Fagsigadan 29

Akub nu Kadasug sat Ke Ayi

1Ay rodi ataw, Akub nalo wan sanya ginans faglagan Yawi. Ay bandi nu glugo wan nu glo, indasug wa sa sik talun sis fakamenitan baliwa. 2Ay sanya fag talun, Akub manlag di, e sik fagfanaguban, swa bilug talun way sigad. Ay ka fag fagfanaguban e fantabun daul sik batu. Ay Akub nalag yangay sik ngay balan ayuwayu, igtiyug sanya sangaba day fagfanaguban. Sik ngay tupa ay sik ngay kambing. Ay kanya fag ngay balan maafudan tuwa tulu. 3Sanya mangaro fag ngay taw at ugali, yap ngay fagayu tagtanud nataban at ngay balan sanya, ya gfainum at ngay balan. Ay rodi long nu ndasug wan fagayu tagtanud, tarabangan wa gbul at fantabun fagfanaguban. Ay gfainum wa long at ngay balan. Ay nu nafainum wan, tarabangan yangay gfafoli at fantabun. Katanya at ugali, sanya fag fulan.

4Ay Akub gina kadasug sanya fag ke fagfanaguban, nalag sik ngay tagtanud balan, gfanya tiba. Ay Akub ginto te, “Mangamam, go daginan ayu ay fulan?”

Tiba gbalus te, “Ami long siginan way amis fulan Karan.”

5Akub ginto te, “E, ay go saful am Laban? Laman, kanya Nakur fufu.”

Tiba gbalus te, “E kin long, saful way ami.”

6Akub ginto te, “Ay mabayan tuwa manga, kanya fag taw?”

Tiba gbalus te, “Kin tuwa, mabayan tuwa. Kanya wa ngani takadasug at baguyna Rakel. Gtaban at ngay kambing ay at ngay tupa.”

7Akub iglong sat fasulitanan fag ngay ama te, “Mangamam, nu katsi, ya long kayabi. Ngabat yay at menit. Ay idya, satu ro, yam fatiyug ay balan. Nu nafainum di am katsi, rodi ro fataban yay am ay balan sat fagsabsaban, ay ay balan mapsugan tuwa nu nanfatiyug wam.”

8At ibama gbalus way te, “Yaya. Ami ste em ugali, gfanya yay ami fiya fiya fagayu tagtanud nu gtaban at ngay balan stiye, laman ro gtarabangan yay ami nu gbul at fantabun. Ay ginanya yay nu gfainum ami fagayu em ngay balan.”

9Akub kaduge gugat gfasulitanan sanya fag ngay tagtanud balan, kadugenya Rakel indasug was ke fagfanaguban, igtaban at tama ngay balan, teway kanya sik tagtanud yangay balan. 10Ay Rakel nu sanya wan, Akub igfalu Rakel. Igbul at fantabun fagfanaguban. Ay gfainum wan Rakel balan fagayu. Fakatanyaun, roro mangaro, kanya at lagbe wan. Ay at ayi wan at ke balan.

11Ay nu nafainum wan, Akub naayuk Rakel.#29:11 Ebi, sanya fag talun at ngay taw ugali galay guseganan te naladlagan, tiba ginan gayuk tiba. Guyway dawdaw. 12Ay kadugenya glong te, “Sik telagbe ta, teway am mama ay ku mina, sik dugsay way. Angku ku mina at ngayan Ribika.” Ay Rakel nu nadungug katanya, natarung sas bale, sat ke tama. Nafamansulit sat tama te, “Nalag aw sik taw sas ke fagfanaguban. Kanya unu am mangwayi.”

13Laban nu nadungug at baguyna nu kamansulit, kanya natarung, nanlinggat sas ke fagfanaguban. Ay Laban nu nalag at Akub, Laban nagafus at Akub ay naayuk. Ay rodi ataw, nataban wa sas bale. Ay nu si was bale, Akub kamansulit wa long fagayu at nadalan. 14Ay Laban nu nadungug at famansulitan fagayu, intuyan wa te, “E kin, ku kalongan wa ngaro o fiya.”

Akub nu Kadaduwa sat Ai Baguyna

Akub nu gbanwan si at ayi Laban nu sik magdanun wan, 15Laban glong te, “Yaya sama, dewa ta kadkalongan, wa siring masine kway e fansali sa emu nu gtarabang ban o gugat gugat angku. Nu katanya, amatangani yap te go tain nu gsali aw sa emu. Ay foyungi angku am fakaumsigun.”

16-17Roro mangaro ginanya, Laban e baguyna duwa. At ngayan Liya ay Rakel. Ay Liya nu gmataan, masine tuwa.#29:16-17 Sis talata 16-17, nariruk ami te, Liya nu gmataan, masine tuwa. Roro dewa ami nariruk katanya, kanya tibak tagfoyung Bibliya way at fatugan. Fakatanyaun ay, wa bangan namayamag at marirukan sis Fangebriyu, ste sirut fag tapan. Ay roro sit ariyan Rakel, bundi fagtvngvd at mata at masine. Fagdaul tuwa at bilug. 18Ay Akub at fagyayun, at ariyan.

Ay Akub igbalus at ayi at nalongan te “Tain nu gsali aw sa emu.” Glong te, “Katatuy nu gsali o sa angku. Tumarabang kway emu fituk banwa. Ay nu ntabu wa kanya fag fituk banwa, foni wa angku am baguyna at ariyan. Kanya ban ku mangenai wan.”

19Ay Laban nu nadungug Akub longan, glong te, “E kin nu gdi, fatunglusi way tarabangi angku fituk banwa. Teway kwa bangan gafonun ku baguyna sa tibak taw. Sa tuwa emu.”

20Ay nu katanya wa long, Akub long gumsiganan way ngap igtarabang at ayi fituk banwa. Kanya nu gamatang, fituk banwa wa glugo sirut. Wa kaduge sik magdanun nu si aba, kanya nu gamatang. Fakatanyaun at amatanganan, matvngvd wa nu gyay at ayi baguyna.

21Ay Akub nu gtarabang at ayi nu anwa fituk banwa, kanya glong at ayi te, “Katsi intabu wan fituk banwa. Indasug wan ta fatuyanan. Foni wa angku katsi am baguyna ku mangena. Nanmangenaan kwan.”

22Ay Laban nu nadungug Akub fagetun, nafamasadan yay sik ngay fakonun ayuwayu. Ay nafaful at ngay taw sanya fag fulan sa at bale. Ay ka fag ngay taw gfangon wa long, guseganan ayuwayu. 23Ay rodi ataw sad yabi, Laban gfadaduwa wan at baguyna sas Akub. Ay Akub natsa wa anya. Ay roro mangaro, Laban nafon, bunwa at baguyna Rakel. Liya wadi. 24Ay aro taw, bagu gfadaduwa, Laban nafon wa at fanuguwan at sadi sas Liya. At ngayan, Silpa. Kanya wa ban Liya fanuguwan.

25Ay balabag di, Akub nu nfulo wan, roro mangaro nu glag at fadiyugan fag mangena, anway Liya. Bunwa Rakel. Ay nu katanya, Akub nananlag at nugangama. Ay glong dawdaw te, “Sek! Taw fakatanyaun am fagbulun sa angku, am fagfanlukun dawdaw angku? Ebi ta sulitanan, am fansali ku natarabangan emu, antuwa Rakel. Bundi Liya.”

26At nugangama gbalus te, “E kin, kanya wa ngaro fiya. Teway fakatanyaun ngaro, ste em ugali, taguna at kaka tuwa em fagfadaduwaun. Bundi at ariyan. 27Ay dewa, nu gyay yay o at ariyan, falangfe way tam fituk menit. Nanguseganan yay tam at kaka naadaduwan. Ay nu nlangfe wa ban kanya, gfon kyay fiya emu at ariyan, laman am mangena. Fatuyanani way angku te, nu nafon aktuwa emu, tumarabang yay ban o fiya angku fituk banwa.”

28Ay Akub gfaning tuwa at nugangama longan te “Falangfe yay tam fituk menit.” Ay nu nlangfe wan kanya fag fituk menit, at nugangama nafadaduwa yangay at baguyna Rakel sas Akub. 29Ay nafon yangay sadik fanuguwan, at ngayan Bila, sas Rakel. Kanya ban Rakel fanuguwan. 30Ay Akub natsa wa Rakel. Ay Akub kesug way ngap at mangena Rakel. Wa bangan kesug at mangena Liya. Ay Akub natarabang yay fiya at ayi fituk banwa.

Diyus Igfon sas Akub at ngay Unga

31Ay Diyus nalag te, Akub wa kesug at mangena Liya. Nu katanya, Diyus natarabang tuwa Liya, laman Liya antuwa gunga. Ay Rakel wa gunga.

32Ay Diyus gtarabang tuway, Liya gfafiyon wan. Nafasalug at unga, sik ama. Kanya yay at turungana. Ay nu e unga wan, Liya glong te, “Diyus glag tuwa mangaro gugat nu gatakan aw. Ay katsi long ban, ku mangama kesug tuwa angku. An aktuway e unga sik ama.” Nu katanya, Liya nafangayan at ngenge te, Rubin, teway kanya fag ngayan at masuwad, “Linggati! Ku ngenge sik ama”.

33Bandi ataw, Liya gdog yangay gfafiyon. Ay gfasalug yangay at ngenge, sik ama. Ay Liya glong te, “Katsi Diyus gdog yangay nafon angku ku ngenge sik ama, teway nadungug te, ku mangama wa gugat kesug angku.” Nu katanya, Liya nafangayan at ngenge te, Simyun, teway kanya fag ngayan at masuwad, “nadungug”.

34Bandi ataw, Liya gdog yay fiya gfafiyon. Ay gfasalug yay fiya at ngenge. Sik ama yangay. Ay Liya gelonganan te, “Katsi long ro, ku mangama umkesug wa long angku, teway ku ngenge at fatulu wan sik ama.” Ay nu katanya, nafangayan at ngenge te, Lebi, teway kanya fag ngayan at masuwad, “kesug”.

35Bandi ataw, Liya gdog yay fiya gfafiyon. Ay gfasalug yangay fiya at ngenge. Sik ama yangay at ngenge. Ay Liya glong te, “Katsi nanfauseganan akway Yawi, teway igfon tuwa angku ku ngay unga.” Ay nu katanya, nafangayan at ngenge te, Uda, teway kanya fag ngayan at masuwad, “nanfauseganan”. Ay Uda nu nsalug wan, Liya intuwas yay nu gfafiyon.

Currently Selected:

Fagsigadan 29: TAWEAST

Highlight

Copy