Uan 18

E Nagamat Isus

(Mat. 26:47-56; Mar. 14:43-52; Lukas 22:47-53)

1Ay Isus nu ntabu wan nu gdarangin, nalo wan gfaygaluwan at ngay tagadal, ay nadife wa sas liskung Kidrun. Ay sit dife e sik gamasun ay e tanum sik ngay kayu ulibu. Isus ay at ngay tagadal indasug sanya fag gamasun. 2Ay anggan Udas, at nanfoyung Isus sas mauri fag ngay taw, nasaful ka fag gamasun, teway ngayu ginan wan Isus ay at ngay tagadal nu maful sanya. 3Ay Udas nataban sanya talun Ruma at ngay sundalu ay anggan ngay tagtanud Diyus bale. Ka fag ngay tagtanud, ngay taganyun daul ay taw Parisiyu at nasugu. Ay ka fag ngay taw, tiba e fiso ay tiba e salung. 4Isus nasaful wan fagayu at kumgurungan sa anya, nu katanya, nangakbang sanya fag ngay taw ay ginto te, “Sinu ay fagsarapun ste?” 5Ay ka fag ngay taw nabalus te, “Isus, sik taw siginans fulan Nasaret.” Ay Isus nalong te, “Fagalay kanya, aw wa ngaro.”

Ay Udas sanya wan malindug maful ka fag ngay taw. 6Ay gina Isus nalong te, “Aw wa ngaro,” ka fag ngay taw insugud ay taba wa nagfu. 7Ay Isus gdog yay nainto te, “Sinu ay fagsarapun ste?” Ay ka fag ngay taw nabalus yay fiya te, “Isus, sik taw siginans fulan Nasaret.” 8Ay Isus nalong te, “Aro nafoyung kwa ayu te, aw wa ngaro. Ay ay fagsarapun nu aw wan, lag gsalag ku ngay ufud nu gfangulian ro.” 9(Katanya Isus at fagnalongun, laman igfagurungan aro at longan te, “Ku Mama, dakdi e nafalyam nus di sadi am nafatsa angku fag ngay taw.”) 10Ay Simun Pedru naguyud at fiso. Ay nabasing fun taganyun at fanuguwan, ay naayas at talinga at siyun. Ay ka fag fanuguwan at ngayan Malkus. 11Ay Isus nasalag Pedru te, “Folii wan am fiso sa am guma. Go gamatangan o te, kwa mabaris ku Mama at fagafadalanun angku fag ngay mataka?”

E Nataban Isus sas Anas

12Ay talun Ruma at ngay sundalu ay at tagfangguna, ay anggan ngay tagulit fag ngay taw Udyu nated ay nasiyuk Isus. 13Ay ka fag ngay taw at taguna at fagtabanan Isus sa sik taw at ngayan, Anas. Anas, Kayfas nugangama. Kayfas at fun taganyun ginanya fag banwa. 14Kayfas ebi at naguna nafoyung sa sangay taw Udyu te, “Go wam nasaful te, at masine sadik taw yakman takate, laman tam ngay taw e fanambagun?”

Pedru Kamayud te, wa Gtoglag Isus

(Mat. 26:69-70; Mar. 14:55-64; Lukas 22:66-71)

15Ay Simun Pedru ay sadi yak tagadal gguyan Isus. Ay fun taganyun natoglag ka fag tagadal, nu katanya, kanya ay Isus nasakbo sas fun taganyun at basad faglanuwan. 16Ay Pedru malindug yay sis day sakbawan alad faglanuwan. Ay ka fag tagadal nalaklo wa sas day alad, ay nananfatuyan wa sa ka fag baguyna at tagtanud sakbawan, laman ro ka fag tagadal tumaban wa Pedru sasad faglanuwan. 17Ay ka fag baguyna nainto sas Pedru te, “Go o at sadi ka fag taw at tagadal?” Ay Pedru kamayud te, “Yaya. Bunwa aw.” 18Ay ginanya fag yabi matis dawdaw. Ay sanya fag ngay fanuguwan ay anggan at ngay tagulit sakbawan nafe afuy sa sik uwing. Ay malindug igsafungan, laman gfangenbung. Ay anggan Pedru malindug yangay sanya gfangenbung.

Fun Taganyun Nainto sas Isus

(Mat. 26:59-66; Mar. 14:55-64; Lukas 22:66-71)

19Ay fun taganyun nainto sas Isus laman nangasaful sa baliwa at foyungan ay sat ngay tagadal. 20Ay Isus nabalus te, “Faggugat kwa nasuksuk nu nafoyung aw ste swa daga fag ngay taw. Nafoyung aw sa sangay taw Udyu at ngay bale fakafulan ay anggan sas Diyus bale sis Erusalem gina ngay taw Udyu maful. Dakdi batang e suksukan ku longan. 21Taw ro at masuwad am fagintoun angku? Intoi wa sa at ngay nadungug ku longan sanya, teway kanya fag ngay taw nasaful wan ku longan.” 22Ay Isus nu nalong wa katanya, at tagulit sakbawan natalaptap dawdaw sas Isus fingi. Ay nalong te, “Taw ro am fagnalongun ngap takatanya sa tam fun taganyun?” 23Ay Isus nabalus te, “Ku longan nu dway matuyan, tain am famatuyanan ste fag ngay taw? Ay nu matuyan tuwa ku longan, taw ro am fagnatalaptapun angku.?”

24Ay gina Isus masiyukan, Anas nafalo wa anya sas Kayfas. Ginanya Kayfas sik fun taganyun.

Pedru Gdog yay fiya Kamayud

(Mat. 26:71-75; Mar. 14:69-72; Lukas 22:58-62)

25Ay Simun Pedru malindug yay gugat sanya gfangenbung. Ay ngay taw nainto anya te, “Go o wan at sadi at tagadal?” Ay Pedru kamayud te, “Yaya. Bunwa aw.” 26Ay sanya at sadi fun taganyun at fanuguwan, aro Pedru at naayas fag fanuguwan at lagbe at talinga. Ay ka fag fanuguwan nalong sas Pedru te, “Nalag aw emu nu gufud o Isus sas gamasun. Go kin?” 27Ay Pedru gdog yay kamayud ginanya sigon. Ay rodi tv sik tabag natarakit.

E Nataban Isus sas Pilatu

28Ginas balabag sirut ka fag ngay taw Udyu nataban Isus siginans Kayfas, ay nafadasug sas Pilatu at bale daul. Ay ka fag ngay taw wa gsakbo sa at fun at bale, anway wa kaumsig nu gfafurat anya mandi, kata at faugali. Fakatanyaun, sik taw Udyu nu nasakbo way sa sik yud Udyu at bale, kanya mafurat wan ay wa ban e gfaon anya gina e fagmafulun sa baliwas Tagfabarita nu Glangfe. 29Ay Pilatu nalaklo sat day bale laman nanginto sanya fag ngay taw te, “Nataw sangay ay nasaful kanya fag taw at asalanan?” 30Ay ka fag ngay taw nabalus te, “Nu gdi mauri ka fag taw at fagbulun, wa ro ami nataban sa emu.” 31Ay Pilatu nalong te, “Tabani wan ka fag taw. Ay am wan tagfatugan te, go setvngvdi ay fanfauri anya, nus nga setawi way ay ugali.” Ay taw Udyu nabalus te, “Am longan sa emi ebi te, lag gfate nus nga sinu.” 32(Katanya taw Udyu at longan, laman umgurungan ro ebi Isus at longan at naguna nafoyung te, katanya ban nu gfate.) 33Ay Pilatu gdog yay nasakbo sat basad bale ay igfaakbang sa anya Isus ay ginto te, “Go o wan taw Udyu at fun?” 34Ay Isus ginto te, “Go am longan, am longan way mandi? Ay go ate am iba nafoyung wa emu ku ugali?” 35Ay Pilatu ginto yay fiya te, “Go sangay aw, sik taw Udyu aw? Am ngay kaiban Udyu anggan at ngay taganyun daul nataban emu sa angku. Nataw ngani am asalanan?” 36Ay Isus nabalus te, “Ku fagmagurangun saman yay ste swa daga sa sik fun nu gmagurang. Satu ro ku fagmagurangun nu ste way swa daga, ku ngay fanuguwan igfabarangyan yay, laman wa nataban angku sa sangay taw Udyu.” 37Ay Pilatu nainto sas Isus te, “Go sik fun o?” Ay Isus nabalus te, “O wan at nalong te, sik fun aw. Ku faginsalugun ste swa daga ay ku fagindasugun laman nanfoyung aw at matuyan. Nus nga sinu takaumsig gfaning sat matuyan fag longan, kanya yangay tagdungug sa ku longan.” 38Ay Pilatu nainto sas Isus te, “Nataw tuwa ngani at matuyan fag longan?”

E Nafalfas Barabas ay e Gafateun Isus

(Mat. 27:15-31; Mar. 15:6-20; Lukas 23:13-25)

Pilatu nu ntabu wan nu glong katanya, gdog yay nalaklo sat day bale. Ay nalong sa sangay taw Udyu te, “Aw, kwa e nasaful Isus at asalanan. 39Ay e ugali way am, laman gfalfas aw sik masungsungan gina e fagmafulun sa baliwas Tagfabarita nu Glangfe. Go kaumsig am nu gfalfas aw sa ayu taw Udyu at Fun?” 40Ay ngay taw nauro dawdaw te, “Lagi kanya fag taw. Am fagfalfasun Barabas yakman!” (Barabas sik takamul ay takamate fag taw.)

Currently Selected:

Uan 18: TAWEAST

Highlight

Copy