Fagsigadan 27

Isaak nu Gdarangin Akub Laman Diyus Tumarabang ban Anya

1Bandi, Isaak anwa dawdaw mafufuwama. Katvngvdan nu kafufuwama, wa bangan glag. Ay nu katanya wan, nasugu tiba te, “Fastei ku turungana, Isaw.” Ay nu sanya wan at baguwama, at tama glong te, “Sama.”

At baguwama glong te, “Taw ro?”

2“Sama katsi, mafufuwama kwa dawdaw. Nu katanya, makbang wa siring nu kate aw. 3-4Ay ku fakaumsigun, bagu aw mkate, an akyay dumarangin emu, laman nus nga setaw Diyus at nafatuyanan ebi sa am fufuwama Abrayam, katanya yangay ban anggan si emu. Ay bagu aw dumarangin emu, katsi nanbul yap o am busuy. Ay lakloi yap. Nan-gamat o mangimut mela. Ay nu nafagamat tuwo, ubai sas bale. Ay fatamai, kata ku nayayuman fiya fiya. Ay nu nafatama wo, fosuki angku laman umon aw. Ay nu nafangon kwan, dumarangin kwa long emu, laman nus nga setaw Diyus at nafatuyanan ebi sa am fufuwama, katanya yangay ban anggan si emu.” Katanya Isaak at longan sat turungana.

5Ay Isaw nalaklo wan. Nansarap wa fiya mangimut. Ay roro mangaro aro taw, kaduge gugat talame gsulitanan, at tina gdungugan wan at tama fasadanan fagayu sat baguwama Isaw. 6Ay at tina nafamansulit sat baguwama Akub te, “Aro, nadungug aw am mama nu glong sam kaka te, 7‘Lakloi yap. Nansarapi mangimut. Ay nu e nafagamat tuwo, fatamai. Ay fosuki angku stiye laman umon aw. Ay nu ntabu wa nu kon aw, dumarangin aw emu sis Diyus at daga salubangan, laman nus nga setaw Diyus at nafatuyanan sa am fufuwama, katanya yangay ban anggan si emu.’ Katanya ku nadungug, am mama longan sa am kaka. Bagu mkate, dumarangin unu am kaka.”

8Ay at tina nu nafamansulit wa at nadungug, nasugu at baguwama Akub te, “Sama, katsi dungugani ku longan emu. Ay faningi. 9Nanlo wo sa tam ngay balan. Buli duwak kambing riyangan at masine dawdaw. Nanfatama aw. Nanfayayum aw kata am mama nayayuman fag fakonun. 10Ay nu ntama wan, oi at nanfosuk sa am mama, laman ro am mama umon. Ay nu ntabu wan, dumarangin wemu. Ay nus nga setaw Diyus at nafatuyanan ebi sa am fufuwama, katanya yangay ban anggan si emu.” Katanya at tina suguwan sat baguwama.

11Ay at baguwama Akub gbalus at tina te, “E yaya, mina. Teway ku kaka at bilug igsigyuwan tuwa dawdaw. Ay angku ku sigyu wa ngaba. 12Ay labon ku mama yumayus yay ku bilug, ay sumaful wa te, ‘Tuy bunwa ku baguwama at turungana. Tibak taw way siring, gfanluk angku.’ Ay nu katanya, ku mama wa long ro dumarangin angku te, laman Diyus tumarabang tuwa angku. Fangkabat dumarangin way te, laman Diyus gfauri wa angku.”

13Ay at tina nu nadungug at baguwama longan, gbalus at baguwama te, “E yaya, lag kalimu. Am mama ro galay nadarangin katanya, te Diyus faurii wemu, sai yakman nangus angku nu kagurungan, kanya fag faurianan. Ay katsi ngani, fangkabat faningi wa ku longan. Loi wan. Nanbul way o duwak kambing riyangan.”

14Ay Akub nafaning wa fiya at tina longan. Nalo wa fiya sa at ngay balan. Ay nabul duwak kambing riyangan. Ay nafosuk at tina. Ay at tina igfatama wan. Gfayayum kata at mangama nayayuman ebi ginan. Ay gfatama yangay tinafay. 15Ay nu ntama wan, at tina nananbul yay at Isaw balukas sat sandigan. Nafabalukasan sas Akub. 16Ay nabul yangay aro fag duwak kambing at balat. Nasiyuk sas Akub take ay sa at liyug fagmalanuwan. 17Ay nu katanya wan, at tina nafon wa sas Akub at fataman, ay anggan at ba tinafay. 18Ay Akub long nanfosuk wa sat tama.

Ay Akub nu ndasug wa sat ke tama, glong te, “Mama!” Ay at tama gbalus te, “E, sama! Sinu o ku baguwama?”

19“Aw wan am baguwama at turungana, Isaw. Ay nafafaning kwan am suguwan angku fagayu. Katsi alunggungi wan. Oni wa ku nafatama fag fakonun, laman nu naon wo, dumarangin wo angku kata am longan aro.”

20At tama gaylatan te, “E, tain tuwa daw nu an o mafagamat mafali am ba mangimut? Madyay katsi iste wo gugat.”

At baguwama gbalus te, “Teway am fagsegan fag Diyus natarabang angku laman fagamat aw.”

21Ay at tama glong te, “E idya, ku baguwama, akbangi yap angku. Yumayus kyay emu, laman umtuyan aw te, go o wa fiya ku baguwama Isaw.”

22At baguwama inkakbang wa fiya. Ay at tama kaduge gyayus, gelonganan te, “Nu gelongan o, Akub way nangus. Ay am take long nu kayayus, muwag, Isaw wo fiya.” 23Roro mangaro, at tina nasiyuk way kambing balat sis Akub take. Ay nu kayayus, gsigyuwan, kata at kaka take nu gsigyuwan. Ay nu katanya, at tama nalukan wa te, “Kin, ku turungana wa siring fiya.”

Ay nu katanya, at tama gadaranginun wan at baguwama. 24Ay dewa katanya, ginto yay te, “Sama, go o wa fiya ku baguwama Isaw?”

At baguwama gbalus te, “Kin, aw wa fiya.”

25At tama nu nadungug katanya, glong te, “Ay inday wan am ba fakonun? Fastei wan. Nanfangon kwan, laman dumarangin kwemu. Ay nu katanya wan, nus nga setaw Diyus at nafatuyanan sa am fufuwama ebi, katanya yangay ban anggan si emu.” Ay Akub nafon wa fiya sat tama at ba fakonun. Ay at tama kon wa gugat. Ay Akub nafon yay sik mamam siginans ubas buwadan. Ay at tama nainum yangay kanya.

26Ay rodi at tama glong te, “Katsi, o ku baguwama, akbangi yap angku stiye. Ay ayuki ku fingi.” 27At baguwama nafaning wa fiya. Naayuk wa fiya at tama. Ay kadugenya, at tama naayuk Isaw balukas.

Ay Isaak gdarangin wat baguwama. Gdarangin te, “Tuy ku baguwama nu kaayuk, kamabebanglu sik ngay tanum sas Diyus nafarabung fag ngay lungud. 28Ay gdarangin aw emu te, laman tam Yawi gfamoyan tuwa ban sa am talun. Ay gfataba tuwa am daga. Ay laman kayu ginan o gani, ngayu tuwa takabul buwadan sanya ginan. Ay anggan at ubas mamam, gbiya tuwa nu kafabul siginan am tanuman ubas.

29“Ay gdarangin kyangay te, laman at ngay fulan taw sam ngaba dayu, gfaning tuwa am longan. Ay o tuwa ban tagmagurang. Anggan am iba sisiyan, katanya yangay, laman gfaning tuwa am nalong. Ay o tuwa ban tagmagurang am iba sisiyan.

“Ay ku darangin yay at sadi te, galay sik taw tumarabang emu, Diyus nangus tumarabang yangay ka fag taw. Ay ate, taw galay gdarangin te laman umfauri o, takafauri nangus bunwa o. Kanya way fag taw.”

30Ay at tama nu ntabu wa nu gdarangin, Akub nalaklo wan. Ay rodi daw tv, at kaka kadasug yangay, siginan at fagnangayonan mangimut. 31Ay gfatama wan at nafagamat. Ay gfayayum yangay kata ebi ginan at tama nayayuman. Ay nu ntama wan, nanfosuk sat tama. Glong te, “Mama, alunggungi wan. Fangoni wan. Tuy wan ku ba fakonun. Laman nu ntabu wa nu gfangon o, dumarangin o angku kata am longan.”

32Ay at tama nu nadungug at baguwama nu gelongan, ginto te, “E, sinu yay o?” At baguwama gbalus te, “Aw wan am turungana. Aw wan Isaw.”

33At tama nu nadungug katanya, kudkulugan dawdaw. Ginto te, “Ay sinu way sangay aro at nananfosuk angku sik ngay fakonun? Nafagamat unu at mangimut ay nafosuk angku stiye. Teway fakatanyaun, naon kwan, at ba fakonun. Ay anggan nadarangin kwa anya. Ay kanya ku darangin kwa mafafabali. Katanya wan.”

34At baguwama nu nadungug at tama nu gelonganan, kanya kabalu dawdaw. Ay gfadaul wa dawdaw guyway. Kadugenya glong te, “Mama, darangini yap long anggan sa angku.”

35Ay at tama gbalus at baguwama te, “Yaya, am ariyan mangaro nafanluk way angku. Kanya way mangaro at kinkakbang angku aro. Ay nadarangin kwa anya. Sa wa ban anya nu kagurungan, Diyus ngay nafatuyanan.”

36Ay Isaw glong sat tama te, “Sek, ku ariyan nu gfagbulun, kata wa ngaro fiya fiya at ngayan.#27:36 Isaw at fagnalongun te, “ku ariyan nu gfagbulun, kata wa ngaro fiya fiya at ngayan,” teway at ariyan ngayan at masuwad, sik tagfanluk. Tuy at faduwa ginan wan ku ariyan nu gfanluk angku. Ebi, nafabul wan ku fakaturunganaun. Ay katsi, naago wa angku am ngay darangin at masine.”

Ay Isaw get te, “Mama, go sangay fagayu at masine am darangin, nafamin wo sa ku ariyan? Go wo e fasawadan nus di sirut sa angku? Satu nu e sawad di, get aw emu te, kanya darangini yap sa angku.”

37Ay at tama gbalus te, “Nus tuwa, nadarangin kwa am ariyan te, laman kanya wa ban tagmagurang emu. At ngay fadugsay gafanuguwanan wa ban anya. Ay nadarangin kyangay te, laman ban kayu ginan am ariyan gani, ngayu tuwa takabul buwadan. Ay anggan at ubas mamam, gbiya tuwa nu kafabul siginan at tanuman ubas. Nu katanya, nu gamatangan aw, katsi we sawad masine ku fagdaranginun emu.”

38Ay Isaw get at tama te, “Go sangay kayunya wan, mama, am fagadaranginun at masine? Nu e sawad di dewa ro sirut, kanya ro angku.” Ay nu nalong katanya, Isaw nauyway wa dawdaw.

39At tama gbalus te, “Yaya ngap, sama, namin wan. Katsi ban ngap, emu am fagbanwanan, sa way sik daga at yud bangan gfangatugbung ay at yud bangan e moyan. 40Ay emu ban am ngay fufu sat dagat daga, sik ngay takamabarangyan way ban. Ay kanya ban gafanuguwanan way am ariyan at ngay fufu. Ay roro dewa katanya, bandi ban am ngay fufu sat dagat daga kamabo way. Ay nu katanya, umtuwas wa ban, am ariyan at ngay fufu sat dagat daga nu gfanuguwanan emu am ngay fufu. At masuwad, di ban faggugat.” Katanya Isaak at longan sat baguwama Isaw.

Akub nu Glagyu at Kaka

41Siginan ginanya, Isaw kalimata dawdaw at ariyan, teway at ariyan at nafabul at tama darangin at masine. Isaw gamatangan te, “Dewa katanya ku ariyan nafagbulun sa angku, katsi ban tv sik menit gina ku mama inkate, gfate kyangay ku ariyan.”

42Ay roro mangaro, at tina nasaful wa at turungana fasadan. Ay nasugu sik taw te, “Fastei ku baguwama Akub.” Ay Akub nu sanya wan, at tina nafoyung te, “Katsi am kaka gananfateun wa emu. Nanfafoli unu sa emu am nafagbulun ebi sa anya. 43Nu katanya, loi wan ste ginan. Lagyui wan. Nangadasugi wa sa ku fadugsay Laban at bale, sas fulan Karan. 44Sanya yap nu gbanwan o. Famanyani yap am kaka amatanganan nu kalukme. 45Ay am kaka amatanganan nu kalyaman tuwa ban, gfasaful kyay emu. Sumugu aw sik taw sanya laman ban nanfoyung emu ay nantaban emu stiye, laman ste yangay nu gbanwan ban o. Ay katsi glong aw te, loi wa fiya ste ginan. Am kaka fate wa fiya emu. Ay nu nafate way emu, rodi ataw tibak taw fate yangay am kaka. Nu katanya, aw ro si ay guyan, kabalu kway ayu ku dugsay.” Katanya Ribika at suguwan sat baguwama Akub.

46Ay Akub bagu lumo, Ribika glong sat mangama te, “Sek, ta nugang fag duwak taw Kit igfatakan dawdaw angku. Kwa kaumsig ta baguwama Akub at mangena ban nu ste yangay fag ngay taw Kit at baguyna. Teway nu kanya way ban ta Akub mangena, aw ngap kate akwan, at masine sa angku. Kalimata kway dawdaw glag.”

Currently Selected:

Fagsigadan 27: TAWEAST

Highlight

Copy