Uan 17

Isus Igdarangin At ngay Tagadal

1Isus nu ntabu wan nu glong katanya, kanya natangda sas banwa ay igdarangin te, “Mama, katsi ndasug wan at lungud. Fauseganani angku, laman aw, am Baguwama, nanfauseganan kyangay emu. 2O wan at nafon angku fagmadaragangun laman mafafamagurang aw sas fagayu taw. Ay nanfon aw anya leleg at yud katabu, kayu am nafatsa angku fag ngay taw. 3Katatuy ka fag ngay taw at fagelelegun at yud katabu at masuwad: ngay taw sumaful te, o way fagsadi at matuyan fag Diyus ay sumaful yangay angku te, aw Isus am nafili fag Fun, am nasugu. 4Nafasure akwan am fagmasineun ste swa daga, teway nafatabu akwan am nasugu angku fag fagbulun. 5Ay katsi o, ku Mama, fauseganani angku, kata ebi fag fagusegananun gina aw si emu gina gyud e fagdaul daga.

6“Aw, nafoyung kwan am ugali sa am nafatsa angku fag ngay taw ste ginan swa daga. Kanya am ngay taw am nafatsa angku gfaning wa am longan. 7Ay katsi kanya nasaful te, fagayu am nafatsa angku siginan wa emu. 8Nafoyung aktuway anya am nafoyung angku fag longan, ay kanya gafanud wan. Ay nasaful wa fiya te, aw, siginan kwa emu. Ay kanya gafanud wa fiya te, o wan at nasugu angku.

9“Ku fagdaranginun bunwa tagste swa daga fag ngay taw. Ku fagdaranginun antuwa am nafatsa angku fag ngay taw, teway kanya am ngay taw wan. 10Fagayu ku taw am taw yangay. Ay fagayu am taw ku taw yangay. Ay kanya fag ngay taw at nafasure ku fagmasineun. 11Ay katsi ban kwa ste swa daga. Guli kwa ban sa emu. Ay ku ngay taw igbanwan yay ban ste swa daga. Ku masine fag Mama, dingdingi ban ku ngay taw siginan am fagmadaragangun, kata am nafon angku fag fagmadaragangun. Laman ta ngay taw umsadi kata nu masadi ta. 12Ebi kaduge aw gufud ku ngay taw, nadingding aktuwa anya. Anway nafon tuwo angku am fagmadaragangun. Ay kayu ku natanud ku ngay taw di e nalyam. Dasday sadi, Sik-Tagfarasras, laman nanfagurungan am Longan. 13Ay katsi gauliun akwa sa emu. Ay nafoyung akwan fagayu sa ku ngay taw ste swa daga, laman guseganan yangay dawdaw, katvngvd nu guseganan aw. 14Nafoyung kwan sa ku ngay taw am longan. Ay at ngay taw ste swa daga kalimata ku ngay taw. Fakatanyaun, ku ngay taw di gfaning ste swa daga at mauri fag ngay ugali. Kata aw nu gyud aw gfaning ste swa daga at mauri fag ngay ugali. 15Dakwa gdarangin te, buli wan ku ngay taw stiye ginan swa daga. Ku fagdaranginun anyay te, dingdingi tuwa ku ngay taw siginans Satanas. 16Ku ngay taw di gfaning ste swa daga at ngay mauri fag ugali. Kata aw nu gyud aw gfaning ste swa daga at mauri fag ugali. 17Fasamani yangay anya, teway matuyan tuwa fagayu am longan. 18Kata nu nasugu o angku ste swa daga, aw gsugu akyangay ku ngay taw sa tibak taw ste swa daga. 19Aw, mafamasadan aw gfon ku leleg laman sa ka fag ngay taw, laman o tuwa fiya fiya tagagbilug kanya fagayu sas fagmatuyanun.

20“Ku fagdaranginun bundi sa katsi fagtvngvd ku ngay taw. Ku fagdaranginun anggan tuwa fagayu tagafanud ban sa angku, at dumungugan ban ku ngay taw at foyungan, 21laman kanya fagayu umsadi yangay kata nu masadi ta, aw ay o, ku Mama. Ay laman anggan ku ngay taw umsadi sa anta. Ay laman ste swa daga fag ngay taw mafanud ban te, o wan at nasugu angku. 22Am nafon angku fag fagmasineun, nafon akyangay sa ku ngay taw, laman ku ngay taw masadi tuwa, kata nu masadi ta. 23Aw wan at masadi sa ku ngay taw. Ay o wan at masadi sa angku, laman ku ngay taw umsadi wa fiya. Ay laman ste swa daga fag ngay taw sumaful wa fiya te, o wan at nasugu angku. Ay o wan takesug ku ngay taw, kata nu kesug o angku.

24“Mama, kaumsig aw am nafon angku fag ngay taw te, laman maful tuwa ban angku ay laman lumag ban ku fagmasineun, ebi am nafasure sa angku siginan ngay ebi yud e fagdaul daga, anway kesug tuwo angku. 25Mama, o wan at matuyan, dewa ste swa daga fag ngay taw yud nasaful emu, aw, nasaful aktuwa emu. Ay anggan ku ngay taw nasaful yangay te, o wan at nasugu angku. 26Ebi nafoyung akwa sa ku ngay taw am ngay ugali, ay nanfoyung kyangay ban, laman kata nu kesug o angku, katvngvd yangay anya ku ngay taw nu kesug at tiba, laman aw masadi aktuwa si ku ngay taw faggugat.”

Currently Selected:

Uan 17: TAWEAST

Highlight

Copy