Fagsigadan 31

Akub nu Gfaning Diyus at Nalong Anya

1Akub nu mabalan wa dawdaw, Laban ngay baguwama gsulitanan ayuwayu te, “Sek, kanya fag Akub nabul wan tam tama at fagekwaun fagayu. Kanya long at faginbalanun. Fagayu at nabul way siginan tam tama.” Ay Akub gsaful wan, Laban ngay baguwama at sulitanan sa anya baliwa. 2Ay anggan Akub natoglag yangay te “Katsi wa katvngvd ebi ku mayi nu kesug angku.”

3Sik sayginan, gina Akub sis fagfasabsaban balan, Diyus nalong anya te, “Katsi ulii wa sam magurang talun. Nangaful wo am ngay kalongan sanya. Ay gufud aktuwa emu kaduge o glo.”

4Ay Akub nu nadungug Yawi nu gelongan sa anya, kanya nasugu yay sik taw te, “Ulii yap sa ku bale. Ay tabani yap stiye Liya ay Rakel.”

5Ay at duwa mangena nu ndasug wa sas fagfasabsaban, sas ke Akub, Akub glong te, “Katsi dugsay am, nu glag aw ay tama, kata way e nalimatan angku. Ay dewa katanya, ku mama fagsegan fag Diyus igtarabang tuwa gugat angku. 6Saful yangay am te, ebi ginan kaduge aw ste si ayu, gugatan aktuwa nu gtabarang aw ay tama. 7Ay dewa katanya, ay tama wa gfaning em sulitanan. Safulu ginan wan nu gfabali em sulitanan sa baliwa nu gfon angku ku nalufuyan. Ay dewa katanya, Diyus igdingding tuwa gugat angku. 8Sayginan ngani, ay tama nalong angku te, ‘Katsi ban fabali yay ta ta sulitanan sa ta balan baliwa. Katsi ban emu fagayu yakman at alay ayu sirut at riruk.’ Ay katanya wa fiya at ngay balan nu griyangan, kata ay tama nalong. Ay roro ay tama nu nalag te, kafaning wa ayuwayu kata at nalong, kanya nafabali yay fiya. Nalong te, ‘Katsi ban emu, tagbiya yakman fagayu at riruk.’ Ay at ngay balan katanya way gugat nu griyangan, gbiya ayu daw at riruk sat bilug. 9Nu katanya nasaful kwa te, Diyus wan tagfon angku ay tama balan, madyay kayu ginan ay tama nalong te ‘Katsi ban emu am ngay balan katanyai yakman at riruk,’ katanya wa ayuwayu bandi baliwa at ngay balan nu griyangan.

10“Ay sayginan, gina at lungud banwa ngay balan nu gululan ayuwayu, ginanya gtiyug aw. Ay kaduge aw gtiyug, inke taginfanan aw. Si ku taginfanan, nu gfasad aw, iglag aw sik ngay kambing tama nu gulul ku fagtanudun fag ngay kambing tina. Ay nu glag aw, kanya fag ngay kambing tama at sigyu mariruk wan fagayu.

11“Ay nu gtaginfanan kwa gugat katanya, rodi ataw e nauro te, ‘Akub.’ Ay gbalus aw te, ‘Taw ro? Ste akwadi.’ Ay roro mangaro, kanya taguro angku, Diyus wa at tagbukngan fag falad. 12Glong te, ‘Linggati nin fag ngay kambing ayuwayu. Glag wa ro o te, fagayu kambing tama tagulul am fagtanudun fag ngay kambing tina, mariruk tuwa at sigyu. Katanya am nalag, igfagurungan kwa ban fiya. Fakatanyaun, teway glag kwa gugat te mauri way Laban at fagbulun sa emu.’

13“Ay Diyus at tagbukngan igfatunglus yay nu gelongan. Glong te, ‘Aw wan Diyus.#31:13 Sis Taguna fag Fatuyanan, tiba ginan tumap tam te Diyus at tagbukngan. Tibak taw at naadal ayuwayu tam Bibliya nu gfayamag kanya, roro kanya tam Isus wan. Aw wan am nalag ebi gina o sis Betel, si am ke nafaturuk fag batu. Ay ginanya, nabusbus o sik bantika sanya fag batu ay inke fatuyanan o sa angku. Aw wan am nalag ginanya.’ Ay kanya fag falad glong yangay angku te, ‘Katsi loi wan ste ginan. Afolii wa sa ebi am fakadaulan fag talun.’ Katanya tagbukngan longan angku kaduge aw gtiyug.”

14Ay at mangena at duwa nu nadungug katanya Akub at longan, igbalus at mangama te, “Kin, bastam wan. Galo wami emu sa am talun. Teway fakatanyaun, nu glag ami em tama, we fagafonun emi at fagmabalanun. 15Fagayu at fagmabalanun at fagfonun emi satu ro, em tama nafamin wan. Ay katanya siring, em tama nu glag emi, kata way ami tibak taw. Bunwa ami at kalongan. Anggan ngani ebi nu gfadaduwa emi, kata way nafabili emi. 16Nu katanya, nu glag ami, Diyus nafalin wa sa emu em tama at fagmabalanun. Ay nu katanya guseganan ami, anggan ami, teway at ke fanambagun ban siginan em tama fagmabalanun, bundi o sesadi. Anggan tuwa ami am ngay mangena ay anggan tam ngay sisiyan. Nu katanya, faningi wa Diyus at longan emu. Lumo watam.”

17Ay Akub nu nadungug at duwa mangena famalus, kanya nafasakay wa long at ngay mangena, anggan at ngay unga sat ngay kamelyu. 18Ay anggan at ngay fagnuwan at nafaful kaduge gbanwan sanyas talun Padan-Aram, nafasakay yangay sas kamelyu. Anggan at ngay bale, naiklas wan ay nafasakay wan. Ay kanya fagayu iglo wan, sanya ginan fag talun, igtaban at ngay balan. Nangadasug wa sas talun Kanaan, nangaful sas Akub tama.

19Ay roro mangaro, talanan nu galoun wan, Rakel nananfamul yay at tama fagsegan fag ngay tawtawan. Ay at tama wa nalag Rakel nu gbul, teway ginanya at tama anwayay igbul at ngay tupa sigyu sam dayu.#31:19 At masuwad, sik taw fagnanbulun tupa sigyu, at sadi, igtunglus tuwa tupa sigyu nu kaaba, kata tam buk nu kaaba. Ay at sadi at fagnanbulun, laman at fangawat at falefe. 20Nus tuwa ma, wa natagak Akub talanan nu sedaw nu glo, teway Akub anwayay igsuksuwanan. Wa nafatagak anya. 21Roro mangaro talanan nalagyu wa gugat. Sa wa gugat sangaba dalan. Nafasakay wa at ngay fagnuwan. Ay nataban wa at ngay balan.

Ay Akub talanan nu glugo wan nu glo, indasug wa sa sik safa daul. At ngayan, Iyupratis. Ay talanan igdife wan. Ay nu ndife wan, gfatunglus yay nu glo sangaba dalan. Ay nangadasug yay sa sik talun, at ngayu at muyud. Kanya fag talun at ngayan, Gilyad.

Laban nu Gguyan Akub

22Ay roro nu tuluk menit wan Akub nu maloan, tibak taw nafoyung Laban te, “Tam Akub talanan nalo wa gugat.” 23Ay nu katanya, Laban nafaful yay at ngay kalongan sanya fag fulan. Ay nataban yadi. Nalong te, “Mangamam, glo yay tam. Nan-guyan watam kanya fag Akub.” Ay kanya fagayu nalo wa fiya. Ay nu fitu wak menit nu glo, gasudun wa dawdaw Akub fag fulan. Ginanya Akub si was talun Gilyad.

24Ay roro, rodi ataw sad yabi, Laban inke taginfanan. Roro mangaro Diyus glong te, “Laban, dewa o nasud Akub, lag e fagbulun sa anya, dewas nga setaw.”

25Ay balabag di, Laban nasud wa fiya Akub. Ay ginanya, Laban manlag di, Akub fag fulan nafaawat wa ayuwayu at ngay bale sanya fag lungud talun. At fangawat at bale, at naubanan wan siginan ku dayu. Ay Laban fag fulan nabul at fangawat at bale at naubanan siginan ku dayu. Ay kawat yangay sanya sit akbang.

26-27Ay Akub ay Laban nansulitanan yay sat fanlonganan baliwa. Laban glong Akub te, “Sek, ku fangalimata wan am nafagbulun sa angku, teway nasuksuwan way am emi nu glo am. Ay nataban wo ku dugsay. Kata way o sik sundalu at nataban way sigad at nafagamat fag ngay taw. Wo ayu sirut nafoyung angku. Nalagyu way am sigad.

“Satu ro nu nafoyung di o angku te, ‘Katsi ku amatanganan, gauliun kwan,’ satu ro nangasfuwan yay tam ayuwayu nanguseganan tam namafulan ebi ginan. Ay nadungug yay tam sik ngay taw ayuwayu nu gfaawang at ngay famaawangan ay nafandanyuwan yay tam ayuwayu. Guseganan ngani, bagu am lumo. 28Ay satu ro, naayuk kyadi ku dugsay ay ku ngay fufu. Satu ro, katanya tuwa ku fasadan, bagu am lumo. Ay roro, nalo way am sigad. Wa long o namaamatanganan, nu katanya way long am fagbulun. 29Nu kaumsig kway ro, mafafauri way long ami ayu, teway ngayu tuwami. Ay roro ngap, dewa katanya ku longan, igdi, dakdi gfagbulun katanya, teway am mama fagsegan fag Diyus aro sad yabi nafataginfanan wa angku. Nalong angku te dewa ami nasud emu, lag e fagbulun sa emu, dewas nga setaw. Nu katanya, di ami gfauri ayu.

30“Ay dewa katanya, gamatangan aw te, unda ro am fagnaloun daw, roro mangaro mason wan nu gauliun o sam talun. Ay am amatanganan nu katanya yamay, taw ro am fagnaubananun daw ku fagsegan fag ngay tawtawan?”

31Ay Akub nu nadungug Laban longan, igbalus te, “E, yaya ngaro, kwa long nafatagak emu ebi nu glo ami. Teway gafanawa kwayay te, labon nu fatagak kway ro emu, gfatawad way o am dugsay.

32“Ay sa long baliwa am longan am ngay tawtawan, kwa long e nauba. Ay nute ngap long nu gafayudun yay o, fafanudani yap emu sarapi sa em wa fagnuwan. Ay nus nga sinu ro fag taw am faglagan tagubanan, kanya fatei wan. Ay nu e natoglag yay o am fagnuwan ste si em ngay fagnuwan, kanya falagi yap sam ngay kalongan am ufud. Ay igfoli aktuwa, am fagnuwan em nauba.” Fakatanyaun Akub nu gelongan sat ayi Laban, wa nasaful te, at mangena Rakel mangaro nauba wan at tama tawtawan, ebi gina glo.

33Ay nu katanya, Laban igfasigad wa long nansarap sas Akub fag fulan at ngay bale. Igfasigad siginans Akub bale nu gsarap at tawtawan. Ay sanya we nalag. Rodi naalin yay sas Liya at bale. Sanya sigon we nalag tawtawan. Sas Bila at bale, at sadi Akub at mangena, sanya sigon we nalag at fagsegan fag ngay tawtawan. Ay sis Silpa sigon at bale, Laban we nalag at tawtawan. We nafafalag, sanya fag ngay bale. Ay nansarap yangay sas Rakel at bale. 34-35Roro kaduge mangaro at tama igsarap sat iba bale, Rakel nasuksuk wa gugat at tama tawtawan. Nasuwad wa gugat sa sik fansalanig, at faglunggungan gina gsakay sis kamelyu. Ay Rakel malunggung way long gugat sit tungud. Ay kadugenya at tama bulun wa gsarap sis Rakel fagnuwan. Ay Rakel glong te, “E, kwa ngaro gmalindug mama, dewa o ste. Malunggung kway. Dangay nangus kadotama angku. Anway te, katsi fag buknga, gfangigusan kway.” Ay Laban wa nafalag at tawtawan, teway nalukan at baguyna nu gelongan.

36Ay Akub nu nalag te, at nugangama we nafalag at fagsarapun, Akub indotama dawdaw at nugangama. Ay igfaaringangan te, “Uda ngani, kwa ngani e nafagbulun mauri sa emu. Kwa ngani e nasalan. Ay deyud aw e nasalan, nanangalo yay o dawdaw emi. 37Nanansarap yay o dawdaw am tawtawan si em wa fagnuwan. Ay go sangay e nafalag yay o ngani? Ay nu e nafalag tuwo, fasurei wa ngani katsi sa tam ngay kalongan, laman tam ngay kalongan yay at lumong te go sinu si anta at ke nasalan.” Katanya Akub at nalong, nu ndotama wa dawdaw.

38Ay Akub gfatunglus yay glong at ayi te, “20 wak banwa nu gtarabang aw emu. Ay kaduge aw si emu, gugatan aktuwa nu gfagut aw am ngay balan. Fagayu am ngay balan tagfafiyon, dewa tupa ay dewa kambing, gfatvngvdun aktuwa. Di batang e kalafi. Ay dewa am ngay balan tama, dakdi batang kon. 39Ay galay sik mangimut mela naagat am balan, dakdi batang gfosuk emu sik matean daw fag balan. Natubus akwa gugat, siginan wa mandi ku balan. Ay am suguwan te, ‘Dewa gina galay e nabulan ku balan, o wan tagtubus,’ kanya gfaning aktuwa. Dewa tagfangkamul nu gbul swa menit ay dewa sad yabi, galay am balan nalyam, gtubus aktuwa. Katanya wa fiya ku nafagbulun kaduge aw si emu.

40“Kaduge aw si emu, ngayu wa dawdaw ku nabaris. Gina swa menit, kasugba kwa dawdaw. Ay gina sad yabi, katis kwa dawdaw. Ay tibak yabi ngap kwa katiyug. 41Katanya ku ngay nabaris, ginanya fag 20k banwa nu gbanwan aw si emu. At 14 nganik banwa, nu gafanuguwanan aw emu, nasungatan kway te, laman ro fabul aw am duwa baguyna. Ay at unumk banwa ku fagnasungatanun, laman ro fabul aw am ngay balan. Ay dewa katvngvd anya nu gsungatan aw, safulu ginan wan nu gfainbalian o ta nasulitanan sa baliwa nu gsali o ku natarabangan emu.

42“Ay dewa katanya am fagbulun sa angku, roro, ku fagsegan fag Diyus gufud tuwa gugat angku. Kanya wan siginan ngay ebi ku fufuwama at fagsegan. Ay kanya yangay tagmagurang ku mama. Satu, kanya em fagsegan fag Diyus way gufud angku, kwa ro inke fanambagun siginan ku natarabangan gugat gugat emu. Teway roro ngap, satu ro am fasadan, igfalo way o sigad angku yud e ubanan. Ay roro Diyus glag wa gugat, te gugatan aktuwa nu gtarabang aw emu. Ay katanya Diyus faginsureun sa emu aro sad yabi. Nanfasaful emu te, igsalan way am fagbulun sa angku.”

Laban ay Akub nu Gfasine at ngay Aringangan

43Ay Laban nu nadungug Akub at longan, gbalus te, “Ay dewa o glong te, nafatakan aw gugat gugat emu, roro nu nanfaamatanganun wa ro tam fiya fiya, kanya fagayu tam nalag katsi, kanya fagayu siginan wa angku ebi ataw. Kanya ngani am duwa mangena, ku baguyna wan. Ay kanya sigon am ngay sisiyan, kanya ku fufu wan. Kanya fag ngay balan tam nalag, fag ngay kambing, fag ngay tupa, kanya siginan wa angku. Kanya fagayu ebi ataw, aw way tagbilug.

“Ay dewa aw glong katanya, infanud kwa te, katsi ban kwa mafafatvngvdun ku dugsay ay ku ngay fufu, teway naalo wemu. 44Katsi gamatangan kway te, umke fatuyanan yap ta bagu ro tam sumaruwayan, laman ro e gfaamatang tuwa ban anta te, insine tuwa ta fanlonganan.”

45Ay Akub nu nadungug Laban at longan te, “Umke fatuyanan yap ta si ta buknga,” inkumsig. Ay nabul sik batu daul sanya. Ay nafaturuk. Kanya ban fag batu tagfaamatang talmanugang te, insine tuwa at fanlonganan. 46Ay Akub nasugu yay at ngay kalongan te, “Nanbul am sik ngay batu ayuwayu. Ay fabugsuli ste.” Ay at ngay kalongan gfaning wa fiya. Nabul sik ngay batu ayuwayu ay nafatungkud sis Akub at nafatungkud fag batu at akbang. Nafatudtungudan, laman mabugsul. Ay nu nafabugsul wa batu, kanya fag duwak fulan taw, Laban fag fulan ay Akub fag fulan, gfangon wa long sit day fabugsulan batu.

47-48Ay duwama kaduge gugat gsulitanan sit day fabugsulan batu, Laban nalong Akub te, “Tuy fag fabugsulan batu tagfaamatang ban anta te insine tuwa ta fanlonganan.” Ay nu katanya, Laban nafangayan kanya fag fabugsulan batu te, Igar-Saduta. Ay Akub nafangayan yangay te, Galed. Kanya fag duwak ngayan, dewa gsadsamanan, kata way at sadi at fagalongun. Anway te, sa wa at duwa fanlong mandi nu glong. Kanya fag duwa at fagalongun anway te, kanya ban fag fabugsulan tagfaamatang anya.

49Kanya fag fabugsulan batu, inke ngayan yay sadi. At ngayan, Mispa. Kanya at masuwad, sanya ginan nu gulit. Fakatanyaun at ngayan, teway sanya wan Laban nu glong sas Akub te, “Diyus gulit tuwa ban nangus anta, dewa ban ta gsaruwayan sa ta duwa fagbanwanan. 50Galay ban o nanfatakan ku duwa baguyna, ay ate anyay o nangadaduwa sa tibak mangena, Diyus glag wan, kanya. Deyud aw iglag emu, Diyus glag wa fiya.”

51Ay kanya fag duwama kaduge gsulitanan sanya fag lungud, Laban glong yangay at Akub te, “Katsi linggati wan nin ta fabugsulan batu, anggan ta nafaturuk fag batu. 52Kanya ban ta fanbukngan. Dewa ban nus nga sinu ta, galay ta e nalimatan ta sadi, di ta glangfe kanya fag ngay batu. 53Ay katsi, gdarangin aw sa ku fufuwama Nakur at fagsegan, ay anggan sa emu am fufuwama Abrayam at fagsegan. Gdarangin aw te laman ban kanya taglag anta, te go gfaning tuwa ta kata ta nafatuyanan aro sa ta sadi.”

Ay Akub nu nadungug at ayi Laban at longan, nalong te, “Kin, maning kwa ban fiya katanya ta nafatuyanan sa ta sadi. Ay ku mama wa ban Isaak at fagsegan fag Diyus taglag angku, te go gfaning kwa fiya katanya.” 54Ay rodi, Akub nafate sik balan. Ay nabatas ka fag balan bilug at balyu, at famauseganan sas Diyus. Ay nafaful yay at ngay iba sanya, laman kanya fagayu nu maful wan, gasfuwan wa gfangon. Anggan Laban fag fulan, igfangon yay sanya. Ay sanya yay nu gtiyug, ginanya fag yabi. Laban sigon maful yay sanya.

55Ay balabag di sad surip, Laban fag fulan galoun wan. Ay Laban gayuk wa at ngay fufu, ay at duwa baguyna. Ay igdarangin wa te laman ban masine nu gbanwan. Ay nu katanya wan, Laban fag fulan nalo wa long. Nauli wan.

Currently Selected:

Fagsigadan 31: TAWEAST

Highlight

Copy