Lukas 10

Isus Nasugu At 72k Tagadal

1Ay nu ntabu wa aro ataw at fagbulun, tam Fun Isus nafili yay fiya 72k#10:1 72: Tibak rirukan nalong wa te, 70k taw. tagadal. Ay nafaudgufudan duwa ay nafalo sa sangay fulan laman nan-guna anya sat fakadasugan ban. 2Ay Isus nalong sanya fag ngay taw te, “Ngayu fag faganiun, ay wa ngayu at tagani. Darangini sas Fun Diyus, at tagbilug fag faganiun, laman kanya sumugu sik ngay tagani sat faganian. 3Katsi loi wan, gsugu aw ayu kata sik ngay tupa riyangan sas wa idu talun. 4Ay gina am glo, lag guba fagsuwadan singku. Ay lag gambagan. Ay lag e sinilas. Ay lag gfamatuwan nus nga sinu fag taw ay nalag sa ay ngaba dalan. 5Ay nus nganday fag bale nu gsakbo am, bagu am gsakbo longi te, ‘Tam Diyus tuwa tagfanabayan ayu fagayu.’ 6Ay sanya at ngay taw nu manabayan tuwa, ay longan umgurungan wa fiya sanya fag bale. Ay roro mangaro nu dway manabayan sanya at ngay taw, Diyus at fagmanabayanun wa long umdasug sanya. 7Ay nus nganday fag bale ay fagsakboan, banwani wa sanya fag bale. Ay oni ay inumi nus nge wain at nafon ayu. Anway sik taw tagfagbulun, e nafon wa fiya sa anya at nalufuyan. Ay lag gadgalinan sa tibak bale. 8Ay nus nga ginain nu ndasug am sa sik fulan, at ngay taw sanya fag bale nu gfasakbo ayu, oni nus nge wain at nafon ayu. 9Ay fafiyai at ke ngay daylan sanya fag fulan. Ay foyungi sas fagayu taw sanya te, ‘Makbang wan nu kaful am sas Diyus at fagmagurangan taw.’ 10Ay nus nga ginain nu ndasug am sa sik fulan, ay at ngay taw sanya nu dway gfasakbo ayu, loi wan sanya ginan. Ay gina am sa sangaba dalan, longi sanya fag fulan te, 11‘At kindafut fag daga sa em darafa siginan ay fulan, sik famasaful sa ayu te, e yud masine at kumgurungan ban sa ayu. Ay dewa katanya, satu asafuli tuwa te, makbang wan nu kaful am sas Diyus at fagmagurangan taw.’ ” 12Iglong aw sa ayu te, “Ginanya ban fag menit, Diyus at faurianan sanya fag fulan taw, glabi yay ban sas fulan Suduma.”

E Nanfauri Ban sa sik ngay Fulan at yud Naubun at Asalanan

(Mat. 11:20-24)

13“E nanfauri ban sa ayu, fulan Kurasin at ngay taw! Ay e nanfauri yangay ban sa ayu, fulan Betsayda at ngay taw! Anway nu sas fulan Tiru ay sas fulan Sidun di nu gfagbulun aw ka fag madaragang fag ngay fagbulun ku nafagbulun sa ayu, glugo wa ro gugat taw Tiru ay taw Sidun nu nasulun saku ay namalunggung sas wa dafug, sik fagsafulan te, naubun wan at asalanan. 14Nu katanya, gina ban sas fakatabuwan fag menit, Diyus at faurianan sa ayu, glabi yay ban sas fulan Tiru ay sas fulan Sidun. 15Ay am, fulan Kapernaum at ngay taw, go nu gfasad am ayu, e sumeg ayu dewa sas banwa? Ay roro ngap ay fakadasugan sa way ban at matean at talun!”

16Ay Isus nalong sas 72k taw te, “Sik taw nu gdungugan tuwa ayu, gdungugan yangay angku. Ay sik taw nu kalimata way ayu, kalimata yangay angku. Ay kanya nu kalimata way angku, kalimata yangay anggan sa at nasugu angku.”

At 72k Tagadal Noli wan

17Ay at nasugu fag 72k tagadal noli wa sas Isus ay guseganan te, “Em Fun, ngay mafurat fag falad gfaning tuwa emi nu nalong ami sam ngayan!”

18Ay Isus nalong te, “Nalag aw Satanas nu katong siginans banwa kamafali sik fangkilat. 19Dungugani ku longan. Nafon aw ayu ku fagmadaragangun, laman dewa am nasiyad sik ubyanun ay sik agipan, di am e nasaitan. Ay manga gbabo tuwam fagayu at tagfabarangyan ayu at fagmadaragangun. Ay di e gfasait ayu, nus nge wain. 20Ay dewa katanya, lag guseganan te, at ngay mafurat fag falad gfaning wa fiya ayu. Ay fagusegananun antuwa te, ay ngayan marirukan wan sas banwa.”

Isus At Fagusegananun

(Mat. 11:25-27; 13:16-17)

21Ay ginanya sirut, Isus guseganan anway at Masine fag Falad nafaamatanganan anya. Ay glong te, “Guseganan aw emu Mama, o banwa at Fun ay anggan daga at Fun. Guseganan aw sa emu teway nafafalyu tuwo ku foyungan at masuwad sat mamatanganan fag ngay taw ay anggan sat ke fagsafulun fag ngay taw. Ay nafasure tuwo ku foyungan at masuwad sa takata sik ngay sisiyan fag ngay taw. Kin, Mama, guseganan aw emu, anway katanya tuwa am fakaumsigun.” 22Ay Isus igfoyung yangay sa sangay taw te, “Ku Mama nafoyung wa sa angku fagayu. Ay we taw nasaful ku ugali, ku Mama way tagsaful. Ay we taw nasaful ku Mama at ugali. Aw way, at Baguwama, tagsaful ku Mama. Ay kayu ku fakaumsigun gfasaful, anggan kanya, sumaful yangay ku Mama at ugali.”

23Ay rodi tv, Isus inbiling sat ngay tagadal ay nalong si at tiba day fagdungugan te, “Useganani tuwa am at nalag fiya fiya ku ngay nafagbulun. 24Anway glong aw ayu te, ngayuk taglong ay anggan ngayuk fun ebi tagyalagun ay tagyadungugun kata ay nalag ay ay nadungug, ay roro wa nalag ay manga wa nadungug.”

Sik Masine fag Taw siginans Talun Samarya

(Mat. 22:35-40; Mar. 12:28-34)

25Ay sik tagfoyung Muisis at Suguwan inkakbang laman nanfaskud Isus, ay ginto te, “Takamoyung, tain manga ban ku fagbulun at masine, laman umke leleg ban aw at yud e fakatabuwan?” 26Ay Isus igbalus te, “Nataw at marirukan sas Muisis at Suguwan? Foyungi angku.” 27Ay ka fag taw igbalus te, “Esugi am Fun am Diyus sas fagdaul am amatanganan. Ay sas fagdaul am fagmabitsugun. Ay sas fagdaul am fagsafulun.#10:27 Diyuterunumyu 6:5. Ay esugi yangay am iba katvngvdi nu kesug o emu.” 28Ay Isus nalong anya te, “Matuyan am famalus. Faningi takatanya, ay e leleg wa ban o at yud e fakatabuwan.”

29Ay ka fag taw kaumsig at iba nu gamatangan sa anya te, kanya sik taw matuyan. Nu katanya, kanya ginto sas Isus te, “Sinu ku kaiban?” 30Ay Isus at famalus nafafaskudanan te, “Ebi sik taw siginans fulan Erusalem nalo sas fulan Eriku. Ay kaduge glo sa sangaba dalan sik ngay takamul nabalabag anya. Ay nabul at ngay ubanan, anggan at balukas. Ay nafalang gugat gugat anya, ay inkate wa bangan nu gubun anya sis day dalan. 31Ay ginanya sik taganyun gdalan yangay sanya fag dalan. Ay nu nalag ka fag taw tagakateun, nalangfe ay nasaruyan way sas day dalan. 32Ay sik taw Lebi gdalan yangay sanya fag dalan. Ay nu nalag ka fag taw tagakateun, nalangfe yangay ay nasaruyan sas day dalan. 33Ay rodi sik taw Samarya gdalan yangay sanya fag dalan. Ay nu nalag ka fag taw tagakateun, kanya nfanyu dawdaw anya. 34Ay inkakbang sa ka fag taw tagakateun. Ay nararus sik langis ay sik safa fangaranug at famafiya sat famaga, ay anggan nasifig. Ay kanya nafasakay ka fag taw sa at sakayan fag balan, ay nauba anya sas bale fagfatiyugan taw laman gimalu anya. 35Ay nus balabag wan, ka fag taw Samarya nabul at singku, ay nafon sat tagbilug bale fagfatiyugan, ay nalong te, ‘Imalui tuwa anya, ay gina kban kafoli ste, nu dyay inkayu ku nafon sa emu gfamut kyay ban.’ ”

36Ay Isus nainto yangay sa ka fag tagfoyung Muisis at Suguwan te, “Sinu, nu gfasad o, sa ka fag tuluk taw at masine at fagbulun kata nu at kaiban?” 37Ay ka fag tagfoyung nabalus te, “Kanya wa at kinfanyu.” Ay Isus nalong anya te, “Loi wan ay faningi at nafagbulun.”

Isus Nananlag sas Marta ay Maria

38Ay Isus ay at ngay tagadal nu glo wa gugat, kanya fagayu ndasug sa sik fulan. Ay sanya e sik mangena, at ngayan Marta. Ay Marta nafasakbo Isus anggan at ngay tagadal sat bale. 39Ay Marta e fadugsay at ngayan Maria. Ay Maria namalunggung sa tam Fun Isus day darafa baliwa ay igdungugan Isus at foyungan. 40Ay roro Marta gasuwayan anway ngayu at fagbulun. Ay kanya nkakbang sas Isus ay nalong te, “Ku Fun, go masine way sa emu ku fadugsay deyud gtarabang angku? Longi yap sa ku fadugsay te, ‘Tarabangi tuwa angku.’ ” 41Ay tam Fun Isus nabalus te, “Marta, Marta, ngayu am fagafanawaun ay fagasuwayanun. 42Madyay sadi wadi taw at fagayudanun. Ay Maria at nafili antuwa at masine. Ay we mafabul siginan anya.”

Currently Selected:

Lukas 10: TAWEAST

Highlight

Copy