Fagsigadan 28

1Isaak nu nadungug at mangena at longan, sat baguwama Akub baliwa, kanya nasugu tiba te, “Fastei ku baguwama Akub.” Ay at baguwama nu sanya wan, at tama gdarangin at baguwama, te laman Diyus tumarabang tuwa anya. Ay nu ntabu at darangin, glong at baguwama te, “Katsi nansarap wo am mangena. Lag gsarap ste fag ngay taw at baguyna. 2Nu katanya, glong aw te, loi yap ste ginan. Nangadasugi sas talun Padan-Aram, sa am fufuwama Betwel at talun. Ay nu sanya wo gugat, sarapi wa am mangena sanya ginan, siginan am mayi Laban at ngay baguyna at sadi. Sanya ginani wan am mangena.

3“Ay tam Tiba Tungud wa nangus tagtarabang emu sa am ngaba banwanan, ay tagfamanyun emu. Ay kanya gfaayu ban am ngay fufu sat dagat daga anggan wa umsik ngay fulan taw tuwa ayuwayu.

4“Fakatanyaun, tam Diyus nu gfagurungan at ngay nafatuyanan ebi sa am fufuwama Abrayam, sa wa ban emu ay sa am ngay fufu. Nu katanya, dewa tam gbanwan ste yud e fagagbilugun daga, bandi ban nu glugo wan, am ngay fufu wan tagagbilug ste fag talun nu sedaw. Ku fagmafalongun ababa katanya sa emu, teway ebi Diyus nafatuyanan wa gugat sam fufuwama te bandi ban, tam ngay fufu wa ban sat dagat daga tagbilug ste fag daga.” Katanya wan Isaak longan sat baguwama Akub.

5Ay at tama nu ntabu wa nu gelongan katanya, Akub nalo wan sanya ginan. Nangadasug wa sat ke magurang fakaumsigun fag talun, talun Padan-Aram, sat tina Ribika talun ebi, sat ke ayi Laban. Kanya Laban ay Ribika, kanya dugsay. Ay at tama, Betwel. Betwel fag fulan taw, sik ngay taw Aram.

Isaw nu Gsarap yay fiya at Mangena

6Ay Isaw nasaful te, “Ku mama ngaro nadarangin yay fiya ku ariyan, te laman Diyus tumarabang anya. Ay nasugu te laman lumo wa sas talun Padan-Aram, laman sanya nu gsarap at mangena.” Ay Isaw nasaful yangay te, “Ku magurang mangaro igsalag way ku ariyan nu gfanmangena ste ginan fag talun. 7Ay ku ariyan nafaning tuwa ku magurang at fakaumsigun. Nalo wan ste ginan. Nangadasug wa sas talun Padan-Aram.” 8Nu katanya, Isaw bagu yay nasaful te, “Sek, ku magurang mangaro, wa kaumsig ste ginan fag ngay taw at ngay baguyna.”

9Ay nu katanya, Isaw nalo yangay. Nananlag wa sat ayi Ismael. Ay indaduwa yangay. At mangena, at ayi baguyna at sadi, at ngayan Makalat. Ay Makalat e fadugsay yay sik ama at ngayan Nebayut. Kanya fag dugsay, at fufuwama, Abrayam yay.

Akub Dewa Inyayu at Magurang, Diyus Di Gfabayan Anya

10Ay ebi ataw, gina Akub glo siginans Beerseba laman nangadasug sat ayi fagbanwanan, 11inke ngay yabi yay sad buknga. Ay sik sayginan, nu kayabi wan, indasug sa sik lungud. Ay gfamenitan yay sanya. Ay gina ganantiyugun, nabul yay sik batu. Gfatungkud yay sit fagtiyugan, sit ke alfuyu baliwa. Ay nu e batu wa sanya, gtiyug wan. 12Ay gtaginfanan wan. Sit taginfanan, nalag unu sik talangtang sam tungud am tungud. At kabatan, siginan swa daga, anggan indasug sas banwa. Ay manlag di, Diyus at fanuguwan fag ngay falad glo ayuwayu sanya sangaba talangtang. Tiba kato, tiba kadaga. 13Ay nalag yangay te, Yawi mangaro malindug sanyas tungud fungfung talangtang.

Ay Akub kaduge gugat gimata sanyas fun talangtang, Yawi naelongan. Glong te, “Aw wan Yawi. Aw wan am fufuwama Abrayam ay am mama Isaak at fagsegan. Katsi glong aw emu te, sanya sim fagtiyugan fag lungud talun, igfon kwa ban sam ngay fufu sat dagat daga. 14Ay kanya ban am ngay fufu sat dagat daga, ngayu way ngap fag taw. Kayu wa bans dafug daga at kayuwan. Ay am fufu ban at fagbanwanan fag ngay talun kaayu wan, sam dayu am dayu. Ay glong aw emu te, am ngay fufu igfadasug ban ku fanarabangun sas fagayu fulan taw nus nganday fag talun.

15“At sadi ya ngaro ku fagalongun emu, glong aw emu te, dakdi ban gubun emu faggugat. Nganday ban nu lumo o, gdingding aktuwa emu faggugat. Ay bandi ban nu glugo wan, gfafoli kyay ban emu stiye fag talun. Ku longan emu katanya matuyan wa fiya. Fagayu ku nalong, gfagurungan kwa fiya.” Katanya Diyus at longan sas Akub.

16Ay rodi Akub infulo wan, siginan at fagtiyugan. Ay gamatangan te, “E, Yawi mangaro ste wan. Aro ginan kwa gsaful.” 17Ay Akub namatangan yangay te, “Bakras bakras! Ste mangaro namafangibuk wa fag lungud talun. Ste wa mangaro Yawi fagbanwanan, madyay iste wan at dalan nu gsakbo sas banwa.”

18Ay balabag di sad surip, Akub nabul at nafatungkud sit ke alfuyu fag batu. Ay nafaturuk, laman kanya tagfaamatang anya fagayu at nalag sanya fag lungud talun. Ay kanya nabul sik bantika. Ay nabusbus sanya fag batu. Fakatanyaun Akub at fagbulun, igfaagbilug sas Yawi kanya fag batu. 19Nu katanya Akub fagbulun, Akub nafangayan sanya fag lungud talun te, Betel. Ebi ataw, e sik fulan sanya fag talun, ay at ngayan, Lus. Ay dewa katanya, Akub nu gfangayan kanya fag lungud talun, Betel wan.#28:19 Sis Fangebriyu, galay glong te Betel, at masuwad, Diyus bale.

20Ay Akub bagu lumo sanya ginan, nafatuyanan yay. Glong te, “Yawi nu gufud tuwa ban angku, ay nu gfatvngvdun tuwa angku sa ku ngaba dalan, ay nu gfon tuwa ban angku ku fakonun ay ku balukas, 21ay nu gfauli tuwa angku manabayan sa ku magurang at bale, kanya wa long ban ku Diyus, ku fagsegan. 22Ay anggan ban tibak taw ste yangay fag ke batu nu nanfauseganan Diyus. Ay fagayu ban Diyus at nafon angku, kayu ginan insafulu, gfon aktuwa anya at sadi.”

Currently Selected:

Fagsigadan 28: TAWEAST

Highlight

Copy