Fagsigadan 33

Akub ay Isaw nu Gfasine at Fagmasadiun

1Ay Akub nu ndasug wa sat ngay talnayan, kanya nabantay. Ay manlag di, at kaka mangaro kadasug wan. Igfaygaluwan at ufud fag 400k mangama. Ay nu katanya, Akub inlimu. Ay at fagbulun, nafasadsamanan at ngay talnayan. Ay nafagudguyanan nu glo. 2-3Taguna taglo, Akub. Ay fadogan tv, at fanuguwan fag duwak mangena, ay anggan at ngay unga. Ay fadogan, Liya talnayan. Ay Rakel talanak tiba guyan.

Ay dugsay nu gakbangan wan, Akub nu kakbang at kaka, fitu ginan gtudan ay fitu ginan kalub. Fakatanyaun Akub fagbulun, mason nu gfababaun sat kaka. 4Ay roro at kaka guseganan dawdaw glag at ariyan. Nu katanya, at kaka natarung wa daw, nanfablang at ariyan. Ay nagafus at ariyan. Ay naayuk.#33:4 Ebi, sanya fag talun at ngay taw ugali galay guseganan te naladlagan, tiba ginan gadgayukan. Ay kanya fagduwa guyway wan.

5Ay rodi at kaka nalinggat sas Akub guyan. Ay nalag sik ngay taw ayuwayu. Ay nainto at ariyan te, “E, sinu kanya am ufud fag ngay taw ayuwayu?” Ay at ariyan gbalus te, “Kanya, em ngay unga wan. Kanya fagayu, Diyus famanyun emi.”

6Ay dugsay nu gsulitanan wa gugat sanya, Akub fanuguwan fag duwak mangena anggan at ngay unga inkakbang sas dugsay. Ay ka fag duwak talnayan natudan ay namalub, sis dugsay daga salubangan. 7Katanya yangay anggan Liya talnayan at fagbulun, ay anggan Rakel talanak. Kanya fagayu natudan yangay ay namalub yangay. Fakatanyaun Akub at ngay talnayan fagbulun, at masuwad, igfababaun sas Isaw.

8Ay rodi ataw, at kaka ginto yay fiya at ariyan. Glong te, “Ay taw kanya ku nafablang fag ngay balan ayuwayu, ebi sik menit?”

At ariyan gbalus te, “E, kanya ngaro ku famaumsiganan way emu.”

9At kaka gbalus te, “E, deyud wan. Angku kasakan tuwa ku ngay fagmabalanun. Ngayu yangay.”

10Ay at ariyan igfabulun glong te, “E, dewa, kaka. Emu wa fiya kanya fagayu. Nu gurungan tuwo nafalyam ku nasalan sa emu, buli tuwa ku fon emu. Teway fakatanyaun ku longan, mason wa dawdaw nu guseganan aw. Kata wa nangus nu nalag aw tam Diyus at mata. Teway ku fagusegananun dawdaw, nalag aw am mata, ay natoglag aw te di o kalimata angku. 11Nu katanya, buli tuwa kayunya ku famanyun emu. Teway ebi ginan Diyus nu gfamanyun angku, ngayu wa fiya. Ay katsi kasakan wan.” Ay at kaka nu nadungug te, at ariyan igfabulun tuwa nu gafonun, rodi ataw at kaka nalong wa te, “E kin, fadi nu gdi.”

12Ay rodi, Isaw glong wa Akub te, “Katsi, lumo watam ste ginan. Gaygaluwan watam.”

13Ay roro Akub gbalus way te, “E, yaya kaka. Glag wa ro o te, tiba em sisiyan alay yay. Anggan em ngay balan, e ngay riyangan yangay sirut. Nu katanya, maran way nu glo ami. Nu gfafali way ro ami em ngay balan nu galafang, rodi ngap ro em balan umkate wan fagayu. 14Ay nu katanya, glabi yay ro kamasine, am loi wan. Gunai wemi. Ami nangarimanan way ami si ay guyan. Nanfainfaluwan way ami em ngay balan nu galafang, ay em ngay sisiyan nu glo. Ay sanya wa ban si ay talun, nu anyangay tam gladlagan.”

15Ay at kaka nu nadungug, glong te, “E kin nu gdi, nanfili kway sik ngay mangama, tagulit ayu nu glo am, laman ro ami tiba gumuna wami.” At ariyan gbalus at kaka te, “Lagi. Dewa ami taglo. Balikam nu nafalag tuwo angku te, nafalyam tuwo ku nasalan sa emu.”

16Ay nu katanya wan, Isaw nalo wan. Infoli wa sat guyan ebi, sas talun Sir. 17Ay roro mangaro, Akub amatanganan fiya fiya, wa gaaloun at kaka. Nu glo, natsa wa tibak dalan. Ay nu ndasug sa sik lungud, Akub naawat yay at bale sanya. Akub naawat fag bale, sik bale at yud kauba. Ay naawat yangay sik ngay bale ayu sirut at fagfasarirungan at balan. Ay nu katanya, bandi ataw at ngay taw nu gngayan sanya fag lungud, Sukut wan. At masuwad sat fanlong, galay nalong Sukut, sik ngay bale ayu sirut.

18Ay Akub fag fulan nu gbanwan wa gugat sis Sukut, bandi ataw naalin wan, sa sik fulan at ngayan Sikim. Kanya fag Sikim, si was talun Kanaan. Nu katanya, Akub indasug tuwa manabayan sas talun Kanaan. Ebi ataw, nalo siginan at ayi talun. Ay katsi infoli wa sa ebi at fakadaulan fag talun.

Ay Akub sanya wan nu gbanwan, makbang fulan Sikim. 19Naawat wa sanya at bale. Ay roro sanya at bale, takauba way. Nga ginain ban Akub fag fulan nu gaalinun, kiklas way at bale, ay guba wan. Ay sanya sit fagbalean sis akbang Sikim, Akub nabili tuwa. Akub fansali sanya fag lungud talun, sit fagbanwanan, 100k pilak. Ay at nafabili sanya, Kamur at ngay baguwama. Ay Kamur at baguwama, at sadi at ngayan, Sikim, kata at fulan ngayan.

20Ay Akub nu sanya wa gugat sis Sikim, naawat yay at fagbatasan famanyun sas Diyus. Nabul sik ngay batu ayuwayu. Ay nu gfatungkud, nafataladan ay nafatudtungudan. Ay sanya wat tungud nu gbatas at famanyun sas Diyus. Ay nafangayan at fagbatasan te, El-Eluy-Israel.#33:20 Sis Fangebriyu, galay glong te, El-Eluy-Israel, at masuwad, Israel fag fulan at fagsegan, sas Diyus wan.

Currently Selected:

Fagsigadan 33: TAWEAST

Highlight

Copy