Lukas 9

Isus At Nasugu fag Labi Duwa at Fagbulun

(Mat. 10:5-15; Mar. 6:7-13)

1Isus nafaful at Nasugu fag Labi Duwa sa anya, ay nafon at fagmadaragangun laman mafaayan ngay mafurat fag falad fagayu, ay laman mafafiya at ke ngay daylan. 2Ay Isus nasugu te, “Foyungi sa sangay taw Diyus nu gmagurang taw baliwa ay fafiyai at ke ngay daylan. 3Lag e uba nus nge wain gina am glo, dewa suwan, ay ambag, ay fakonun, ay singku, ay anggan lag gfaduwa ay balukas. 4Ay nus nganday fag bale ay fagsakboan, sanyai wan nu gtiyug am, ginanya mandi fag lo. 5Ay sik fulan at ngay taw nu dway gfasakbo ayu, nu glo wam sanya ginan fag fulan, farikfiki yap at dafug siginan ay darafa, sik famasaful sanya fag taw te, e yud masine at kumgurungan ban sa anya.” 6Ay at Labi Duwa nalo wan ay nadalan wa fiya sa sangay fulan. Ay nafoyung at Masine fag Barita, ay nafafiya at ke daylan nus nganday at fakadasugan.

Erudes Gfainbalian sat Amatanganan

(Mat. 14:1-12; Mar. 6:14-29)

7Ay Erudes tagmagurang sis talun Galiliya nadungug fagayu ebi Isus at fagbulun. Ay kanya gfainbalian at amatanganan, anway tibak taw iglong te, “Kanya Uan way Tagfasurung nadog yay gleleg.” 8Ay tiba glong te, “Kanya Elyas nadog yay insure.” Ay tiba glong te, “Kanya sik taglong ebi nadog yay gleleg.” 9Ay Erudes nalong te, “Nafalifung aw Uan at liyug. Nu katanya, sinu way ka fag taw ku nadungug ayuwayu sa baliwa at fagbulun?” Ay Erudes gfabulun gyalagun Isus.

Isus Nafafangon 5,000k Taw

(Mat. 14:13-21; Mar. 6:30-44; Uan 6:1-14)

10Isus at ngay Nasugu nu nfoli wan, gfamansulit wa sas Isus fagayu at fagbulun. Ay nu ntabu wan nu kamansulit, Isus nataban at ngay Nasugu sa sik fulan at ngayan Betsayda, ay we nataban tibak taw. 11Ay ka fag ngay taw nu nasaful te, sanya ro Isus nu glo, naguyan yay. Ay Isus nafaful ka fag ngay taw, ay nafoyung sas Diyus nu gmagurang taw baliwa, ay anggan nafafiya at ke ngay daylan.

12Ay nu kayabi wan, at Nasugu fag Labi Duwa nkakbang sas Isus ay nalong te, “Faloi wan ka fag ngay taw laman suma yay sangay fulan at makbang iste, ay laman gsarap yay at fakonun ay at fagtiyugan, teway iste way tam stalun yud e taw.” 13Ay Isus nalong sat Labi Duwa te, “Am wa ro tagfayafun ka fag ngay taw.” Ay at Labi Duwa nabalus te, “Lima way em ba tinafay ay duwak uyang. Wa ro umsak nu dway ami lumo laman nanbili yay ami tibak tinafay, em famayafun ka fag ngay taw.” 14Labon 5,000k mangama at kayuwan tagsanya. Ay Isus nalong sat ngay tagadal te, “Falunggungi ay fainkafudani ka fag ngay taw. Ay sik afud 50k taw.” 15Ay nafalunggung wa fiya fagayu at taw sanya. 16Ay Isus nabul ka fag limak tinafay ay ka fag duwak uyang, ay natangda sas banwa, ay nauseganan sas Diyus. Ay nafanramyukan ay nafon sat ngay tagadal laman gfafafud sa sangay taw. 17Ay fagayu taw naon ay napsug wan. Ay at ngay tagadal nafaful yay at nagsawadan, ay labi duwak sabi at kinkapnu.

Pedru Nafoyung te, Tam Isus, Tam Diyus at Nafili fag Fun

(Mat. 16:13-19; Mar. 8:27-29)

18Ay kaduge Isus igdarangin sesadi, at ngay tagadal sanya yangay. Ay Isus nainto te, “Sinu aw ngay taw at longan?” 19Ay at ngay tagadal nabalus te, “Tibak taw glong te, Uan Tagfasurung o. Ay tiba glong te, Elyas o. Ay tiba glong yangay te, Diyus o at taglong at kinleleg.” 20Ay Isus nainto yangay fiya sat ngay tagadal te, “Ay nu si ayu, sinu aw?” Ay Pedru nabalus te, “O wan Diyus at nafili fag Fun!” 21Ay Isus matvngvd nu gsalag sat ngay tagadal te, “Lag gfoyung dewa nus nga sinu fag taw.”

Isus Naguna Nafoyung nu Mkate ban

(Mat. 16:21-28; Mar. 8:27-30)

22Ay Isus nalong yangay te, “Aw, Taw at Baguwama, maris kban ngayuk mataka. Ay taw Udyu at ngay tagmagurang, ay at ngay taganyun daul, ay anggan at ngay tagfoyung Muisis at Suguwan umlimata ban angku. Ay e fate wa ban angku. Ay sa ban sfatuluk menit gdog kyangay gleleg.”

23Ay rodi Isus nalong sas fagayu taw tagsanya te, “Sik taw nu kaumsig tuwa nangalo angku, ubuni tuwa at fakaumsigun mandi. Ay mafamasadani tuwa dewa sas fakateun, katvngvdan nu kaumsig nangalo angku. 24Anway nus nga sinu fag taw nu kesug way at leleg katsi, malyam wa ban at leleg. Ay nus nga sinu tagfon at leleg katsi, laman e fanambagun aw, ka fag taw ban e leleg tuwa faggugat. 25Tain, nu kin ban, sik taw at fanambagun, dewa nafabul fagayu nus nge wain fag nanuranan, ay nu nalyam way ngap ban at leleg? 26Anway nus nga sinu fag taw nu kapla way gfoyung angku ay anggan ku longan, anggan aw, Taw at Baguwama, kapla akyangay ban anya, gina ban aw kadasug stiye e fagmadaragangun. Ay e fagmadaragangun akyangay siginan ku Mama. Ay anggan e fagmadaragangun aw siginan at ngay tagfabarita. 27Ay matuyan iglong aw ayu te, am tiba tagste, ya mkate yap ngay nalag Diyus nu gmagurang taw.”

Isus At Bilug Inbali yay Sirut

(Mat. 17:1-8; Mar. 9:2-8)

28Ay nu nlangfe wa waluk menit, Isus nataban Pedru, ay Uan, ay Santiagu, ay nalo sa sik muyud laman nandarangin. 29Ay gina Isus igdarangin, inbali wan at mata. Ay at balukas malagsi ay masulo dawdaw. 30-31Ay rodi tv sik duwama nsure ay igfasulitanan Isus. Kanya Elyas ay Muisis. Ay kanya masulo nu kalag. Ay at sulitanan sa baliwas Isus nu kate sas Erusalem, ay makbang wan. 32Ay Pedru ay anggan at ufud fag duwa gtiyug matukba dawdaw. Ay gina nfulo, nalag Isus nu masulo dawdaw ay anggan fag duwama at malindug sis Isus day tigyangan. 33Ay gina ka fag duwama galoun siginans Isus, Pedru nalong sas Isus te, “Em Takamoyung, masine ste yangay ami. Nangawat yay ami tuluk fagfanlanbungan, at sadi sa emu, ay at sadi sis Muisis, ay at sadi sis Elyas.” (At matuyan Pedru wa nasaful dewa naelongan katanya.) 34Ay kaduge Pedru gelongan, sik linyabu nalanbung tagsanya fagayu, ay inlimu dawdaw. 35Ay e nadungug sik elongan sanya ginan sad linyabu te, “Kanya ku baguwama ku nafili. Dungugani tuwa anya!” 36Ay nu ntabu wan nu gelongan, at nalag sanya Isus way sesadi. Ay ginanya fag ngay menit at ngay tagadal wa nafoyung nus di sadik taw at nalag.

Isus Nafafiya sik Baguwama ke Mafurat fag Falad

(Mat. 17:14-21; Mar. 9:14-27)

37Ay balabag di Isus ay at tuluk tagadal indaga wa sanya ginan fag muyud. Ay sik ngay taw ayuwayu nafablang anya. 38Ay sik ama siginan swa taw matvngvd nu nalong te, “Em Takamoyung, linggati yap ku baguwama fag sadi! 39Kayu ginan at mafurat fag falad igmagurang ku baguwama, kanya guro dawdaw. Ay ka fag mafurat fag falad igfafanggong ku baguwama ay glafas at bibig. Ay kanya gfatakan dawdaw ku baguwama, ay wa bangan gaubunun anya. 40Ay aro dewa matvngvd nu get aw sa am ngay tagadal laman gayan, kanya wa mafaayan.” 41Isus nalong te, “Am katsi fag ngay sugfun taw, at yud way am gafanud! Seduge ya ban nu gufud aw ayu? Ay seduge ya ban nu gsungatan aw gfaygaluwan ayu? Tabani ste sa angku ka fag baguwama!” 42Ay gina ka fag baguwama kadasug sas Isus, ka fag mafurat fag falad nafafulid anya sas daga ay igfafanggong anya. Ay rodi Isus matvngvd nu gsalag ka fag mafurat fag falad. Ay Isus nafafiya ka fag baguwama. 43Ay fagayu taw tagsanya nadulawan dawdaw te, “Madaragang dawdaw Diyus!”

Isus Gdog yay Nafoyung nu Mkate ban

(Mat. 17:22-23; Mar. 9:30-32)

Ay fagayu at taw sanya gamatangan dawdaw Isus at fagbulun. Ay Isus nalong sat ngay tagadal te, 44“Dungugani tuwa ro ku longan sa ayu. Aw, Taw at Baguwama, e tumaban ban angku sa sik ngay taw takalimata angku.” 45Ay at ngay tagadal wa nasaful at longan at masuwad, anway mafalyu way at longan ay manga kalimu way ginto sas Isus at longan at masuwad.

Sinu ban Tam at Tiba Tungud?

(Mat. 18:1-3; Mar. 9:33-37)

46Ay Isus at ngay tagadal igbadbaboan te, “Sinu ban tam tiba tungud?” 47Ay Isus nasaful at ngay tagadal at amatanganan. Ay nabul sik sisiyan sirut ay gfalindug sit day tigyangan. 48Ay Isus nalong sat ngay tagadal te, “Nus nga sinu fag taw nu gfasakbo tuwa tuy fag sisiyan sat bale anway kanya gseg angku, kanya kata wa nu gfasakbo angku sat bale. Ay bundi aw fag sadi, kata yangay nu nafasakbo sat bale at nasugu angku. Anway nus nga sinu sa ayu at tiba daga fag taw, kanya ban at tiba tungud.”

Sik Taw nu Gdi Gsalag Antam, Igtarabang tuwa Antam

(Mar. 9:38-40)

49Ay Uan nalong sas Isus te, “Em Takamoyung, nalag ami sik mangama nu gayan at mafurat fag falad sa am fagmadaragangun. Ay nasalag ami anya, anway wa kanya at sadi tagalo antam.” 50Ay roro Isus nalong te, “Lag gsalag anya, anway kanya fag taw nu gdi gsalag ayu, kanya gtarabang tuwa ayu.”

Sadik Fulan sis Samarya Kauri Isus

51Ay nu makbang wan at menit Isus nu kafoli sas banwa, kanya namatangan te, suma yays Erusalem. 52Ay Isus nasugu tiba at tagadal laman nansarap at fagtiyugan sas Samarya. 53Ay roro at ngay taw sanya wa kaumsig gfasakbo Isus, teway nasaful te, Isus at fasadan fiya fiya galoun sas Erusalem. 54Ay at tagadal fag duwa, Santiagu ay Uan, nu nasaful ka fag ngay taw at fagbulun, nalong sas Isus te, “Em Fun, go kaumsig o nu get ami sik afuy siginans banwa laman igbatas ka fag ngay taw?” 55Ay Isus inbiling ay gbaya te, “Lagi.” 56Ay rodi Isus ay at ngay tagadal nalo wa sa tibak fulan.

Isus Nafaskud Tuluk Ama Takaumsig Tagaaloun Anya

(Mat. 8:19-22)

57Ay Isus ay at ngay tagadal kaduge glo sa sangaba dalan, sanya e sik taw glong sas Isus te, “Nangalo akwa emu nus nganday nu glo o.” 58Ay Isus nabalus te, “Amatangani, sik idu talun e faglutan tuwa. Ay sik manuk tungud e fagsubukan tuwa. Ay roro aw, Taw at Baguwama, dakwa batang e faglugoan si sik buknga laman nanfafiyan ku lufuy.” 59Ay Isus nalong yay fiya sa sadi ya fiyak taw te, “Aloi angku.” Ay kanya fag taw nalong te, “Ku Fun, guli akyay. Nangalo akyay nu glibing ku mama.” 60Ay Isus nalong anya te, “Fabayani wa sanya fag ngay matean at nanlibing at kinkate. Ay o, loi wan ay foyungi sa sangay taw Diyus nu gmagurang taw baliwa.” 61Ay e sadi ya fiyak taw at nalong sas Isus te, “Ku Fun, anggan aw nangalo akyay ban emu. Ay idya katsi, nanfoyung akyay sa ku bale at ngay taw ku fagbulun ban.” 62Ay Isus nafafaskudanan te, “Sik taw tagaradu nu nanlinggat way gugat sat guyan, katanya we fanambagun at fagbulun sas Diyus at fagmagurangan taw.”

Currently Selected:

Lukas 9: TAWEAST

Highlight

Copy