Fagsigadan 34

Akub Talanan nu Gdalan Tagbiya fag Fanlonganan

1Akub ay Liya e baguyna, at ngayan Dina. Ay Akub fag talanan nu gbanwan wa gugat sis akbang fulan Sikim, sayginan Dina nananlag sat ngay taw dan, sat fagsud fag ngay baguyna. 2-4Ay roro kanya gina nanlag at fagsud fag ngay baguyna, sik baguwama nalag anya, ay nalabian. Kanya fag baguwama at ngayan, Sikim. Ay Sikim tama, at ngayan Kamur. Kanya wan at fun, sanya fag fulan. Ay kanya fag talame, taw Kib.

Ay Sikim nalabian wayay Dina, nagamat wa anya. Ay Dina deyud kaumsig, ka fag mangama natsa wa anya.

Ay Sikim nu nafagbulun wa katanya sas Dina, roro gtunglus wa gyay anya. Ay nu gelongan, igfalukmeanan gugat gugat Dina. Ay mason wan ay nu gyay, Sikim inkakbang sat tama. Ay Sikim nalong sat tama te, “Mama, falui angku. Nanfasulitanan yap long o snay fag baguyna at tama, te laman umdaduwa aw sanya fag baguyna.”

5Ay Sikim kaduge glong katanya sat tama, roro Akub nasaful wan at kin-gurungan sat baguyna. Ay Akub dewa nasaful, igfabayan way. We nafagbulun. Igfanya way at ngay baguwama nu kadasug, teway ginanya at ngay baguwama malakloan yay sasad talun, nanfasabsab at ngay balan.

6-7Ay at ngay baguwama dewa malakloan sasad talun, roro nasaful wa gugat at kin-gurungan sat ariyan. Nu katanya at ngay baguwama mason dawdaw nu kadotama. Kalimata dawdaw Sikim, teway nafagbulun mauri sat ariyan. Kanya fag ngay baguwama nu gamatangan, Sikim nafagbulun sat ariyan, kata wa nafauri Akub talanan fagayu. Sikim at nafagbulun, mason dawdaw nu mauri. Ay Akub at ngay baguwama nu nasaful wa at kin-gurungan, guli wa sat bale.

Ay Akub ngay baguwama nu ndasug wa sat bale, Sikim talame indasug yangay sanya. 8Ay Sikim tama glong sas Akub te, “Sama, ku baguwama gyay wa dawdaw am baguyna. Ay go tain ayu ay amatanganan? Go gfadaduwa watam tam duwena? 9Nu nafadaduwa tuwa tam, siginan ban ginanya, igfodfonan watam tam ngay baguyna. Nu am at ke baguwama, ay ami at ke baguyna, igfon tuwami ayu. Ay nu ami at ke baguwama, ay am at ke baguyna, igfon yangay am emi ay unga. 10Ay nu katanya tuwa tam fagbulun, di ban e fanlonganan nu gbanwan am ste si em talun. Dewas nganday nu gbanwan am, kaumsig tuwami. Ay dewa bans nganday nu an am gadgalinan ste si em talun, masine tuwa. Ay dewa ban am umbalan dawdaw ste si em talun, di ami kalimata. At mafanud, taguna ngani nanfadaduwa tam tam duwena.” Katanya Sikim tama at longan sas Akub talamian.

11Ay Sikim e fagalongun yadi, at tama nu ntabu wan nu gelongan. Sikim glong yay te, “Nu maning tuwam ku fakaumsigun, mon kyangay ayu dewas nge wain ay fakaumsigun. 12Dewa ku fansali ay baguyna, ay dewa ku famaumsiganan ayu, nus nge wain ngani, eti wa sa angku. Faayui tuwa ay fagetun. Ay igfon kwa fiya ayu. Ku fagyadungugun siginan ayu, ay elongan way te, kaumsig tuwam nu mdaduwa aw sa ay baguyna.”

13Ay roro Akub ngay baguwama kaduge gugat gdungugan talame nu gelongan, kadotama way dawdaw sat amatanganan, teway Sikim nafagbulun sat ariyan mauri dawdaw. Ay nu katanya, nu gbalus talame, igfanluk way. 14Glong te, “Yaya, ami ngap, wami mafalong te, ‘Kin, fadaduwa watam tam duwena.’ Teway at fanlonganan, am wam nafatuli kata emi. Ay kafurat way ami gfadaduwa em ariyan sa sik mangama at yud matulian. 15Ay fagayu mangama si ay fulan nu nafatuli di, kin, anggan ami kaumsig wa long ami, satu ro. 16Dewa long ban tam gfadaduwa tam duwena, ay dewa ban tam igbanwan maful, itam fag duwak fulan, ay dewa ban tam sadik fulan, kaumsig tuwami, nu nafatuli tuwam kata emi. Ay dewa ban tam gfodfonan tam ngay baguyna, satu long ro kanya masine tuwa sa emi. 17Ay katsi ngap yaya, way am igfatuli, anway ngap ami nantaban em fadugsay siginan am bale. Ay nu nafataban tuwami, lumo wami ngani ste ginan, siginan ay day fulan.”

18Ay talame nu gdungugan wa gugat Akub ngay baguwama nu gelongan, kaumsig tuwa nanfaning. 19Ay nu katanya, talame gasubuwan wa nanfasulitanan at ngay ibama, teway at baguwama mason nu kaumsig Dina. Ay sanya mangaro sis Kamur fag talanan, taglabi tiba sisiyan nu madaragang, Sikim wan.

20Ay rodi ataw, Sikim talame indasug wa sas tigyangan fulan. Sanya e sik sakbawan daul, ay sanya tibama nu maful. Ay talame kamansulit wa sat ngay ibama te, 21“Nu glag ami ay nu gdungug ami, Akub fag fulan kagup wa bangan antam. Nu katanya, glong ami ayu te, lag tam gsalag, kanya fag ngay taw nu gbanwan maful ste si antam. Ay nu gadgalinan nus nganday at fakaumsigun ste si tam talun, dangay gsalag. Teway tam talun igbiya tuwa. Kasakan tuwa antam fag duwak fulan. Ay bandi ban, itam fag duwak fulan, igfodfonan tuwa tam tam ngay baguyna.

22“Ay nu gdungug ami, Akub fag fulan kaumsig tuwa katanya. Kaumsig tuwa igbanwan maful antam. Ay kaumsig yangay nu antam umsadi. At fagetun anway te, fagayu tam nangus mangama si antam fag fulan, ani tuwa fatulii. Fakatanyaun unu at fagetun, kanya fag fulan, fagayu nu sik ama yap ngay, matulian tuwa. 23Ay ami nu gamatangan ami, masine wan dewa tam maning, teway nu nafaning tuwa tam at fagetun, antam wa ban at fagmabalanun ayuwayu. At ngay balan ayuwayu, antam wa ban, nu antuwa tam maning at fagetun. Nu katanya, ami nu gamatangan ami, maning watam, laman kanya fag ngay taw gbanwan wa ban maful antam.” Katanya, Sikim talame nu kamansulit at naloan sas Akub.

24Ay sanya fag ngay mangama at maful sis ke sakbawan nu nadungug, kaumsig tuwa at ngay longan. Nu katanya, kanya fag fulan nafaning wa fiya Akub ngay baguwama at fakaumsigun. Nafatuli wan fagayu. Nu sik ama yap ngay, nafatuli wan.

25Ay roro nut si was fatuluk menit nu matulian, Simyun ay Lebi, Dina at fadugsay, nabul at fiso, fafud anya. Ay nasakbo sasad fulan. Ay nabasing way sigad sanya fag fulan at ngay mangama. Ay sanya at ngay mangama wa kalong natagak, te Akub baguwama nanfabarangyan mangaro. Famamut ya te, kasait yay at fagtulian. Ay nu katanya, kanya fag dugsay nafate wan, fagayu at mangama sanya fag fulan mandi. 26Anggan at fun Kamur, inkate wan, anggan at baguwama Sikim. Ay kanya fag dugsay nu nafate wan fagayu at mangama sanya, nalo sas Sikim bale ay nataban wan at ariyan Dina. Ay nafauli wan.

27-29Ay Akub baguwama tiba nalo yangay sanya fag fulan. Ay manlag di, sanya at ngay mangama matean wa ayuwayu. Ay nu katanya, Akub ngay baguwama nabul wan fagayu at naumsigan sanya sad fulan ay sas day fulan. Ay nataban wan at ngay mangena ay at ngay sisiyan ay at ngay balan. Ay nalo wan. Fakatanyaun at nafagbulun, inlimata dawdaw sanya fag fulan taw at nafagbulun sat ariyan.

30Ay Akub nu nasaful at ngay baguwama fagbulun, igbaya. Glong te, “Sek, nu katanya way long ay fagbulun, igfatakan way am dawdaw angku. Teway ste fag talun at ngay taw dan umlimata wa antam. Taw Kanaan ay taw Peres umlimata wa long antam. Ay tumarabangan wa ban igfabarangyan antam. Ay itam fag fulan wa tam ay ngayu, fagayu long ban tam umkate watam.”

31Ay at dugsay Simyun ay Lebi igbalus at tama te, “Sek, teway em fangalimata wan kanya fag Sikim. Ka fag Sikim nu gfasad, mafasali way em ariyan at bilug.”

Currently Selected:

Fagsigadan 34: TAWEAST

Highlight

Copy