

Isus Nataban Lebi

(Mat. 9:9-13; Mar. 2:13-17)

27Ay rodi, Isus nalo wan ay nalag sik taget buwis, at ngayan Lebi. Kanya malunggung sis fagsalian buwis fag bale. Ay Isus nalong anya te, “Aloi angku.” 28Ay Lebi nlindug ay naubun wan fagayu, ay naalo wa Isus.

29Ay Lebi nafamasadan sik ngay fakonun ayuwayu sit bale, laman sik famauseganan sas Isus. Ay ngayuk taget buwis ay tiba yak taw at tagfasfuwan gfangon sanya. 30Ay taw Parisiyu ay anggan ngay tagfoyung Muisis at Suguwan kalimata sas Isus at ngay tagadal, ay glong te, “Taw ro ay fagfasfuwanun gfangon ay ginum sanya fag ngay taget buwis ay ngay tagasalanan fag ngay taw?” 31Ay Isus nafafaskudanan te, “Sik taw at yud e daylan wa long gayudan sik tagfafiya, kayu way at ke daylan tagayudan. 32Ku fagnastiyeun kwa nan-gewan at matuyan fag ngay taw, ku fagnan-gewanun kayu way tagasalanan, laman gubun at ngay asalanan.”

Sik Fagintoun sa baliwa nu Gfe lungud gyud Gfangon laman Gdarangin

(Mat. 9:14-17; Mar. 2:18-22)

33Ay ka fag ngay taw ginto sas Isus te, “Uan Tagfasurung ngay tagadal ngayu ginan nu gfe lungud gyud gfangon laman gdarangin. Ay anggan taw Parisiyu ngay tagadal katanya yangay. Ay madyay am ngay tagadal kon tuwa ay ginum.” 34Ay Isus nabalus te, “Go takadaduwa fag mangama ngay fagwes masine wa nu gfe lungud gyud gfangon laman gdarangin dewa gfaygaluwan at takadaduwa fag mangama? Igdi! Kaduge yap ngay gfaygaluwan takadaduwa fag mangama, wa masine nu gfe lungud gyud gfangon laman gdarangin. 35Ay roro tibak menit ban e tumaban kanya fag mangama. Ay ginanya yay ban at ngay iba nu gfe lungud gyud gfangon laman gdarangin.”

Isus At Duwak Fafaskudanan sat Bagu ay sat Dan fag Ugali

(Mat. 9:16-17; Mar. 2:21-22)

36Ay Isus nafafaskudanan yangay te, “We taw grasras sik falefe bagu laman nansimat sa at dan fag falefe. Anway nu katanya way at fagbulun, kanya grasras way at bagu fag falefe, ay at nasimat fag falefe bagu wa kata at dan fag falefe. 37Ay manga we taw gtalin at bagu fag fangaranug fag safa sa at dan fag balat balan fag fagsuwadan. Anway nu natalin way sanya, gina at bagu fag fangaranug fag safa lumafas, umbugsang ay umbusbus, ay at fagsuwadan umrasras wan. 38Nu katanya, sik taw nu gtalin at bagu fag fangaranug fag safa sa tuwa at bagu fag balat balan fag fagsuwadan. 39Ay sik taw nu nainum wa at dan fag fangaranug fag safa, wa kaumsig nanginum at bagu fag fangaranug fag safa, anway kanya nu gamatang, amayayum yap at dan.”

Currently Selected:

Lukas 5: TAWEAST

Highlight

Copy