Fagsigadan 26

Abrayam Dewa Nkate, Diyus Gtarabang tuwa gugat Isaak

1Sayginan, inke fanlunus sanya fag talun, sis Isaak fagbanwanan, kata ebi at tama Abrayam nadalan. Nu katanya, Isaak naalin yay sas sik fulan at ngayan Girar, sas taw Filistiyu at talun. Ay sanya fag taw Filistiyu at fun, Abimilik.

2-3Ay Isaak nu gbanwan wa gugat sanyas Girar, Yawi insure sa anya. Ay glong te, “Isaak, fatunglusi yap banwani iste. Lag galin sas talun Iptu. Aw wan tagfoyung emu at masine am fagbanwanan. Lag gafanawa, teway gufud aktuwa emu ay gtarabang aktuwa emu. Ay sa tuwa ban am ngay fufu sat dagat daga nu gfon aw ste fag ngay talun. Ay gfagurungan kwa ban sa emu fagayu ku ngay nafatuyanan ebi sa am mama. 4Gfaayu aw am ngay fufu sat dagat daga kayus galeme sas banwa. Ay ste ban fag ngay talun, sa tuwa am ngay fufu nu gfon aw. Ay am fufu wa ban sat dagat daga tagfadasug ku fanarabangun sas fagayu taw. 5Fakatanyaun ku longan, te gfagurungan akwa fiya fagayu ku nafatuyanan sa am mama, teway am mama nadungugan tuwa ku ngay longan ay nafaning ku ngay suguwan.”

6Ay Isaak nu nadungug wan Yawi at longan, gfaning tuwa. Igfatunglus yay nu gbanwan sanya sis fulan Girar.

7Ay sanya fag fulan, at ngay mangama ginto sas Isaak te, “Sinu kanya am ufud fag mangena?” Ay Isaak kalimu way gfoyung, teway gamatangan te, sanya fag ngay mangama mafate anya, laman fabul at mangena, teway at mangena masine dawdaw. Ay nu katanya, Isaak gbalus way tiba te, “E, kanya ngaro fag mangena ku ariyan way.”

8Ay Isaak nu glugo wan nu gbanwan sanya fag fulan, sayginan, Abimilik kamantayan. Ay nalag Isaak nu ggafus at mangena. 9Ay nu nalag wan, Abimilik nasugu tiba te, “Fastei Isaak.” Ay Isaak nu sanya wan, Abimilik glong te, “Taw fakatanyaun am nafagbulun sa emi? Am longan, kanya am ariyan way. Ay roro am mangena wan.” Ay Isaak gbalus te, “Teway, kalimu aw te, ste ro at ngay taw gfate way angku.”

10Ay Abimilik nalong te, “Sek, wa long namasine katanya am elongan. Dalagvn di e natsa am mangena, dewa o glong te am ariyan way. Satu long ro ami at sadi nu natsa way ami am mangena, gfangasalanan way ami, teway kamuwagan way o ay nu gelongan o.” 11Ay Abimilik nu nasaful te, kanya sik daduwa wa mangaro, nalong sat fagmagurangun fag ngay taw te, “Nus nga sinu at magbulun mauri ste fag daduwa, e fate wa anya.”

Isaak Dewa Gafalingunan, Diyus Gtarabang tuwa gugat Anya

12Ay Isaak kaduge gbanwan sanyas fulan Giral, gfasigad wa gtanum. Ay Diyus igfamanyun sa anya. Gfatugbung ay gfaayu at buwadan. Ay ginanya fag banwa, Isaak naani, ngayu dawdaw. Galay at natanum ebi sik saku, bandi at naani, 100k saku tuwa. 13Nu katanya long, Isaak kabalan wa dawdaw. Kaayu wa gugat gugat at fagmabalanun. 14Ay bandi, Isaak fanuguwan ngayu wan. Anggan at ngay tupa ay at ngay kambing ay at ngay baka ngayu wan, teway Diyus nafamanyun anya. Ay roro at ngay taw dan sanya, at ngay taw Filistiyu, galabian wan. 15Nu katanya, anwa nanfatakan Isaak. Naaut daga. Ay nafaut at ngay fagfanaguban ayuwayu, laman we kabul mamam. Kanya fag ngay fagfanaguban, ebi yay at tama Abrayam ngay fanuguwan naawat.

16Ay kadugenya, Abimilik nasugu Isaak te, “Katsi am, loi wan ste ginan, siginan em fulan. Wami maabanwan maful emu, teway glabi way o dawdaw emi nu mabalan o.”

17Ay nu katanya, Isaak fag fulan naalin wan. Nalo wa sa sik liskung. Girar yangay at ngayan. Sanya wan nu gbanwan. 18Ay ebi ataw, sanya fag liskung, at tama Abrayam at ngay fanuguwan e naali wa sik ngay fagfanaguban. Ay roro Abrayam nu nkate wan, taw Filistiyu nafapnu wa daga sanya fag ngay fagfanaguban. Ay we kabul mamam. Ay Isaak fag fulan nu gbanwan wa sanya fag liskung, naadkad yay fiya ka fag ngay ba daga siginan sad fagfanaguban. Ay bandi ataw, e ngay fagfanaguban yangay sanya. Ay Isaak fag fulan nu nafafasine wa kanya fag ngay fagfanaguban, nafe ngayan tuwa. Nus nga setaw at tama nafangayan ebi ataw, katanya yay gugat anggan Isaak nu gngayan sanya fag ngay fagfanaguban.

19Bandi, Isaak nu gbanwan wa gugat sis liskung Giral, at ngay fanuguwan nangali wa sik bagu fag fagfanaguban. Ay at ngay fanuguwan nu kali wa gugat, at alian insagbat sa sik mata bulbug. Ay inke mamam wa long masine siginant fakalian. 20Ay roro at fanlonganan, sanya at taw dan mangaro fag ngay tagtanud balan igfaaringangan way Isaak at ngay tagtanud balan. Glong te, “Kanya fag mata bulbug ami way tagbilug. Bunwa am. Emi wadi.” Ay inke aringangan wayay sanya sis ke fagfanaguban, bandi ataw Isaak nafangayan sanya fag ke fagfanaguban te, Isik.#26:20 Sis Fangebriyu, galay glong te, Isik, at masuwad, garingangan.

21Ay Isaak at fanuguwan nu nabilugan wan, gdog yangay kali sat dayu. Sadik fagfanaguban yangay. Ay kata yangay ebi ataw. Taw dan gfaaringangan yangay. Ay nu katanya, Isaak nafangayan sanya fag fagfanaguban te, Sitna.#26:21 Sis Fangebriyu, galay glong te, Sitna, at masuwad, kalimata.

22Ay bandi ataw, Isaak fag fulan naalin wan. Sa was tibak lungud talun. Sanya sat fagalinan, Isaak fag fulan naali yay sik fagfanaguban. Ay nu nafaali wan, Isaak nafangayan te, Rikubut.#26:22 Sis Fangebriyu, galay glong te, Rikubut, at masuwad, sik lungud talun yud mafutuk. Fakatanyaun nu gfangayan, Isaak nalong te, “Katsi long tam Yawi nafon antam sik lungud talun at yud mafutuk, tam fagbanwanan. Ay katsi long ban, umkayu wa long ban tam dawdaw. Anggan tam ngay fagekwaun umkayu wan.”

23Ay bandi, Isaak fag fulan naalin yangay. Nalo wa sa sik lungud talun at ngayan Beerseba. Sanya wa nu gbanwan. 24Ay gina ndasug sas Beerseba, rodi ataw sad yabi, Yawi nsure sas Isaak. Ay glong te, “Isaak. Aw wan am mama fagsegan. Nu katanya, lag kalimu. Aw wan tagufud emu faggugat. Aw yangay tagtarabang ban emu sam ngaba banwanan. Ay tagfaayu am ngay fufu sat dagat daga, aw yangay. Fakatanyaun ku fagbulun sa emu, teway katanya ebi ku nafatuyanan sa am mama, ku fanuguwan.” 25Ay Isaak nu nadungug Yawi at longan, naawat sik fagbatasan sanya. Nabul sik ngay batu. Nafataladan, ay tiba, nafatudtungudan. Ay sanyat tungud nu gbatas at famanyun sas Yawi. Fakatanyaun at fagbulun, Isaak igfauseganan Yawi. Ay Isaak naawat yangay at bale sanya sis akbang fagbatasan. Ay kadugenya, at ngay fanuguwan kawat yangay sik alian bagu, at fagfanaguban.

Isaak ay Abimilik nu Gfasine at Fagmasadiun

26Ay bandi sik menit, Abimilik nalo wan siginan at fulan Girar. Gfaygaluwan at fatarabangan at ngayan Akusat ay at fun sundalu Fikul. Kanya fag tuluk ama naaygaluwanan wan nalo. Nanlag Isaak.

27Ay ka fag tuluk ama nu ndasug wa sas Isaak, Isaak ginto te, “Taw ro ay fagstiyeun yay? Ay sadaw ebi inlimata wam angku, madyay nafalo wam emi siginan ay fulan.”

28-29Ay kanya fag tuluk ama gbalus Isaak te, “Katsi intuyan wami te, am Yawi gufud wa fiya emu, ay gtarabang wa fiya emu. Nu katanya, namatangan ami te, masine tuwa siring nu antam umke fatuyanan matvngvd, laman masine tuwa tam fagmasadiun, nu gbanwan tam. Ebi ngani, nu namatang tuwo, gina o gugat maful gbanwan si emi, sa em fulan, di ami gfagbulun mauri sa emu. Ay anggan bandi gina am iglo siginan em fulan, di ami nafaaringangan emu. Masine tuwa em fagbulun sa emu. Ay em fagnaloun stiye, an ami nanget emu te, fatuyanani nangus sa emi te, anggan ban si emu am fagbulun sa emi, masine yangay, kata tuwa em nafagbulun sa emu ebi.”

30Ay Isaak nu nadungug Abimilik fagetun, kanya nafamasadan sik ngay fakonun ayuwayu, ay anggan sik ngay fanginum. Ay fagayu gasfuwan gfangon ay ginum. 31Ay balabag di sad surip, kanya gasfuwan yangay kawat at fatuyanan. Ay nu ntabu wan nu kawat at fatuyanan, Abimilik fag fulan nauli wan. Siginan ginanya e fagmasadiun wan, kanya Isaak ay Abimilik fag fulan.

32Ay rodi, Abimilik fag fulan nu nauli wan, Isaak at ngay fanuguwan kadasug wan siginan at fagnangalian at fagfanaguban. Ay glong sas Isaak te, “Katsi long, e mamam wan, sa em fakalian. E fagfanaguban watam.” 33Ay nu katanya, Isaak nafangayan kanya fag fagfanaguban te, Seba.#26:33 Sis Fangebriyu, galay glong te, Seba, at masuwad, fatuyanan. Ay bandi ataw nu nke fulan wan sanya fag lungud, at ngay taw nu gngayan ka fag fulan, Beerseba. Anggan katsi, kanya fag fulan at ngayan, Beerseba yay.

Isaw nu Gfanmangena

34Isaak baguwama at sadi, Isaw. Ay Isaw at banwa nu anwa 40, kanya nafanmangena duwa. At ba mangena, siginan ways taw Kit. Bunwa siginan at kalongan fag ngay taw. At sadi at ngayan, Udit. Ay at tama, Beri. Ay at sadi at ngayan, Basimat. At tama, Ilun. 35Ay roro kanya fag duwena at ugali mauri way. Nu katanya, Isaw magurang gabiyatan dawdaw sat amatanganan sanya baliwa fag duwak mangena.

Currently Selected:

Fagsigadan 26: TAWEAST

Highlight

Copy