Uan 19

Pilatu Nafafalang Isus

(Mat. 27:26-31; Mar. 15:15-20)

1Ay Pilatu nalong sa sangay sundalu te, “Buli wan Isus ay falangi.” 2Ay ka fag ngay sundalu nafabalulang sik wat tagadugiun ay nafasangboan sas Isus. Ay anggan nafabalukasan Isus sik balukas ngaba maubian. 3Ay nasadsadian nangakbang sas Isus ay gelongan te, “Madaragang o, taw Udyu at Fun!” Ay nafalang Isus at fingi. 4Ay Pilatu gdog yay nalaklo siginan sad bale, laman nanlong sa sangay taw Udyu te, “Dungugani! Katsi gfon akwa sa ayu ka fag taw laman sumaful ro am te, kwe nasafulan ka fag taw at asalanan.” 5Ay rodi Isus nalaklo yay fiya ay gsangboan tagadugiun ay e balukas ngaba maubian. Ay Pilatu nalong sa sangay taw Udyu te, “Nin wan ka fag taw!” 6Ay at ngay taganyun daul ay at ngay tagulit nu nalag Isus, nauro dawdaw te, “Tuktuki sas salibagan kayu! Tuktuki sas salibagan kayu!” Ay Pilatu nabalus te, “Am wa long tagtaban ay tagtuktuk anya. Aw, kwe nasafulan at asalanan.” 7Ay ka fag ngay taw Udyu nalong yangay sas Pilatu te, “E suguwan wami, ay kata em suguwan, masine ka fag taw nu mkate wan, teway nalong te, ‘Aw wan Diyus at Baguwama.’ ”

8Ay Pilatu nu nadungug ka fag ngay taw Udyu at longan, inkugat yay nu kalimu. 9Ay Pilatu nataban Isus sat basad bale ay nainto te, “Daginan o fiya fiya?” Ay Isus wa gbalus. 10Ay Pilatu nalong sas Isus te, “Taw way am fagyudun gbalus angku? Asafuli te, e fagmadaragangun akwa fiya gfalfas emu. Ay e fagmadaragangun kyangay gtuktuk emu sas salibagan kayu.” 11Ay Isus nabalus te, “Wo e fagmadaragangun sa angku, nu dway ro siginans Diyus. Ay at nataban angku ste sa emu at asalanan glabi yay am asalanan.” 12Ay Pilatu nu nadungug Isus at longan, kanya gamatangan dawdaw te, “Tain ro nu gfafalfas aw Isus?” Ay roro taw Udyu nauro te, “Nu gfalfas way long o ka fag taw, bunwa o talun Ruma at fun fiya fiya at fagwes. Anway nus nga sinu at nafoyung te, ‘Aw wan sik fun,’ kanya kamabo way tam fun fiya fiya.” 13Ay Pilatu nu nadungug ka fag ngay taw Udyu at longan, kanya gdog yay nataban Isus sas day bale ay malunggung sat fagfasinean fanlonganan fag faglunggungan. Ay ka fag faglunggungan sa baliwa at Mafadatagan fag ngay Batu (sis Fangebriyu at fanlong, Gabata).

14Ginanya anwa swa bilug menit ay kamasadan yay sa at fagmafulun sa baliwa Tagfabarita nu Glangfe. Ay Pilatu nalong sa sangay taw Udyu te, “Nin wan ay Fun.” 15Ay taw Udyu nauro te, “Fatei wan! Fatei wan! Katsi tuktuki wa ngani sas salibagan kayu!” Ay Pilatu nainto te, “Go nansugu aw te, tuktuki ay fun?” Ay ngay taganyun daul nabalus te, “Wami e tibak fun, dasday talun Ruma at fun fiya fiya.” 16Ay rodi Pilatu nafanusetaw Isus sa sangay taw Udyu laman tumuktuk anya sas salibagan kayu.

E Natuktuk wa Isus sas Salibagan Kayu

(Mat. 27:33-44; Mar. 15:21-32; Lukas 23:26-43)

17Ay ngay sundalu nataban Isus sas day fulan. Ay Isus gfasanan at salibagan kayu ay nalo sas talun at ngayan Butul Alfuyu. Sis Fangebriyu at fanlong, Gulguta. 18Sanya wan at fagtuktukan Isus sas salibagan kayu. Ay e duwa yak ama at natuktuk sat salibagan kayu, at sadi sis Isus siyun baliwa ay at sadi sit wala baliwa. Ay Isus sisad buknga. 19Ay Pilatu nafariruk sik fagsafulan ay nafadafut sas Isus at salibagan kayu. Ay at rirukan sanya te, “Isus sik Taw Nasaret, NGAY TAW UDYU AT FUN.” 20Ay ngayuk taw Udyu at natap kanya fag rirukan, teway at fagtuktukan Isus makbang way sis fulan. Ay nu marirukan sis Fangebriyu, ay sas Latin, ay sas Grigu at fanlongan. 21Ay taw Udyu at ngay taganyun daul nasalag sas Pilatu te, “Lag griruk te, ‘Taw Udyu at Fun.’ Am rirukan anyakman te, ‘Tuy fag taw nalong te, aw wan taw Udyu at Fun.’ ” 22Ay Pilatu nabalus te, “Ku nafariruk, nafariruk kwan.” 23Ay ufat sundalu nabul wan Isus at ngay balukas siginan sit bilug. Ay nu natuktuk wa Isus, ka fag ufat sundalu naafudan wan Isus at ngay balukas. Ay roro at ngaba fag balukas we sugfunan, fagdaul sadi way. 24Ay ka fag ngay sundalu glodlongan te, “Agi yap tam ggirat. Nanfagsafulan yay tam te, sinu ro tam at mul ka fag balukas at ngaba.” Ka fag ngay sundalu at fagbulun igfagurungan kata ebi at marirukan sis Diyus at longan te:

“Kanya naafudan ku ngay balukas.

Ay nafagsafulan yay te,

‘Sinu at mul ku balukas at ngaba?’ ”

Ay katanya wa fiya at ngay sundalu at nafagbulun.

25Ay ufat mangena malindug makbang sis salibagan kayu. At sadi, Isus at tina. Ay at sadi, Isus at bay. Ay at sadi Maria, Kleupas at mangena. Ay at sadi, Maria sik taw Magdala. 26Ay Isus nu nalag at tina ay anggan at fakesugun fag tagadal nu malindug sanya, kanya nalong sat tina te, “Sena, nin wan ku fakesugun fag tagadal bilang am baguwama.” 27Ay Isus nalong yangay sa ka fag tagadal te, “Nin wan bilang am mina.” Ay ginanya fag menit, ka fag tagadal nataban wa Isus at tina sat bale ay sanya nu gbanwan.

Isus Inkate wan

28Ay Isus nu nasaful wa te, intabu wan fagayu, kanya nalong te, “Kadanum akyay.” Isus at fagnalongun katanya gfagurungan at marirukan sis Diyus at longan. 29Sanya e sik fagsuwadan mapnu mamam mayat. Tiba nafasurung sik fanrarus sanya, ay nasalod ka fag fanrarus sa sik sanga isopo at fanfadasug sas Isus bibig. 30Ay Isus nu nasupsup wa ka fag mamam mayat, naelongan yay te, “Intabu wan!” Ay inkarung wan ay inkate wan.

E Nabangko sas Isus at Tigyangan

31Ginanya fag menit kamasadan yay sa at fagmafulun sa baliwas Tagfabarita nu Glangfe. Ay balabag di Fakamatoun wa fag Menit, taglabi nu mafanud sas fagayu tibak Fakamatoun fag Menit teway natungul gina e fagmafulun sa baliwas Tagfabarita nu Glangfe. Taw Udyu kalimata way nu e matean sas salibagan kayu gina e Fakamatoun fag Menit, nu katanya, naet sas Pilatu te, “Fudi at ngay bitis ka fag ngay taw sas salibagan kayu ay buli at bilug sanya ginan.” 32Ay katanya wayay, at ngay sundalu ndasug ay nafud ka fag duwama bitis at natuktuk fasfuwan Isus. 33Ay inkakbang yay sas Isus. Ay nu nalag te, matean wa mangaro, wa nafud at bitis. 34Ay dewa katanya sik sundalu nabangko yay daw Isus at tigyangan, ay inbusbus wa daw sik taguk ay sik mamam. 35Ay aw, nalag akwan fagayu at kin-gurungan ay nafoyung kyangay sa ayu laman anggan am, gafanud yangay am. Ay ku foyungan matuyan wa fiya. 36Fagin-gurunganun laman umgurungan at marirukan sis Diyus at longan te, “Nus di sadi at butul we mfud.” 37Ay marirukan yangay sis Diyus at longan te, “Ngay taw ban lumag at fagbangkoan.”

Use Nalibing Isus

(Mat. 27:57-61; Mar. 15:42-47; Lukas 23:50-56)

38Ay rodi Use, sik taw siginans fulan Arimatiya, nananlag sas Pilatu laman nanget ay nanbul Isus at bilug. (Use, Isus at tagadal at sadi. Ay roro wa nafoyung sa tiba te, kanya wan Isus at tagadal, anway kalimu taw Udyu at ngay tagmagurang.) Ay Pilatu nafon Use at fagetun. Nu katanya, Use nabul wan Isus at bilug. 39Ay anggan Nikudemu (ebi at kinkakbang sas Isus gina sad yabi) sanya yangay. Ay kanya gubanan sik ngay famabebanglu sas Isus at bilug. Ay at kamabiyatan undain 35k kilu. 40Kanya fag duwama natarabangan nauba Isus at bilug. Ay nabarikus sas Isus at bilug sik masine fag falefe ay nafabebanglu. Katanya taw Udyu at ugali nu glibing. 41Ay fagtuktukan Isus makbang sa sik tanuman. Ay sanya fag tanuman e bagu faglibingan at yud batang e nalibing. 42Ay anway ginanya kamasadan yay fag menit, ay anway ka fag faglibingan makbang tuway, kanya fag duwama nalibing wan Isus at bilug sanya.

Currently Selected:

Uan 19: TAWEAST

Highlight

Copy