Fagsigadan 30

1Ay Rakel nu nalag at kaka te kanya gunga tuwa ayuwayu, galabian wan, teway nasaful anya te kanya wa gugat gunga. Ay nu katanya, kanya glong sat mangama te, “Katsi foni wa nangus angku ta unga. Way ngap o gfon angku, aw taglabi, umkate kwan.” 2Ay at mangama nu nadungug katanya, kadotama dawdaw at mangena. Igbalus te, “Taw ro fagsaun angku nu get o? Sangay nu glag o angku, aw wan tam Diyus? Ay kanya wa ngani at nasalag emu te laman wo gunga.”

3Ay Rakel glong at mangama te, “Katatuy yakman ate ta fagbulun, laman umke unga aktuwa. Mon akway emu ku fanuguwan, at ngayan Bila, laman suma o anya. Ay nu gfafiyon wa ban, ay nu nke ngenge, kanya ban bilang wa aw at tina.” 4Ay nu ntabu katanya Rakel nu gelongan, nafon wa fiya at fanuguwan sat mangama, laman at mangama yangay mangena at sadi. Ay at mangama natsa wa fiya at fanuguwan. 5Ay at fanuguwan gfafiyon wa fiya. Ay at ngenge nu nsalug wan, manlag di, sik ama.

6Ay Bila nu nafasalug at ngenge sik ama, bilang wa Rakel at ke ngenge. Ay Rakel nalong te, “Diyus nadungug tuwa angku. Ay natarabang tuwa angku si ku natakan. Nafon tuwa angku ku fagetun sik ngenge.” Nu katanya, Rakel nafangayan ka fag ngenge te, Dan, teway kanya fag ngayan at masuwad, “natarabang”.

7Bandi gfafiyon yay fiya, Bila. At faduwa ginan. Ay gdog yay fiya igfasalug at ngenge. Ay at ngenge sik ama yangay. 8Ay Rakel nu nalag at ngenge, glong te, “Siginan ngay ebi, ami dugsay, igbadbaboan ami dawdaw. Ay katsi long, dakdi galabawan.” Nu katanya, nafangayan kanya fag ngenge te, Naptali, teway kanya fag ngayan at masuwad, “igbadbaboan ami”.

9Roro ginanya, Liya gamatangan way te, “E sek, unda katsi, intuwas wan nu gngenge aw, madyay kwa gugat igfafiyon. Nu katanya siring, at masine ku fagbulun, nanfon akway sa ku mangama ku fanuguwan Silpa, laman at mangena yangay.” Ay katanya wa fiya Liya at fagbulun. 10Ay at fanuguwan gfafiyon wan. Ay bandi ataw, igfasalug wan at ngenge, sik ama. 11Ay Liya nu nalag at fanuguwan ngenge, kanya glong te, “Masine tuwa takagurungan sa angku katsi.” Nu katanya, nafangayan kanya fag ngenge te, Gad, teway kanya fag ngayan at masuwad, “masine tuwa takagurungan”.

12Bandi ataw Silpa gfafiyon yay fiya. At faduwa ginan. Gfasalug yangay at ngenge. Sik ama yangay fiya at ngenge. 13Ay Liya nu nalag, glong te, “Fadi fadi, guseganan aw dawdaw katsi. Anggan ro ku ibayna, gfasfuwan yangay angku guseganan.” Ay nu katanya, Liya nafangayan kanya fag ngenge te, Asir, teway kanya fag ngayan at masuwad, “guseganan”.

14Sik sayginan, ginas fanganiun trigu, Rubin nalaklo sas gamasun. Ay nu sanya wa gugat sad gamasun, nalag sik makmak, at ngayan mandragora.#30:14 Sanya fag talun, e sik makmak at ngayan mandragora. At lalid nu kalag, kata bangan sik taw. Ay ginanya at ngay taw at fagafanudun, galay sik mangena naon kanya fag makmak at buwadan, igtarabang unu anya laman kafafiyon kanya fag mangena. Ay kanya nagulad. Nauba sas bale. Ay nafon at tina. Ay Rakel nu nalag Rubin ba mandragora, nananget sat tina. Glong te, “Kaka, foni wa angku am mandragora.” 15Ay at Liya kadotina. Gbalus te, “Lagi long! Teway kata wo ay naago angku ta mangama. Ay katsi kaumsig yay o nangago angku ku mandragora. Yaya long! Kwa long gfon emu!” Ay Rakel gbalus te, “Ay dewa, nu katanya way am amatanganan, katsi ro fag yabi o ya ngani tagfataladan ta mangama. Foni ngay angku am mandragora.” Ay at kaka nafon wa fiya.

16Ginanya yangay fag menit, Akub gina kadasug siginan at gamasun, at mangena Liya nafablang anya. Ay glong at mangama te, “Katsi ro fag yabi, aw ya am fataladan. Teway nafon kwa sa ku ariyan ku baguwama ba mandragora, laman ku fansali emu.” Ay nu katanya, kanya wa fiya Akub at fataladan ginanya fag yabi.

17Ay Diyus natarabang Liya. Infanyu Liya nu gatakan. Ay nu katanya, Liya gdog yangay gfafiyon. Ay at ngenge nu nsalug wan, manlag di, sik ama. Kanya wan Akub ay Liya at unga at falima. 18Ay Liya glong te, “Tuy fag ngenge Diyus nafamanyun sa angku, teway masine ku fagbulun sa ku mangama. Nafon aktuwa ku fanuguwan sa anya.” Ay nu katanya, Liya nafangayan at ngenge te, Isakar, teway kanya fag ngayan at masuwad, “sik nafamanyun”.

19Bandi ataw, Liya gfafiyon yangay. Ay igfasalug yangay at ngenge. Kanya at faunum wan, Liya ay Akub at unga. 20Ay Liya glong te, “Fadi fadi sas Diyus. Masine at famanyun sa angku. Ay katsi long ban, ku mangama guseganan wa dawdaw angku, teway unum wan ku ngenge sik ama.” Ay nu katanya, Liya nafangayan at ngenge te, Sibulun, teway kanya fag ngayan at masuwad, “guseganan dawdaw”.

21Ay bandi ataw Liya gdog yay fiya gfafiyon. Ay gfasalug yangay fiya at ngenge. Ay roro at ngenge sik ina. Ay Liya nafangayan at ngenge te, Dina.

22Bandi long ataw, Diyus nabalus Rakel fagetun. Natarabang anya laman kafafiyon tuwa. 23Ay Rakel gfafiyon wan. Ay nu nafasalug wa at ngenge, manlag di, sik ama. Ay Rakel nu nalag at ngenge, gelonganan te, “Fadi fadi sas Diyus. Katsi nafalyam wan ku fakaplaun.” 24Ay glong yangay te, “Ku ngenge nangus, sadi ya.” Ay Rakel nafangayan at ngenge te, Use, teway kanya fag ngayan at masuwad, “famuti yap”.

Akub Fagmabalanun nu Kaayu

25-26Rakel nu nafasalug wa at Use, Akub glong sas Laban te, “Katsi gauliun akwan, sa ku talun, sa ku guyan. Ay fagayu ku ngay mangena ay ku ngay sisiyan, tumaban akwan. Kanya fagayu, am fansali wa ku natarabangan emu. Nasaful wo te, ebi ginan kaduge aw ste, gugatan aktuwa nu gtarabang aw emu. Nu katanya, dangay gsalag nu guli ami.”

27Laban gbalus Akub te, “Lagi. Nu masine di sa emu, lag nangus glo. Teway sik falad nafoyung angku te, Yawi fagnafamanyunun ayuwayu angku, teway gbanwan tuwo maful angku. Nu katanya, lag glo. 28Nu gfatunglus tuwo gbanwan iste maful angku, sumali aktuwa katsi ban am natarabangan angku. Foyungi way angku. Ay nus nga seyu am fakaumsigun, sumali aktuwa kayunya.”

29-30Ay roro Akub ya gfoyung at fakaumsigun. Glong yay sat ayi te, “Nasaful wo te, ebi ginan nu gtarabang aw emu, gfagut am balan, gugatan aktuwa. Ebi gina aw bagu kadasug stiye, nu glag aw, ya bangan ngayu am fagekwaun. Ay roro nu gtanud kwa gugat am ngay balan, bandi ataw inkayu wa dawdaw. Ay katsi long, ngayu wa long am fagekwaun. Fakatanyaun ay, nus nganday nu gtarabang aw, Diyus sigon sanya yangay. Gtarabang yangay emu. Ay roro ku fakaumsigun fiya fiya katsi, nu gtarabang aw, sa tuwa ku ngay talnayan, laman ku ngay talnayan di e nayudanan.” Katanya Akub at longan sat ayi.

31-32Ay Laban gbalus Akub te, “Ani way foyungi angku te, go seyu nu sumali aw sa emu, nu tumarabang o angku katsi ban.”

Ay Akub gbalus at ayi te, “E yaya, dewa yud am fansali sa angku. An akway iglong emu te, katsi ro nu kaumsig tuwo, lumo aw sa tam ngay balan. Ay an aw nanlingaman. Ay fagayu kambing at mariruk at sigyu, kanya angku. Anggan tam ngay tupa at mariruk at sigyu, ay anggan tupa riyangan at ngay malayung at sigyu, kayunya ban angku. Kanya wa ban am fon angku ku nalufuyan. Ay nu kaumsig tuwo katanya nu gamatang o ku longan, fatunglus kyay tumarabang emu katsi ban. 33Ay nu katanya tuwa ta sulitanan, saful way o fagayu si angku ku balan. Fagayu way at mariruk ay fagayu tupa riyangan at malayung. Ay galay ban aw e nabul tam ngay balan at yud mariruk at sigyu ay tam ngay tupa riyangan at malagsi at sigyu, kayunya ban saful wo te, kanya ku nafamul way am balan.” Katanya Akub at longan sat ayi.

34Ay Laban gbalus at mangwayi te, “Kin, kaumsig aw katanya am longan.” 35Ay roro ngap, talyai nu ntabu wa nu gsulitanan katanya, at ayi naguna wa gugat nalo sat balanan. Ay nafasaman wan fagayu at mariruk at sigyu ay fagayu tupa riyangan at malayung at sigyu. Ay kanya fagayu, nafatanud way sat ngay baguwama. 36Laban nalong te, “Tuy fagayu ani wa tabani. Fayayui wa ste ginan, siginans Akub fagtanudun. Ani loi tuluk menit at kayayuwan. Ay sanyai wa nu gtanud am.” Nu katanya at ngay baguwama nafaning wa fiya Laban fakaumsigun.

37Ay roro Akub e faran tuwa, laman faayu at ngay balan si anya. Kanya nabul sik ngay sanga kayu ayuwayu, at lukba malayung. Ay at butul fiya fiya, malagsi. Ay Akub fagbulun, naayas at ngay ba sanga at lukba. Nafabudbukngaun sat dayut dayu. Ay rodi at ngay ba sanga nu kalag, mariruk. 38-39Ay Akub nafatsas balan faginuman ka fag ngay sanga, laman ro ka fag ngay balan gina ginum, glag ka fag ngay sanga at maayasan. Ay nu ntabu wa nu ginum, balan gululan wan sit akbang ba sanga. Ay bandi, ka fag ngay balan riyangan, katanya wa fiya, kata ka fag ngay sanga. Igridrirukun. 40Ay Akub nafasaman wan kanya fag ngay riyangan. Si anya wan.

Ay at sadi Akub at faran, gina at ayi tupa gululan, igfaakbang sanya at ayi ngay balan at malayung, laman ro tagululan lumag, laman ban at riyangan malayung yangay. Nu katanya wan Akub faran, kaayu wan si anya fag afud at balan. Ay Akub nafasaman wan si anya at ngay balan, laman wa maful at ayi balan.

41Ay Akub at fagbulun, nu gsuwad at ba sanga sad faginuman, igfatungul tuwa gina at mabitsug fag ngay balan tina gafagban. Kanya long fag ngay balan tina nu gafagban wan, Akub long gsuwad at ba sanga sanya sad faginuman, laman ro glag. 42Ay Akub nu glag at tagafagban ginanya nu anway at magumu fag ngay tina, wa gsuwad at ba sanga. Ay bandi ataw, sis Akub at ngay kambing ay at ngay tupa, mabitsug tuwa. Di kata sit ayi. Sit ayi at kambing ay at tupa magumu way.

43Ay nu katanya wan Akub fagbulun, bandi ataw kanya inbalan wa long dawdaw. Ngayu wa at tupa, ngayu wa at kambing, ngayu wa at kamelyu, ay ngayu wa at asnu. Anggan at ngay fanuguwan inkayu wan.

Currently Selected:

Fagsigadan 30: TAWEAST

Highlight

Copy