Lukas 11

Isus At Foyungan sa baliwa nu Gdarangin

(Mat. 6:9-15; 7:7-11)

1Sik menit, Isus igdarangin sa sik talun. Ay nu ntabu wan nu gdarangin, at tagadal at sadi glong anya te, “Em Fun, foyungi emi nu gdarangin laman gsaful yangay ami, kata ebi Uan Tagfasurung nu gfoyung sat ngay tagadal.”

2Ay Isus nalong sat ngay tagadal te, “Nu gdarangin am, katatuyi te,

‘Em Mama, masine at ngay taw nu gseg emu. Ay at masine, oi tuwa tagmagurang at ngay taw.

3Ay foni emi em fakonun kayu menit kayu menit.

4Ay falyami em ngay asalanan, kata nu nafalyam ami em iba at asalanan sa emi.

Ay dingdingi emi laman di ami gafaskudan sas asalanan.’ ”

5Ay Isus nafoyung sik fafaskudanan te, “Nu e fagwes o, ay nu nalo o sat bale swa bilug yabi, ay glong o te, ‘Sama, faulbusi yap angku sik fakonun, 6teway ku fagwes at sadi ndasug sa ku bale, ay dakwa e famaon anya.’ 7Ay siginan sad bale am fagwes gbalus emu te, ‘Madingdingan wan em sakbawan, lag gfulo emi. Dakwa maalindug ay mafafon emu nus nga setaw kanya am fagetun.’ ” 8Ay Isus nalong yangay te, “Dewa am fagwes kauri kalunggung laman nanfon nus nga setaw am fagetun, kanya umlunggung yay laman nanfon am fagetun, anway matvngvd nu get o.” 9Ay iglong akyangay sa ayu te, “Eti, ay gfon ban ayu. Sarapi, ay lumag ban am. Atuki, ay lumuwang ban laman sa ayu. 10Anway fagayu taget, mul wa ban fiya. Ay fagayu tagsarap, lumag wa ban fiya. Ay fagayu at takatuk, e lumuwang wa ban fiya sa anya. 11Ay amatangani ayu, am at ngay tama te, ngay unga nu naet wa ro sa ayu sik uyang, go ay fon ro sa anya sik ubyanun way? 12Ay nu naet wa ro sa ayu sik iklug, go ay fon ro sa anya sik agipan way? 13Ay dewa am at ngay mauri fag taw, gsaful tuwam gfon at masine sa ay sisiyan. Ay Tama sas banwa glabi yay dawdaw sik taw tama ste swa daga nu gsaful gfon at masine, anway at nafon sa taget anya at Masine fag Falad.”

Isus ay Satanas

(Mat. 12:22-30; Mar. 3:20-27)

14Ebi Isus naayan sik mafurat fag falad tagyud mafaelongan sa sik taw. Ay ka fag mafurat fag falad nu nkayan wan, aro fag taw mafaelongan tuwa. Ay at ngay taw sanya nadulawan dawdaw. 15Ay tibak taw nalong te, “Kanya fag taw at fagmafaayanun at mafurat fag falad, at fagmadaragangun siginan ways Satanas, ngay mafurat fag falad at fun!” 16Ay tibak taw kaumsig gfaskud Isus. Ay get sas Isus te, “Falagi emi sik madulawan siginans banwa.” 17Ay roro Isus nasaful ka fag ngay taw at amatanganan, ay nalong te, “Sa sik fagmagurangan at ngay taw nu dway e fagmasadiun ay garingangan way gugat, bandi ban ka fag fagmagurangan umrasras wan. Katanya yangay at kumgurungan ban sa sik talafuwan. 18Ay Satanas ay at ngay fanuguwan nu gfaringangan way mandi si at fagmagurangan, go kanya e fagmagurangun yay ban? Yaya! Ku fagnalongun, anway glong am te, ku fagmafaayanun ngay mafurat fag falad siginans Satanas ku fagmadaragangun. 19Ay ku fagmadaragangun ku fagmafaayanun at mafurat fag falad, nut siginan way ros Satanas, daginan ay ngay fanuguwan at fagmadaragangun at fagmafaayanun at mafurat fag falad? Ay ay ngay fanuguwan wan tagfoyung sa ayu te, ‘Yaya. Wa matuyan ay amatanganan.’ 20Ku fagmadaragangun ku fagmafaayanun at mafurat fag falad nut siginan tuwas Diyus, gfatuyan te, Diyus tuwa tagmagurang ayu.”

21Isus glong yay te, “Sik madaragang fag taw nu e famabarangyan tuwa, ay nu gtanud tuwa at bale, at ngay nanuranan we malyam. 22Ay tibak taw taglabi yay anya nu madaragang gfabarangyan ay mabo anya, mul wan at famabarangyan, at fagsegun, ay mafud at nafamul fag ngay nanuranan sat ngay fanuguwan.”

23Isus glong yay te, “Nus nga sinu at yud gfadiyuganan angku, kanya ku fabarangyan way. Ay at yud gtarabang angku gfaful ngay taw, kanya gfasaruwayan way.”

Sik Mafurat fag Falad gdog yay Kafoli

(Mat. 12:43-45)

24“Sik mafurat fag falad nu nalfas wan siginan sik taw, kanya glo sa sangay talun at yud e mamam laman nansarap at fagbanwanan, ay nu dway e nalag, kanya gamatanganan te, ‘Kafoli kyay sa ebi ku fagbanwanan.’ 25Ay nu ndasug sanya, manlag di, malanu ay masine, 26ka fag mafurat fag falad nansarap yay fitu yak mafurat fag falad glabi yap anya nu mauri laman at ufud. Ay fagayu nu nasakbo wan, ka fag taw inkugat yay siginan ebi ataw nu mauri.”

At Matuyan fag Fagusegananun

27Ay kaduge Isus gelongan katanya, sik mangena siginan swa taw gbiya nu gelongan te, “Guseganan at nafasalug emu ay at nafasusu emu fag mangena.” 28Ay Isus nalong te, “Glabi yay nu guseganan sik taw at nadungugan ay at nafaning Diyus at longan.”

Tibak Taw Udyu Kaumsig Gyalagun sik Madulawan fag Fagbulun

(Mat. 12:38-42; Mar. 8:12)

29Kaduge at ngay taw kaful ayuwayu, Isus glong te, “Am katsi fag ngay taw, mauri way am. Ay ay fagyalagun sik madulawan way fag fagbulun fagtvngvd. Ay roro ngap we fagfalagun sa ayu, dasday kata ebi gina sis Unas fag madulawan. 30Ebi Unas at fagbulun sik madulawan fag fagbulun sa sangay taw Ninibi. Katanya yangay aw, Taw at Baguwama, ku fagbulun sik madulawan yangay fag fagbulun sa ayu katsi. 31Ay gina ban sas fakatabuwan menit, talun Sheba at tagmagurang fag mangena gdog yangay ban gleleg gfasfuwan ayu ay lumong ban te, sik mauri way am. Anway ka fag mangena ndasug siginans fungfung daga, laman nandungugan fun Sulumun at mamatanganan fag longan. Ay katsi iste, taglabi fiya fiya fun Sulumun nu mamatanganan. 32Ay gina ban gtap asalanan fag ngay menit, ebi fag ngay taw Ninibi gdog yangay ban gleleg gfasfuwan ayu ay lumong ban te, sik mauri way am. Anway taw Ninibi naubun tuwa at asalanan gina nadungug Unas at foyungan. Ay katsi iste, taglabi fiya fiya Unas.”

Tam Bilug at Salung

(Mat. 5:15; 6:22,23)

33We taw te, nu nasulsul wa sik salung, gsuksuk wan ay ate gsuklub bugyas. Fangkabat, fatsa tuwas fagfatungkudan salung laman tagsakbo glag tuwa. 34Am bilug at salung am mata wan. Ay am mata nu maliyo tuwa nu glag, fagdaul am bilug mayamag tuwa. Ay roro am mata nu dway maliyo nu glag, anggan fagdaul am bilug kata way nu marum. 35Nu katanya, tagaki tuwa, laman tagsi emu fag mayamag di marum. 36Ay fagdaul am bilug nu mayamag tuwa, ay nu gdi e afud marum, kanya mayamag tuwa kata sik salung nu gfayamag emu.

Isus Kalimata sa sangay Taw Parisiyu ay sa sangay Tagfoyung Muisis at Suguwan

(Mat. 23:1-36; Mar. 12:38-40; Lukas 20:45-47)

37Ay nu ntabu wan Isus nu gelongan, sik taw Parisiyu nagewan Isus sat bale laman gfasfuwan anya nanfangon. Ay Isus nasakbo ay gfangon sanya. 38Ay ka fag taw Parisiyu gamatangan te, Isus wa nafegus at daluwap gina bagu gfangon. 39Ay tam Fun Isus nalong sa ka fag taw Parisiyu te, “Am fag ngay taw Parisiyu, dewa am nafegus ay faginuman fag taya at guyuy ay anggan ay fagfangonan fag taya at guyuy, roro sa ay basad galabian way am gugat ay mauri way am. 40Am at yud mamatanganan! Diyus nu naawat ay faginuman ay fagfangonan at guyuy, naawat yangay at basad, go kin? 41At masine, afanyui tuwa ay iba at yud e kwa, ay foni ay ngay taya at suwadan. Ay nu katanya tuwa ay fagbulun, masine tuwam, kata ay taya nu mafegusan.

42“E nanfauri ban ayu, am fag taw Parisiyu! Dewa am nafon at fasafuluwan kafud sas Diyus siginan ay nabul ay ngay famayayum, ay roro ngap nalyam wam at matvngvd fag fagbulun, kata nu kafanyu am ay iba, ay nu kesug am Diyus. Nu gfon tuwam ay fasafuluwan kafud sas Diyus, dangay kalyam nu kafanyu am ay iba ay anggan nu kesug am Diyus.

43“E nanfauri ban ayu, am fag taw Parisiyu! Anway ay fakaumsigun si tuwam at masine fag faglunggungan sa ay bale fakafulan. Ay manga nu glo am sa tuwa swa taw, laman ngay taw at nanfablang ayu, gseg ayu. 44Ay e nanfauri yangay ban ayu. Anway kata am sik faglibingan at yud e fagtoglagan. Ay ngay taw nu nadalan sanya wa nasaful te, ‘E malibingan iste.’ ”

45Ay sadik tagfoyung Muisis at Suguwan nalong sas Isus te, “Em Takamoyung, nu katanya wa nu glong o, gbaya wo anggan emi.” 46Ay Isus nalong te, “E nanfauri ban anggan am, fag ngay tagfoyung Muisis at Suguwan, anway gfatakan am ay suguwan sa sangay taw. Ay roro am yay at yud gfaning ay ngay suguwan, madyay am oma tagfoyung wam kaumsig gtarabang nus di oma glangbud sumyu. 47Ay e nanfauri ban ayu, anway gfasine way am at ngay faglibingan Diyus at ngay taglong ay ngay aguyangan ebi at nafate. 48Ay anggan am, igfadiyuganan way am ay aguyangan at fagbulun. Anway kanya at nafate ka fag ngay taglong, ay am wan at nafasine at faglibingan. 49Diyus at masafulan dawdaw glong te, ‘Sumugu akban ku ngay taglong ay ku ngay takamoyung sa sangay taw Udyu, ay taw Udyu nanfatakan ban anya ay nanfate.’ 50Nu katanya, fagayu ku nafamasadan fag faurianan sas fagayu at nafate sik taw gfadasug akyangay ban fiya sa katsi fag ngay taw. Anway nabusbus Diyus at ngay taglong at taguk siginan ngay fagsigadan tam fagdaul daga. 51Siginans Abel at taguk anggan Sakariyas at taguk. E nafate Sakariyas gina sis buknga Diyus bale ay fagyagoan. Matuyan, iglong aw ayu te, katsi fag ngay taw umfauri wa ban anway sat nafagbulunan.

52“E nanfauri ban ayu, am tagfoyung Muisis at Suguwan, anway igsalag way am tibak taw, laman wa sumaful Diyus at longan. Ay manga wam kaumsig gfaning Diyus at longan, ay igsalag way am at takaumsig gfaning.”

53Ay gina Isus nalo sanya ginan, at ngay tagfoyung Muisis at Suguwan ay anggan taw Parisiyu kadotama dawdaw Isus. Ay manga gfalingun anya, anway at fakaumsigun, Isus melongan nangus ayuwayu. 54At fakatanyaun igsarap Isus at longan at yud matuyan.

Currently Selected:

Lukas 11: TAWEAST

Highlight

Copy