Lukas 4

Satanas Igfaskud Isus

(Mat. 4:1-11; Mar. 1:12-13)

1Ay Isus nu noli wa siginans Safa Urdan, at Masine fag Falad tagmagurang anya. Ay manga nataban wa anya sa sik talun at yud e taw. 2Ay Isus nut sanya 40k menit. Ay ginanya Satanas igfaskud anya. Ay Isus wa gfangon kaduge sanya. Ay nu kaduge wa niya, kalunus wa dawdaw.

3Ay Satanas nalong sas Isus te, “Nu o wa fiya Diyus at Baguwama, awati tinafay tuy fag batu.” 4Ay Isus nabalus te, “Yaya. Marirukan sis Diyus at longan te, ‘Sik taw at faglelegun bundi siginans fakonun fagtvngvd.’ ”

5Ay Satanas nataban Isus sa sik tungud abat. Ay sik liplip way nafabantay way sigad fagayu fagmagurangan sas fagdaul daga. 6Ay Satanas nalong sas Isus te, “Kanya fagayu nafon wa angku, ay mon kban sa nus nga sinu ku fakaumsigun. Ay gfon kwa ban emu kanya fagayu ay anggan nus nge wain at masine sanya. 7Ay nu sumeg tuwo angku, fagayu kanya emu wa ban.” 8Ay Isus nabalus te, “Yaya. Marirukan sis Diyus at longan te, ‘Segi am Fun am Diyus. Ay kanyai tuwa am fagfaningun.’ ”#4:8 Diyuterunumyu 6:13.

9Ay Satanas nataban Isus sas Erusalem. Ay nafat sanya Isus sas Diyus bale sas tungud fungfung sub. Ay nalong yangay fiya sas Isus te, “Nu o wa fiya Diyus at Baguwama, arabangi wa daw, 10anway marirukan sis Diyus at longan te, ‘Diyus sumugu at ngay tagfabarita laman nantarabang emu. 11Ay kanya sumangfut emu, laman di o umtuktuk sas wa batu.’ ”#4:11 Danyu 91:11-12. 12Ay Isus nalong yangay anya te, “Yaya. Marirukan sis Diyus at longan te, ‘Lag gfaskud am Fun am Diyus.’ ” 13Ay Satanas nu nafaskud wa fagayu at fanfaskud, nalo yay, naubun sirut Isus.

Isus nu Gfasigad Igfoyung

(Mat. 4:12-17; Mar. 1:14-15)

14Ay Isus noli wa sas talun Galiliya, ay at Masine fag Falad tagmagurang anya. Ay e nafoyung sas fagdaul Galiliya ay anggan sat ngaba dayu fag ngay fulan sas Isus at fagbulun baliwa. 15Ay Isus nafoyung sa sangay taw Udyu at ngay bale fakafulan. Ay ngayuk taw tagseg Isus.

Taw Nasaret Kalimata way Isus

(Mat. 13:53-58; Mar. 6:1-6)

16Ay Isus noli wan sas Nasaret, sa at fakadaulan fag fulan. Ay kata ebi ataw at ugali kanya nasakbo sa sangay taw Udyu at bale fakafulan sis Fakamatoun fag Menit. Ay Isus inlindug laman igtap Diyus at longan. 17Ay e nafon sas Isus taglong Isayas at rirukan. Ay Isus narafad ay natap te,

18“Fun Diyus at Masine fag Falad si wa angku,

anway Diyus nafili angku laman nanfoyung aw at Masine fag Barita sa sangay taw at yud e kwa.

Ay kanya nasugu angku laman nanfoyung aw sa sangay kinsungsung te, ‘E nanfalfas ban ayu.’

Ay anggan sa at ngay yud glag te, ‘Lumag ban am.’

Ay nasugu yangay angku laman gfalfas tagafalingunan,

19ay laman nanfoyung akyangay te,

‘Katsi ndasug wan at lungud tam Fun nu gfalangfe taw.’ ”

20Ay Isus nu ntabu wa nu gtap, nafabilug wan at fagtapan, ay nafon yangay sat tagtanud. Ay kanya nlunggung wan, ay fagayu taw sanya glinggat dawdaw anya. 21Ay Isus gfasigad gfoyung te, “Katsi kanya fag Longan at masuwad in-gurungan wan, kaduge am gdungugan.” 22Ay fagayu taw nalong at masine sas Isus baliwa, ay nadulawan at ngay e longan at masine. Ay ginto, “Go tuy fag ama Use wa at baguwama? Go kin?” 23Ay Isus nalong te, “Lumong wam fiya katatuy fag longan te, ‘Tagfafiya, fafiyai tuwa mandi emu,’ at masuwad te, ‘Fagbuluni ste si am talun, kata yangay em dungganan am fagbulun sas fulan Kapernaum.’ ” 24Ay Isus nalong yangay te, “Matuyan iglong aw ayu te, we taw gadunguganun sa sik taglong si at fulan mandi. 25At matuyan, kaduge ebi fag taglong Elyas gleleg, ngayu at burangday#4:25 burangday Sis Faniganun, balo. fag mangena sis talun Israel. Ay tuluk banwa ay unumk magdanun wa batang namoyan, nu katanya, indasug sik fanlunus daul sas fagdaul talun. 26Ay dewa katanya, Diyus wa nasugu Elyas sanya fag ngay burangday sas talun Israel. Fangkabat, Diyus nasugu anya sa sik burangday sa sik fulan Sarefat, sas Sidun fag talun. 27Ay anggan ngayu yangay at ke mason fag daylan sit balat sas talun Israel kaduge ebi fag taglong Elisyu gleleg. Ay fagayu sanya wa nafafiya. Naaman way siginans talun Sirya fag sadi at nafafiya.” 28Ay fagayu taw sanya sis bale fakafulan nu nadungug Isus at longan, matvngvd nu kalimata anya. 29Ay ka fag ngay taw inlindug ay natulud Isus siginan at fulan, ay nataban sa sik tungud abat sas day fulan, laman nanfatong anya. 30Ay dewa katanya, Isus nalo yay sa tiba buknga ay taba wa inyayu.

Sik Ama at ke Mafurat fag Falad

(Mar. 1:21-28)

31Ay Isus nalo wa sas fulan Kapernaum, sis Galiliya fag talun. Ay nafoyung sanya fag ngay taw sis Fakamatoun fag Menit. 32Ay at ngay tagdungugan nadulawan sas Isus at foyungan, teway Isus nu gfoyung kata tuwa daw sik fun at ke fagmadaragangun. 33Ay sanya sis bale fakafulan, e sik ama at ke mafurat fag falad. Ay kanya guro dawdaw te, 34“Isus, sik taw Nasaret, bakras, taw ro am fagstiyeun? Go am fagstiyeun nanfalyam wa ro o em fagmadaragangun? Nasaful akwa emu te, go sinu o. O wan at Malayun sat Masine tagsiginans Diyus.” 35Ay Isus matvngvd nu gsalag te, “Lag gelongan. Alfasi wan sanya ginan fag taw!” Ay ka fag mafurat fag falad nu nafafulid wa ka fag ama sis wa taw, nalfas wan sanya ginan fag ama. Ay ka fag ama di e fakatarasan, nus di sirut. 36Ay sanya fag ngay taw nu nalag, nadulawan dawdaw, ay gfangintoanan te, “Taw fakatanyaun at foyungan? Madyay kanya e fagmadaragangun tuwa nu gsugu at mafurat fag falad, ay gfaning tuwa anya!” 37Ay at foyungan inrapyag sanya fag ngay fulan tagsafungan.

Isus Nafafiya Simun at Nugangina

(Mat. 8:14-17; Mar. 1:29-34)

38Ay Isus inlindug ay nalo wan siginan ngay taw Udyu at bale fakafulan. Ay nasakbo sas Simun at bale. Ay sanya Simun at nugangina gadaylan, masugba at bilug. Ay at iba get Isus te, “Fafiyai anya.” 39Ay Isus inlindug sanya fag mangena day fagtiyugan ay igsalag ka fag daylan, ay kanya nfiya wa fiya. Ay rodi ka fag mangena nlindug, ay kanya tuwa takamasadan Isus ay at ngay ufud fakonun.

40Ay gina gakafalyuun at menit, ngayuk taw nataban at ngay tagadaylan sas Isus, nus nge wain at daylan. Ay Isus nu nated nafasadsadian, infiya wan fagayu. 41Ay anggan ngay mafurat fag falad nalfas wan siginan ngay taw. Ay gbiya nu guro te, “O wan Diyus at Baguwama!” Ay Isus igsalag nu gelongan, anway ka fag ngay mafurat fag falad nasaful te, Isus, kanya anwa Tagfalangfe.

Isus At Fagnaloun Nanfoyung sa sangay Fulan

(Mar. 1:35-39)

42Ginas balabag sirut, Isus nalo wan ay indasug sa sik talun at yud e taw, ay at ngay taw nasarap anya. Ay rodi tiba nu nalag Isus, gfatawad anya te, lag yap glo ste ginan. 43Ay Isus nalong sanya fag ngay taw te, “At masine nanfoyung akyangay sa tibak fulan at Masine fag Barita sa baliwas Diyus nu gmagurang taw, teway katanya at fasadan at fagnasuguun angku.” 44Ay Isus igfoyung sas talun Udiya at ngay bale fakafulan.

Currently Selected:

Lukas 4: TAWEAST

Highlight

Copy