Fagsigadan 32

Akub nu Gfaumsiganan at Kaka

1Ay Akub sigon fag fulan nalo wan siginan at fagfasulitananan Laban. Ay Akub nu glo wa sangaba dalan, Diyus fanuguwan sik ngay falad insure sa anya. 2Ay Akub inlipsik. Gelonganan te, “Ste mangaro fag lungud, sik ngay falad siginan tam Diyus glo ayuwayu. Kata sik fulan taw nu gaygaluwanan.” Nu katanya Akub nafangayan sanya fag lungud talun te, Makanayim. Kanya fag ngayan at masuwad, “duwak fulan”.

3Ay Akub nu ndasug wa sas Makanayim, igsugu wa tiba at fanuguwan. Glong te, “Katsi am gunai wa emi. Nanlagi wa ku kaka sat fagbanwanan, sas talun Sir.” Kanya fag Sir, tibak taw nu gngayan, Idum.

4Ay Akub glong yangay sanya fag ngay fanuguwan te, “Dewa gina, nu nalag wam ku kaka, longi katatuy: ‘Am ariyan Akub nasugu emi stiye. Nanfadasug ami emu at fagalongunun. At fagalongun unu fiya fiya emu, get unu emu te, dangay kalimata anya. Ay am ariyan glong yangay te, “Ebi ginan nu gbanwan aw, maful kyay si ta ayi Laban. 5Ay nu gbanwan kwa gugat sanya, inkayu wa dawdaw ku fagmabalanun. Inkayu wan ku ngay tupa, ku ngay kambing, ku ngay asnu, ay ku ngay baka. Anggan ku ngay fanuguwan, ngayu wan.”’ Dewa gina, katanyai wa fiya ay longan, nu nalag am ku kaka.” Katanya Akub nu gsugu at ngay fanuguwan.

6Ay at ngay fanuguwan nanlag wa fiya sa at kaka. Ay bandi ataw, kanya fag ngay fanuguwan gina nfoli sas Akub, kamansulit sas Akub te, “Nalag wami fiya am kaka. Ay nu nafoyung wami am fagalongun, kanya glo wan. Ay nu glo, e ufud tuwa sik ngay mangama ayuwayu. Manga 400 at kayuwan. Kanya nanfablang wa unu emu.”

7Ay Akub inlimu dawdaw at fanuguwan nafamansulit. Gabiyatan dawdaw sat amatanganan. Nu katanya Akub namatangan te, “Nangafud aw mangaro duwa, ku ufud fag ngay taw, anggan em ngay balan. Mafud aw duwa, laman ro duwak fulan tuwa.” Ay rodi ataw, Akub fag fulan duwa tuwak afud. 8Akub gamatangan te, laman ro at kaka dewa nafabarangyan sadik fulan, sadik fulan umlagyu yadi.

9Ay Akub nu nafaduwa wak afud at ngay ufud, rodi ataw igdarangin. Glong te, “Yawi, katsi gdarangin aw sa emu. Dungugani nangus, teway o wan ku fufuwama Abrayam at fagsegan. Anggan ku mama Isaak at fagsegan, o yangay. Ay o yangay at nalong angku ebi te, ‘Katsi ulii wan. Afolii wa sam ngay kalongan at talun, sam fakadaulan ebi. Ay gtunglus tuwa ban nu gtarabang aw emu.’ Katanya ebi am longan angku. Nu katanya, katsi dungugani ku darangin. 10Ay intuyan kwa te, ebi ginan, di o gfabayan angku. Gtarabang tuwo gugat gugat angku, madyay gina akyay istiye baliwa, gina aw gdife Safa Urdan, kwe ubanan, dasday ku suwan. Ay katsi, nu kafoli kwan, ngayu wa dawdaw am famanyun sa angku. At kayuwan am famanyun sa angku, duwak fulan wan ku taban fag ngay taw ay fag ngay balan. 11-12Ku fun, kwa long sik masine fag taw. Ay roro dewa aw nasaful katanya, get kyay emu te, tarabangi angku, te laman ro ku kaka di gfate angku ay anggan ku ngay talnayan. Ebi, o Yawi, nalong wo te tumarabang wo fiya angku. Ay nalong yangay o angku te, igfaayu o ku ngay fufu sat dagat daga. At kayuwan we mangatap, kata lagnas sas tigyangan dagat. Nu katanya tuwa am longan sa angku, katsi tarabangi wa fiya emi, laman ku kaka di e fagbulun mauri sa emi, kata ku nalimuwan.” Katanya Akub at darangin.

13Ay rodi ataw, Akub fag fulan nafamenitan yay sanya fag lungud. Ay balabag di, Akub nanfili yay sik ngay balan ayuwayu, at famaumsiganan at kaka. 14At nafili, 200k kambing tina, ay 20k tama, ay 200k tupa tina, ay 20k tupa tama, 15ay 30k kamelyu tina anggan at ngay riyangan, ay 40k baka tina, ay safuluk baka tama, ay 20k asnu tina, ay safuluk asnu tama. Kayunya, Akub at nafili, at famaumsiganan at kaka.

16Ay Akub nafainkafudan at nafili at ngay balan, laman ro di maful. Ay nu nafagbulun wa katanya, nafatanud yangay sanya fag ngay balan sik ngay fanuguwan. Fagayu fulan balan e ngay tagtanud tuwa. Ay nu katanya wan at nafagbulun, Akub nalong sanya fag ngay tagtanud balan te, “Katsi am loi wan. Gunai wemi. Nanfablang wam ku kaka. Ay nu glo am, dangay gaygaluwan ayuwayu. Sik fulan nu anwa nalo, ay nu glugo wa sirut at buknga, at fadogan fag fulan loi yangay.”

17Ay Akub igsugu sat taguna fag fulan. Glong te, “Dewa gina, ku kaka nu lumag wa ayu, minto ayu te, ‘Go sinu ay fun?’ Ay minto yangay ayu te ‘Go dada ro am? Ay sinu kanya at ke balan ayuwayu ay taban?’ 18Dewa gina, am balusi te, ‘Kanya at ke balan em fagtabanun, am ariyan Akub. Ay kanya, at fon wa unu emu. Ay katsi, kanya gguyan yay emi.’ Katanyai, ay famalus sa ku kaka.” Katanya wan Akub at fangatulun sat taguna fag fulan fanuguwan tagtaban at ngay balan. 19Anggan sat faduwa ay sat fatuluk fulan, katanya yadi at longan. Anggan nafafafud fagayu fulan tagtaban at ngay balan, kata way at sadi Akub longan. 20Glong way te, “Fagayu am, longi ku kaka te, ‘Am ariyan gguyan yay emi.’ ”

Fakatanyaun Akub fagbulun, fagnafagunaun anya kanya fag ngay balan, teway Akub gamatangan te, “Nanfaguna kyay angku ku famaumsiganan ku kaka, laman ro nu ami wan tagladlagan, labon di kalimata angku.” 21Ay Akub naguyanan yay sanya, sit fagtiyugan. Nanfamenitan yay sanya.

Diyus nu Gfabali Akub Ngayan

22Ay roro ginanya fag yabi, Akub igfadife way at ngay talnayan sis Abuk fag safa. At ngay mangena fag ufat, ay at ngay baguwama fag labi sadi, kanya fagayu at nafadife. 23Ay rodi ataw, nasugu yay at ngay fanuguwan te, “Fadifei wan tam ngay fagnuwan ay tam ngay balan.” 24Ay kanya sesadi, naguyanan yay sanya fag dife baliwa.

Ay Akub kaduge gsesadian sanya sad yabi, sik mangama ndasug. Ay kanya fag mangama nafabarangyan dawdaw Akub. Nafasadsanganan. Nayafabungleun at sadi. Ay nafalugo wan, nu gbarangyan katanya. Arvs anggan wa nafamenit, at kadugayan nu gbarangyan.

25Kanya fag duwama nu gbarangyan wa gugat gugat sanya gfalugo, at sadi nasaful te, “Yaya, katatuy galabawan kwan. Kwa long ro mabo Akub.” Ay nu katanya, kanya at sadi fag mangama nated Akub balangbang, sit ke sulfuwan balitang. Ay naslu wan at sulfuwan sanya. 26Ay Akub sulfuwan nu naslu wan, kanya fag mangama at sadi get wa Akub te, “Katsi falfasi wa angku. Gakamenitun wan. Glo kwan.”

Ay Akub gbalus at sadi te, “Yaya, kwa gfalfas emu. Yap ngay o nafatuyanan angku, te tumarabang wo ban angku, kwa gfalfas emu.”

27Nu katanya at usama nainto Akub te, “Sinu am ngayan?”

Ay Akub gbalus te, “Angku ku ngayan Akub.”

28Ay at usama gbalus te, “Katsi ban am ngayan bundi Akub. Antuwa Israel. Fakatanyaun am ngayan, teway o tuwa at nababo. Gina o nayababoun sik taw, ginanya nababo wo fiya. Ay katsi nayababoun o Diyus, ay o wa fiya at nababo.”

29Ay Akub nainto at usama te, “Ay emu am ngayan, sinu?”

Roro at usama wa gfoyung at ngayan. Fangkabat gbalus way Akub te, “Go taw ro am fagyasafulun ku ngayan?” Ay dewa katanya, at usama nafatuyanan tuwa sas Akub, te kanya ban gtarabang tuwa gugat Akub.

30Ay rodi ataw, Akub nafangayan sanya fag lungud te, Penuel.#32:30 Sis Fangebriyu, galay glong te, Penuel, at masuwad, Diyus at mata. Fakatanyaun Akub nu gngayan, teway gamatangan te, “Aro ginan mangaro, glag akwan Diyus at mata. Ay dewa katanya, dakdi nkate. Gleleg kyadi.”

31Balabag di, Akub glo wan. Ay igfilayan way nu glo, teway naslu at sulfuwan balitang. Ay kaduge Akub glo, at menit kasure wan.

32Ay nu katsi wa si antam, Akub at ngay fufu sat dagat daga wa kon at ngay mangimut ugat sit ke sulfuwan balitang. Fakatanyaun at ugali, teway ebi Diyus nu gted Akub at bilug, sit ke sulfuwan balitang.

Currently Selected:

Fagsigadan 32: TAWEAST

Highlight

Copy