Lukas 7

Isus Nafafiya sik Fun Sundalu at Fanuguwan

(Mat. 8:5-13)

1Nu ntabu wan Isus nu gfoyung sa sangay taw, kanya nalo wa sas fulan Kapernaum. 2Ay sik fun sundalu at fakesugun fag fanuguwan gadaylan ay gakateun wan. 3Ka fag fun nu nadungug Isus at fagbulun, nasugu taw Udyu at ngay tagmagurang tiba laman nanget sas Isus te, “Sai yap sirut ku bale, ay fafiyai ro ku fanuguwan.” 4Ay ka fag ngay tagmagurang nu ndasug wa sas Isus, matvngvd nu glong te, “Em fun matuyan tuwa fag taw, ay tarabangi nangus anya. 5Ay kanya kesug tuwa fagayu taw si tam talun. Ay kanya yangay at nafaawat tam bale fakafulan.”

6Ay rodi Isus naalo wa ka fag ngay tagmagurang. Ay Isus nu makbang wa bangan sa ka fag fun at bale, ka fag fun nasugu yay at ngay fagwes laman nanfoyung sas Isus te, “Ku Fun, dakwa e fagmasineun nu sak wa ro o daw sumakbo sa ku bale. 7Ku fagyudun wa naamatanganan nangakbang sa emu, teway kwe fagmasineun laman nangakbang emu. E longani way fagtvngvd, umfiya wa ro ku fanuguwan. 8Anway e fun akyay si ku tungud. Ay e sundalu akyay si ku daga tv. Ay nu lumong aw sat sadi te, ‘Loi sanya,’ kanya lumo wa fiya. Ay nu lumong aw sat sadi te, ‘Stei,’ kanya stumiye wa fiya. Ay nu lumong aw sa ku fanuguwan te, ‘Buli,’ kanya ro nanbul wa fiya.” 9Ay Isus nu nadungug katanya, naylatan dawdaw sa ka fag fun at nalong. Ay Isus inbiling ay nalong sat naalo anya fag ngay taw te, “Glong aw sa ayu te, kwa batang e nadungug at nafanud takatvngvd anya, dewa sas fagayu taw Israel.” 10Ay at nasugu fag ngay taw nu noli wa sas bale, nalag te, ka fag fun fanuguwan infiya wan.

Isus Nafaleleg sik Burangday at Baguwama

11Balabag di Isus nalo wa sa sik fulan at ngayan Nain. Ay at ufud sanya at ngay tagadal wan ay anggan sik ngay taw ayuwayu. 12Ay gina Isus gakadasugun sa ka fag fulan at sakbawan alad, e nafablang sik ngay taw ayuwayu at nanlibing siginan sad fulan. Kanya at kinkate sik burangday at baguwama, kanya way fagsadi at unga. 13Ay tam Fun Isus nu nalag ka fag burangday, infanyu dawdaw anya. Ay nalong te, “Lag guyway.” 14Ay Isus inkakbang ay nated at kinkate at fagsuwadan. Ay rodi taguba ntuwas yay nu glo. Ay Isus nalong te, “Sama, glong aw emu te, malunggungi.” 15Ay at matean inlunggung ay gelongan wan. Ay Isus nataban sat tina. 16Ay fagayu sanya fag taw nadulawan dawdaw. Ay gseg Diyus te, “Diyus di kalyam at ngay taw. Ay kanya nasugu at madaragang fag taglong sa antam.” 17Ay ka fag foyungan sas Isus baliwa nrapyag sas fagdaul talun Udiya ay anggan sa tagsafungan fag ngay talun sat ngaba dayu.

Isus ay Uan Tagfasurung

(Mat. 11:1-19)

18Uan Tagfasurung at ngay tagadal nafoyung anya fagayu aro ataw Isus at fagbulun. 19Ay Uan nagewan at tagadal fag duwa, ay nasugu anya sa tam Fun Isus laman nanginto te, “Go o wan ebi at nafoyung tagadasugun, ay go ate gfanya yay ami?” 20Ay Uan at tagadal fag duwa nu ndasug sas Isus, nalong te, “Uan nasugu emi laman nanginto ami emu te, ‘Go o wan ebi at nafoyung tagadasugun, ay go ate gfanya yay ami?’ ” 21Ay ginanya, Isus nafafiya ngayuk taw tagadaylan, dewa at mason fag daylan, ay anggan at ke ngay mafurat fag falad. Ay nafafiya yangay ngayuk taw at yud glag. 22Ay Isus nalong sas Uan at tagadal fag duwa te, “Ulii wan. Ay foyungi sas Uan ay nalag, ay ay nadungug te, at yud glag ebi, katsi glag tuwa. Ay at yud malo ebi, katsi malo tuwa. Ay at mason at ke daylan sit balat, katsi nfiya tuwa. Ay at yud gdungug ebi, katsi gdungug tuwa. Ay at kinkate ebi, katsi gleleg yangay. Ay e nafoyung at Masine fag Barita sat yud e kwa. 23Ay nus nga sinu at yud gfainfolian at amatanganan sa angku, useganani tuwa.”

24Ay Uan at ngay tagadal nu nalo wan, Isus ginto sa sangay taw sas Uan baliwa te, “Taw ro ay fagnaloun sas talun at yud e taw? Taw sangay ay fagyalagun sanya? Go ay fagyalagun takata sik sigbo taginkaloan sas tagmara? 25Ay nu bunyay kanya, nataw tuwa ay fagyalagun? Go ay fagyalagun antuwa sik taw at ke balukas at masine dawdaw? Anway ay fagyalagun nu at ke balukas way at masine dawdaw, kanya tagfaning way sat mabalan fag taw at ugali. Ay nu gbanwan sa way tiba tungud fag fun at bale. 26Ay nu bunyay kanya, inday tuwa ro ay fagyalagun? Go ay fagyalagun antuwa sik Diyus at taglong? Ay kin, nu katanya. Uan Tagfasurung glabi yay tibak taglong. 27Kanya wan ebi at marirukan sis Diyus at longan te, ‘Sumugu aw ku tagfoyung at gumuna emu laman nanfamasadan am dalan.’#7:27 Malakyas 3:1. 28Glong aw sa ayu te, ya batang insalug glabi Uan Tagfasurung. Ay roro dewa katanya, sik taw dewa tiba daga sas Diyus at fagmagurangan taw, kanya glabi yay Uan.”

29Ay fagayu taw, ay anggan at ngay taget buwis nu nadungug Isus foyungan, naseg Diyus te, masine Diyus at fagbulun, anway ebi kanya fag ngay taw Uan wa nafasurung. 30Ay roro at taw Parisiyu ay at ngay tagfoyung Muisis at Suguwan kauri way sas Diyus at fasadan sa anya. Ay wa kaumsig Uan nu nanfasurung anya.

31“Tain ro nu gfaladlabian aw katsi fag ngay taw? 32Kanya kata way sik ngay sisiyan at malunggung si sangaba lungud talun faglanuwan, ay guro sa at tiba te, ‘Dewa ami gfantulalian, am, wam gsayaw. Ay dewa ami guyway, am, wam gauywayun.’ 33Katatuy ku fafaskudanan aro at masuwad. Uan Tagfasurung nu ndasug, gfe lungud gyud gfangon laman gdarangin ay gyud ginum fangaranug. Ay am, kalimata way am daw te, ‘Uan e mafurat way fag falad.’ 34Ay aw, Taw at Baguwama, dewa aw bagu kadasug, gfangon aktuwa ay ginum aktuwa. Ay glong am te, ‘Kanya fag taw sik tagfangatebo way ay sik taginum way fangaranug, ay at fagwes sik ngay taget buwis ay ngay tagasalanan way.’ 35Ay dewa katanya, sik taw tagfaning Diyus at fasadan, gfaning tuwa Diyus at nafon emi fag fagbulun.”

Isus Gfangon sas Simun Bale

36Sik taw Parisiyu nagewan Isus laman nanfangon sat bale. Ay Isus nalo wa fiya sat bale, ay nasakbo ay gfangon sanya. 37Ay sanya fag fulan e sik mangena takadungug katvngvdan gasalanan. Ay kanya fag mangena nadungug te, Isus gfangon sa ka fag taw Parisiyu at bale. Ay rodi, ka fag mangena e ubanan sik famabebanglu masuwadan si sik fagsuwadan at naawat sik batu at ngayan, alabastru. 38Ay ka fag mangena namalindug sas Isus day guyuy baliwa, sat day darafa. Ay at luwon nafabasa Isus at darafa. Ay at buk wan at fanrarus. Ay kanya naayuk ay nabusbus famabebanglu sas Isus darafa. 39Ay ka fag taw Parisiyu, at nagewan Isus aro, gamatangan te, “Nu nda ka fag mangama bunwa sik taglong, laman ro nu sik taglong tuwa, gsaful wa te, ka fag mangena tagted anya mauri way.” 40Ay Isus nalong sa ka fag taw Parisiyu te, “Simun, e fagalongunun aw emu.” Ay Simun nabalus te, “Em Takamoyung, kin, taw am fagalongunun?” 41Ay Isus nalong te, “E duwak taw nabedan sa sik ama tagfabedan singku. At sadi at bedan 500k fisu. Ay at usama at bedan 50k fisu way. 42Ay kanya fag duwa wa mafasali at bedan. Ay at nafabedan fag ama, nafalyam tuwa ka fag duwama bedan. Ay Isus nainto sas Simun te, nu katanya, inday kanya fag duwama at taglabi nu kesug sa tagfabedan?” 43Ay Simun nabalus te, “Nu si angku, at ke bedan at ngayu.” Ay Isus nalong te, “Gtungul wa fiya am famalus.” 44Ay rodi Isus inbiling sa ka fag mangena baliwa ay nalong yangay sas Simun te, “Go glag o tuy fag mangena? Dewa aw nasakbo sam bale, wo nafon angku sik safa laman ku famegus ku darafa. Ay roro tuy fag mangena at luwon wan at fanbasa ku darafa, ay anggan at buk wan at fanrarus. 45Ay wo naayuk angku. Ay roro ngap siginan ngay aw bagu kadasug ste, tuy fag mangena gayuk wa ku darafa. 46Ay wo nabusbus langis sa ku alfuyu. Ay roro tuy fag mangena nabusbus tuwa famabebanglu sa ku darafa. 47Ay nu katanya, glong aw sa emu te, tuy fag mangena at asalanan dewa ngayu, nafalyam wan. Teway matvngvd tuwa nu kesug angku. Ay sik taw nu alay way at asalanan at nalyam, wa mandi matvngvd nu kesug angku.” 48Ay Isus nalong sanya fag mangena te, “Nafalyam wan am ngay asalanan.” 49Ay at ngay taw tagsis fagfangonan tagfasfuwan Isus, igsulitanan sit dayu te, “Sinu tuy fag mangama at mafafalyam ngay asalanan?” 50Ay Isus nalong yangay sa ka fag mangena te, “Am fagafanudun at nafalangfe emu. Loi wan manabayan.”

Currently Selected:

Lukas 7: TAWEAST

Highlight

Copy